Հրդեհ՝ Նորամարգ գյուղում. դեպքի վայր են մեկնել երկու մարտական հաշվարկ և մեկ ջրատար

Սեպտեմբերի 25-ին, ժամը 23:24-ին Արարատի մարզային ճգնաժամային կառավարման կենտրոն ահազանգ է ստացվել, որ հրդեհ է բռնկվել Նորամարգ գյուղի 17-րդ փողոցի տներից մեկի խորդանոցում:

Դեպքի վայր են մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատներից երկու մարտական հաշվարկ և մեկ ջրատար։

Պարզվել է, որ հրդեհը բռնկվել է գյուղի 17-րդ փողոցի տներից մեկի բակում գտնվող փայտե խորդանոցում և հարևան տան տանիքում։

Հրդեհը մեկուսացվել է սեպտեմբերի 26-ին, ժամը 00:04-ին, մարվել՝ 01:50-ին: Այրվել են տան տանիքի փայտե կառուցատարրերը (մոտ 10 քմ), խորդանոցը (մոտ 30 քմ) և մոտ 200 քմ խոտածածկույթ: