Լրահոս

Մայիսի 13-ին, ժամը 20.00-ի սահմաններում, «Օպել» մակնիշի մեքենայի վարորդը Գյումրիի Տիմիրյազևի փողոցում վրաերթի է ենթարկել 5-ամյա տղայի և իր մեքենայով տեղափոխել հիվանդանոց: Այս մասին հայտնում են ՀՀ Ոստիկանությունից: Կատարվում է քննություն:

Բռնցքամարտիկ Գուրգեն Հովհաննիսյանն իր 3-րդ անընդմեջ հաղթանակն է տարել պրոֆեսիոնալ ռինգում: Ամերիկայի Միացյալ Նահանգներում կայացած պրոֆեսիոնալ բռնցքամարտի երեկոյի ընթացքում 24-ամյա Հովհաննիսյանը մենամարտել է ամերիկացի Ջեսս Բրայնի հետ և երկրորդ ռաունդում նոկաուտի է ենթարկել մրցակցին։ Հովհաննիսյանը նախորդ 2 մենամարտերում ևս հաղթանակ էր տարել, իսկ վերջին մենամարտն անցկացրել էր դեկտեմբերի 11-ին, գրում է Armsport.am-ը։

Մայիսի 15-ին, ժամը 06:02-ին Սևանա լճում որոնողական աշխատանքները վերսկսելու նպատակով դեպքի վայր են մեկնել ԱԻՆ ՓԾ հատուկ ջրափրկարարական ջոկատից մեկ մարտական հաշվարկ և օպերատիվ խումբը։ Ժամը 07:44-ին որոնողական աշխատանքները վերսկսվել են: *** Հիշեցնենք, որ մայիսի 6-ին, ժամը 18:16-ին Գեղարքունիքի մարզային ճգնաժամային կառավարման կենտրոն ահազանգ է ստացվել, որ Վարդենիկ-Զոլաքար գյուղերի ափամերձ հատվածից երկու քաղաքացի նավակով դուրս են եկել Սևանա լիճ և չեն վերադարձել։

Մեր պատանեկության, երիտասարդության տարիներին՝ բակում, փողոցում, դպրոցում, համալսարանում, արհամարհրված էին բոլոր տեսակ մատնիչ-բանսարկուները, որոնց անվանում էինք «գործ տվողներ», «ստուկաչներ»։ Ամոթ էր նույնիսկ նրանց բարևելը, էլ ուր մնաց ընկերություն անելը։ Այո՛, ապրում էինք ԽՍՀՄ-ում, բայց հասարակությունը խիստ բացասական էր վերաբերվում 1937 թ․ մատնիչ-բանսարկուներին։ Գրել է իրավապաշտպան Ավետիք Իշխանյանը։ «Եվ ով կմտածեր, որ մեր երազած անկախ Հայաստանում, իշխանությունների խրախուսմամբ, սնկի պես կաճեն, կբազմանան տարբեր բանսարկու-մատնիչ-ստուկաչ-գործ տվողներ։ Նրանց շարքերում են ուսանողներ, իրենց քաղ․հասարակություն կոչող ստահակներ։ Ի՞նչ ասես, որ ապացուցված ԱԱԾ «ստուկաչը» դարձավ ԱԺ նախագահ, այսօր՝ ԱԳ նախարար։ Սա կոչվում է բարքերի անկում»։

Վերջին օրերին մեկը մյուսին հաջորդող կալանքները իշխանությունների վախերի արտացոլանքն են: Իրենց երկրին նվիրվածների, 44օրյա պատերազմով անցածների նկատմամբ կալանքը կիրառում են ոչ թե որպես խափանման միջոց, այլ պատժիչ գործիք: Երևի թե բանտը ամենահարմար տեղն է իշխանությունների համար` մեկուսացնելու մարդկանց, ովքեր կարող են ներդրում ունենալ մեր երկրի զարգացումների հարցում: Իսկ այդ նպատակով թե´ հրահրող «պապիկներ», թե´ սուտ մատնություն անող «թոռնիկներ» կգտնվեն: Սա է այսօր մեր իրականությունը: Եվ մեր պայքարը նաև սրա դեմ է: Քաղաքական պատվերն ու իրավական աբսուրդը հասել է այն աստիճանի, որ Ավետիք Չալաբյանին/ Avetik Chalabyan/ կալանավորում են խիստ կասկածելի ակնհայտ սադրող ձայնագրության, ըստ էության սուտ մատնության հիման վրա: Ավելին, երկու ամսով կալանավորում են Քրեական օրենսգրքի այնպիսի հոդվածով, որը 2022թ. հուլիսի 1-ից ուժի մեջ մտնող օրենսգրքով այլևս պատժելի չի լինելու: Համոզված եմ, որ Ավետիքի և մյուսների կալանքը ունենալու է ճիշտ հակառակ ազդեցությունը: Քաղաքական հետապնդումները որևէ արդյունք չեն տալու: Իսկ ազատության համար պայքարը ավելի մեծ թափ է հավաքելու:

Երեկ այդ առաջարկները հրապարակվեցին, եւ ես պետք է անկեղծորեն խոստովանեմ, որ դա բացարձակ խայտառակություն է։ Այսինքն՝ վաղուց ոչ ոք նման առիթ չի տվել Ադրբեջանին ու միջազգային հանրությանը ծաղրել Հայաստանի քաղաքական, դիվանագիտական միտքն ու ներուժը։ Այս մասին, այսօր՝ մայիսի 14-ին, ասաց Հայաստանի Հանրապետական կուսակցության փոխնախագահ Արմեն Աշոտյանը՝ մեկնաբանելով Հայաստանի իշխանությունների կողմից Ադրբեջանին ուղարկված վեց առաջարկները։

Դատավոր Ոսկանյանը րոպեներ առաջ Գյումրու հայտնի դեպքով մերժել է դաշնակցական Վելիխան Խլղաթյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Այս մասին տեղեկանում ենք փաստաբան Գայանե Պապոյանից։ 

Երկուշաբթի օրվանից նոր թափով վերսկսվելու են բողոքի և անհնազանդության ակցիաները: Այդ մասին մանրամասն կխոսեմ մայիսի 15-ի` ժամը 18:00-ի մեր հանրահավաքին, գրել է :

Մայիսի 15-ին, ժամը 07։58-ին Արմավիրի մարզային ճգնաժամային կառավարման կենտրոն ահազանգ է ստացվել, որ Մեծամոր քաղաքի 12-րդ շենքի առաջին հարկի բնակարաններից մեկում հրդեհ է բռնկվել։ Այս մասին հայտնում են ՀՀ ԱԻՆ-ից: Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատներից երկու մարտական հաշվարկ: Հրդեհը մեկուսացվել է ժամը 08:29-ին, մարվել՝ 09։05-ին: Այրվել են բնակարանի պատշգամբը, հյուրասենյակը և խոհանոցը՝ գույքով (մոտ 50 քմ): Փրկարարները շենքից տարահանել են 39 քաղաքացու. տուժածներ չկան

ԱԺ «Հայաստան» խմբակցության պատգամավոր, «Վերածնվող Հայաստան» կուսակցության նախագահ Վահե Հակոբյանը հայց է ներկայացրել ընդդեմ Անդրանիկ Քոչարյանի: Այս մասին հայտնում են «Վերածնվող Հայաստան» կուսակցությունից: Ներկայացված հայցով պահանջվում է պարտավորեցնել հրապարակայնորեն հերքել Հակոբյանի վերաբերյալ Հանրային հեռուստաընկերության եթերում հնչեցված զրպարտական արտահայտությունները, ներողություն խնդրել վիրավորանքի համար և հատուցել զրպարտությամբ և վիրավորանքով պատճառված ոչ նյութական վնասը։ Դատավարության հետագա ընթացքի վերաբերյալ հանրությանը պարբերաբար կտրվի տեղեկատվություն:

«Դիմադրություն» շարժումն այսօր 18։00-ին Ֆրանսիայի հրապարակում համահայկական մեծ հանրահավաք է հրավիրում։ Հիշեցնենք, որ Իշխան Սաղաթելյանը հայտարարել է, որ երկուշաբթի օրվանից նոր թափով վերսկսվելու են բողոքի և անհնազանդության ակցիաները:

Մայիսի 14-ին` ժամը 23:15-ին, Ճգնաժամային կառավարման ազգային կենտրոն ահազանգ է ստացվել, որ Երևանի Կորյունի փողոցում քաղաքացին ընկել է փոսը (մոտ 7 մետր). դուրս բերելու համար անհրաժեշտ է փրկարարների օգնությունը: Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը: Պարզվել է, որ քաղաքացին ընկել է նախկին ճոպանուղու չշահագործվող շինության երկրորդ հարկից և վնասվել: Փրկարարները Դ. Խ.-ին (ծնված 2002 թ.) վնասվածքներով դուրս են բերել փոսից և մոտեցրել շտապօգնության ավտոմեքենային. վերջինս հոսպիտալացվել է «Հերացի» թիվ 1 հիվանդանոցային համալիր:

Խոշոր ավտովթար՝ Արմավիրի մարզում. Արմավիր քաղաքի «Կարմիր կամրջի» մոտ բախվել են 2 Mercedes-ներն ու Opel-ը. կա 5 վիրավոր

Մայիսի 14-ին, տեղական ժամանակով ժամը 21:14-ին (Գրինվիչի ժամանակով ժամը 17:14-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցված հյուսիսային լայնության 41.20⁰ և արևելյան երկայնության 43.96⁰ աշխարհագրական կոորդինատներով 4.5 մագնիտուդով երկրաշարժին հաջորդել են հետցնցումներ։ Այս մասին հայտնում են ՀՀ ԱԻՆ-ից: Մայիսի 15-ի, ժամը 08։00-ի դրությամբ հետցնցումների քանակը 30 է, որոնցից առավելագույնի ուժգնությունը կազմել է 1․7 մագնիտուդ։

Ստում ե՜ք, ստորաբար ու նենգաբար ստում ե՜ք Իշխանության երիտհեղափոխականներն ու նրանց շուրջ պտտվող միավորները մեր ժողովրդին փորձում են համոզել, որ ամեն ինչ որոշված է, որևէ բան հնարավոր չէ փոխել ու կասեցնել, իզուր տեղը մի չարչարվեք: Նիկոլն ու ալիևը փորձում են մեզ ու աշխարհին համոզել, որ Հայ ժողովուրդը համակերպվել է դավադիր պարտության հետ, հրաժարվել է Արցախից, ուրացել ու պղծել է արցախյան 30-ամյա հերոսամարտի տասնյակ հազարավոր զոհերի հիշատակը, հրաժարվել է պետություն ու պետականություն ունենալու դարավոր երազանքից: Ստում եք, նենգաբար ու ստորաբար ստում եք, բոլորդ: Ոչինչ որոշված չէ, որոշողը Հայ ժողովուրդն է, Հայ ազգը ու Հայ մարդը: Նրանք ոնց որոշեն, այդպես էլ կլինի, ու աշխարհաքաղաքական բոլոր կենտրոնները ստիպված կլինեն հաշվի նստել մեր որոշման հետ, իսկ մեր որոշումն է. 1. Տեր ենք մեր հայրենիքին 2. Արցախը եղել է, կա և լինելու է հայկական ու երբեք չի՛ լինելու ադրբեջանի կազմում 3. Հայաստանը մնալու է անկախ ու ինքնիշխան պետություն: Ու ոչ մեկդ չփորձեք կանգնեք այս ճանապարհին ու ստեր տարածելով կոտրել մեր ժողովրդի կամքն ու վճռականությունը:

Շիրակի մարզպետ Նազելի Բաղդասարյանը ֆեյսբուքյան էջում գրել է․ «Երկրաշարժը բավականին մեծ ուժգնությամբ զգացվել է Շիրակի մարզի բոլոր բնակավայրերում։ Այս պահին Շիրակի մարզպետարանի պատասխանատու ստորաբաժանումները տեղեկատվություն են ստանում բոլոր համայնքներից՝ հնարավոր վնասները ճշտելու առումով։ 911 եւ Շտապ օգնության ծառայություններում երկրաշարժի հետեւանքներով պայմանավորված ահազանգեր չեն գրանցվել։ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 41.20⁰ և արևելյան երկայնության 43.96⁰ աշխարհագրական կոորդինատներով Վրաստան-Հայաստան սահմանային գոտում` Բավրա գյուղից 15 կմ հյուսիս-արևելք, օջախի 10 կմ խորությամբ, 4.5 մագնիտուդով երկրաշարժ: Էպիկենտրոնային գոտում ստորգետնյա ցնցման ուժգնությունը կազմել է 6 բալ: Շիրակի մարզի համայնքների ղեկավարների վստահեցմամբ, այս պահի դրությամբ փլուզումներ չկան արձանագրված»։

Freedom House միջազգային իրավապաշտպան կազմակերպությունը անհանգստացած է Հայաստանում լրագրողների, հանրային գործիչների և հասարակ քաղաքացիների նկատմամբ բողոքի ցույցերի ժամանակ իրականացվող բռնությամբ, գրում է ԱԺ Մարդու իրավունքների պաշտպանության եւ հանրային հարցերի մշտական հանձնաժողովի նախագահ, ԱԺ «Պատիվ ունեմ» խմբակցության պատգամավոր Թագուհի Թովմասյանը։ «Կազմակերպության թվիթերյան էջում գրառում է արվել, որով դատապարտվել են վերջին շրջանում իրավապահ մարմինների կողմից կատարվող գործողությունները: Ներկա իշխանությունը ժողովրդավարությունը դարձրել է Հայաստանի բրենդը և իր իշխանության թիվ մեկ ձեռքբերումը, այնինչ մենք հստակ քայլերով հետընթաց ենք ապրում ժողովրդավարությունից, և այս մասին բազմաթիվ անգամներ հիշատակում են միջազգային կառույցները։ Վերջերս էլ գրություն էի ուղարկել ԵԽ Գլխավոր քարտուղարին՝ նրան տեղեկացնելով բողոքի խաղաղ ակցիայի ընթացքում քաղաքացիների, լրագրողների և հասարակական գործիչների կողմից ոստիկանության անհամաչափ գործողությունների մասին՝ ներկայացնելով առարկայական ապացույցներ և կոնկրետ դեպքեր, որից հետո ԵԽ Գլխավոր քարտուղարի Մեդիա ազատության պաշտոնական հարթակում CoE Media Freedom նախազգուշացում էր տեղադրվել՝ ի պաշտպանություն լրագրողների, որում հիշատակվում էր նաև ԱԱԾ ՊՊԾ պետ Սարգիս Հովհաննիսյանի կողմից լրագրողների նկատմամբ բռնության դեպքը։ Լրագրողների նկատմամբ անօրինական գործողություններին անդրադարձել էր նաև Լրագրողների պաշտպանության CPJ Europe and Central Asia / Committee to Protect Journalists կոմիտեն, որը լրագրողների իրավունքների պաշտպանությամբ զբաղվող միջազգային ոչ քաղաքական կազմակերպություն է։ Հոդվածի վերնագիրն արդեն իսկ շատ խոսուն է՝ «Հայաստանի իշխանությունները պետք է հետաքննեն ոստիկանության և պետական պաշտոնյաների կողմից մամուլի վրա վերջին հարձակումները և ապահովեն, որ մեղավորները պատասխանատվության ենթարկվեն»։ Եվ նման հրապարակումներն ու նախազգուշացումները բազմաթիվ են։ Այսօր էլ հենց այս և իշխանության կողմից մարդու ազատության իրավունքի խախտման այլ նախադեպերի մասին քննարկում էի կազմակերպել Ֆրանսիայի հրապարակում, որտեղ հրավիրված էին նաեւ իրավական ոլորտի ներկայացուցիչներ և վերոնշյալ գործողությունները քննում էինք իրավական տեսանկյունից։ Այո՛, Հայաստանում արդարության մթնոլորտը լուրջ հարվածի տակ է, և սա հովանավորվում է պետական մակարդակով, և ոստիկանական գործողություններն էլ հրահանգված են իշխանության կողմից։ Այս երկակի չափանիշները և նման զարգացումները կործանարար են լինելու մեր երկրի համար»։

Այսօր՝ մայիսի 14-ին, ողբերգական ավտովթար է տեղի ունեցել Արագածոտնի մարզում: Ժամը 17:00-ի սահմաններում, BMW-X5 մակնիշի ավտոմեքենան, Արա լեռան տարածքին հարակից Ծաղկեվանքի ճանապարհին, դեռևս անհայտ հանգամանքներում, դուրս է եկել երթևեկելի գոտուց, մի քանի պտույտ գլորվելով, բախվել ապառաժ քարերին և կողաշրջված վիճակում հայտնվել ձորում: Ինչպես դեպքի վայրից հայտնում է Shamshyan.com-ը, վթարի հետևանքով քաղաքացիների օգնությամբ 2 հոգի մարմնական վնասվածքներով դուրս են բերվել ձորից և տեղափոխվել «Աշտարակ» բժշկական կենտրոն: Քաղաքացիների ավտոմեքենաներին են մոտեցել Աշտարակի հիվանդանոցի շտապօգնության բժիշկները, ովքեր վիրավորներին տեղափոխել են շտապօգնության ավտոմեքենա և պարզվել է, որ նրանցից մեկը մահացած է: Փաստի առթիվ Ն. Խաչատրյանի որոշմամբ հարուցվել է քրեական գործ՝ ՀՀ քր-օր-ի 242 հոդվածի 2-րդ մասի հատկանիշներով: Ոստիկանությունն ու քննչական վարչությունը պարզում են վարորդի, մահացածի և վիրավորի ինքնությունը:

Մայիսի 14-ին, ժամը 20։25-ին Լոռու մարզային ճգնաժամային կառավարման կենտրոն տեղեկություն է ստացվել, որ Ազնվաձոր գյուղի մոտակա դաշտամիջյան հատվածում նկատվել է քաղաքացու դի՝ ծառից կախված․ անհրաժեշտ է փրկարարների օգնությունը։ Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ: Պարզվել է, որ քաղաքացին կախված է եղել հողանցման երկաթե սյան վրա: Մինչ փրկարարների կանչի վայր հասնելը՝ իջեցրել են տեղի ուժերով։ Փրկարարները քաղաքացու դին (Օ. Ս.) մոտեցրել են (մոտ 2 կմ) երթևեկելի հատված և հանձնել ոստիկանության աշխատակիցներին։

Ադրբեջանի պաշտպանության նախարարության տարածած հաղորդագրությունը, թե մայիսի 14-ին ՀՀ ԶՈւ ստորաբաժանումները հրաձգային զինատեսակներից գնդակոծել են հայ-ադրբեջանական սահմանի արևելյան ուղղությամբ տեղակայված ադրբեջանական մարտական դիրքերը` ապատեղեկատվություն է: Իրադրությունը հայ-ադրբեջանական սահմանին հարաբերականորեն կայուն է և գտնվում է ՀՀ ԶՈւ ստորաբաժանումների լիարժեք վերահսկողության տակ: