Լրահոս

Կիևում օգոստոսի 22-ից 25-ը արգելված է զանգվածային միջոցառումների անցկացումը, ուկրաինական լրատվամիջոցները հրապարակել են Կիևի քաղաքային ռազմական վարչակազմի ղեկավար Նիկոլայ Ժիրնովի հրամանը։ «2022 թվականի օգոստոսի 22-ից օգոստոսի 25-ն արգելել զանգվածային միջոցառումների, խաղաղ հավաքների, հանրահավաքների և այլ միջոցառումների անցկացումը, որոնք կապված են մարդկանց մեծ բազմության հետ»,- ասվում է փաստաթղթի տեքստում: Չորեքշաբթի՝ օգոստոսի 24-ին, Ուկրաինան նշում է Անկախության օրը։

Երևան-Մեղրի մայրուղում վերականգնվել է բնականոն երթևեկությունը։ Տեղեկությունը հայտնում է Սյունիքի մարզպետարանը։ «Երեկ կեսօրից մինչ այս պահը Սյունիքի մարզպետ Ռոբերտ Ղուկասյանը, մարզպետի խորհրդական Կարեն Բալյանը, ՀՀ ոստիկանության Սյունիքի մարզային վարչության պետ Ալիկ Մամիկոնյանը, ՀՀ ոստիկանության հասարակական անվտանգության ապահովման գլխավոր վարչության պետի տեղակալ Էդգար Պետրոսյանը գտնվել են Մ2 միջպետական մայրուղում և զրուցել բեռնատարի վարորդների հետ. ներկա պահին մայրուղում վերականգնվել է բնականոն երթևեկությունը...»:

Մյունխենում ընթացող մարմնամարզության Եվրոպայի երիտասարդների առաջնությունում Հայաստանն առաջին մեդալն է նվաճել։ Երիտասարդների պայքարում փոխչեմպիոնի կոչումը նվաճել է Համլետ Մանուկյանը՝ դառնալով արծաթե մեդալակիր։ Մանուկյանը երկրորդ արդյունքն է ցույց տվել նժույգթափեր վարժությունում, տեղեկացնում է armsport.am-ը:

Թուրքիայի նախագահական ընտրությունները, որոնք նախատեսված են 2023 թվականի հունիսի կեսերին, կարող են անցկացվել 2022 թվականի աշնանը, գրում է Welt am Sonntag թերթը՝ հղում անելով Եվրոպական արտաքին գործողությունների ծառայության (EEAS) աղբյուրներին եւ ԵՄ դիվանագետներին։ Հրատարակության համաձայն՝ կան որոշ նշաններ, որ Թուրքիայի նախագահ Ռեջեփ Թայիփ Էրդողանը պատրաստվում է ժամանակից շուտ ընտրություններ անցկացնել, որոնց կազմակերպչական աշխատանքները կարող են տեղի ունենալ բավականին արագ։ Գալիք ընտրություններին Էրդողանի նախապատրաստությունը ցույց տվող նշանների թվում, ըստ դիվանագետների, միջազգային քաղաքականության մեջ Թուրքիայի նախագահի գործունեության աճն է: Այդ գործողություններից են Միջերկրական ծովում թուրքական գազի արդյունահանման ծրագիրը, որի շրջանակում օգոստոսի 9-ին Մերսին նավահանգստից մեկնել է «Աբդուլհամիդ Խան» նավը՝ Միջերկրական ծովի արեւելյան հատվածի հանքավայրերը ուսումնասիրելու նպատակով։ Բացի այդ, օգոստոսի կեսերին Էրդողանն անձամբ այցելել է Ուկրաինա, որտեղ հանդիպել է նախագահ Վոլոդիմիր Զելենսկիի եւ ՄԱԿ-ի գլխավոր քարտուղար Անտոնիո Գուտերեշի հետ։ Այս բոլոր գործողությունները կոչված են ցույց տալու Թուրքիայի ղեկավարի ուժը՝ նախընտրական քարոզարշավի մեկնարկից առաջ՝ կարծում են հրապարակման աղբյուրները, եւ Թուրքիայում հասարակական տրամադրությունների հնարավոր աճը թուրքական տնտեսության կարճաժամկետ վերականգնումից հետո ամռան վերջում Էրդողանը կարող է ընտրությունների անցկացման պատճառ համարել՝ հայտնվելով իր համար շահեկան վիճակում: Թուրքիայում տարեկան գնաճը 2022 թվականի հուլիսին հասել է 79,6 տոկոսի, որն ամենաբարձրն է 1998 թվականից ի վեր, մինչդեռ գներն ընդամենը մեկ ամսում աճել են 2,37 տոկոսով։ Սրանք արժութային եւ տնտեսական ճգնաժամի հերթական փուլի արդյունքներն են, որում երկիրը գտնվում է արդեն մի քանի տարի։ Դրա պատճառներից մեկը, ըստ վերլուծաբանների, Էրդողանի՝ տնտեսական աճը խթանելու համար տոկոսադրույքների իջեցման քաղաքականությունն է, որը սկսվել է 2018 թվականին։ Դա արվել է Կենտրոնական բանկի ղեկավարի խորհրդին հակառակ, ինչի պատճառով լիրայի փոխարժեքը ռեկորդային ցածր մակարդակի է հասել եւ մեծացրել ծախսերը մի երկրում, որը կախված է նյութերի եւ էներգիայի ներմուծումից։ 2021 թվականի աշնանը երկրում գնաճը սկսել է էլ ավելի ուժեղանալ՝ լիրան կտրուկ անկում է ապրել այն բանից հետո, երբ երկրի Կենտրոնական բանկը նվազեցրել է փոխարժեքը՝ մինչեւ 14 տոկոս: Իսկ 2022 թվականին Ուկրաինա ռուսական ներխուժման տնտեսական հետեւանքները եւ լիրայի շարունակական անկումը խթանել են գնաճը: 2021 թվականին արժույթը դոլարի նկատմամբ թուլացել է 44 տոկոսով, իսկ այս տարի՝ եւս 27-ով։ 2018 թվականից նախագահը աշխատանքից ազատել է կենտրոնական բանկի երեք ղեկավարների, եւ չնայած շարունակվող գնաճին եւ համաճարակի տնտեսական հետեւանքներին, 2021 թվականին նա հայտարարել է երկրում լիարժեք տիեզերական ծրագիր կազմակերպելու իր մտադրության մասին: Նախաձեռնությունը հակասություններ է առաջացրել քաղաքացիների շրջանում։ Թեեւ ոմանք ոգեւորվել են այդ գաղափարով, մյուսները կասկածի տակ ենն դրել դեպի Լուսին ծախսատար առաքելության նպատակահարմարությունը: Ընդ որում, առաքելության մասին հայտարարվել էր դեռեւս լիրայի փոխարժեքի աշնանային կտրուկ անկումից առաջ, սակայն նույնիսկ այս իրադարձություններից հետո Էրդողանը չի հրաժարվել տիեզերական ծրագրից, գրել է Deutsche Welle-ն։

Թենիսի աշխարհի 7-րդ ռակետ հույն Ստեֆանոս Ցիցիպասը Ցինցինատիի մրցաշարի եզրափակիչում է: «Արմենպրես»-ի հաղորդմամբ` Ցինցինատիի Մաստերս կարգի մրցաշարի տղամարդկանց մենախաղի կիսաեզրափակիչում Ստեֆանոս Ցիցիպասի մրցակիցը աշխարհի առաջին ռակետ ռուս Դանիիլ Մեդվեդն էր: 2 ժամ 26 րոպե տևողությամբ մրցախաղում Ցիցիպասն առավելության հասավ երեք սեթերից հետո` 6:7, 6:3, 3:6 հաշվով: Եզրափակիչում Ցիցիպասի մրցակիցն աշխարհի 152-րդ ռակետ խորվաթ Բորնա Չորիչն է: Ցինցինատիի մրցաշարն անցկացվում է օգոստոսի 15-22-ը: Առաջին անգամ Մաստերս կարգի այս մրցաշարը կայացել է 1899 թվականին: Այն դասվում է թենիսի Մաստերս 1000 կարգի մրցաշարերին: Տղամարդկանց մենախաղի գործող չեմպիոնը Գերմանիան ներկայացնող Ալեքսանդր Զվերևն է, իսկ կանանց մրցաշարում` Էշլի Բարտին:

Հայաստանի ֆուտբոլի Մ-17 հավաքականը Մոլդովայում երկրորդ ընկերական հանդիպումն անցկացրեց Մոլդովայի Մ-19 ընտրանու հետ։ «Արմենպրես»-ի հաղորդմամբ` այս մասին գրում է Հայաստանի ֆուտբոլի ֆեդերացիան: Հայաստանի հավաքականը հաղթեց մրցակցին 2:0 հաշվով: Հայաստանի Մ-17 տարեկանների հավաքականի մեկնարկային կազմն ուներ հետևյալ տեսքը` 12. Էդգար Ֆիթլիջյան, 3. Դավիթ Ղազարյան, 4. Ալեքսանդր Պետրոսյան, 5. Պետիկ Մանուկյան, 7. Ալբերտ Մարտոյան, 9. Արթուր Ղարիբյան, 10. Դավիթ Ղիասյան, 11. Գևորգ Գալստյան, 13. Ստեփան Գիգոլյան, 17. Արամ Բաղդասարյան, 19. Համլետ Ալեքսանյան:

Ռուս մասնագետները ուշադիր ուսումնասիրում են Կիևին հանձնված արևմտյան գրավված զենքերը և արդեն գիտեն, թե ինչպես վարվել դրանց հետ և ինչպես հակազդել դրանց, ասել է ՌԴ պաշտպանության նախարար Սերգեյ Շոյգուն «Վեստի Նեդելի» ծրագրին տված հարցազրույցում: «Իհարկե, դրանով զբաղվում է և՛ մեր գիտությունը, և՛ մեր արդյունաբերությունը, մենք երկու կողմից ենք նայում, նախ՝ այս զենքի դեմ պայքարելու հնարավորությունները, ինչպես և ինչով կարելի է հակադարձել, մյուս կողմից՝ ինչպես կարելի է հարվածել դրա հիմնական թերություններին: Այս աշխատանքն ընթացքի մեջ է, ընդհանուր առմամբ, բավականին հաջող է ընթանում»,- ասել է նախարարը։

«Վեոլիա Ջուր» ընկերությունը տեղեկացնում է իր հաճախորդներին և սպառողներին, որ վթարային աշխատանքներով պայմանավորված ս.թ. օգոստոսի 21-ին ժամը 12:00-19:00-ն կդադարեցվի Եղեգնաձոր քաղաքի Մոմիկի 2, 4, 6 զույգ շենքերի, Պ.Սեվակի 2, 4/2-4/1-4/6-7-8- զույգ շենքերի, Միկոյանի 3 շենքի ջրամատակարարումը: Ընկերությունը հայցում է սպառողների ներողամտությունը պատճառված անհանգստության և կանխավ շնորհակալություն հայտնում ըմբռնման համար:

Թենիսի աշխարհի 152-րդ ռակետ, խորվաթ Բորնա Չորիչը Ցինցինատիի մրցաշարի եզրափակիչում է: «Արմենպրես»-ի հաղորդմամբ` Ցինցինատիի մրցաշարի տղամարդկանց մենախաղի կիսաեզրափակիչում մրցեցին Մեծ Բրիտանիան ներկայացնող Կամերոն Նորիսը և խորվաթ Բորնա Չորիչը: 1 ժամ 31 րոպե ձգված մրցախաղում Չորիչն առավելության հասավ երկու սեթերից հետո` 6:3, 6:4 հաշվով: Ցինցինատիի մրցաշարն անցկացվում է օգոստոսի 15-22-ը: Առաջին անգամ Մաստերս կարգի այս մրցաշարը կայացել է 1899 թվականին: Այն դասվում է թենիսի Մաստերս 1000 կարգի մրցաշարերին: Տղամարդկանց մենախաղի գործող չեմպիոնը Գերմանիան ներկայացնող Ալեքսանդր Զվերևն է, իսկ կանանց մրցաշարում` Էշլի Բարտին:

Չինաստանի ծովային անվտանգության վարչակազմը հայտնել է, որ օգոստոսի 22-ին Չինաստանը զորավարժություններ կանցկացնի Արևելաչինական ծովում՝ արևելյան Չժեցզյան նահանգի մոտակայքում։ Չժեցզյան նահանգի ծովային անվտանգության վարչության տվյալներով՝ զորավարժությունները կանցկացվեն օգոստոսի 22-ին՝ ժամը 02.00-ից: «Զորավարժությունների ընթացքում նավերի անցումը դեպի այդ գոտիներ կարգելվի»,- ասվում է հաղորդագրության մեջ։ Այլ մանրամասներ չեն հաղորդվում։

Օգոստոսի 18-21-ը ԱԻՆ ՓԾ Ճգնաժամային կառավարման ազգային կենտրոնում ստացվել է 6 ահազանգ՝ հանրապետության տարբեր տարածքներում տեղի ունեցած ճանապարհատրանսպորտային պատահարների վերաբերյալ: Մասնավորապես՝ Երևանում, Արմավիրի մարզի Էջմիածին, Տավուշի մարզի Նոյեմբերյան, Արագածոտնի մարզի Աշտարակ քաղաքներում, Երևան-Երասխ և Երևան-Գյումրի ավտոճանապարհներին։ Դեպքի վայր ժամանած փրկարարները հոսանքազրկել են ավտոմեքենաները, փակել գազի բալոնների փականները, կատարել ճանապարհի լվացման աշխատանքներ և սահմանազատել տարածքը: Կա 10 տուժած։

Օգոստոսի 18-21-ը ԱԻՆ ՓԾ ճգնաժամային կառավարման ազգային կենտրոնում 8 ահազանգ է ստացվել հանրապետության տարբեր տարածքներում քաղաքացիներին օգնություն ցուցաբերելու վերաբերյալ: Մասնավորապես՝ Երևանում, Շիրակի մարզի Գյումրի և Արագածոտնի մարզի Աշտարակ քաղաքներում: Դեպքի վայր ժամանած փրկարարները քաղաքացիներին ցուցաբերել են համապատասխան օգնություն:

Այսօր՝ օգոստոսի 21-ին, արտակարգ դեպք է տեղի ունեցել Երևանում: Ժամը 05:50-ի սահմաններում պարեկները Արաբկիր վարչական շրջանի Մամիկոնյանց փողոցում ծառայություն կատարելիս են եղել, երբ նկատել են, որ նշված փողոցի թիվ 8ա շենքի մոտակայքում ծուխ է նկատվում: Պարեկները, գնալով ծխի հետքով, պարզել են, որ պայթյուն է տեղի ունեցել էլեկտրաենթակայանում, ինչի հետևանքով էլ առաջացել է ծուխ: Ինչպես հայտնում է shamshyan.com-ը, տեղեկությունը փոխանցվել է ոստիկանության օպերատիվ կառավարման կենտրոն, որտեղից էլ՝ ՀՀ արտակարգ իրավիճակների նախարարության փրկարար ծառայության 911 ճգնաժամային կառավարման ազգային կենտրոն, ապա օպերատիվորեն ժամանած թիվ 5 հրշեջ-փրկարարական ջոկատից ժամանած հրշեջները մարել են կրակը: Ըստ նախնական տեղեկությունների՝ այրվել է ապահովիչների վահանակը և մալուխ:

Ճապոնիան դիտարկում է 1000 հեռահար թեւավոր հրթիռներ տեղակայելու հնարավորությունը՝ Չինաստանի դեմ իր հակահարձակման կարողությունը բարձրացնելու համար, հայտնում է տեղական Yomiuri թերթը: Դրանք մոդիֆիկացված հրթիռներ կլինեն, որոնց հեռահարությունը 100 կմ-ից կհասցվի 1000 կմ-ի, գրում է թերթը՝ վկայակոչելով կառավարական աղբյուրներին: Դրանք կտեղակայվեն հիմնականում Նանսեյ հարավային կղզիների շուրջ եւ կկարողանան հասնել Հյուսիսային Կորեայի եւ Չինաստանի առափնյա շրջաններ: Ճապոնիան, որի հետպատերազմյան սահմանադրությունը դատապարտում է ռազմական գործողությունները, ինչը նշանակում է, որ նա կարող է օգտագործել իր բանակը միայն ինքնապաշտպանության համար, վերջին տարիներին ավելացրել է իր ռազմական ծախսերն ու որդեգրել ավելի կոշտ ռազմավարություն: Այնուամենայնիվ, այն ձեռնպահ է մնում հեռահար հրթիռների տեղակայումից, ինչը նրա սահմանափակումներից մեկն է: Տարածաշրջանային լարվածությունն այս ամիս սրվել է, ինչը պայմանավորված է ԱՄՆ Ներկայացուցիչների պալատի նախագահ Նենսի Փելոսիի Թայվան կատարած այցով: Պեկինը հրթիռներ է արձակել Թայվանի մերձակայքում եւ Ճապոնիայի բացառիկ տնտեսական գոտում, գրում է Reuters լրատվական գործակալությունը։

Իտալիայից ժամանած զբոսաշրջիկը Կուբայում դարձել է կապիկի ծաղիկի առաջին վարակակիրը, նրա վիճակը ծայրահեղ ծանր է, հայտնել են երկրի առողջապահության նախարարությունից։ «Ազգությամբ իտալացի տղամարդը Կուբա է ժամանել որպես զբոսաշրջիկ այս տարվա օգոստոսի 15-ին: Հիվանդը ծայրահեղ ծանր վիճակում է, նրա կյանքին վտանգ է սպառնում»,- ասվում է առողջապահության նախարարության կայքում։ Զբոսաշրջիկը, ով հասցրել է այցելել մի քանի շրջան, օգոստոսի 17-ին իրեն վատ է զգացել և հաջորդ օրը դիմել է բժշկի, երբ ախտանշաններն ավելի են սրվել։ Նա սրտի կանգով տեղափոխվել է հիվանդանոց, սակայն բժիշկներին հաջողվել է փրկել նրան: «Հիվանդության ծանրությունը պայմանավորված է «ուղեկցող պատճառներով»»,-ասվում է նախարարության հաղորդագրության մեջ:

Հնագիտական գանձերը, ներառյալ քարե դարի խեցեղենը եւ միջնադարյան գերեզմանները՝ թրերով եւ զարդերով, բացահայտել են Գերմանիայի Դանուբ գետի մոտ մարդկանց բնակության երկար պատմությունը, գրում է Live Science-ը։: Գերմանիայի հարավ-արեւմուտքում Տուտլինգեն քաղաքի Գայզինգեն-Գուտմադինգեն թաղամասում հնագետները հայտնաբերել են նեոլիթյան կամ քարե դարի մեկ գերեզման, որը թվագրվում է մ.թ.ա. երրորդ հազարամյակին: Նրանք նաեւ հայտնաբերել են վաղ միջնադարյան 140 գերեզմաններ, որոնք թվագրվում են մ.թ. 500-600 թվականներին, որտեղ հայտնաբերվել են այնպիսի առարկաներ, ինչպիսիք են սրերը, նիզակները, վահանները, ոսկրե սանրերը, բաժակներն ու ականջօղերը: Նախկինում բնակեցման մասին առաջին գրավոր վկայությունների հիման վրա տարածքը թվագրվել է 1273 թվականին։

Օգոստոսի 21-ին, ժամը 09։04-ին Տավուշի մարզային ճգնաժամային կառավարման կենտրոն ահազանգ է ստացվել, որ Սևքար գյուղում այրվում է անասնագոմ։ Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։ Պարզվել է, որ Սևքար գյուղի 19-րդ փողոցում այրվում են անասնագոմի տանիքը (մոտ 30 քմ) և կուտակած անասնակեր՝ 3 տոննա։ Հրդեհը մեկուսացվել է ժամը 11։52-ին։

Արմավիրի մարզային ճգնաժամային կառավարման կենտրոնն օգոստոսի 20-ին, ժամը 21:29-ին ահազանգ է ստացել, որ Էջմիածին-Գայ ավտոճանապարհին տեղի է ունեցել ՃՏՊ, ավտոմեքենաներից մեկը այրվում է և կա արգելափակված քաղաքացի: Ինչպես «Արմենպրես»-ին տեղեկացրին ՀՀ արտակարգ իրավիճակների նախարարությունից, դեպքի վայր է մեկնել ԱԻՆ Փրկարար ծառայության մարզային փրկարարական վարչության հրշեջ-փրկարարական ջոկատի մեկ մարտական հաշվարկ։ «Պարզվել է, որ Էջմիածին-Մարգարա ավտոճանապարհի 6-րդ կմ-ին բախվել են «Opel Astra G» (վարորդ՝ Ա. Ա., ծնված 1986 թ.) և «Opel Zafira» (վարորդ՝ Ա. Ա., ծնված 1979 թ.) մակնիշների ավտոմեքենաները. վերջինս բռնկվել է: «Opel Astra G» ավտոմեքենայի վարորդը հոսպիտալացվել է Էջմիածնի ԲԿ, այնուհետև տեղափոխվել՝ Երևան»,- ասվում է հաղորդագրության մեջ: Ըստ աղբյուրի՝ հրդեհը մեկուսացվել է ժամը 21:42-ին, մարվել՝ 21:52-ին: Այրվել է «Opel Zafira» մակնիշի ավտոմեքենան. ներսում հայտնաբերվել է վարորդի այրված դին:

Հայաստանի շախմատի տղամարդկանց թիմի նախկին ադամ Լևոն Արոնյանը շարունակում է մրցելույթները FTX Crypto Cup արագ շախմատի մրցաշարում: «Արմենպրես»-ի հաղորդմամբ` արագ շախմատի առցանց մրցաշարի 4-րդ տուրում հայ գրոսմայստերի մրցակիցը ԱՄՆ ներկայացուցիչ Հանս Նիմանն էր: 4 պարտիաների արդյունքում Արոնյանն առավելության է հասել 2,5-1,5 հաշվով: Հայ գրոսմայստերն այժմ 5-րդն տեղում է մրցաշարային աղյուսակում: Առաջատարն աշխարհի չեմպիոն Մագնուս Կարլսենն է: Արագ շախմատի այս մրցաշարը բաղկացած է 7 տուրից, մրցանակային ֆոնդը կազմում է 210 հազար ԱՄՆ դոլար:

Սոմալիի ուժերը ոչնչացրել են «Աշ Շաբաբ»-ի գրոհայիններին, որոնք պաշարել էին երկրի մայրաքաղաք Մոգադիշոյում գտնվող հյուրանոցը, հայտնում է France Presse գործակալությունը՝ վկայակոչելով երկրի անվտանգության ուժերի հրամանատարին։ «Անվտանգության ուժերը դադարեցրել են պաշարումը, զինյալները մեռած են, վերջին մեկ ժամվա ընթացքում մենք շենքից ոչ մի կրակոց չենք լսել», – մեջբերում է գործակալությունը հրամանատարի խոսքերը։ Ավելի վաղ Somali Guardian-ը հայտնել էր, որ Սոմալիի Hayat հյուրանոցի վրա «Ալ-Շաբաբ»-ի գրոհայինների հարձակման զոհերի թիվը հասել է 40-ի, ավելի քան 70-ը վիրավորվել է։