Պարեկները երեխայի աչքի առաջ հարվածել են դատախազին, տարել բաժին, ծեծել՝ վնասելով քիթը

«Հրապարակ» թերթը գրել է. «Երեկ իշխանական կայքերը հայտնեցին, որ պարեկային ծառայության ոստիկանները կանգնեցրել են ԱԺ նախկին պատգամավոր Գևորգ Պետրոսյանի եղբոր՝ դատախազ Էդգար Պետրոսյանի մեքենան, եւ պարզվել է, որ Էրեբունի եւ Նուբարաշեն վարչական շրջանների դատախազության ավագ դատախազ Է. Պետրոսյանը մեքենան վարել է ոչ սթափ կամ, ինչպես իշխանական կայքերն էին գրել, հարբած վիճակում։ Էդգար Պետրոսյանը, ըստ լուրերի, չի ենթարկվել պարեկների օրինական պահանջներին, դիմադրել է նրանց, ինչից հետո պարեկային ծառայության աշխատակիցները ստիպված են եղել արցունքաբեր գազ կիրառել դատախազի նկատմամբ ու նրան ուժով բերման ենթարկել։ Դատախազը ձերբակալվել է։

Սակայն որոշ ժամանակ անց դատախազ Պետրոսյանը դատախազության ջանքերով ազատ է արձակվել, քանի որ դատախազությունը համարել է, որ Պետրոսյանի ձերբակալումը եղել է ոչ իրավաչափ։

Եվ սա դուր չի եկել պարեկների «կնքահայր» Դանիել Իոաննիսյանին, որը, թվում է, ոչ մի կարգավիճակ չունի այս հարցում, շահագրգիռ կողմ չէ, պաշտոնյա չէ, պարեկային ծառայության աշխատող չէ, սակայն պարեկային ծառայության հետ կապված ցանկացած միջադեպի պարտադիր արձագանքում է ու ծանր է տանում, երբ պարեկների «խաթրին» դիպչում են։

«Այս պատմության էպիկ մասն այն է, որ մեկ այլ դատախազի որոշմամբ ոստիկանների նկատմամբ բռնություն գործադրած դատախազ Էդգար Պետրոսյանն ազատ է արձակվել, իսկ նրա ձերբակալումը՝ որակվել «ապօրինի»: Այսպիսով, Հայաստանում կա պարեկային ծառայություն, որի համար մեկ է, թե խմած վարորդն ով է, բայց չկա դատախազություն, որը զերծ է ԽԾԲ-ական ավանդույթների պաշտպանությունից»,- իր ֆեյսբուքյան էջում գրել է Իոաննիսյանն ու հիշեցրել, որ Էդգար Պետրոսյանն ԱԺ նախկին պատգամավոր Գևորգ Պետրոսյանի եղբայրն է։

Գևորգ Պետրոսյանն էլ, հիշեցնենք, ամեն օր իր ձևերով հիշում ու հիշատակում է Նիկոլ Փաշինյանին, ուստի իշխանական քարոզչամիջոցների կողմից նրա դատախազ եղբորը թիրախավորելը միանգամայն տրամաբանական է։ Կարճ ժամանակ անց Իոաննիսյանի գրառմանը հետևեց դատախազության արձագանքը։ Գլխավոր դատախազի խորհրդական Գոռ Աբրահամյանն իր ֆեյսբուքյան էջում նախ նկատել էր, որ Իոաննիսյանը ո՛չ այդ դեպքի ականատեսն ու վկան է, ո՛չ տիրապետում է կամ կարող էր տիրապետել վարույթի նյութերին, ո՛չ էլ առհասարակ որևէ առնչություն կարող է ունենալ տեղի ունեցածի հետ, սակայն նման անպատասխանատու «փաստագրումներ» է անում։ Ապա ավելացրել․ «Քննությանը չխոչընդոտող որոշակի փուլում դատախազությունը կհրապարակի դեպքի տեսանյութը, և շատ հնարավոր է՝ պարոն Իոաննիսյանը զղջա իր ներկայիս մերկապարանոց հայտարարությունների համար՝ ստիպված լինելով տեսագրության մեջ մատնացույց անել պարեկին և դատախազին վերագրվող իբրև թե արարքները, նաև գուցե ապատեղեկատվություն տարածելու համար խիստ անհարմար դրության մեջ դնի իրեն նման տեղեկատվություն տվողներին»։

Նկատենք, որ դատախազությունից չեն հերքել, որ դատախազ Պետրոսյանը եղել է ալկոհոլ օգտագործած կամ ոչ սթափ վիճակում։ Ասում են՝ քննություն է ընթանում, որի ընթացքում կպարզեն բոլոր հանգամանքները։ Իսկ ինչպե՞ս է տեղի ունեցել դեպքը։ Մեզ որոշ մանրամասներ պատմեցին դատախազ-պարեկներ «շփումից»։ Ասացին՝ դեպքը եղել է գիշերվա երկուսի կողմերը, ԱվանԱռինջի տարածքում։ Դատախազ Պետրոսյանն իսկապես գինովցած է եղել և մեքենան վարել է ոչ սթափ վիճակում: Ասացին՝ խնջույքից տուն վերադառնալիս է եղել․ ընկերոջ երեխայի կնունքին է մասնակցելիս եղել։

Խնջույքից դուրս գալուց հետո իրեն լավ չի զգացել, երբ հասել է Ավան, կանգնել է «Երևան սիթի» սուպերմարկետի մոտ, որ մտնի՝ խմելու բան առնի։ Դուրս է եկել, նստել մեքենան ու թույլ է տվել երթևեկության կանոնների խախտում․ ասացին՝ հոծ գիծ խախտելով է շրջադարձ կատարել կամ նման մի բան։ Պարեկները դա նկատել են և հրահանգել, որ կանգնեցնի մեքենան։ Էդգար Պետրոսյանն ասել է՝ ինձ լավ չեմ զգում՝ առաջարկելով գալ իրենց տան մոտ, ու շարունակել է վարել մեքենան։ Ոստիկանները հետապնդել են նրան մինչև նրա տուն, որը գտնվում է Ավան-Առինջ թաղամասում։

Այստեղ արդեն, երբ կանգնել են, սկսվել է քաշքշուկ, վիճաբանություն ոստիկանների և դատախազի միջև։ Մեզ ասացին՝ պարեկները բռնի ուժ են կիրառել դատախազի նկատմամբ, հարվածներ հասցրել նրան, արցունքաբեր գազ կիրառել, ապա ուժով նստեցրել ոստիկանական մեքենան, որ տանեն բաժին։ Այդ ամենը տեղի է ունեցել Պետրոսյանի ընտանիքի անդամների, այդ թվում՝ երեխայի աչքի առաջ։

Ճանապարհին կապ են տվել, և պաշտպանության նախարարության մոտ նրանց են միացել նաև պարեկային ծառայության այլ ոստիկաններ, որոնք, միանալով դատախազին ճնշելու գործընթացին, հենց մեքենայի մեջ հարվածել են նրան, ծեծել՝ վնասելով, գուցե նաև կոտրելով Էդգար Պետրոսյանի քիթը։ Երբ տարել են բաժին, այնտեղ ևս ոստիկանների կողմից դատախազի նկատմամբ բռնություն է կիրառվել։

Այսինքն՝ թե՛ իր տան մոտ, թե՛ մեքենայի մեջ և թե՛ բաժնում նրան ծեծել են՝ պատճառելով մարմնական վնասվածքներ, որոնք կապտուկների տեսքով երևում են նրա մարմնի տարբեր հատվածներին։ Մեզ ասացին, որ սրա վերաբերյալ կան նաև տեսագրություններ, և անհրաժեշտության դեպքում դրանք կարող են հրապարակվել։ Ձերբակալումից հետո երկուստեք իրար դեմ ցուցմունք են տվել, այսինքն՝ պարեկները դատախազի դեմ են բողոք գրել, որ դիմադրել է, չի ենթարկվել իրենց օրինական պահանջին, դատախազը՝ պարեկների դեմ, որ իր նկատմամբ օրենքի խախտում են թույլ տվել, բռնություն կիրառել, որի ապացույցներն առկա են իր մարմնի վրա։

Ուստի դեռ հարց է՝ այս իրավիճակում ով ավելի մեղավոր դուրս կգա և ով կձերբակալվի ու պատասխանատվության կենթարկվի։ Դատախազությունից չնայած չեն հերքում արարքը և չեն էլ արդարացնում իրենց աշխատակցի՝ ոչ սթափ վիճակում մեքենա վարելը, բայց պաշտպանում են նրան՝ համարելով, որ պարեկները ոչ իրավաչափ են գործել այդ իրավիճակում։ Ոչ սթափ վիճակում մեքենա վարելը, իհարկե, օրենքի խախտում է, և դա չի կարելի արդարացնել, սակայն հիշեցնենք, որ մենք գրել էինք, թե ինչպես է նույն պարեկային ոստիկանության ղեկավար Արթուր Ումրշատյանը 2021 թ․ նոյեմբերի 21-ին ոչ սթափ վիճակում իր վարած Toyota Corolla ավտոմեքենայով Արտաշատ-Վերին Արտաշատ ճանապարհին վթարի ենթարկվել՝ դուրս եկել երթևեկելի գոտուց ու կողաշրջվել։

Ումրշատյանի հետ մեքենայում եղել էր նաև նրա կինը, որը վթարի հետևանքով տեղափոխվել էր հիվանդանոց, բարեբախտաբար՝ լուրջ վնասվածք չէր ստացել։ Ումրշատյանը մեզ հետ զրույցում չէր հերքել վթարի փաստը։ Բայց ոստիկանությունն այս դեպքը ծածկադմփոց արեց, Դանիել Իոաննիսյանն էլ որևէ կերպ չանդրադարձավ սրան։ Իսկ ընդդիմադիր քաղաքական գործչի եղբոր դեպքին այսպիսի մեծ հնչեղություն տվեցին»:

Առավել մանրամասն՝ թերթի այսօրվա համարում։