Լրահոս

Անթալիայի դիվանագիտական ֆորումի նման ֆորումները հանրային դիրքավորման, մեսիջներ փոխանակելու, քաղաքական սիրախաղեր սկսելու կամ դրանք մերժելու հարթակներ են։ Մյուս կողմից՝ որոշակի տեսլականի հանրայնացում, թե ինչպիսի պատկերացում ունեն տարածաշրջանային պետություններն իրենք իրենց տեղի, դերի և հարաբերությունների կարգավորման մասով։ Բայց դժվարանում եմ ասել՝ հայկական կողմն առհաարակ ունի՞ արտաքին քաղաքական օրակարգ, որովհետև այն սովորաբար ածանցվում է ՀՀ վարչապետի արտաքին և պետական քաղաքականության՝ նեղ-սուբյեկտիվ և ոչ միշտ հիմնավորված, երբեմն՝ արկածախնդիր մոտեցումներին, Aysor.am-ի թղթակցի հետ զրույցում ասաց քաղաքագետ Ալեն Ղոնդյանը՝ անդրադառնալով հայաստանյան կողմի՝ ֆորումին մասնակցության փաստին։ Քաղաքագետի համոզմամբ՝ Անթալիայի դիվանագիտական ֆորումում ՀՀ արտգործնախարարն իր ելույթը պետք է ձևակերպի Նիկոլ Փաշինյանի՝ խիստ վիճելի թեզերի ներքո կամ խոսի ոչնչի մասին։ «Եթե մենք Անթալիայի ֆորումին ՀՀ մասնակցության հիմք ընդունենք ԱԺ ամբիոնից արտգործնախարար Արարատ Միրզոյանի՝ հայ-թուրքական դիվանագիտական մեկնարկի մասին պատմությունը, երբ նա այդ ամբողջ պրոցեսը հանգեցրեց Չավուշօղլուի հետ հանդիպմանը հընթացս երկու բառ փոխանակելուն, ապա նմանօրինակ կարևորագույն, ես կասեի՝ ռազմավարական նշանակության հարցին նման մոտեցումն, իհարկե, խիստ անլուրջ է։ Անլրջության էլեմենտ է նաև այն, թե ում նշանակեցին որպես հայկական կողմի բանագնաց՝ ի տարբերություն թուրքական կողմի, ով, առհասարակ, գիտի՝ դիվանագիտությունն ինչ է, թե ինչպես են ազգային շահերը սպասարկում և ինչպես պետք է դիրքավորվել»,- ասաց քաղաքագետը։ Հիշեցնենք, որ ՀՀ ԱԳՆ մամուլի խոսնակ Վահան Հունանյանի տեղեկացմամբ՝ Հայաստանի Հանրապետության արտգործնախարար Արարատ Միրզոյանը կմասնակցի Անթալիայի դիվանագիտական ֆորումին։ Այն նախատեսված է անցկացնել մարտի 11-ից 13-ը։

Կիրակի Ռուսաստանի մի քանի խոշոր քաղաքներում հակապատերազմական ցույցեր են եղել: Դաշնության լրատվամիջոցները հայտնում են ավելի քան 3500 ձերբակալվածի մասին: Հավաքվածները հայտարարել են, որ այս պատերազմը միայն մեկ մարդու է պետք:

ՌԴ նախագահ Վլադիմիր Պուտինը Եվրոպական խորհրդի նախագահ Շառլ Միշելի հետ հեռախոսազրույցի ժամանակ ԵԽ-ին կոչ է արել ազդեցություն բանեցնել ուկրաինական իշխանությունների վրա և հարկադրել նրանց՝ հարգելու հումանիտար իրավունքը, հայտնում է Կրեմլի մամուլի ծառայությունը։ «ՌԴ նախագահը նշել է, որ ռուս զինծառայողները մի քանի անգամ լռության ռեժիմ են հայտարարել՝ հումանիտար միջանցքներով բնակչության տարհանման համար, սակայն Ուկրաինայի ազգային գումարտակները խոչընդոտում են դրան՝ խաղաղ բնակիչների նկատմամբ գործադրելով բռնություն ու հրահրելով սադրանքներ»,- նշված է հաղորդագրությունում։ Ըստ պաշտոնական տեղեկագրի՝ ՌԴ նախագահը ԵԽ-ին կոչ է արել իրական ներդրում ունենալ մարդկանց կյանքը փրկելու գործում, ազդել Կիևի վրա և հարկադրել նրան՝ հարգելու մարդասիրական իրավունքը։ Պուտինը նշել է նաև, որ ՌԴ ԶՈՒ-ն ամեն ինչ անում է՝ Ուկրաինայի խաղաղ բնակչության կյանքը չվտանգելու համար։

ՀՀ քննչական կոմիտեի զինվորական քննչական գլխավոր վարչության ութերորդ կայազորային քննչական բաժնում ՀՀ քրեական օրենսգրքի 104-րդ հոդվածի 2-րդ մասի 1-ին, 2-րդ և 13-րդ կետերով հարուցվել է քրեական գործ՝ մեկ զինծառայողի սպանության, ևս մեկ զինծառայողի հրազենային վիրավորում ստանալու դեպքի առթիվ: Ըստ նախնական տեղեկությունների` 2022թ. մարտի 7-ին՝ ժամը 12:55-ին, ՀՀ ՊՆ N զորամասի պահպանության տեղամասի մարտական հենակետում ինժեներական աշխատանքներ կատարելիս, Ադրբեջանի զինված ուժերի ստորաբաժանումների կողմից արձակված կրակոցներից, մահացու հրազենային վիրավորում է ստացել նույն զորամասի պայմանագրային զինծառայող, սերժանտ Հրաչ Արամի Մանասարյանը՝ ծնված 1985թ., իսկ պայմանագրային մեկ զինծառայող, շարքային (ծնված 1990թ.) ստացել է հրազենային վիրավորում և տեղափոխվել բժշկական կենտրոն: Կատարվում է նախաքննություն:

Ադրբեջանական կողմը մարտի 7֊ին 60 մմ տրամաչափի ականանետով թիրախավորել է Խրամորթ գյուղին հարակից գերեզմանոցը` արձակելով 2 ական, տեղեկացնում է Արցախի Հանրապետության Պաշտպանության բանակը։ Հրադադարի խախտման հետևանքով տուժածներ չկան։ «Միջադեպի մասին հաղորդվել է ՌԴ խաղաղապահ զորակազմի հրամանատարությանը»,- նշված է հաղորդագրությունում։ Ավելի վաղ Արցախի ՊԲ հայտնել էր, որ մարտի 7-ին ադրբեջանական զինուժը հերթական անգամ խախտել է հրադադրի պահպանման ռեժիմը Ասկերանի շրջանի Խրամորթ գյուղի գերեզմանատան ուղղությամբ:

Ռուս-ուկրաինական պատերազմի ծանր հետևանքները Հայաստանը կզգա աշնանը: Մասնագետների կանխատեսմամբ, օգոստոսին ցորենի դեֆիցիտ կունենանք: Սովորաբար այդ ժամանակ է Հայաստանը ներկրում և ամբարում ռուսական և ուկրաինական հացահատիկը: ՔՊ-ականները չեն հասկանում, թե ինչու են բոլորը անհանգստացած ցորենի համար:

Այսօր գրեթե մեկ ժամ շիրակցիները փակ են պահել Գյումրի-Երևան ավտոմայրուղին: Երեկ ֆերմերները պարզել են, որ կառավարությունը սուբսիդավորելու է միայն մինչև 3 հա հողատարածք ունեցողների պարարտանյութի ծախսը: Բայց շատերը մինչեւ 20 հա ցանքատարածք ունեն, իսկ պարարտանյութի գինը երեք անգամ թանկացել է: էկոնոմիկայի նախարարությանը չորս օր ժամանակ են տվել՝ հարցին լուծում տալու համար, հակառակ դեպքում հզոր ցույցեր են խոստանում կառավարության դեմ

ԵՄ-ն Չինաստանին հորդորում է ազդել Ռուսաստանի վրա՝ Ուկրաինայում ռազմական գործողությունները դադարեցնելու հարցում, հայտարարել է ԵՄ ԱԳՆ ներկայացուցիչ Պետեր Ստանոն՝ Բրյուսելում։ «Մեր նպատակն է՝ առավելագույնս ճնշել Ռուսաստանին, որպեսզի ռազմական գործողությունները դադարեն։ Չինաստանը Ռուսաստանի վրա ազդելու ներուժ ունի, մենք ցանկանում ենք, որ Չինաստանը բանեցնի իր ազդեցությունն ու Ռուսաստանին հարկադրի հրադադար հայտարարել»,- ասել է Ստանոն։

«Վրացական երազանք-Ժողովրդավարական Վրաստան» իշխող կուսակցության խորհրդարանական խմբակցության ղեկավար Մամուկա Մդինարաձեն արձագանքել է Ուկրաինայի իշխանություններին, որոնք դժգոհություն են հայտնել վրացական կաթնամթերքը Ռուսաստան արտահանելու կապակցությամբ։ Վրացական իշխանության ներկայացուցիչը նշել է, որ Ուկրաինայից հնչած գնահատականները ցավալի են իրենց համար։ Հիշատակելով, մասնավորապես, Ուկրաինայի ԱԳՆ-ի, ինչպես նաև Գերագույն Ռադայի խոսնակ Ռուսլան Ստեֆանչուկի հայտարարություններն, ըստ որոնց վրացական իշխանությունները, Ուկրաինայում ռազմական գործողությունների ֆոնին, որոշել են առևտուր սկսել Ռուսաստանի հետ, որն իր հերթին կաթնամթերք արտադրող վրացական 15 ընկերության թույլատրել է մուտք գործել ռուսական շուկա, Վրաստանի իշխող խմբակցության ղեկավարն ասել է․ «Ուկրաինայի հետ մեր առանձնահատուկ հարաբերությունների, ինչպես նաև Վրաստանի կողմից Ուկրաինային քաղաքական ու հումանիտար աջակցություն հատկացնելու ֆոնին մեզ համար ցավալի են Ուկրաինայի իշխանությունների առանձին ներկայացուցիչների բացասական գնահատականները՝ Վրաստանի վերաբերյալ։ Երեկ մենք նմանատիպ գնահատական լսեցինք Ուկրաինայի խորհրդարանի ներկայացուցչի կողմից, որը, որքան էլ զարմանալի է, այս դեպքում վերաբերում էր կաթնամթերքին»,- ասել է Մդինարաձեն։ Նա հավելել է, որ վրացական որոշ ընկերություններ ռուսական շուկայում ներկայացվածության վերաբերյալ ռուսական կողմի հետ բանակցում են դեռ 2020 թվականից։ Վրացական իշխող խմբակցության ներկայացուցիրը վերահաստատել է նաև Ռուսաստանի նկատմամբ պատժամիջոցների փաթեթին չմիանալու՝ իր երկրի իշխանությունների դիրքորոշումը։

Մարտի 7-ին ադրբեջանական զինուժը հերթական անգամ խախտել է հրադադրի պահպանման ռեժիմը Ասկերանի շրջանի Խրամորթ գյուղի գերեզմանատան ուղղությամբ: Այս մասին հաղորդում է Արցախի ՊԲ-ն: «Միջադեպի արդյունքում հայկական կողմից տուժածներ չկան: Հրադադարի խախտման դեպքի վերաբերյալ հավելյալ տեղեկություններ կհաղորդենք ավելի ուշ»,- ասված է հաղորդագրության մեջ:

«Մենք էլ ենք ուզում, որ խաղաղության դարաշրջան լինի, բայց հարցն այն է, որ ուզելը մի բան է, իրականությունը՝ մեկ այլ բան: Ադրբեջանի պահվածքի մեջ մենք չենք տեսնում որեւէ փոփոխություն»,- Yerkir.am-ի հետ զրույցում ասել է Արցախի հանրապետության արտաքին գործերի նախարար Դավիթ Բաբայանը՝ ընդգծելով, որ Արցախում խաղաղության միակ գրավականը ռուս խաղաղապահներն են: Հարցազրույցը՝ ստորև․ -Մարտի 6-ի առավոտյան ադրբեջանական կողմը Խրամորթի ուղղությամբ ինտենսիվ կրակ է արձակել։ Դրան նախորդող եւ հաջորդող օրերին եւս սադրանքներ են եղել։ Հայաստանյան քաղաքական գործիչները հայտնում են, որ Խրամորթում ստեղծված իրավիճակը բավականին վտանգավոր է: Ի՞նչ է այդտեղ կատարվում: -Արցախը հիմա յուրահատուկ իրավիճակում է՝ ամբողջ երկիրը դարձել է սահմանամերձ: Ամեն ինչ պետք է անենք, որ կանգնած մնանք մեր հողում։ Ես վստահ եմ, որ մեր ժողովուրդն ունի այդ տոկունությունը: Ադրբեջանի սադրանքներն ունեն միայն մեկ պատճառ՝ հայատյացությունը, ծավալապաշտական ծրագրերը, ուրիշ ոչ մի պատճառ չկա, մնացածն առիթներ են: Ադրբեջանի պահվածքը նորություն չէ, որ մենք զարմանում ենք, փորձում վերլուծել՝ ինչո՞ւ, ո՞նց: -Փոխադարձ «դրական» ազդակներ» են փոխանցվում Հայաստանի եւ Ադրբեջանի իշխող վարչախմբերի միջեւ` «խաղաղության դարաշրջան» բացելու համար. այս համատեքստում պետք է, չէ՞, Ադրբեջանը սադրանքների չգնար: -Արցախում խաղաղության միակ գրավականը ռուս խաղաղապահներն են: Իհարկե, մեր զինված ուժերը եւ տոկունությունը կան, բայց նոր պատերազմ չլինելու հանգամանքը ռուս խաղաղապահների ներկայությունն է: Մենք էլ ենք ուզում, որ խաղաղության դարաշրջան լինի, բայց հարցն այն է, որ ուզելը մի բան է, իրականությունը՝ մեկ այլ բան: Ադրբեջանի պահվածքի մեջ մենք չենք տեսնում որեւէ փոփոխություն: -Ռուս-ուկրաինական պատերազմը կարո՞ղ է ինչ-որ իմաստով անդրադառնալ նաեւ Արցախի ճակատագրի վրա: -Իհարկե, դրանք փոխկապակցված գործընթացներ են, քանի որ աշխարհում հիմա չկան ազատ տարածքներ, որտեղ կարելի է գլոբալ աշխարհաքաղաքական վեկտորի համար դիրքերն ուժեղացնել: Հիմա ամենուր կարմիր գծեր են, եւ յուրաքանչյուր ուղղությամբ շահերի բախումը անմիջապես ազդում է այլ տարածաշրջանների վրա: Ադրբեջանը եւ Թուրքիան աղոթում են, որ Ռուսաստանը թուլանա եւ ձախողի: - Արցախի սահմանամերձ գյուղերի բնակիչներին զինելու անհրաժեշտություն տեսնո՞ւմ եք ՝ ինքնապաշտպանություն կազմակերպելու համար: -Թե Արցախն ինչը ոնց է անելու՝ թողնենք մի կողմ: Հիմա առաջին փուլում պետք է ամեն ինչ անենք, որպեսզի պահպանենք այն, ինչը մնացել է Արցախից: Երկրորդը՝ այնպես անենք, որ մեր աշխատանքներում անվերապահորեն հետեւենք մեր հրամայականին՝ քիչ խոսենք, շատ գործենք, չքաղաքականացնենք, չշահարկենք ամեն ինչ: -Քաղաքական շրջանակներում քննարկվում է Միութենական պետությանը Հայաստանի հնարավոր անդամակցության հարցը: Եթե այս քննարկումները, այդուհանդերձ, իրողություն դառնան, ինչպե՞ս եք տեսնում Արցախի ճակատագիրը․ Շուշին եւ Հադրութը վերադարձնելու մտքեր են գեներացվում, ի՞նչ կասեք: -Մեզ համար բոլոր շրջաններն էլ կարեւոր են, մեր պատմական տարածքներն են, որոնք այս պահին գրավվել են, մենք պետք է երբեք սա չմոռանանք: Ոչ ոք սկուտեղի վրա չի տալու մեզ մեր հայրենիքը: Վերականգնելո՞ւ ենք մեր երբեմնի Մեծ Հայքը․ եթե արժանի լինենք, ինչը կախված է բացառապես մեզնից: Ինչպիսի՞ երկիր ենք կառուցում, ինչպիսի՞ աշխարհաքաղաքականությանն ենք կողմնակից, ի՞նչ կողմնորոշում ունենք, կի՞րթ ենք, տո՞ւրք ենք տալիս ինտելեկտին եւ հայրենասիրությանը, թե՞ ոչ: Ոչ ոք հենց այնպես չի տալու մեզ այն, ինչն ուզում ենք: Ամեն ինչ կախված է մեզնից: Առհասարակ, հայ-ռուսական բարեկամությունը եղբայրություն է, սա պետք է շատ լավ հասկանանք: Այն մարդիկ, որոնք ունեն արցախատյաց քաղաքականություն, ինչը նաեւ հայատյացության դրսեւորում է, նրանք միշտ խփում են եւ՛ Արցախին, եւ՛ Ռուսաստանին: Ինչո՞ւ, որովհետեւ հասկանում են՝ առանց Արցախ չկա Հայաստան, որ հայոց պետականությունը կկործանվի: Արցախը մեր պետականության հիմնասյուներից մեկն է: Նաեւ հասկանում են, որ հանրությունը միայնակ չի կարող դիմակայել Թուրքիային եւ Ադրբեջանին, եւ պետք է Ռուսաստանի հետ եղբայրական հարաբերություններ ունենալ: Սա չի նշանակում, որ մենք թշնամի ենք Արեւմուտքին, ամենեւին: Որպես ազգ՝ մենք ունենք հետաքրքիր առանձնահատկություն եւ հնարավորություն՝ պահպանել բոլորի հետ նորմալ հարաբերություններ, որովհետեւ ունենք Սփյուռք: Բայց մենք միայնակ ի վիճակի չենք։ Խփում են մեր հենասյուներին, մեկը՝ հասկանալով, մյուսը՝ չհասկանալով: Հասկանալով ուզում են կործանել հայոց պետականությունը: Շատ զգույշ պիտի լինենք, կարմիր գծեր են բոլորը, իսկ կարմիր գիծը արյուն է: -Արեւմուտքը հիմա շատ ուշիմ հետեւում է ռուս-ուկրաինական պատերազմին եւ աջակցություն է ցուցաբերում Ուկրաինային՝ բացահայտ: Հռոմի Պապն էլ երկու կարդինալ է ուղարկել Ուկրաինա՝ նշելով, թե քրիստոնյաները դեմ են պատերազմին, ասում են՝ խելագարություն է: Արցախյան 44-օրյա պատերազմի ժամանակ մենք չտեսանք այս համընդհանուր աջակցությունը, ինչո՞ւ: -Մենք բազմիցս ասել ենք, որ աշխարհաքաղաքականությունը բարդ երեւույթ է, եւ կա, դժբախտաբար, շահերի բախում: Մենք տեսնում ենք միջազգային իրավունքի, գաղափարների դեգրադացիա, քանի որ ամեն ինչ արդեն շահն է որոշում: Բոլորն ունեն իրենց շահերը։ Այս իրավիճակում խենթ գաղափարների, անիրատեսական հասկացությունների հետեւից չպետք է ընկնենք: Հասկանում եմ՝ շատ պատասխանատու պահ է, այլեւս այսպես-այնպես խաղալ չի լինի, սահմանափակվել է մեր հնարավորությունը, ամբողջ աշխարհում կարմիր գծեր են, կարմիր գիծն արյունով է գծվում: Պետք է լավ հասկանանք, թե ինչ է կատարվում, հույսներս անիրատեսական հասկացությունների հետ չկապենք, պետք է լինենք պրոֆեսիոնալ եւ հայրենասեր, ուրիշ ոչինչ: - Հանրությունը մեղադրում է Հայաստանի իշխանությանը՝ միջազգային հանրության, նաեւ ռուսական կողմի հետ դիվանագիտությունը տապալելու մեջ։ -Ես չեմ ուզում միջամտել Հայաստանի Հանրապետության ներքին գործընթացներին։ Ոչ թե չունեմ իմ կարծիքը կամ որեւէ մեկից վախենում եմ, այդպիսի բան չկա: Մենք պետք է հասկանանք, որ Արցախը պետք է լինի սրբություն։ Շատ ուժեր, շատ կեղտոտ մարդիկ ուզում են Արցախը դարձնել թիրախ, որ խփեն, դիվիդենդներ շահեն, հայոց պետականությունը կործանվի։ Թույլ չենք տալու: Ներքին քաղաքական գործընթացներին միայն հենց այս պատճառով չեմ խառնվելու: Պատասխանատվություն ունենալով հայոց պետականության հանդեպ՝ մենք չենք ուզում միջամտել եւ խոսել այս կամ այն հարցերի մասին: Կրկնում եմ՝ ոչ թե չունենք կարծիք, կողմնորոշում կամ վախենում ենք, ո՛չ, մենք պարզապես մտահոգված ենք մեր ժողովրդի ապագայով: Մեր պատմության ամենածանր փուլում ենք։ Բազմաթիվ անգամներ կորցրել ենք մեր պետականությունը, բայց չի եղել հայ ժողովրդի վերացման գործընթաց: Կորցրել ենք պետականությունը, բայց ժողովուրդը գոյատեւել ու վերականգնվել է: Հիմա կամ լինելու ենք, կամ չենք լինելու:

Այսօր՝ մարտի 7-ին, խոշոր ավտովթար է տեղի ունեցել Երևանում։ Ժամը 12։40-ի սահմաններում Շինարարների 31 հասցեի դիմաց բախվել են Երևանի բնակիչներ՝ 22-ամյա Ռոբերտ Անտոնյանի վարած ՎԱԶ 2121 մակնիշի և 47-ամյա Վաչագան Հարությունյանի վարած Fiat մակնիշի ավտոմեքենաները։ Գագիկ Շամշյանը հայտնում է, որ վթարի հետևանքով Նիվան կողաշրջվել է։ Ըստ նախնական տեղեկությունների՝ վթարի հետևանքով տուժածներ չկան։

Գյումրի քաղաքի 63-ամյա բնակչի մահվան դեպքով ձերբակալվել է մահացածի եղբորորդին։ Տեղեկությունը հայտնում է ՀՀ քննչական կոմիտեն։ Ըստ հաղորդագրության` մարտի 5-ին Գյումրի քաղաքի Մ. Սարգսյան փողոցի տներից մեկում հայտնաբերվել է նույն հասցեում բնակվող 63-ամյա բնակչի դին: Արտաքին զննությամբ տուժածի գլխի շրջանում հայտնաբերվել են արնանման հետքեր և քերծվածքներ: Նախաքննության ընթացքում կատարվել է դեպքի վայրի զննություն, վերցվել են փորձանմուշներ, նշանակվել է դիակի դատաբժշկական փորձաքննություն: Նույն օրը հիշյալ հանցագործությունը կատարելու կասկածանքով ձերբակալվել է տուժածի եղբորորդին` ծնված 1984 թվականին: Դեպքի առթիվ ՀՀ քրեական օրենսգրքի համապատասխան հոդվածով հարուցվել է քրեական գործ։ Նախաքննությունը շարունակվում է:

Թուրքիայում կտրուկ թանկացել է արևածաղկի ձեթը: Թուրքիան արևածաղկի ձեթի 70 տոկոսը ներկրում է Ուկրաինայից և Ռուսաստանից։

Մարտի 7-ին, ժամը 14:10-ին Լոռու մարզային ճգնաժամային կառավարման կենտրոն տեղեկություն է ստացվել, որ Վանաձոր քաղաքի «Կոնգո» թաղամասի գերեզմանատանն այրվում է խոտածածկ տարածք։ Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատներից երկու մարտական հաշվարկ: Հրդեհը մեկուսացվել է ժամը 15։57-ին, մարվել՝ 16։21-ին։ Այրվել է մոտ 35 հա խոտածածկույթ։ Հրդեհաշիջման աշխատանքներին մասնակցել են «Հայանտառ» ՊՈԱԿ «Վանաձորի անտառտնտեսության» 8 աշխատակից։

Ինչպես տեղեկացրել էինք, այսօր Կառավարության շենքի դիմացից Մանուել Մանուկյանի և Արտակ Ավետիսյանի բերման ենթարկելու վերաբերյալ հրապարակված տեղեկությունների և ստացված ահանզանգի կապակցությամբ ՄԻՊ արագ արձագանքման խմբերը մեկնել են ոստիկանության համապատասխան բաժիններ։ Մարդու իրավունքների պաշտպանի ներկայացուցիչներն այց են իրականացրել Ոստիկանության Երևան քաղաքի վարչության Կենտրոնական և Մաշտոցի բաժիններ, առանձնազրույցներ ունեցել ազատությունից զրկված անձանց հետ, ուսումնասիրել նրանց վերաբերյալ կազմված փաստաթղթերը: Վարչական ձերբակալման ենթարկված անձանց իրավունքներին առնչվող որոշ հարցեր քննարկվել են նաև Ոստիկանության ներկայացուցիչների հետ: Պարզվել է, որ Մանուել Մանուկյանը և Արտակ Ավետիսյանը վարչական ձերբակալման են ենթարկվել Վարչական իրավախախտումների վերաբերյալ ՀՀ օրենսգրքի 182-րդ հոդվածով նախատեսված արարք կատարելու համար: Առանձնազրույցի ընթացքում վարչական ձերբակալման ենթարկված անձինք տեղեկացրել են, որ մինչև իրենց ազատությունից զրկելը Ոստիկանության ծառայողների կողմից չի հնչեցվել որևէ պահանջ, վարչական ձերբակալման ենթարկելիս իրենց նկատմամբ կիրառվել է անհամաչափ ֆիզիկական ուժ, իրենց չեն պարզաբանել վարչական ձերբակալման հիմքերն ու պատճառներն, ինչպես նաև իրենց իրավունքներն ու պարտականությունները: Առանձնազրույցի ընթացքում Մ. Մանուկյանը նշել է, որ Ոստիկանության ծառայողներն իր ձեռքերը ոլորել են և բիրտ ֆիզիկական ուժի կիրառմամբ նստեցրել Ոստիկանության տրանսպորտային միջոց, ինչի հետևանքով զգում է ուժեղ ցավ: Զանգվածային լրատվության միջոցներով համացանցում հասանելի տեսագրությունների ուսումնասիրությունից ևս պարզվել է, որ Մանուել Մանուկյանը Ոստիկանության ծառայողներին տեղեկացնում է ձեռքի վնասվածքի մասին և խնդրում ձախ ձեռքը չքաշել: Հաշվի առնելով նշված հանգամանքը՝ Պաշտպանի ներկայացուցիչների կողմից պահանջ է ներկայացվել Ոստիկանության բաժին հրավիրել շտապ բժշկական օգնության խումբ: «Արմենիա» բժշկական կենտրոնում Մ. Մանուկյանը ենթարկվել է բժշկական հետազոտության: Ավելի ուշ, Մ. Մանուկյանը Պաշտպանի ներկայացուցիչներին տեղեկացրել է, որ հետազոտությունների արդյունքում իր մոտ ոսկրային կոտրվածք չի արձանագրվել, սակայն վնասված ձեռքի շրջանում զգում է ուժեղ ցավ: Ոստիկանության բաժիններ իրականացված այցերի արդյունքներն ամփոփվում են Պաշտպանի աշխատակազմում, որից հետո անհրաժեշտ պարզաբանումներ ներկայացնելու պահանջով համապատասխան գրություն կուղարկվի ՀՀ ոստիկանություն:

