Լարված իրավիճակ՝ սահմանին. Բաքուն Գեղարքունիքում հարվածել է նաև ՌԴ ԱԴԾ մեքենային

Ժամը 18-ի դրությամբ՝ իրադրությունը հայ-ադրբեջանական սահմանին շարունակում էր լարված մնալ: Պաշտպանության նախարարությունն է հայտնել, որ Սոթքից Գորիս՝ ամբողջ սահմանագծով թշնամին վերսկսել է ինտենսիվ հրթիռակոծումն ու հրետակոծումը: Հարվածներ են հասցվել նաև Սոթքի ուղղությամբ տեղակայված զորամասին, հրդեհ է բռնկվել, ավելի ուշ՝ մարվել: Նախարարության խոսնակը նաև հաստատել է սկանդալային տեղեկությունը, որ Ադրբեջանը հրետանային հարվածներ է հասցրել Գեղարքունիքում ռուս սահմանապահների տեղակայման կետին: