Կհարձակվի՞ Ռուսաստանը Ուկրաինայի վրա․ ԱՄՆ-ում թեման կրկին ակտուալ է

Սպիտակ տան ազգային անվտանգության հարցերով խորհրդական Ջեյք Սալիվանն ընդգծել է, որ ԱՄՆ վարչակազմը դեռ պատրաստ չէ հաստատել հետախուզական ծառայությունների տեղեկություններն այն մասին, որ Ռուսաստանն առաջիկա օրերին ծրագրում է ռազմական ներխուժում Ուկրաինա, սակայն Միացյալ Նահանգները կփորձի օգնել՝ կանխելու ցանկացած հանկարծակի հարձակում, հաղորդում է «Ամերիկայի ձայն»-ը։

«Մենք ի վիճակի չենք ճշգրիտ կանխատեսել ներխուժման օրը, բայց մենք արդեն որոշ ժամանակ է՝ ասում ենք, որ եկել է ժամանակը, երբ Ռուսաստանի և Ուկրաինայի միջև լուրջ ռազմական գործողություններ կարող են սկսվել ցանկացած օր, ներառյալ Օլիմպիական խաղերի եզրափակիչ շաբաթը»,- ասել է Սալիվանը CNN-ի «Երկրի դրության մասին» հաղորդաշարի եթերում։     

«Ռուսաստանի իշխանություններն ուժեր են կուտակում, մանևրներ են իրականացնում, և դրանից ակնհայտ է դառանում, որ մոտ ժամանակներս խոշոր ռազմական գործողությունների հավանականություն կա»,- ասել է Սալիվանը։

Հիշեցնենք, որ Բայդենի վարչակազմը Ուկրաինայում գտնվող ԱՄՆ քաղաքացիներին կոչ է արել հնարավորինս շուտ լքել երկիրը՝ ներխուժման սպառնալիքի պատճառով։