Էկոնոմիկայի նախարարությունը ներկայացրել է ՀՀ արդյունաբերության ոլորտի ցուցանիշները 2022թ․ հունվարը 2021թ․ հունվարի համեմատությամբ։ Արդյունաբերության թողարկման ծավալն աճել է 16.6%–ով։ Հանքագործական արդյունաբերության ծավալը կրճատվել է -0.9%–ով։ Մշակող արդյունաբերության ծավալն աճել է 25.1%–ով։ Մշակող արդյունաբերության ծավալում առավել մեծ տեսակարար կշիռ ունեցող ենթաճյուղերից աճել են՝ ▪️Սննդամթերքի արտադրության ծավալը 17.9%-ով, ▪️Խմիչքների արտադրության ծավալը՝ 26.5%–ով, ▪️Ծխախոտային արտադրատեսակների արտադրության ծավալը՝ 1.9%-ով, ▪️Այլ ոչ մետաղական հանքային արտադրատեսակների արտադրության ծավալը՝ 82.7%-ով, ▪️Հիմնային մետաղների արտադրության ծավալը՝ 32.0%-ով, ▪️Հագուստի արտադրության ծավալը՝ 8.7%–ով, ▪️Ռետինե և պլաստմասսայե արտադրատեսակների արտադրությունը՝ 46.4%-ով, ▪️Կաշվի, կաշվե արտադրատեսակների արտադրությունը՝ 87.1%-ով։ Կրճատվել է ▪️Մանածագործական արտադրատեսակների արտադրությունը՝ -16.9%–ով, ▪️Պատրաստի մետաղական արտադրատեսակների արտադրությունը՝ -19.9%-ով, ▪️Քիմիական նյութերի և քիմիական արտադրատեսակների արտադրությունը՝ -16.6%-ով։

Ռուսաստանի հակաօդային պաշտպանությունն այսօր Ռոստովի մարզի երկնքում որսացել է ուկրաինական Տոչկա-Ու հրթիռ: Ականատեսների պատմելով, հարվածից անմիջապես հետո նավթաբազայում հրդեհ է բռնկվել:

Ռուսաստանի նախագահ Վլադիմիր Պուտինը Դոնբասի հանրապետությունների պաշտպանության հատուկ գործողության վերաբերյալ ՌԴ դիրքորոշումը ներկայացրել է Եվրոպական խորհրդի նախագահ Շառլ Միշելին։ Տեղեկությունը հայտնում է Կրեմլի մամուլի ծառայությունը: Ըստ հաղորդագրության` Պուտինը Միշելի հետ զրույցում ընդգծել է, որ ռուս զինվորականները բոլոր հնարավոր միջոցները ձեռնարկում են Ուկրաինայում խաղաղ քաղաքացիների կյանքը պահպանելու համար։ ՌԴ նախագահի խոսքով` Ուկրաինայում հիմնական սպառնալիքը բխում է ազգայնականներից, որոնք ահաբեկիչների մարտավարություն են կիրառում` թաքնվելով խաղաղ բնակիչների հետևում։ Նա ԵՄ-ին կոչ է արել իրական ներդրում ունենալ մարդկանց փրկության գործում, ճնշում գործադրել Կիևի վրա, ստիպել հարգել հումանիտար իրավունքը: