Իսրայելի դատարանը չեղարկել է Նեթանյահուի գործով երկու լսումները ՝ Թրամփի հետ ԱՄՆ-ում նրա հանդիպման պատճառով

Երուսաղեմի շրջանային դատարանը չեղարկել է Իսրայելի վարչապետ Բենյամին Նեթանյահուի մասնակցությամբ կոռուպցիայի գործով լսումները, որոնք պետք է անցկացվեին փետրվարի 10-ին և 11-ին՝ Իսրայելի կառավարության ղեկավարի՝ ԱՄՆ ծրագրված այցի պատճառով: Ինչպես փոխանցում է ՏԱՍՍ-ը, այս մասին հայտնել է Kan պետական հեռուստառադիոընկերությունը։ 

Փետրվարի 7-ին կառավարության ղեկավարի գրասենյակը հայտնել է, որ Նեթանյահուն առաջիկա շաբաթ հերթական այցով կմեկնի ԱՄՆ: Նրա հայտարարության համաձայն՝ փետրվարի 11-ին, ինչպես սպասվում է, Վաշինգտոնում կկայանա Իսրայելի վարչապետի և ԱՄՆ նախագահ Դոնալդ Թրամփի հանդիպումը, իսկ դրա գլխավոր թեման կդառնա Իրանի հետ ամերիկացիների բանակցությունները: 

Մասնավորապես, Նեթանյահուն պնդելու է, որ «ցանկացած բանակցություն անպայման պետք է ներառի բալիստիկ հրթիռների (իրանական զինանոցի) սահմանափակման թեման», ինչպես նաև «իրանական առանցքին (Մերձավոր Արևելքում Թեհրանի հետ դաշնակից ուժեր - խմբ. ՏԱՍՍ) աջակցության դադարեցումը»,-հայտարարել են գրասենյակից։ 

Իրանի և ԱՄՆ-ի միջև Թեհրանի միջուկային ծրագրի շուրջ ճգնաժամի կարգավորման հարցով բանակցությունների նոր փուլը տեղի է ունեցել փետրվարի 6-ին Օմանի մայրաքաղաքում: 

Իրանական պատվիրակությունը գլխավորում էր արտաքին գործերի նախարար Աբբաս Արաղչին, ամերիկյանը՝ նախագահի հատուկ բանագնաց Սթիվեն Ուիթքոֆը: Օմանի ԱԳՆ ղեկավար Բադր Ալ Բուսաիդիի խոսքով՝ Թեհրանի և Վաշինգտոնի պատվիրակությունները Մասկատում շատ լուրջ խորհրդակցություններ են անցկացրել իրանական միջուկային ծրագրի շուրջ և մտադիր են շարունակել երկխոսությունը: