Պաշտպանական ոլորտի սահմանափակումները խաթարում են ՆԱՏՕ-ի արդյունավետությունը. Ֆիդան

ՆԱՏՕ-ի ներսում պաշտպանական ոլորտում համագործակցության սահմանափակումները խաթարում են դաշինքի արդյունավետությունն ու արձագանքման կարողությունները։ Այս մասին հայտարարել է Թուրքիայի արտգործնախարար Հաքան Ֆիդանը՝ Անկարայում ՆԱՏՕ-ի գագաթնաժողովի պաշտոնական բացման նախաշեմին։

«Կոլեկտիվ պաշտպանությունը մնում է ՆԱՏՕ-ի առանցքը, սակայն ռազմավարական իրավիճակը փոխվում է։ Սպառնալիքները դարձել են բազմաչափ, ավելի արագ և բարդ։ Ավանդական չափորոշիչներն այլևս չեն արտացոլում իրականությունը։ Այժմ կարևոր են մարտական պատրաստվածության, արդյունաբերական ներուժի և օպերատիվ պատրաստվածության արդյունքները։ Ծայրահեղ կարևոր է եվրոպական ներդրման ավելացումը [ՆԱՏՕ-ի գործունեության մեջ], սակայն պաշտպանական-արդյունաբերական ոլորտում համագործակցության սահմանափակումները խաթարում են արդյունավետությունը և դանդաղեցնում արձագանքումը։ Այդ սահմանափակումները դարձել են ռազմավարական թերություն։ Եվրոպական պաշտպանական նախաձեռնությունները պետք է մնան լիովին ներառական ՆԱՏՕ-ի բոլոր դաշնակիցների համար»,- գրել է Ֆիդանը X-ում։

Նախարարի խոսքով՝ «իրական խնդիրը ոչ միայն այն է, թե ինչպես արձագանքել, այլև այն, թե ինչպես կազմակերպել համագործակցությունը, որպեսզի այն արտացոլի ներկայիս իրողությունները»։

«Անկարայի գագաթնաժողովը կօգնի դաշինքին իր կառույցները համապատասխանեցնել ժամանակակից աշխարհի պահանջներին։ Անկարայում ընդունված որոշումները ոչ միայն կկարգավորեն հրատապ խնդիրները, այլև կձևավորեն եվրաատլանտյան անվտանգությունը առաջիկա տարիների համար։ Թուրքիայի նպատակը հստակ է՝ ավելի համախմբված, գործունակ և ավելի կայուն դաշինք»,- նշել է Ֆիդանը։