Երևանում բանկի մասնաճյուղը թալանելուց հետո տղամարդը Բագրատաշենի անցակետով լքել է Հայաստանը

Պարզվել է երեկ՝ նոյեմբերի 17–ին, Երևանի Շինարարների 25 հասցեում գործող «ՎՏԲ» բանկի մասնաճյուղում դիմակավորված ու զինված ավազակային հարձակում կատարողի ինքնությունը, հաղորդում է Shamshyan.com–ը։

Ձեռնարկված հսկայածավալ օպերատիվ հետախուզական և քննչական գործողությունների արդյունքում պարզվել է, որ այն կատարել է Երևան քաղաքի Բաշինջաղյան փողոցի բնակիչ 32-ամյա Հովհաննես Բ.-ն, ով նախկինում եղել է մի քանի անգամ դատապարտված, այդ թվում՝ գողության համար և երեկ արդեն նա Բագրատաշենի անցակետով լքել է Հայաստանը:

Հիշեցնենք, որ երեկ  արտակարգ դեպք էր տեղի ունեցել Երևանում: Զինված անձը ներխուժել էր Շինարարների 25 հասցեում գործող բանկերից մեկի մասնաճյուղ:  Մինչ դեպքի վայր կժամանեին իրավապահները, տղամարդը բանկի մասնաճյուղից հափշտակել էր խոշոր չափի գումար և դիմել փախուստի:  Գ. Շամշյանի տեղեկություններով՝ հափշտակված գումարն անցնում է 1 միլիոն դրամը:

Զինված անձը մտել է բանկի մասնաճյուղ, պարանոցին գցած է եղել ցուցանակ, որի վրա գրված է եղել.

«Եթե փողերը չտաք, 20 վայրկյանում կտրաքացնեմ»:

Դեպքի փաստով քննչական բաժնում «ավազակային հարձակում» հատկանիշներով նախաձեռնվել է քրեական վարույթ: