Լրահոս

Երևանցիներն ահազանգում են դեղերի դեֆիցիտի մասին: Վիրուսների պիկին, երբ առողջապահության նախարարությունը հայտնում է գրիպի ենթատեսակների ակտիվ տարածման մասին, դեղատներում գրեթե անհնար է գտնել հակավիրուսային դեղեր, հակաբիոտիկներ: «Հայլուրի» թղթակիցները այսօր եղել են մայրաքաղաքի տարբեր դեղատներում, զրուցել հաճախորդների հետ, որ հաստատել են՝ դեղ ճարելու համար 7-8 դեղատուն են ոտքի տակ տալիս:

ԱՄՆ Ֆլորիդա նահանգի Մայամի Գարդենս քաղաքում ռեփ կատարող Ֆրենչ Մոնտանայի (French Montana) տեսահոլովակի նկարահանումների ժամանակ հրաձգություն է տեղի ունեցել։ Դրա հետևանքով տասը մարդ վիրավորվել է, հայտնում է WSVN-ը։ Միջադեպը տեղի է ունեցել հունվարի 5-ին, ժամը 20:00-ի սահմանում՝ The Licking ռեստորանի մոտ։ Քաղաքի ոստիկանական բաժանմունքը հաստատել է կրակոցների փաստը, սակայն հրաժարվել է մանրամասներ հայտնել մինչև հետաքննության ավարտը: Տուժածներից չորսը կարողացել են ինքնուրույն հասնել հիվանդանոց, ևս վեցը տեղափոխվել են և նրանց ցուցաբերել բուժօգնություն։ Ֆրենչ Մոնտանա չի մեկնաբանել միջադեպը։

Կրիշտիանու Ռոնալդուն մեկնաբանել է իր տեղափոխությունը Սաուդյան Արաբիան ներկայացնող ակումբ: «Այստեղ հայտնվելը հրաշալի է, մեծ պատիվ է: Անհամբերությամբ եմ սպասում մեկնարկիս, մարդկանց և ինձ երջանկացնելուն: Շատ ուրախ եմ, որ այստեղ եմ: Ցանկանում եմ հաճույք ստանալ ու օգնել ակումբին: Ես այստեղ եմ, որ լինեմ նոր սերնդի մի մասը: Այս առաջնությունը մեծ ներուժ ունի: Այստեղ ելույթ են ունենում հիանալի խաղացողներ: Այն շատ, շատ, շատ ուժեղ ու մրցունակ առաջնություն է: Դրա համար եմ այստեղ»,- պորտուգալացու խոսքերը մեջբերում է ակումբի մամուլի ծառայությունը:

Սևանա լճում սիգ ձկնատեսակի որսի արգելքի միջոցառումների շրջանակում լճից դուրս է բերվել 44 ապօրինի ձկնորսական ցանց: Այս մասին տեղեկացնում են ՀՀ շրջակա միջավայրի նախարարությունից: «Սևանա լճում սիգի ձվադրման ժամանակահատվածում իրականացվող համատեղ միջոցառումների շրջանակներում՝ հունվարի 5-ին, «Սևան» ազգային պարկ» ՊՈԱԿ-ի հատուկ նշանակության ջոկատի, ինչպես նաև ոստիկանության և բնապահպանության և ընդերքի տեսչական մարմնի ներկայացուցիչների կողմից իրականացվել են ձկների ձվադրման ժամանակահատվածում որսի արգելքի կարևորության վերաբերյալ բացատրական աշխատանքներ, կազմակերպվել և իրականացվել են լողամիջոցների, որսագործիքների և ժամանակավոր կացարանների դուրս բերման աշխատանքներ: Միջոցառումները կրում են շարունակական բնույթ: Հիշեցնենք, որ Սևանա լճում սիգի ձվադրման ժամանակահատվածում իրականացվող համատեղ միջոցառումները մեկնարկել են 2022 թվականի դեկտեմբերի 1-ից, դրանք կտևեն մինչև 2023 թվականի հունվարի 20-ը ներառյալ»:

Ճապոնիան և Մեծ Բրիտանիան մտադիր են Ճապոնիայի վարչապետ Ֆումիո Կիսիդայի` Լոնդոն այցի ժամանակ ռազմական համագործակցության մասին համաձայնագիր ստորագրել, որը կսահմանի Ճապոնիայում բրիտանացի զինվորականների և Մեծ Բրիտանիայում` Ճապոնական ինքնապաշտպանության ուժերի մարտիկների գտնվելու իրավական շրջանակները: «Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ վկայակոչելով Yomiuri թերթը։ Ըստ աղբյուրի՝ համաձայնագիրը ենթադրում է երկու երկրների զինվորականների համատեղ զորավարժություններին ներգաղթի հսկողության անցնելու պահանջների վերացում, ինչպես նաև զենք և զինամթերք տեղափոխելու ընթացակարգերի պարզեցում։ Ներկայումս Ճապոնիան նման համաձայնագիր ունի միայն Ավստրալիայի հետ։

Դնեպրոպետրովսկում սկսվել է ռուս գիտնական Միխայիլ Լոմոնոսովի հուշարձանի ապամոնտաժումը: Ինչպես հայտնում է «Արմենպրես»-ը, վկայակոչելով «ՌԻԱ Նովոտսի»-ին, այս մասին գրում է ուկրաինական «Հասարակական. Դնեպր» հրատարակությունը։ Ավելի վաղ Դնեպրոպետրովսկում ապամոնտաժվել են խորհրդային օդաչու Վալերի Չկալովի, գրող Մաքսիմ Գորկու, ռուս դասական Ալեքսանդր Պուշկինի հուշարձանները:

Թուրքական լրատվամիջոցները հայտնում են, որ Թուրքիան վերացրել է Հայաստանի հետ ուղիղ օդային բեռնափոխադրումների արգելքը: ՀՀ արտգործնախարարության մամուլի խոսնակ Վահան Հունանյանը հաստատել է տեղեկությունը։ «Իրապես, թուրքական կողմն այսօր մեզ տեղեկացրել է, որ ուղիղ օդային բեռնափոխադրումների արգելքը վերացվել է: Ցանկանում ենք հիշեցնել, որ Հայաստան-Թուրքիա ուղիղ օդային բեռնափոխադրումների իրականացումը 2022թ. հուլիսի 1-ին հատուկ ներկայացուցիչների հանդիպմանը ձեռք բերված պայմանավորվածություններից մեկն էր: Ակնկալում ենք, որ մյուս պայմանավորվածությունը՝ երրորդ երկրների քաղաքացիների համար ցամաքային սահմանը հատելու հնարավորության ապահովումը, նույնպես շուտափույթ կյանքի կկոչվի»։

Ուկրաինայից որոշ փախստականների, որոնք գտնվում են Իռլանդիայում, Սուրբծննդյան տոներին, չնայած ցուրտ եղանակին, տեղավորել են վրաններում։ «Արմենպրես»-ի հաղորմամբ՝այս մասին հայտնում է gazeta կայքը՝ վկայակոչելով Newstalk ռադիոկայանին։ Ռադիոկայանի մեկնաբան Ջեյմս Ուիլսոնը հայտնել է, որ փախստականներից մի քանիսին տեղավորել են դպրոցների շենքերում, իսկ մյուսներին ՝ փողոցում ՝ վրաններում։ Նրա խոսքով ՝ 88 ուկրաինացիներ նման պայմաններում ապրում են Նոկալիշին բնակավայրում (Քլեր շրջան) ։ «Մտահոգություններ կան այն մասին, թե ինչպես են նրանք դիմանալու ձմռանը», - ասել է նա: Ներկայացուցիչների պալատի պատգամավոր Քաթալ Քրոուն խոստովանել է, որ այդ վրանները հարմար չեն մարդկանց ցածր ջերմաստիճանում տեղավորելու համար: «Դրանք չեն դիմանում ձյանը, սառնամանիքին, ինչը մեզ մոտ նկատվել էր դեկտեմբերի սկզբին ։ Դա ոչ պիտանի «բնակարան» է», - հավելել է պատգամավորը։

Ռուսաստանը կմնա գազի համաշխարհային շուկայի առաջատարներից մեկը ՝ չնայած 2022 թվականին տեղի ունեցած էներգետիկ ոլորտի բոլոր իրադարձություններին։ «Արմենպրես»-ի հաղորդմամբ՝ նման կարծիք է հայտնել ազգային էներգետիկ անվտանգության հիմնադրամի առաջատար վերլուծաբան Իգոր Յուշկովը: Սակայն, նրա խոսքով, Մոսկվան կորցրել է վառելիքի աշխարհի խոշորագույն արտահանողի դիրքը. ռուսական գազի մասնաբաժինը եվրոպական տարածքում նվազել է 34 տոկոսից մինչև 8 տոկոս: «Նախկինում մենք միայն Եվրոպա արտահանում էինք 155 մլրդ խմ։ Այդպես էր 2021 թվականին։ Հիմա նման ցուցանիշներ չկան։ Բայց միևնույն է, Ռուսաստանը մոտ 30-40 մլրդ խմ գազ կմատակարարի Եվրոպային», - նշել է Յուշկովը։

Ադրբեջանը պետք է անհապաղ թույլ տա Լաչինի միջանցքով անխափան տեղաշարժը։ «Արմենպրես»-ի փոխանցմամբ՝ այս մասին հայտարարել է Եվրահանձնաժողովի պատգամավոր Վիոլա ֆոն Կրամոն-Տաուբադելը։ «Այսօր՝ հունվարի 6-ին, հայերը նշում են Սուրբ Ծնունդը։ Սիրտս ցավում է Լեռնային Ղարաբաղում շրջափակված ավելի քան 100 հազար մարդկանց համար։ Նրանք սննդի և դեղորայքի պակաս ունեն։ Ադրբեջանի կառավարությունը և նրանց համախոհները պետք է անհապաղ թույլատրեն Լաչինում խաղաղ բնակչության անխափան տեղաշարժը», - Twitter-ի իր էջում գրել է Վիոլա ֆոն Կրամոն-Տաուբադելը։ Արցախը Հայաստանին և ամբողջ աշխարհին կապող Լաչինի միջանցը դեկտեմբերի 12-ից փակ է որպես «բնապահպանական ակտիվիստներ» ներկայացող մի խումբ ադրբեջանցիների կողմից։ Ադրբեջանն անտեսել է միջանցքը բացելու՝ աշխարհի տարբեր երկրների և կազմակերպությունների կոչերը։

Այսօր՝ հունվարի 6-ին, սպանություն է տեղի ունեցել Երևանում։ Ժամը 16։30-ի սահմաններում ՀՀ ոստիկանության պարեկային ծառայության Երևանի գնդի 4-րդ գումարտակի 1-ին վաշտի պարեկները ծառայություն կատարելիս են լինում Ռուբինյանց-Պարույր Սևակ փողոցների խաչմերուկում, երբ նկատում են, որ Պարույր Սևակի փողոցում գործող «Degusto» արագ սննդի կետի դիմաց 3 քաղաքացի ուշագնաց ընկած է։ Ինչպես հայտնում է shamshyan.com-ը, պարեկները վիրավորներից մեկին իրենց ծառայողական ավտոմեքենայով տեղափոխում են «Իզմիրլյան» ԲԿ, իսկ երկուսի համար էլ ահազանգում են 1-03 շտապօգնություն, և ժամանած բժիշկների հերթապահ խումբը այդ երկու վիրավորներին էլ է տեղափոխում «Իզմիրլյան» ԲԿ։ «Degusto»-ի դիմաց հայտնաբերվել են արնանման հետքեր: Մինչ դեպքի վայրում տարածքը սահմանազատել և ծառայություն էին կատարում պարեկները, հիվանդանոցից ահազանգ է ստացվել, որ վիրավորներից մեկը մահացել է, իսկ մյուս երկուսի կյանքի համար բժիշկները պայքարում են։

Թուրքական կողմն այսօր հայկական կողմին տեղեկացրել է, որ ուղիղ օդային բեռնափոխադրումների արգելքը վերացվել է, «Սպուտնիկ Արմենիա»-ի հարցմանն ի պատասխան ասել է ՀՀ ԱԳՆ մամուլի խոսնակ Վահան Հունանյանը։ «Թուրքական կողմն այսօր մեզ տեղեկացրել է, որ ուղիղ օդային բեռնափոխադրումների արգելքը վերացվել է: Ցանկանում ենք հիշեցնել, որ Հայաստան-Թուրքիա ուղիղ օդային բեռնափոխադրումների իրականացումը 2022թ. հուլիսի 1-ին հատուկ ներկայացուցիչների հանդիպմանը ձեռք բերված պայմանավորվածություններից մեկն էր: Ակնկալում ենք, որ մյուս պայմանավորվածությունը՝ երրորդ երկրների քաղաքացիների համար ցամաքային սահմանը հատելու հնարավորության ապահովումը, նույնպես շուտափույթ կյանքի կկոչվի»,-ասել է Հունանյանը։

ՌԴ պաշտպանության նախարարությունը հայտարարել է, որ Ուկրաինայում կողմերի շփման գծի ամբողջ երկայնքով հրադադարի ռեժիմ է սահմանվել 36 ժամով։ «Արմենպրես»-ի փոխանցմամբ՝ այս մասին հայտնել է ՌԴ ՊՆ պաշտոնական ներկայացուցիչ Իգոր Կոնաշենկովը հունվարի 6-ի ճեպազրույցի ժամանակ։ «Համաձայն ՌԴ նախագահի հանձնարարականի և ՌԴ պաշտպանության նախարարի ցուցումների՝ հատուկ ռազմական գործողության շրջանում ռուսական զորքերի (ուժերի) միացյալ խմբավորումում հրադադար է հայտարարվել հունվարի 6-ի ժամը 12:00-ից մինչև հունվարի 7-ի ժամը 24:00-ն՝ Ուկրաինայում կողմերի շփման գծի ամբողջ երկայնքով», - հայտնել է Իգոր Կոնաշենկովը։ Նա միևնույն ժամանակ նշել է, որ Ուկրաինան շարունակել է գնդակոծությունները։ «Չնայած ռուսական զորքերի կողմից այսօր՝ հունվարի 6-ին, Մոսկվայի ժամանակով ժամը 12:00-ից հրադադարի ռեժիմի պահպանմանը, Կիևի վարչակարգը շարունակել է գնդակոծել բնակավայրերն ու ռուսական զորքերի դիրքերը», - ասել է Կոնաշենկովը։ Նա հայտնել է, որ Ուկրաինայի ԶՈՒ-ն գնդակոծություններ է իրականացրել Կրասնի Լիմանի, Լուգանսկի Ժողովրդական Հանրապետության Բելոգորովկա բնակավայրի ուղղությամբ։ Ինչպես հայտարարել է ՌԴ պաշտպանության նախարարության ներկայացուցիչը, «ռուսական զորքերի պատասխան կրակով ճնշվել են Ուկրաինայի զինված ուժերի դիրքերը, որտեղից իրականացվել է հրետակոծությունը»։

Խաղաղօվկանոսյան փոթորիկի պատճառով Կալիֆորնիայում երկու օր ուժգին քամիներ, տեղատարափ անձրևներ և ձյան տեղումներ են եղել, որոնք առնվազն 2 մարդու կյանք են խլել. նրանցից մեկը 1-2 տարեկան տղա է, մյուսը՝ 19-ամյա աղջիկ։ Այս մասին հաղորդում է «Արմենպրես»-ը՝ վկայակոչելով Reuters գործակալությանը։ Եղանակային պայմանների հետևանքով տասնյակ հազարավոր մարդիկ զրկվել են էլեկտրական հոսանքից, խաթարվել է երթևեկությունը, տեղի են ունեցել քարաթափումներ, ծառեր են տապալվել։ Օդերևութաբանները կանխատեսել են, որ հունվարի 6-ին և առաջիկա օրերին ևս փոթորիկը կշարունակվի։ XS5LSKANERI7RGIHHCZHPDZYAY.jpg (80 KB) 2OSZMC4APZPQPJWFQPHVYX5KQ4.jpg (148 KB) CMGSLXKXPJLBLDZ2SDZS53BMR4.jpg (156 KB) 5ZICFJEXLJPH3LMNVNEB4NKE2Y.jpg (120 KB)

Պորտուգալացի հարձակվող Կրիշտիանու Ռոնալդուի շնորհանդեսը Սաուդյան Արաբիայի «Ալ Նասր» ակումբում դիտել է ավելի քան 3 միլիարդ մարդ: Իսկ Կատարում կայացած աշխարհի առաջնության եզրափակիչ Արգենտինա – Ֆրանսիա հանդիպումը դիտել է 2 միլիարդ մարդ: 37-ամյա ֆուտբոլիստի շնորհանդեսը ուղիղ եթերում ցուցադրել է ավելի քան 40 հեռուստաալիք: Հիշեցնենք, որ Ռոնալդուն ազատ գործակալի կարգավիճակում է տեղափոխվել «Ալ Նասր», որի հետ կնքել է 2,5 տարվա պայմանագիր: Ռոնալդուի տարեկան աշխատավարձը կկազմի 200 միլիոն եվրո։

Երկրները, որոնք ճանաչել են Հայոց ցեղասպանությունը, իրենց հայտարարություններում ասել են «Այլևս երբեք», Twitter-ում գրել է Արցախի ՄԻՊ Գեղամ Ստեփանյանը՝ հորդորելով այդ երկրներին ճանաչել Արցախի անկախությունը և պատժամիջոցներ կիրառել Ադրբեջանի նկատմամբ: «Ճանաչեք Արցախի անկախությունը, պատժամիջոցներ կիրառեք Ադրբեջանի դեմ, պատասխանատվություն ստանձնեք արցախահայության կյանքի և իրավունքների պաշտպանության համար և ապացուցեք ձեր հավատարմությունը «Այլևս երբեք»-ին»,- գրել է Արցախի մարդու իրավունքների պաշտպանը:

Բեռլինը մտադիր է Կիևին մատակարարել մոտ 40 Marder տեսակի հետևակի մարտական ​​մեքենա: Ինչպես հայտնում է «Արմենպրես»-ը, վկայակոչելով «ՌԻԱ Նովոտսի»-ին, այս մասին լրագրողներին ասել է Գերմանիայի կառավարության պաշտոնական ներկայացուցիչ Շտեֆեն Հեբեշտրեյտը։ Ավելի վաղ Գերմանիայում ՌԴ դեսպանատունը դատապարտել է Marder հետևակի մարտական ​​մեքենաներ և Patriot հակաօդային պաշտպանության համակարգերը Կիև ուղարկելու Բեռլինի որոշումը: Ռուսական կողմը դա համարում է ուկրաինական հակամարտության սրման քայլ։

«Բարսելոնայի» նախագահ Ժոան Լապորտան հերթական անգամ խոսել է Լիոնել Մեսսիի՝ կատալոնական ակումբը լքելու պատճառների մասին: «Ես պետք է «Բարսելոնան» վեր դասեի պատմության ցանկացած ֆուտբոլիստից: Տնտեսական ճգնաժամի պայմաններում ես չէի կարող նրան պահել: Կարծում եմ՝ ակումբի համար լավագույն որոշումն էր: Հիմա նա ՊՍԺ-ի ֆուտբոլիստ է, և ես գերադասում եմ այլևս չխոսել նրա մասին: Մենք կենտրոնացած ենք մեր ծրագրերի վրա: Լիոնելը միշտ կլինի մեր ակումբի մի մասը, սակայն ես կցանկանայի, որ ամեն բան այլ կերպ ավարտվեր: Մի քանի տարբերակներ կային, սակայն արդար չէ խոսել դրանց մասին: Մենք կապ պահպանում ենք»,- Լապորտայի խոսքերը մեջբերում է Cadena Ser-ը:

Հունվարի 6-ին, ժամը 11:31-ին Սյունիքի մարզային ճգնաժամային կառավարման կենտրոն ահազանգ է ստացվել, որ Կապան քաղաքի Բարաբաթում թաղամասում այրվում է տուն։ Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ: Հայտարարվել է հրդեհի բարդության «Թիվ 2» աստիճան․ դեպքի վայր են մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից ևս երկու մարտական հաշվարկ։ Պարզվել է, որ հրդեհը բռնկվել է երկհարկանի տանը (յուրաքանչյուր հարկը 120 քմ)․ տուժածներ չկան: Հրդեհը մեկուսացվել է ժամը 13։22-ին, մարվել՝ 15։28-ին։ Այրվել են տան առաջին հարկը, երկրորդ հարկից 100 քմ հատված և տանիքի փայտե կառուցատարրերը։