Արդյոք հայ զինվորներին ադրբեջանցիները ստուգո՞ւմ են. ՊՆ-ի պատասխանը

Մենք գրել էինք, որ համացանցում տարբեր գործիչներ վկայություններ են տալիս, որ Սյունիքի մարզի Սև լճի տարածքում կան հայկական դիրքեր, որտեղ բարձրանալիս հայ զինվորներին ստուգում են ադրբեջանցի զինված ծառայողները: Այս մասին հրապարակային հայտարարություններ են արել հանրային գործիչներ Արթուր Համբարձումյանն ու Ավետիք Քերոբյանը: 

Քերոբյանը մասնավորապես հայտարարել է. « «Ադրբեջանցի սահմանապահները հայկական սուվերեն տարածքում ստուգում են հայ զինվորներին մարտական հերթափոխի ժամանակ։ Ավելին՝ 2 հատ պահեստատուփից և 2 օրվա սննդից ավելի չեն թողնում։ Փաստացի այդ հենակետի/երի զինվորները պատանդ են և չեն կարողանում դուրս գալ, վերջիններիս պարտադիր ինչ-որ մեկը պետք է փոխարինի։ Խնդրի մասին տեղյակ է ՊՆ-ն և ոչինչ փաստացի չի ձեռնարկում»,- հայտարարել է ռազմական փորձագետ Ավետիք Քերոբյանը: 

«News.5tv.am»-ը պաշտոնական գրավոր հարցում էր ուղարկել ՊՆ՝ հարցնելով.

1. Արդյոք գրառման մեջ նկարագրած իրավիճակը, մասնավորապես, որ ադրբեջանցի զինծառայողները ստուգում են հայ զինծառայողներին, համապատասխանո՞ւմ է իրականությանը:

2․ Պաշտպանության նախարարությունը տեղյա՞կ է նման խնդրի, եթե այո, ապա ինչպե՞ս է պատրաստվում լուծել այն:

Պաշտպանության նախարարությունից, սակայն, այս պարզ հարցերին չէին պատասխանել, փոխարենը մեկամսյա ժամկետ են խնդրել: 

ՊՆ-ի պատասխանը այնուամենայնիվ ստացել ենք. հարցերին հստակ պատասխան տալու փոխարեն նախարարության գլխավոր քարտուղար Համլետ Բատիկյանը ուղարկել է հետևյալ տեքստը. «Պաշտպանության նախարարության համապատասխան ստորաբաժանումը մշտադիտարկում է մամուլի և սոցցանցերի հրապարակումները, դրանց արձագանքում ըստ անհրաժեշտության:

Հայտնում ենք նաև, որ ՀՀ զինված ուժերի ստորաբաժանումները հերթափախերն իրականացնում են բնականոն»: