Լա Մանշում ռուսական ֆրեգատը նախազգուշական կրակոցներ է արձակել. Մեծ Բրիտանիան հետաքննում է դեպքը

Մեծ Բրիտանիայի պաշտպանության նախարարությունը հետաքննում է հաղորդումներն այն մասին, որ ռուսական «Ծովակալ Գրիգորովիչ» ֆրեգատը իբր նախազգուշական կրակոցներ է արձակել Լա Մանշ նեղուցում։ Այս մասին հայտնել է BBC-ն։

«Մենք հետաքննում ենք Լա Մանշ նեղուցում տեղի ունեցած միջադեպի մասին հաղորդումները», - հայտնել է գերատեսչության աղբյուրը հեռարձակող կորպորացիային։

Ինչպես նշում է BBC-ն, միջադեպը իբր տեղի է ունեցել հունիսի 16-ին՝ Վայթ կղզուց դեպի հարավ մոտ 20 ծովային մղոն (37 կմ) հեռավորության վրա՝ Մեծ Բրիտանիայի տարածքային ջրերից դուրս։ Նախազգուշական կրակոցները, ըստ պնդումների, արձակվել են Մեծ Բրիտանիայում գրանցված զբոսանավից մոտ 500 յարդ (460 մ) հեռավորության վրա։ Վերջինիս անվանումը չի նշվում, սակայն հստակեցվում է, որ նավը վնասվածքներ չի ստացել, և ոչ ոք չի տուժել։

Հաղորդվում է նաև, որ միջադեպի պահին ռուսական ֆրեգատին ուղեկցել է Մեծ Բրիտանիայի ռազմածովային ուժերի HMS Mersey պարեկային նավը։

Բրիտանացի զինվորականները կատարվածը չեն կապում Լա Մանշ նեղուցում ռուսական այսպես կոչված «ստվերային նավատորմին» պատկանող Smyrtos տանկերը գրավելու գործողության հետ։

Ավելի ուշ պաշտպանական գերատեսչության աղբյուրը Sky News հեռուստաալիքին հայտնել է, որ ռուսական ռազմանավը, ամենայն հավանականությամբ, մի քանի կրակոց է արձակել՝ հնարավոր բախման մասին նախազգուշացնելու համար։ Նրա անձնակազմը զբոսանավին համապատասխան ազդանշան է տվել, սակայն այն չի փոխել ընթացքը։ Դրանից հետո, ըստ պնդումների, արձակվել են նախազգուշական կրակոցներ, ընդ որում՝ ոչ թե զբոսանավի ուղղությամբ։