ԱՄՆ-ը լայնածավալ արշավ է սկսում Միջազգային քրեական դատարանի դեմ

ԱՄՆ-ը մտադիր է օգտագործել իրեն հասանելի բոլոր գործիքները Միջազգային քրեական դատարանի (ՄՔԴ) լուծարման արշավում։ Այս մասին հայտարարել է ԱՄՆ պետքարտուղար Մարկո Ռուբիոն։

Ամերիկյան արտաքին քաղաքական գերատեսչության ղեկավարի գնահատմամբ՝ ՄՔԴ-ն «միջամտում է ամերիկյան զինված ուժերի և իրավապահ մարմինների գործունեությանը», ինչը իբր սպառնում է «ԱՄՆ-ի՝ որպես ինքնիշխան և անկախ պետության կործանմամբ»։ «[ԱՄՆ նախագահ Դոնալդ] Թրամփի վարչակազմը միշտ կպաշտպանի մեր զինծառայողներին այս սպառնալիքից։ ԱՄՆ-ը դիվանագիտական արշավ է սկսում [ՄՔԴ-ի դեմ]՝ առաջնորդվելով պարզ ուղերձով՝ ինքնիշխան պետությունները վեր են գլոբալիզմից»,- հայտարարել է Ռուբիոն Substack-ում իր բլոգում։

«Օգտագործելով մեր կառավարության ձեռքի տակ եղած բոլոր գործիքները և աշխատելով այն դաշնակիցների հետ, որոնց հետ կարող ենք միավորել ջանքերը, մենք ապամոնտաժելու ենք ՄՔԴ-ն, եթե հարկ լինի՝ աղյուս առ աղյուս», - նշել է ԱՄՆ պետքարտուղարը։

Հուլիսի 13-ին Պետդեպարտամենտը հայտնեց, որ ԱՄՆ-ը լայնածավալ արշավ է սկսում ՄՔԴ-ի դեմ՝ նպատակ ունենալով չեզոքացնել դրանից բխող, Վաշինգտոնի կարծիքով, «սպառնալիքն ամերիկյան ինքնիշխանությանը»։ Գերատեսչության հայտարարությունից հետևում է, որ ՄՔԴ-ի դեմ հնարավոր գործողությունները ներառելու են, ի թիվս այլոց, «[ամերիկյան մուտքի] վիզաների չեղարկումը և դատարանի անձնակազմի [ԱՄՆ] մուտքի արգելքը»։ Բացի այդ, նկատի է առնվում «ՄՔԴ-ի և դրա հետ կապված կազմակերպությունների դեմ պատժամիջոցների ընդլայնումը»։

Թրամփի գլխավորած ներկայիս ամերիկյան վարչակազմն արդեն մի քանի անգամ պատժամիջոցներ է սահմանել ՄՔԴ-ի նկատմամբ։ ՄՔԴ-ի պաշտոնատար անձանց դեմ պատժամիջոցներ սահմանելը նախատեսող հրամանագիրը Թրամփը ստորագրել է 2025 թվականի փետրվարի 6-ին։ Ամերիկյան կառավարությունը ՄՔԴ-ին մեղադրել է Վաշինգտոնի և նրա դաշնակիցների, ինչպիսին Իսրայելն է, նկատմամբ ոչ իրավաչափ գործողությունների մեջ։ Մասնավորապես, ԱՄՆ-ում կարծում են, որ դատարանը չարաշահել է իր լիազորությունները՝ Իսրայելի վարչապետ Բենյամին Նեթանյահուի և երկրի նախկին պաշտպանության նախարար Յոավ Գալանտի ձերբակալության անհիմն օրդերներ տալով։ Հրամանագիրը թույլ է տալիս ֆինանսական և վիզային սահմանափակումներ կիրառել ամերիկյան քաղաքացիների կամ նրանց դաշնակիցների նկատմամբ հետաքննություններին առնչվող ՄՔԴ-ի աշխատակիցների, ինչպես նաև նրանց ընտանիքի անդամների նկատմամբ։