«Պայքարը հանուն գաղափարի է ու արժեքի․ այն շարունակվելու է, քանի դեռ Արցախի կարգավիճակը վտանգված է»․ անկախության սերնդի ներկայացուցիչները շարունակում են հացադուլը

Ազատության հրապարակում ապրիլի 17-ից հացադուլ հայտարարած Նվեր Կիրակոսյանն ու Արթուր Ավագյանը, որ 44-օրյա պատերազմի մասնակիցներ են, չեն պատրաստվում դադարեցնել պայքարի իրենց այս գործողությունը, մինչև չհամոզվեն, որ նպատակը, որը հետապնդում են, իրագործվել է․ անկախության սերնդի կրիտիկական հատվածը դարձել է իրավատեր։

«Պայքարը հանուն գաղափարի է ու արժեքի, այն շարունակվելու է, քանի դեռ այդ արժեքը, այսինքն, Արցախի կարգավիճակը վտանգված է։ Հացադուլը կդադարի այն դեպքում, երբ դառնա ինքնապատակ, իսկ ինքնանպատակ կդառնա, երբ իր խնդիրը լուծի, այսինքն՝ հավաքվի անկախության սերնդի այն կրիտիկական հատվածը, որը կասի՝ ես տեր եմ ժառանգությանը, մտահոգ եմ ու պատարաստ եմ դրա համար անել գործողություններ՝ հրաժարվել միայն ստատուսներ գրելուց կամ անտարբեր մնալուց։ Երբ ունենանք այդ վիճակը, կփաստենք, որ հացադուլն իր խնդիրը լուծել է», -լրագրողների հետ զրույցում ասել է Նվեր Կիրակոսյանը։

Արթուր Ավագյանն իր հերթին ընդգծեց՝ կրիտիկական զանգվածը, որի մասին իրենք խոսում են, արդեն ձև ու բովանդակություն է ստանում։

«Մենք շփվում, խոսում ենք այն մարդկանց հետ, ովքեր տիրապետում են գիտելիքների, արագ են մտածում, զգում ենք, որ մի փուլի ենք հասել, որ կարող ենք ասել՝ ում փնտրում էինք, մեզ գտել են, մենք էլ իրենց ենք գտել, բայց սա դեռ բավարար չէ», -ասել է նա։

Հացադուլ հայտարարած երիտասարդները նշեցին՝ այս օրերի ընթացքում իրենց այցելող բազմաթիվ մարդկանց հետ զրույցների ընթացքում հասակցել են՝ պայքարը նրանց ոգևորել է․ դա այն է, ինչը նրանց պետք էր, իսկ համախմբմամբ հնարավոր է հասնել ընդհանուր նպատակի իրագործմանը: