Ներգնա տուրիզմը Հայաստանում ակտիվացել է. որքա՞ն գումար է հարկավոր մեր երկրում հանգստի համար

Այն, որ Հայաստանում արտագնա տուրիզմը բավականին զարգացել է, կասկած չկա, սակայն հաճելի է դրան զուգահեռ դրական դինամիկա նկատել նաև ներգնա տուրիզմի ոլորտում։

ArmDaily.am-ը ներգնա տուրիզմի զարգացման, սպասարակման ոլորտում տիրող իրավիճակի վերաբերյալ զրուցել է Տուրիզմի հայկական ֆեդերացիայի (ՏՀՖ) նախագահ Մեխակ Ապրեսյանի հետ, նաև ուսումնասիրել է, թե հայաստանյան հանգստյան գոտիներն ու հյուրանոցներն այս տարի ինչ առաջարկներով են հանդես գալիս։

Ըստ Ապրեսյանի, համաձայն նախորդ տարվա և այս տարվա առաջին եռամսյակի ցուցանիշների, ներքին տուրիզմը մեծ թափով զարգանում է, Հայաստանում հանգստացողների թիվն էականորեն ավելացել է։ «2021 թվականի և այս տարվա առաջին եռամյակի ցուցանիշներով ներքին տուրիզմը բավականին ակտիվացել է ու այդպես էլ պետք է լիներ։ Եթե հիշում եք, կորոնավիրուսային համավարակով պայմանավորված խիստ կարանտինային սահմանափակումների վերացումից հետո ընդհանուր ընկալում և ձգտում կար, որ զբոսաշրջության ոլորտի վերականագնումն սկսենք հենց ներքինից։ Կարելի է ասել՝ հետկորոնավիրուսային իրավիճակը, երբ երկրից դուրս գալը դեռևս որոշակիորեն սահմանափակված էր, նպաստեց ներգնա տուրիզմի վերականգմանն ու զարգացմանը»,- ընդգծեց Ապրեսյանը։

Մեր զրուցակցի խոսքով՝ բավականին հաճելի միտում է, երբ մենք ինքներս սկսել ենք մեր երկիրն ավելի շատ ճանաչել ու մեր հանգիստը հենց երկրի ներսում ենք կազմակերպում։ «Բավականին լավ ու դրական զարգացում է, որ այսօր արտագնա տուրզիմը չի կազմակերպվում ներգնա տուրիզմի հաշվին»,- նկատեց մեր բանախոսը։

Ապրեսյանն, անդրդառնալով Հայաստանում սպասարկման ոլորտում առկա իրավիճակին, մատնանշեց, որ ծառայությունների որակը բավականին լավացել է։ «Սպասարակման, ծառայությունների մատուցման ոլորտում իրավիճակը բավականին լավացել է, սակայն դա չի նշանակում, որ այլևս զարգացման, նոր կարգավորումների կարիք չկա։ Ամեն տարի մենք պետք է որակական առումով մեկ քայլով բարձրանանք, երբևէ չպետք է թուլանանք, որովհետև, եթե թուլանանք ու սպասարկման ոլոտին առաջնային նշանակություն չտանք, բացասական հետևանքներն իրենց սպասեցնել չեն տալու։ Մասնավոր հատվածում պետք է լինի բարձր գիտակցություն, բացի դրանից շատ կարևոր է, որ սպասակման, ծառայությունների մատուցման համար լինի պետական հստակ կարգավորումներ»,- ընդգծեց Ապրեսյանը։

Խոսելով ներգնա տուրզիմի պատասխանատուների կողմից վարվող գնային քաղաքականության մասին՝ մեր բանախոսը նշեց․ «Գնային քաղաքականությունը, ոչ միայն զբոսաշրջության ոլորտում, այլ նաև այլ ոլորտներում, փոփոխվել է՝ պայմանավորված համատարած գնաճով։ Ցավոք, զբոսաշրջության ոլորտում ևս գների որոշակի թանկացումներ կան, սակայն չենք կարող ասել, որ շատ շեշտակի են, սակայն ներգնա տուրիզմի համար այս թեկուզ փոքր-ինչ թանկացումը նպաստավոր չէ»։ Ինչ վերաբերում է հանգստյան գոտիների և հյուրանոցների առաջարկներին, պետք է նկատել, որ այս տարի գնաճ իսկապես նկատվել է»։

Ստորև կներկայացնենք մի շարք հանգստյան տների և հյուրանոցների ծառայություններն ու դրանց արժեքները։

Եվ այսպես,

Տավուշում հանգստանալու համար քաղաքացիները մեկ օրվա համար կարող են գտնել տարբեր գների հյուրանոցներ։

Օրինակ՝ «Լաստիվեր» ռեզորթում հանսգտանալու համար քաղաքացին մեկ օրվա համար պետք է վճարի 45.000 դրամից սկսած։ Սա ստանդարտ երկտեղանի սենյակի արժեքն է՝ նախաճաշի ներառմամբ։

Պետք է նշենք, որ ա շաբաթներին ամրագրման համար ստանդարտ սենյակներ գրեթե չկան։ «Ապագա» ռեզորթում ստանդարտ մեկ տեղանոց քոթեջի արժեքը սկսում է 26.500 դրամից, իսկ հյուղակների մեկ օրվա արժեքը սկսում է 14.000 դրամից։ Լոռու «Թեժ լեռ» ռեզորթում հանգստանալու համար մեկ գիշերվա համար պետք է նախատեսել առնվազն 33.000 դրամ՝ առանց նախաճաշի։ Տեղափոխվելով Աղվերան՝ պետք է նշենք, որ օրինակ «Աղվերան Արարատ» ռեզորթում, «Պարկ Աղվերան» ռեզորթում մեկ օր ստանդարտ մեկ տեղանոց սենյակում հանգստանալու համար քաղաքացիները պետք է վճարեն առնվազն 25.000 դրամ։ Ծաղկաձորի «Թեղենիս» հանգստյան գոտում մեկ օր հանգիստ կազմակերպելու համար առնվազն անհրաժեշտ է 34.000 դրամ։

Այս արժեքով կարելի է հանգստանալ բյուջետային քոթեջներում՝ կիրակից ուրբաթ օրերին, իսկ շաբաթ-կիրակի օրերին մեկ օրվա արժեքը կազմում է 38.000 դրամ։ «Էլեգանտ» հյուրանոցում էլ 1 օրվա հանգիստը կարժենա 30.000 դրամ՝ նախաճաշի ներառմամբ։

«Ջերմուկ» հյուրանոց-սպա կենտրոնում մեկ տեղանի համարի արժեքները սկսում են 30.000 դրամից,իսկ երկտեղանին՝ 35.000 դրամից։

Արժեքի մեջ ներառվում է նաև 3-անգամյա սնունդ։