ՔՊ-ում որոշել են չներել «անառակ որդիներին»

«Հրապարակ» թերթը գրում է. «Քաղաքացիական պայմանագիր» կուսակցության սեպտեմբերյան համագումարին ընդառաջ, իշխող թիմում կրքերը եռում են։ Համագումարում, ինչպես հայտնի է, ՔՊ նոր վարչություն պետք է ընտրվի։ Բանն այն է, որ վարչության անդամության համար որոշ ՔՊ-ականների առաջադրումը խուլ դժգոհություններ է առաջացրել կուսակցական վերնախավում։ Մեզ հասած տեղեկություններով՝ փորձում են կուսակցության կանոնադրական փոփոխություններով փոքրացնել վարչության կազմն ընտրողների թիվը։

Նախորդ՝ 2019-ի համագումարին վարչության անդամ ընտրողները 336-ն էին, կան խոսակցություններ, որ դրա կեսը, մի բան էլ պակաս են ուզում թողնել։ Թեև սկզբում խոսք էր գնում այն մասին, որ ՔՊ բոլոր անդամներն են ընտրելու։

Որքան փոքր լինի ընտրողների կազմը, այնքան կմեծանա նոր վարչության կազմավորման գործընթացի վրա ազդելու, ընտրությունների արդյունքները կանխորոշելու հնարավորությունը։ Նիկոլ Փաշինյանը հասկացրել է՝ նոր վարչությունում պետք է լինեն ամենավստահելիները, թերևս սրանով էր պայմանավորված, որ վարչության թվակազմը որոշել էին 6-ով փոքրացնել՝ հասցնել 15 հոգու։

Անգամ սեփական չափորոշիչներն են «նեղ կռուգում» սահմանել՝ վերնախավում պետք է լինեն բացառապես նրանք, ովքեր պատերազմից հետո մի գրամ անգամ չեն մտածել նավը լքելու մասին կամ էլ, ինչպես իրենք են ասում, չեն «թռել» Նիկոլ Փաշինյանի վրայից։ Իսկ «թռչողները» քիչ չեն, որոնք առաջին հայացքից ՔՊ հիմնադիրներից են, սակայն պատերազմից հետո ընդհատակ անցան, ամաչում էին մարդամեջ դուրս գալ և կրծքով չէին պաշտպանում պատերազմում պարտված և կապիտուլյացիա ստորագրած Փաշինյանին։ Երբ արշալույսները խաղաղվեցին, և Նիկոլ Փաշինյանը նորից ոտքը պնդացրեց, «անառակ որդիները» վերադարձան իշխանամերձ տարածք։

ՔՊ մեր աղբյուրներն ասում են՝ որքան էլ շոկային էր ԱԳ նախարար Արարատ Միրզոյանի չառաջադրվելը վարչության անդամի պաշտոնում, սակայն թիմում նրա նկատմամբ նեգատիվն ավելի քիչ է, քան, ասենք, ԵԿՄ նախագահ Սասուն Միքայելյանի, իմքայլական նախկին պատգամավոր Մխիթար Հայրապետյանի, Տիգրան Ավինյանի և այլոց նկատմամբ, որոնք պատերազմից հետո աշխատել են հեռու մնալ Նիկոլ Փաշինյանից՝ փորձելով տարանջատվել աղետաբեր պատերազմի պատճառ դարձած թիմի պարագլխից։

Իսկ հիմա, երբ պարզ է, որ Փաշինյանն աթոռը բաց չի թողնելու, նրանք կրկին փորձում են օգտվել իշխանական բարիքներից։ Սասուն Միքայելյանը, օրինակ, պատերազմից հետո Հանրայինի եթերում հայտարարեց․ «Մե՜ծ սխալներ ա արել Փաշինյանը», հրաժարվեց արտահերթ խորհրդարանական ընտրություններին ընդգրկվել ՔՊ ցուցակում։

Իհարկե, ժամանակի հետ ԵԿՄ նախագահը քննադատության սլաքներն ուղղեց ընդդիմության կողմը, թե եթե «30 տարի բանակ սարքած լինեին, այսօր այս վիճակում չէինք լինի», սակայն մեր աղբյուրներն ասում են, որ Փաշինյանը չի կարողանում ներել կուսակցական «դասալիքներին», նա անվերապահ ստրկական ծառայություն է պահանջում և գնահատում է նրանց, ովքեր «նեղ պահերին» իր կողքին են եղել։

ՔՊ-ում նաև չեն հասկանում, թե ինչով է պայմանավորված Սասուն Միքայելյանի վերադառնալու ցանկությունը․ հիշենք, որ գործող վարչության կազմում էլ նա չկա, պատերազմից հետո գրեթե չի շփվում Նիկոլ Փաշինյանի հետ։ ՔՊ-ում եզրակացրել են, որ Միքայելյանը փորձում է քավել մեղքերը և ցույց տալ, որ պատրաստ է դառնալ Փաշինյանի հավատարիմ զինվորը։

Անվստահություն կա նաև նախկին փոխվարչապետ Տիգրան Ավինյանի նկատմամբ։ Նա էլ հրաժարվեց մասնակցել արտահերթ ընտրություններին, հայտարարեց, թե գնում է բիզնես ոլորտ, տևական ժամանակ իրեն հեռու պահեց ներքաղաքական թոհուբոհից՝ չթաքցնելով, որ մերժում է որոշ օլիգարխների՝ քաղաքականություն մտնելը, նկատի ունենալով Խաչատուր Սուքիասյանի և Գուրգեն Արսենյանի պատգամավոր դառնալը։

Այսօր նա այն քիչ ՔՊ-ականներից է, որ առանց թիկնազորի շրջում է մայրաքաղաքում, գրեթե ամեն օր այցելում է Երևանի տարբեր վարչական շրջաններ, հանդիպում բնակիչների հետ։ Եվ քանի որ Նիկոլ Փաշինյանի համար Երևանը պահելը կենսական նշանակություն ունի, իսկ նման շանս ՔՊ-ականներից ամենից շատ Տիգրան Ավինյանն ունի, ով կարող է պայքարել ընդդիմության թեկնածուի դեմ, նա արդեն Երևանի քաղաքապետի պաշտոնի հայտարարված թեկնածուն է։

Շատերի համար ընկալելի չէ նաև Մխիթար Հայրապետյանի պահվածքը․ նա էլ իբր «հայրենասերների» խմբակից էր, պատերազմից հետո լուրեր էին հասնում, որ մեկուսացել, ինքնամփոփ է դարձել, կուսակցական հավաքների ժամանակ այն քչերից էր, որ Փաշինյանին մեղադրում էր կատարվածի մեջ։ Հայրապետյանն էլ չցանկացավ պատգամավոր դառնալ և ընտրացուցակում ամենավերջին հորիզոնականում էր։

Բայց որոշ ժամանակ անց հայտնվեց Փաշինյանի կնոջ կողքին․ «Իմ քայլը» հիմնադրամի գործադիր տնօրենն է և ՔՊ վարչության անդամ դառնալու ցանկություն է հայտնել։ Ամեն գնով փորձելու են վարչություն անցկացնել Լենա Նազարյանին, որին կուսակցությունում համեմատում են մահապարտի հետ, քանի որ պատերազմից հետո նա էր վարչապետի կնոջ համար փնտրում-գտնում զոհվածների ընտանիքներ, ուր կարող էր այցելել Աննա Հակոբյանը, և ինքն անձամբ էլ ուղեկցում էր նրան՝ փորձելով կոտրել իշխանությունների նկատմամբ ատելության մթնոլորտը»:

Առավել մանրամասն՝ թերթի այսօրվա համարում։