Սլովակիայում մեկնարկել է վարչապետ Ռոբերտ Ֆիցոյին ցմահ վճարումներից զրկելու հարցով հանրաքվեն

Սլովակիայում մեկնարկել է հանրաքվե՝ երկրի վարչապետ Ռոբերտ Ֆիցոյին ցմահ վճարումներից զրկելու հարցով։ Այդ մասին հայտնել է «ՏԱ-3» հեռուստաալիքը։

Ընտրատեղամասերը Սլովակիայում բացվել են տեղական ժամանակով ժամը 07:00-ին (մոսկովյան ժամանակով՝ 08:00-ին) և կաշխատեն մինչև 22:00-ն (մոսկովյան ժամանակով՝ 23:00-ն)։ Հանրաքվեին կարող է մասնակցել շուրջ 4,33 միլիոն ընտրող՝ հանրապետության մոտ 5,45 միլիոն բնակչությունից։ Այնուամենայնիվ, հեռուստաալիքի տեղեկատվությամբ, ներկա պահին գրանցվում է ընտրողների ցածր ակտիվություն։ Հունիսի վերջին Ipsos սոցիոլոգիական գործակալության անցկացրած հարցման արդյունքների համաձայն՝ հանրաքվեն կարող է ձախողվել՝ ընտրողների ցածր մասնակցության պատճառով։ Սոցիոլոգների պարզած տվյալներով՝ դրան պատրաստ է մասնակցել ընտրելու իրավունք ունեցող սլովակների միայն 26,5%-ը, իսկ 73,5%-ը՝ կանտեսի այն։

Բացի վարչապետի ցմահ վճարումների չեղարկման հարցից, քաղաքացիները կարտահայտվեն պետական մարմինների կառուցվածքում հատուկ դատախազությունը և հանցավորության դեմ պայքարի ազգային գործակալությունը վերականգնելու վերաբերյալ։ Դրանք լուծարվել էին Ֆիցոյի կառավարության կողմից։

Հանրաքվեի անցկացումը նախաձեռնել է լիբերալ, խորհրդարան չանցած «Դեմոկրատներ» կուսակցությունը։ Նրանց հաջողվել է հավաքել իշխանություններին ուղղված համապատասխան խնդրագրի տակ օրենքով սահմանված ընտրողների ստորագրությունների քանակը։

Սլովակիայում խնդրագրով համապետական հանրաքվե անցկացնելու համար անհրաժեշտ է հավաքել ընտրելու իրավունք ունեցող քաղաքացիների առնվազն 350 հազար ստորագրություն։ Քվեարկության արդյունքները վավեր ճանաչելու համար մասնակցության շեմը պետք է գերազանցի 50%-ը։