Մենք իրավունք չունենք չօգտագործել իմպիչմենտի գործիքը. Ագնեսա Խամոյան

Արթուր Վանեցյանը նպատակահարմար է գտել այս փուլում մանդատը վայր դնել, ինչն իր որոշումն է, բայց կարևոր եմ համարում ընդգծել, որ Վանեցյանը ևս արձանագրեց, որ բոլորիս նպատակը մեկն է՝ հասնել այս իշխանության հեռացմանը։ Այս մասին «News.am»-ի հետ զրույցում ասել է ԱԺ «Հայաստան» խմբակցության անդամ Ագնեսա Խամոյանն՝ անդրադառնալով «Պատիվ ունեմ» խմբակցության ղեկավար Արթուր Վանեցյանի մանդատից հրաժարվելու հայտարարությանը։

Արթուր Վանեցյանը մանդատից հրաժարվել է, որովհետև ըստ նրա՝ քաղաքացիները իրենց քվե էին տվել այս իշխանությունների կործանարար գործունեությունը կասեցնելու և երկիրն աղետից դուրս բերելու համար, բայց այս խորհրդարանը դադարել է լինել նպատակին հասնելու արդյունավետ հարթակ։

«Խորհրդարանի գործունեության մասին դեռ խորհրդարանում եղած ժամանակ ավելի կոշտ ձևակերպումներ ենք տվել, դրանից հետո մեր գնահատականներում այս խորհրդարանի իշխանական հատվածի որակի մասին ոչինչ չի փոխվել։ Ուզում եմ հիշեցնել, որ մենք ունենք մեկ գործիք, այն է՝ իմպիչմենտի պրոցես սկսել, և ես չեմ կարծում, որ մենք իրավունք ունենք այդ գործիքը չօգտագործել։

«Հայաստան» խմբակցության խորհրդարանական գործունեության մասով կարող եմ արձանագարել, որ այս պահին բոլոր պրոցեսները փողոցում են, խորհրդարան վերադարձը պայմանավորված է բացառապես մեր օրակարգով, ինչպես օրինակ, վերջերս արտահերթ նիստ նախաձեռնեցինք, որին սակայն ՔՊ-ական պատգամավորները չեկան։ Կարծում եմ՝ այս շարժման մեջ որևէ մեկը գերի չէ այդ մանդատին»,- հավելել է Ագնեսա Խամոյանը։