Թուրքիան հետևում է ԱՄՆ-ի և Իրանի միջև բանակցային գործընթացը տապալելու Իսրայելի փորձերին․ Էրդողան

Թուրքիան ուշադրությամբ հետևում է Իսրայելի կողմից ԱՄՆ-ի և Իրանի միջև բանակցային գործընթացը տապալելու փորձերին։ Այս մասին Ստամբուլում՝ Պակիստանի վարչապետ Շահբազ Շարիֆի հետ բանակցություններից հետո կայացած մամուլի ասուլիսի ժամանակ հայտարարել է Թուրքիայի նախագահ Ռեջեփ Թայիփ Էրդողանը։

«Պակիստանի ջանքերի շնորհիվ ձեռք բերված համաձայնության շնորհիվ աշխարհը կարողացավ մի փոքր ավելի հանգիստ շունչ քաշել։ Վերջին օրերին միջազգային մամուլում հայտնված հաղորդագրությունները վկայում են այն դժվարությունների մասին, որոնց կողմերը բախվում են այս բանակցային գործընթացում։ Մենք աջակցել ենք և շարունակում ենք աջակցել յուրաքանչյուր քայլի, որը նպաստում է մեր տարածաշրջանում լարվածության նվազեցմանը և խնդիրների դիվանագիտական ճանապարհով լուծմանը։ Մենք ուշադրությամբ հետևում ենք իսրայելական վարչակազմի սադրանքներին, որոնք ուղղված են համաձայնությունը խաթարելուն։ Սիոնիստ գրոհայինները, որոնք իրենց քաղաքական գոյատևումը կապում են տարածաշրջանում հակամարտությունների շարունակման հետ, այժմ հատկապես ակտիվորեն են գործում Լիբանանում և Սիրիայում»,- հայտարարել է Էրդողանը։

Նա նշել է, որ «Գազայում ճնշվածների նկատմամբ իսրայելական օկուպացիոն ուժերի անմարդկային հարձակումները պետք է դադարեցվեն»։ «Մենք չպետք է թույլ տանք, որ նրանք տարածաշրջանը խեղդեն վառոդի հոտի և արյան մեջ։ Թուրքիան ցանկանում է ստեղծել այնպիսի միջավայր, որում տարածաշրջանի բոլոր բնակիչները՝ անկախ իրենց կրոնական պատկանելությունից, կապրեն խաղաղության և անվտանգության մեջ։ Եվ այս կապակցությամբ ես կարևոր եմ համարում ընդգծել հետևյալ կետը. ցանկացած լուծում, որը հիմնված չէ տարածաշրջանի երկրների կամքի և ներդրման վրա, չի կարող մնայուն լինել»,- նշել է թուրք առաջնորդը։

Նա հավելել է, որ Թուրքիան «կշարունակի աշխատել եղբայրական երկրների, հատկապես Պակիստանի հետ համերաշխությամբ՝ տարածաշրջանում խաղաղությունն ու կայունությունը ամրապնդելու համար։