Լրահոս

Ռուսաստան-Ուկրաինա փոխադարձ հրթիռակոծության մեղադրանքների տեղատարափ է այն պահին, երբ Մոսկվան հայտարարում է Սուրբ ծննդյան առիթով 36-ժամյա հրադադարի մասին: Ռուս-ուկրաինական ճակատում կատաղի մարտեր են նաև այսօր՝ Սուրբ Ծննդյան տոնին: Եվրոպան «կեղծիք» է անվանել Ռուսաստանի՝ մի քանի ժամով հրադադար հաստատելու նախաձեռնությունը:

«Վասկո դա Գաման» իր պաշտոնական կայքում հայտնել է պաշտպան Անդրե Սանտուշի՝ «Չելսիի» հետ պայմանագիր կնքելու մասին: Երիտասարդ ֆուտբոլիստը բրազիլական ակումբում անցկացրել է 38 հանդիպում՝ դառնալով 8 գոլի հեղինակ։ 2021 թվականին, Կարիոկայի առաջնության խաղում իր դեբյուտը նշելուց հետո, Անդրե Սանտուշը դարձավ 21-րդ դարում «Վասկո դա Գամայի» կազմում երբևէ խաղացած ամենաերիտասարդ խաղացողը։ Ավելի վաղ հաղորդվում էր, որ լոնդոնցիները 18-ամյա բրազիլացու համար կվճարեն 12,5 մլն եվրո։ Բոնուսները ներառյալ՝ ապագայում գործարքը կարող է աճել մինչև 20 միլիոն եվրո։ Ավելի վաղ լոնդոնյան ակումբը ևս երկու տրանսֆեր էր ձևակերպել՝ «Մոնակոյի» պաշտպան Բադիաշիլի ու «Մյոլդեի» հարձակվող Ֆոֆանայի։

Թող Աստված պահապան լինի Հայ ազգին և այնպիսի զորություն տա, որ կարողանանք թոթափել մեր ներքին ախտերը և նորոգված ու ամրապնդված դուրս գանք այս տևական ճգնաժամից: Այս մասին իր ֆեյսբուքյան էջում գրել է Արցախի Հանրապետության պետնախարարի խորհրդական Արտակ Բեգլարյանը: «Քրիստոս ծնավ և հայտնեցավ, մեզ և ձեզ մեծ ավետիս: Շնորհավոր Սուրբ Ծննդյան տոնը: Այսօր Երևանի Սուրբ Զորավոր Աստվածածին եկեղեցում մասնակցեցի Սուրբ Ծննդյան պատարագին և աղոթքս բարձրացրեցի առ Աստված հանուն Հայ ազգի ու Հայոց Հայրենիքի զարթոնքի ու զորացման, հանուն Արցախում շրջափակված մեր հայրենակիցների տոկունության ու Արցախի հարատևման: Թող Աստված պահապան լինի Հայ ազգին և այնպիսի զորություն տա, որ կարողանանք թոթափել մեր ներքին ախտերը և նորոգված ու ամրապնդված դուրս գանք այս տևական ճգնաժամից: Սեր, հավատ, ներդաշնակություն ու զորություն բոլորիս...»,- գրել է նա:

«Թող խաղաղություն լինի, պատերազմ չլինի, մեր ժողովուրդն էլ հանգիստ պառկի քնելու»: Այսպես են քաղաքացիները պատասխանել «Հայլուրի» թղթակցի հարցին, թե ինչ ցանկություն ունեն Սուրբ ծննդյան տոնին: Արփի Սուքիասյանն այսօր մասնակցել է Սուրբ ծննդյան պատարագին, զրուցել հավատացյալների հետ: Նրանք ասել են, որ Ամանորը նշել են առանց ճոխ սեղանի, քանի որ գերության մեջ են Արցախում ապրող 120 հազար մեր հայրենակիցները:

Հնդկաստանը ՄԱԿ-ի Աբյեյի ժամանակավոր անվտանգության ուժերի կազմում տեղակայել է առաջին կին խաղաղապահ գումարտակը: Այս տարածքի սեփականությունը վիճարկվում է Սուդանի և Հարավային Սուդանի կողմից: «Սա վերջին տարիների ամենամեծ խաղաղապահ ստորաբաժանումն է, որն ամբողջությամբ կին է», – թվիթերում գրել է ՄԱԿ-ում Հնդկաստանի մշտական ​​ներկայացուցիչ Ռուչիրա Կամբոջը: ՄԱԿ-ում Հնդկաստանի մշտական ​​ներկայացուցչությունը նույնպես հատուկ հայտարարություն է տարածել, որում ասվում է, որ այդ քայլը վկայում է «Հնդկաստանի մտադրության մասին՝ էապես ավելացնել հնդիկ կանանց թիվը խաղաղապահ զորամասերում»: Հնդկական կանանց զորախումբը, որը բաղկացած է երկու սպաներից և 25 ցածր կոչումներից, մասնագիտանալու է համայնքի իրազեկման գործում, ինչպես նաև կկատարի անվտանգությանն առնչվող լայնածավալ խնդիրներ, ասել է հնդկական առաքելությունը:

Սյունիքի մարզային ճգնաժամային կառավարման կենտրոն հունվարի 6-ին, ժամը 21։49-ի դրությամբ տեղեկություն է ստացվել, որ Վերիշեն գյուղի մոտակա սարին դիտարկվող հատվածում, այրվում է խոտածածկույթ։ ԱԻՆ-ից NEWS.am-ին հայտնում են, որ Վերիշեն գյուղի վարչական ղեկավարի կողմից սահմանվել է մշտադիտարկում։ ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ գյուղի մերձակայքում իրականացնելու է հերթապահություն: Մոտակայքում անտառներ և բնակավայրեր չկան։

Այսօր՝ հունվարի 6-ին, արտակարգ դեպք է տեղի ունեցել Արարատի մարզում։ Ժամը 11։00-ի սահմաններում Արտակարգ իրավիճակների նախարարության փրկարար ծառայության 911 ճգնաժամային կառավարման կենտրոն ահազանգ է ստացվել, որ Նոր Խարբերդ բնակավայրի 1-ին փողոցում ավտոմեքենա է այրվում։ Պարզվել է, որ հրդեհը բռնկվել է Երևանյան խճուղու 1-ին փողոցի սկզբնամասում կայանված Toyota Harrier մակնիշի ավտոմեքենայում, ու մինչ հրշեջների ժամանումը, կրակի տարածման դեմ պայքարել են վարորդն ու քաղաքացիները։ Ըստ նախնական տեղեկությունների, բարեբախտաբար, տուժածներ չկան։

Ադրբեջանը Արդարադատության միջազգային դատարան է ներկայացրել Հայաստանի դեմ երկրորդ բողոքը: Ըստ Ադրբեջանի արտգործնախարարության՝ Հաագայի դատարանից պահանջում են դադարեցնել Լաչինի միջանցքով ականների տեղափոխումը Լեռնային Ղարաբաղ: Այն միջանցքով, որն արդեն 26 օր փակ են պահում ադրբեջանցի, այսպես կոչված, էկոակտիվիստները՝ հումանիտար ճգնաժամ ստեղծելով Արցախում:

Հայաստանը դրական է գնահատում ուղիղ օդային բեռնափոխադրումների արգելքը վերացնելու Թուրքիայի քայլը: «Արմենպրես»-ի հարցին ի պատասխան՝ ընդգծել է ՀՀ ԱԳՆ մամուլի խոսնակ Վահան Հունանյանը։ «Մենք, բնականաբար, դրական ենք գնահատում ուղիղ օդային բեռնափոխադրումների արգելքը վերացնելու Թուրքիայի քայլը: Հայաստանը, ինչպես և նախկինում, կառուցողական կերպով շարունակելու է բանակցություններն ինչպես հուլիսի 1-ին հատուկ ներկայացուցիչների ձեռք բերած մյուս պայմանավորվածությունը՝ երրորդ երկրների քաղաքացիների համար ցամաքային սահմանը հատելու հնարավորության ապահովումը շուտափույթ կյանքի կոչելու, այնպես էլ Հայաստան-Թուրքիա հարաբերություններն ամբողջական կարգավորելու, այն է՝ երկու երկրների միջև դիվանագիտական հարաբերությունների հաստատման և հայ-թուրքական սահմանի բացման նպատակով»,- նկատեց նա։ Ավելի վաղ Վահան Հունանյանը հայտնել էր, որ Թուրքիան վերացրել է Հայաստանի հետ ուղիղ օդային բեռնափոխադրումների արգելքը;

Հունվարի 6-ին` ժամը 17:03-ին, Շիրակի մարզային ճգնաժամային կառավարման կենտրոն ահազանգ է ստացվել, որ Մարալիկ քաղաքի բամբակամանվածքային ֆաբրիկայի մոտակայքում այրվում է կուտակած անասնակեր: Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ: Պարզվել է, որ հրդեհը բռնկվել է 16-րդ փողոցում: Հրդեհը մեկուսացվել է ժամը 17:30-ին, մարվել՝ 19:20-ին: Այրվել է մոտ 240 հակ անասնակեր։

Իտալիայի փոխչեմպիոն «Ինտերի» մամուլի ծառայությունը վերհիշել է Ֆրանսիայի հավաքականի կազմում աշխարհի ու Եվրոպայի չեմպիոն Յուրի Ջորկաեֆի՝ 25 տարի առաջ՝ հունվարի 5-ին, «Ռոմայի» դեմ տնային խաղում շրջադարձ հարվածով խփած գոլը: «Իսկական մոգություն՝ Յուրի Ջորկաեֆի կողմից 1997-ի այս օրը»,- տեսանյութի նկարագրությունում գրել է միլանյան ակումբի մամուլի ծառայությունը: Իտալիայի առաջնության 1996/97 մրցաշրջանում, տնային խաղում «Ինտերը» 3-1 հաշվով հաղթել էր «Ռոմային»: Մրցաշրջանի ավարտին Ջորկաեֆը 14 գոլով դարձել էր թիմի լավագույն ռմբարկուն:

Մայիսի 12-ից Սյունիքի մարզի Սեւ լիճ կոչվող տարածքում հաստատված ադրբեջանցիներն այսօր՝ հունվարի 6-ի առավոտյան հրդեհ են բռնկել այդ տարածքի սարալանջերում: Այս մասին NEWS.am-ի հետ զրույցում ասաց Վերիշեն համայնքի վարչական ղեկավար Արտակ Զադայանը։ «Հրդեհը տարածվել է «Քաչալսար» կոչվող սարերի փեշերից: Մեր տեղեկություններով՝ իրենք անվադողերը վառել են եւ գլորել այնտեղ: Ուրիշ ո՞վ կարող էր անել դա, եթե ոչ՝ ադրբեջանցին: Հիմա հրդեհն արդեն մեր վարչական տարածք է հասել՝ Վերիշենի սարեր: Գյուղից 3-4 կմ հեռավորության վրա է, լավ տեսանելի: Այս սարերի բարձրադիր հատվածներում խոտը չոր է, չհնձված, դրա համար է հեշտ է տարածվում հրդեհը: Այդտեղ գյուղացիներն անասուններին էին արածացնում, հիմա, բնականաբար, չեն կարող, վնասներ, կարծում եմ՝ ադրբեջանցիների միտումը հենց դա է եղել»,- նշեց Զադայանը: Արտակ Զադայանի խոսքով՝ հրշեջներն աշխատում են դեպքի վայրում, մինչեւ առավոտյան հրդեհը մարած կլինի:

Աշխարհի 20-րդ ռակետ, հայազգի Կարեն Խաչանովը, ով ներկայացնում է Ռուսաստանը, դուրս մնաց պայքարից Ավստրալիայի Ադելաիդա քաղաքում ընթացող միջազգային մրցաշարում: Քառորդ եզրափակչում երկու սեթում նա 3-6, 3-6 հաշվով պարտվել է ռուս թենիսիստ, աշխարհի 7-րդ ռակետ Դանիիլ Մեդվեդևին: Մրցախաղը տևել է 1 ժամ 18 րոպե: Խաչանովն ATP-ի դասակարգման աղյուսակի թոփ-10-ի ներկայացուցիչների դեմ մրցախաղերում 22-րդ անընդմեջ պարտությունը կրեց: Ընդհանուր առմամբ՝ ռուսաստանցին լավագույն տասնյակի թենիսիստների դեմ անցկացրել է 50 մրցախաղ, տարել 10 հաղթանակ և կրել 40 պարտություն: Մեդվեդևը կիսաեզրափակչում կմրցի կանադացի Դենիս Շապովալովի և սերբ Նովակ Ջոկովիչի դիմակայության հաղթողի հետ:

ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, անկուսակցական Թագուհի Թովմասյանը սոցցանցի իր էջում գրում է․ «Ադրբեջանի կողմից Արցախի լիակատար շրջափակման հետևանքով առաջացած հումանիտար բազում խնդիրներին զուգահեռ, այսօր Ադրբեջանը կրակահերթեր է արձակել հումանիտար արտակարգ իրավիճակում հայտնված խաղաղ բնակչության ու քաղաքացիական ենթակառուցվածքների ուղղությամբ։ Հունվարի 6-ին, ժամը 13:00-ի սահմաններում Մարտունու շրջանի Հացի գյուղի վարչական տարածքի «Կաղնուն տակ» կոչվող տեղամասում տեղի բնակչի կողմից շահագործվող «Բելառուս 82-1» տրակտորով գյուղատնտեսական աշխատանքներ կատարելիս, հարակից ադրբեջանական մարտական դիրքից հրաձգային զենքից կրակահերթ է արձակվել տրակտորի ուղղությամբ, ինչի արդյունքում գյուղատնտեսական աշխատանքը դադարեցվել է։ Ադրբեջանի հերթական սադրանքը, հատկապես Արցախի շրջափակման ծանր պայմաններում, պետք է առավելագույնս պատժվի միջազգային հանրության կողմից, իսկ կանխարգելիչ գործողությունների իրականացումը խիստ անհրաժեշտություն է, քանի որ վտանգված է 120 հազար մարդկային կյանք»:

«Ալ-Նասրի» նորեկ Կրիշտիանու Ռոնալդուն հետաքրքրված է, որ ակումբը ձեռք բերի նաև «Պորտուի» պաշտպան Պեպեին: Ինչպես հայտնում է Marca-ն, նա ակումբի ղեկավարության հետ քննարկել է ընկերոջ և հայրենակցի հետ պայմանագիր կնքելու հարցը։ «Ալ-Նասրը» համաձայնել է Ռոնալդուի առաջարկին, և կփորձի ձեռք բերել Պեպեին: Ռոնալդուն և Պեպեն միասին խաղացել են Մադրիդի «Ռեալում», ինչպես նաև Պորտուգալիայի հավաքականում։

«Տեցի կռուգի» մոտ Թուրքիայի 31-ամյա քաղաքացին խուլիգանություն է արել: Ըստ Shamshyan.com-ի՝ նա վնասել է պարեկների մեքենան, կոտրել «Դալի» դիսկո-ակումբի դռան ապակին, ապա ոտքով հարվածել ակումբում գտնվող քաղաքացուն: Այսօր միջադեպի վայր են գնացել «Հայլուրի» թղթակիցները:

Հունվարի 6-ին տեղի է ունեցել ՀՀ ԱԳ նախարար Արարատ Միրզոյանի և ԱՄՆ Միջազգային զարգացման գործակալության (ՄԶԳ) կառավարիչ Սամանթա Փաուերի հեռախոսազրույցը: Հեռախոսազրույցի ընթացքում ՀՀ ԱԳ նախարարն ԱՄՆ ՄԶԳ կառավարչին է ներկայացրել դեկտեմբերի 12-ից Ադրբեջանի կողմից Լեռնային Ղարաբաղը Հայաստանին կապող միակ ճանապարհի` Լաչինի միջանցքի արգելափակման հետևանքով ահագնացող հումանիտար իրավիճակը: Նախարար Միրզոյանը շեշտել է, որ Ադրբեջանի գործողություններն ուղղված են Լեռնային Ղարաբաղում 120 հազար արցախահայությանն էթնիկ զտմանը ենթարկելուն: Ընդգծելով, որ Ադրբեջանը կոպտորեն խախտում է 2020թ. նոյեմբերի 9-ի եռակողմ հայտարարությամբ ստանձնած իր պարտավորությունները` ՀՀ ԱԳ նախարարը կարևորել է միջազգային հանրության հստակ քայլերը` ուղղված Լաչինի միջանցքի բնականոն աշխատանքի վերականգնմանը և հումանիտար աղետի կանխարգելմանը:

Գեղարքունիքի մարզում այսօր՝ հունվարի 6-ին, ավտովթար է տեղի ունեցել ։ Ժամը 10։30-ի սահմաններում 33-ամյա Անդրանիկ Ս-ն իր վարած ՎԱԶ 2106 մակնիշի ավտոմեքենայով Սևան-Մարտունի-Գետափ ավտոճանապարհի 7-րդ կմ հատվածում դեպի Սևան ընթանալիս դուրս է եկել երթևեկելի գոտուց և շրջվել։ Այս մասին հայտնում է Shamshyan.com-ը: Վթարի հետևանքով վարորդ Անդրանիկ Ս-ն մարմնական վնասվածքներով տեղափոխվել է «Սևան» ԲԿ։ Գ. Շամշյանի տեղեկություններով՝ վարորդ Անդրանիկ Ս-ն աշխատում է «Մեգա Թրեյդ» ՍՊԸ-ում՝ որպես տնօրեն։ Վթարի փաստով Սևանի քննչական բաժնում նախաձեռնվել է վարույթ։

Ֆրանսիական L’Equipe-ը քվեարկություն է անցկացրել և որոշել 2022 թվականի լավագույն մարզիկին: Լավագույնն է ճանաչվել Լիոնել Մեսսին: Նրա ակումբակից, Ֆրանսիայի հավաքականի հարձակվող Կիլիան Մբապեն երկրորդն է: Լավագույն եռյակը եզրափակում է իսպանացի թենիսիստ, աշխարհի երկրորդ ռակետ Ռաֆայել Նադալը, ով 2022 թվականին «Մեծ սաղավարտի» չորս մրցաշարերից երկուսում հաղթել էր: Տարվա 10 լավագույն մարզիկները՝ ըստ L’Equipe-ի 1. Լիոնել Մեսսի (ֆուտբոլ, ՊՍԺ, Արգենտինա 808 միավոր) 2. Կիլիան Մբապե (ֆուտբոլ, ՊՍԺ, Ֆրանսիա 381) 3. Ռաֆայել Նադալ (թենիս, Իսպանիա 285) 4. Ռեմկո Էվենեպուլ (հեծանվասպորտ, Բելգիա 252) 5. Մաքս Ֆերստապեն (Ֆորմուլա-1, «Ռեդ Բուլ», Նիդերլանդներ, 196) 6. Կարիմ Բենզեմա (ֆուտբոլ, «Ռեալ», Ֆրանսիա 195) 7. Արման Դյուպլանտիս (աթլետիկա, Շվեդիա 185) 8. Ստեֆեն Քարի (բասկետբոլ, «Գոլդեն Սթեյթ», ԱՄՆ 139) 9. Անտուան ​​Դյուպոն (ռեգբի, «Թուլուզ», Ֆրանսիա, 105) 10. Դավիդ Պոպովիչ (լող, Ռումինիա, 98)