Վրաստանը չեղարկում է կորոնավիրուսի «կանաչ անձնագրերը»

Վրաստանում կորոնավիրուսի տարածման դեմ պայքարի միջգերատեսչական համակարգող խորհրդի օպերատիվ շտաբի ղեկավար Գիորգի Գիբրաձեն հայտարարել է, որ երկրում չեղարկվում են կորոնավիրուսի «կանաչ անձնագրերը»։ «Sputnik Грузия»-ի փոխանցմամբ՝ Գիբրաձեն այս մասին ասել է այսօր՝ փետրվարի 1-ին, լրագրողների հետ կայացած ճեպազրույցում։

«Կանաչ անձնագրերը», որոնք ճանաչվում են ԵՄ-ի կողմից, Վրաստանում սկսցին գործել 2021 թվականի դեկտեմբերի 1-ից։ Առանց անձնագրերի անհնար էր մուտք գործել ռեստորաններ, թատրոններ, ֆիթնես կենտրոններ և այլ հաստատություններ։ 

«Հաշվի առնելով օմիկրոնի տարածման արագ տեմպերը և վիրուսի թույլ ընթացքը, ինչպես նաև համաշխարհային պրակտիկան՝ խորհուրդը որոշել է վերացնել կանաչ անձնագիր պահանջելու պարտավորությունը»,- ասել է Գիբրաձեն։

Պաշտոնյան միևնույն ժամանակ հավելել է, որ COVID-19-ի հայտնաբերման և գրանցման բոլոր համակարգերը շարունակում են գործել։ «Նրանք, ովքեր կանաչ անձնագրի կարիք ունեն արտերկիր մեկնելու համար, կրկին կկարողանան օգտվել այդ մեխանիզմից»,- եզրափակել է Գիբրաձեն: