Լրահոս

Հայաստանում տեղակայված ՌԴ Հարավային ռազմական օկրուգի (ՀՌՕ) ավիաբազայի օդաչուներն ուսումնավարժական թռիչքներ են կատարել МиГ-29 ու Су-30СМ կործանիչներով։ Տեղեկությունը հայտնում է ՀՌՕ լրատվական ծառայությունը։ Անձնակազմերը ուսումնամարտական խնդիրներ են մշակել զույգերի և բարդ օդաչուական տարրերով օղակների կազմում: Զինծառայողները վարժանքներ են կատարել ինքնաթիռի վթարային վայրէջքի շարժիչներից մեկի «հրաժարվելու» պայմաններում, երբ տեսանելիությունը սահմանափակ է։ Բացի այդ, վարժանքներ են կատարվել սահմանափակ թռիչքուղում վայրէջք կատարելու պայմաններում՝ պայմանական հակառակորդի օդային հարվածներից հետո թռիչքուղու մասնակի փլուզման դեպքերի համար։ Օդաչուները խնդիրներն իրականացրել են ցերեկային ու գիշերային ժամերին եղանակային բարդ պայմաններում` հորդառատ տեղումներ, քամի...

Դոնեցկի Ժողովրդական Հանրապետության Գորլովկա քաղաքում դպրոցի շենքի գնդակոծության հետևանքով երկու ուսուցիչ են զոհվել։ Տեղեկությունը հայտնել է քաղաքի վարչակազմի ղեկավար Իվան Պրիխոդկոն: «Թիվ 50 դպրոցի ռմբակոծության արդյունքում երկու ուսուցիչ է զոհվել»,-գրել է Պրիխոդկոն իր Telegram ալիքում։ Ավելի վաղ Պրիխոդկոն հայտնել էր, որ դպրոցը արկի ուղիղ հարված է ստացել։

«Այլընտրանքային նախագծեր խմբի» անդամ Վահե Հովհաննիսյանը գրել է. «Նկարի մի կեսը Երևանից է, մյուսը՝ Կիևից։ Իսկ ամբողջության մեջ նկարն այն մասին է, թե ինչ է լինում պետությունների հետ, երբ փողոցից իշխանության են գալիս պատահական մարդիկ։ Այս նկարը ժողովուրդների և պետությունների ողբերգության մասին է։ Մեկը՝ փոքր, կիսաշրջափակված Հայաստանի, որն անհավատալի ջանքերով կարողացավ պետականություն վերականգնել ու երկրորդ հայկական պետություն՝ Արցախ կայացնել, մյուսը՝ Եվրոպայի մեջտեղում, բարեկամ պետություններով շրջապատված՝ 40 մլն բնակչությամբ Ուկրաինան։ Երկուսի ողբերգության հիմքում իրականում անձերը չեն։ Սխալ է ասել, որ միայն Նիկոլը կամ Զելենսկին կործանեցին պետությունները։ Նրանք իշխանության են եկել խոշոր ընտրազանգվածների աջակցությամբ, բայց դա´ էլ ամենակարևորը չէ։ Նրանք կարողացել են պետությունները տանել խոշոր վթարների, որովհետև այդ ժողովուրդները չեն ունեցել լուրջ պետական մտածողությամբ վերնախավեր։ Չի եղել ոչ մի մեխանիզմ, որը դեպի աղետ ճանապարհի որևէ հատվածում կկա նգնեցներ նրանց։ Երբ Նիկոլը գոռում էր «Արցախը Հայաստանն է և վերջ», երբ հայտարարում էր, որ «բանակցում է իր նոր կետից», մի 20 հոգի հազիվ Հայաստանում հասկացան ու ահազանգեցին, որ այդ ճանապարհը տանում է պատերազմի։ Կամայական թիվ չեմ ասում, հարկ եղած դեպքում անվանապես կնշեմ. հաստատ ավելին չէին։ Երբ Զելենսկին Բայդենների, ամերիկյան և եվրոպական չինովնիկների դատարկ խոստումների տակ դեպի երազանքների ՆԱՏՕ և հակառուսականության քաղաքականություն էր տանում, ուկրաինական վերնախավը մերի պես ամուլ և դատարկ էր։ Ագրեսիվ անմիտները եղանակ էին ստեղծում, իսկ գրագետ կոնֆորմիստները լռում էին։ Կարծում եմ՝ ծանոթ պատկեր է։ Ուկրաինական պատերազմը ինչ-որ պահի կանգնելու է։ Խնդիրը մնալու է նույնը՝ ձևավորել սոլիդ վերնախավեր, որոնք թույլ չեն տա նոր աղետներ։ Ուկրաինան ուներ հնարավորություններ՝ խուսափելու աղետից, բայց չկարողացավ, Ուկրաինան ունի հնարավորություններ՝ աղետից հետո վերականգնվելու, եթե անի հետևություններ։ Հայաստանը կկարողանա՞ վերականգնվել. շատ դժվար է լինելու։ Բայց առաջին քայլը հետևություններ անելն է, հետո՝ այդ հետևությունների հիման վրա նոր լուրջ քաղաքական հասարակական համակարգեր ստեղծելը։ Հետո արժանապատության և պրագմատիզմի հենքի վրա վերականգնումն է։ Ու մեկ էլ տեսար՝ պատմական խելագարության հերթը հասնի Ադրբեջանին»։

Ամերիկան դեմոկրատիա, ազատություն հորջորջումներով և ռուսոֆոբիայի մոլուցքով կուտ տվեց Ուկրաինային՝ գցելով կործանման թակարդը, գրում է արձակագիր Լևոն Ջավախյանը։ «Դուք ասում եք, ռուսը մեզ ի՞նչ կանի... Ես էլ ասում եմ՝ մեզ կուտի։ Սև, սպիտակ, մոխրագույն՝ դե շուտ վազեք դեպի տուն։ Ուկրաինայում արյունահեղություն է, իսկ ու՞ր է Ամերիկան։ Կարծում եք՝ նրան հուզու՞մ է ուկրաինական դժբախտությունը։ Նրան միայն մի բան է հետաքրքրում՝ իր շահը։ Հիշու՞մ եք, քառասունչորսօրյա պատերազմում կոտորվում էր մի ողջ ժողովուրդ, իսկ Տրամպը մեզ դուխ էր տալիս՝ սիրուն դրոշ ունեք։ Մենք մենակ էինք, այժմ էլ մենակ ենք՝ արհավիրքին դեմ հանդիման։ Հիմա էլ արևմուտքը «առաջադեմ մարդկությանը» քաջալերում է սանկցիաներով։ Այդ դասը Ռուսաստանն արդեն անցել է քաղաքացիական պատերազմի տարիներին։ Ի՞նչ եղավ՝ ուրիշին եղավ։ Վրաստանը ևս անցավ այս փորձությունով, որից դուրս պրծավ անդամահատված։ Հայաստանը ևս իր բաժին տույժը ստացավ։ Արդեն իսկ Արցախը կորցնելու եզրին ենք, անմիջական սպառնալիք կա բուն երկրի կորստյան առումով։ Եվ այս ամենը արևմտյան հովերով տարված սահակաշվիլինների, փաշինյանականների, զելինսկիների ազգակործան քաղաքականության հետևանքով։ Մարդուն առաջնորդում են ոչ թե օտարածին բնազդները, այլ առողջ բանականությունը, տարրական խելքը, որի բացակայության պատճառով կորստյան է մատնվում սրբության սրբոցը՝ հայրենիքը։ Խելոք ազգերը դաս են քաղում ուրիշի դժբախտությունից»։

Թուրքիան մերժել է Բոսֆորի ու Դարդանելի նեղուցներով ռուսական ռազմական նավերի նեղաշարժը սահմանափակելու Ուկրաինայի խնդրանքը: Ըստ այդ երկրի արտգործնախարարության՝ Թուրքիան կարող է սահմանափակել ռուսական ռազմանավերի տեղաշարժը, բայց անգամ այդ դեպքում Ռուսաստանը իրավունք է ունենալու իր նավատորմը վերադարձնել բազա: Ուկրաինան երեկ էր խնդրել Թուրքիային փակել Բոսֆորի ու Դարդանելի նեղուցը ռուսական ռազմանավերի համար, որպեսզի դրանք Ուկրաինային չմոտենան:

Ուկրաինայի պաշտպանության նախարարությունը կադրեր է հրապարակել ու հայտնել, որ երևացող երկու մեքենաները ռուս զինվորականները առևանգել են ուկրաինական բանակից: Մեքենայի ներսում ռուս զինծառայողներ են, որ հագել են ուկրաինացի զինծառայողների համազգեստները և մեծ արագությամբ շարժվում են դեպքի մայրաքաղաք Կիև: Նրանց հետևից գալիս է ռուսական ռազմական բեռնատարների շարասյունը: Ըստ ուկրաինական կողմի՝ ռուս զինվորականները նաև գրավել են Չեռնոբիլի ատոմակայանը: Անձնակազմը պատանդ է պահվում: Չեռնոբիլի ատոմակայանը գտնվում է Ուկրաինայի հյուսիսային շրջանում՝ Բելառուսի սահմանից ընդամենը 16 կիլոմետր հեռավորության վրա: Ռուս-ուկրաինական պատերազմի մեկնարկից 24 ժամ անց Ուկրաինայի նախագահը հայտնել է 137 զոհի, 316 վիրավորի մասին: Զոհերից տասը սպա է:

Վարչապետ Նիկոլ Փաշինյանը ԵԱՏՄ պետությունների կառավարությունների ղեկավարների հետ հանդիպել է Ղազախստանի Հանրապետության նախագահ Կասիմ-Ժոմարտ Տոկաևի հետ: Ղազախստանի նախագահը ողջունել է ԵԱՏՄ երկրների պատվիրակությունների ղեկավարներին և հույս հայտնել, որ Նուր-Սուլթանում ընթացող Եվրասիական միջկառավարական խորհրդի նիստը կանցնի արդյունավետ: Իր խոսքում վարչապետ Փաշինյանը, մասնավորապես, նշել է, որ Ղազախստանի նախագահը ճիշտ է նկատել` այսօրվա նիստը, հանդիպումը համընկնում է աշխարհաքաղաքական իրավիճակի կտրուկ սրման հետ: «Ակնհայտ է, որ մենք գտնվում ենք զգայուն ժամանակահատվածում, աշխարհաքաղաքական զգայուն տեկտոնական գործընթացներում, և այս համատեքստում, իհարկե, Եվրասիական տնտեսական միությունը կարևոր ֆորմատ է, որպեսզի զարգացնենք մեր երկրների տնտեսությունները: Իհարկե, ակնհայտ է, որ պատժամիջոցների գործողություններն ակնհայտ ազդեցություն կունենան եվրասիական տարածաշրջանում տնտեսական մթնոլորտի վրա, և այս առումով, մենք պետք է քննարկենք, թե ինչպիսի օպերատիվ որոշումներ պետք է ընդունել, որպեսզի այդ բացասական ազդեցությունները լինեն նվազագույն և եթե հնարավոր է, շրջանցել դրանք, իրականացնելով համապատասխան քայլեր: Դուք ճիշտ ասացիք` 2021 թվականի արդյունքները Եվրասիական տնտեսական միության համար բավականին դրական են, որովհետև սկզբունքորեն նախորդ տարին արդեն ճգնաժամային էր, բայց առևտրատնտեսական կապերի ընդհանուր ծավալը ԵԱՏՄ-ի ներսում, առևտրաշրջանառությունն աճել է, ինչը բավականին դրական ազդակ է բոլորիս համար»,- ասել է ՀՀ վարչապետը: Նիկոլ Փաշինյանն ընդգծել է, որ առկա է Եվրասիական տնտեսական տարածաշրջանի ընդլայնման ներուժ: «Կան դիտորդ պետություններ, որոնց հետ բավականին արդյունավետ համագործակցում ենք: Առկա է նաև որոշակի հետաքրքրություն այլ երկրների կողմից` սերտացնելու կապերը Եվրասիական տնտեսական միության հետ: Կարծում եմ` սա ընդհանուր առմամբ դրական գործընթաց է և հույս ունեմ, որ Եվրասիական տնտեսական միությանը, մեզ բոլորիս կհաջողվի իրականացնել այնպիսի քաղաքականություն, որպեսզի ընթացիկ իրավիճակներում ԵԱՏՄ-ն որպես տնտեսական հարթակ ամրապնդվի և շարունակի ազդակ հաղորդել մեր երկրների տնտեսությունների զարգացմանը», - ասել է վարչապետ Փաշինյանը:

Եվրոպայում և ԱՄՆ-ում ոչ ոք Ռուսաստանի հետ պատերազմ սկսելու ցանկություն չունի, հայտարարել է Ֆրանսիայի պաշտպանության նախարար Ֆլորանս Պարլին։ «Ոչ մի եվրոպական երկրում և ԱՄՆ-ում ցանկություն չկա պատերազմել Ռուսաստանի հետ։ Այն, ինչ մենք ցանկանում ենք, այս սարսափելի ներխուժմանը որքան հնարավոր է շուտ վերջ տալն է», - ասել է Փարլին RTL ռադիոկայանի եթերում: Նրա խոսքով՝ այժմ գլխավոր նպատակը Ուկրաինայի արևելքում շուտափույթ հրադադարի հասնելն է։

«Republica»-ն հրապարակել է լուսանկար՝ կից գրելով․ «Սա չեչենական հատուկ նշանակության ջոկատն է` Ուկրաինայի անտառներում։ Նրանց առջև ի թիվս այլ հանձնարարականների` դրված է նաև Ուկրաինայի բարձրաստիճան պաշտոնյաներին պատժելու խնդիրը»։

Նախկին ռազմագերի Ռոբերտ Նալբանդյանը կմնա ազատության դեմ` վերաքննիչ քրեական դատարանը մերժել է դատախազության բողոքը։ Տեղեկությունը Facebook–ի իր էջում գրել է իրավապաշտպան Ռուբեն Մելիքյանը։ Ռոբերտ Նալբանդյանը 2021-ի նոյեմբերի 16-ի դեպքերի ժամանակ էր գերեվարվել, իսկ դեկտեմբերի 4-ին ռուսական կողմի միջնորդությամբ վերադարձել էր Հայաստան։ Դրանից հետո շուրջ 2 ամիս նա կալանքի տակ էր և այս տարվա հունվարի 7-ին հայտնի դարձավ, որ ազատ է արձակվել։ «Այս գլոբալ թոհուբոհի մեջ փոքր լավ լուրով եմ ուզում կիսվել (ինձ համար՝ մեծ). այսօր Վերաքննիչ քրեական դատարանը մերժեց դատախազության բողոքը նախկին ռազմագերի Ռոբերտ Նալբանդյանին ազատ արձակելու որոշման դեմ։ Ռոբերտը կմնա ազատության մեջ։ Այդ կարևոր որոշումը կայացրեց դատավոր Կարեն Բիշարյանը»,–գրել է Մելիքյանը։

Ուկրաինացի զինվորները կամավոր վայր են դրել զենքերը և դիմել գործընկերներին. «Մի՛ գնացեք պատերազմի»։

Ուկրաինայի նախագահ Վլադիմիր Զելենսկին ասել է, որ դիմել է «Բուխարեստի իննյակին» և ռազմական օգնություն խնդրել, նաև կոչ է արել պատժամիջոցներ կիրառել Ռուսաստանի դեմ։ Այսօր առավոտյան ուկրաինացիներին ուղղված իր տեսաուղերձում Զելենսկին նշել է, որ Ուկրաինային անհրաժեշտ է հակապատերազմական կոալիցիա ստեղծել։ «Բուխարեստի իննյակը» Կենտրոնական և Արևելյան Եվրոպայի 9 երկրների ասոցիացիա է, որը ստեղծվել է ՆԱՏՕ-ի արևելյան թևի երկրների միջև ռազմական համագործակցությունը խորացնելու համար: Ասոցիացիայի կազմում ընդգրկված են Բուլղարիան, Հունգարիան, Էստոնիան, Լիտվան, Լատվիան, Լեհաստանը, Ռումինիան, Սլովակիան և Չեխիան: ՄիաժամանակԶելենսկին կարծում է, որ միայն ուկրաինացիների վճռականությունն է ի վիճակի «պահպանել Ուկրաինայի ազատությունը և պաշտպանել պետությունը»։ Ուկրաինայի ղեկավարը քաղաքացիներին հորդորել է ցուցաբերել առավելագույն զսպվածություն և փոխադարձ աջակցություն։

Ուկրաինայի նախագահ Վլադիմիր Զելենսկին հայտարարել է, որ չնայած Արևմուտքի խոստումներին, երկիրը միայնակ է մնացել իր պետության պաշտպանության հարցում։ Նրա խոսքով՝ Արևմուտքը միայն խոսում է Ուկրաինային աջակցելու մասին։ Զելենսկին նաև պարզաբանել է, որ համաշխարհային առաջնորդներից ոչ մեկը պատրաստ չէ երաշխավորել իր երկրի անդամակցությունը ՆԱՏՕ-ին և զինվորականներ ուղարկել Ուկրաինա։ «Մենք մնում ենք միայնակ մեր պետության պաշտպանության գործում. Ո՞վ է պատրաստ մեզ հետ կռվել։ Անկեղծ ասած՝ ես նման մարդկանց չեմ տեսնում… Բոլորը վախենում են», - ասել է նա։

ԱՄՆ ֆինանսների նախարարությունը պատժամիջոցներ է սահմանել բելառուսական 24 կազմակերպությունների և ֆիզիկական անձանց նկատմամբ՝ կապված Ուկրաինայում ստեղծված իրավիճակի հետ։ Այս մասին ասվում է գերատեսչության տարածած հաղորդագրության մեջ։ «Օտարերկրյա ակտիվների վերահսկողության գրասենյակը պատժամիջոցներ է սահմանում Բելառուսի 24 ֆիզիկական և իրավաբանական անձանց նկատմամբ՝ Ռուսաստանի ներխուժմանը Բելառուսի աջակցության համար»,- ասվում է փաստաթղթում։ Նշվում է, որ պատժամիջոցների տակ են հայտնվել պաշտպանական արդյունաբերության մի շարք ձեռնարկություններ՝ երկրի պաշտպանության նախարար Վիկտոր Խրենինը և Անվտանգության խորհրդի քարտուղար, գլխավոր շտաբի նախկին պետ Ալեքսանդր Վոլֆովիչը։ ԱՄՆ գանձապետարանը ցանկում ներառել է Dabrabyt Bank-ը, Belinvestbank-ը և նրա երկու դուստր ձեռնարկությունները՝ Belinvest-engineering-ը և Belbusinessleasing-ը: «Մինսկի տրակտորների գործարանը» (MZKT), ձեռնարկության գլխավոր տնօրեն Ալեքսեյ Ռիմաշևսկին և նրա տեղակալ Ալեքսանդր Վետենևիչը, ինչպես նաև Բելառուսի պետական ​​ռազմաարդյունաբերական կոմիտեն, նրա նախագահ Դմիտրի Պանտուսը և վարչության պետի տեղակալ Վյաչեսլավ Ռոսսոլայը ևս ցուցակում են: ԱՄՆ պատժամիջոցների ենթարկված ձեռնարկությունների ցանկում են նաև Belspetsvneshtechnika, KB Radar, 558 Aircraft Repair Plant, Integral, Minotor-Service, Defense Initiatives և OKB TSP-ն: ԱՄՆ կառավարությունը նաև սահմանափակումներ է մտցրել ծրագրային ապահովման 24×7 Panoptes և Synesis ընկերությունների, ինչպես նաև դրա գործադիր տնօրեն Ալեքսանդր Շատրովի նկատմամբ։ Ցուցակում ընդգրկվել են նաև բելառուս գործարար Ալեքսանդր Զայցևը, ինչպես նաև նրա հետ կապված երկու ընկերություններ՝ Sohra Group-ը և Bremino Group-ը։ ԱՄՆ-ում նրանց ակտիվները կսառեցվեն, իսկ ԱՄՆ քաղաքացիներին և իրավաբանական անձանց կարգելվի նրանց հետ գործարքներ կնքել։

Արարատի մարզում, փետրվարի 24-ին, ողբերգական դեպք է տեղի ունեցել. ժամը 19:50-ի սահմաններում ԱԻՆ փրկարար ծառայութան 911 ճգնաժամային կառավարման կենտրոն ահազանգ է ստացվել, որ Սուրենավան գյուղի վարչական տարածքում գտնվող դաշտամիջյան հատվածում անցնող Կախանովի ջրանցքում «Բելառուս» մակնիշի տրակտոր է ընկել: Օպերատիվորեն ժամանել է ԱԻՆ ՓԾ Արարատի թիվ 24 հրշեջ-փրկարարական ջոկատից 1 մարտական հաշվարկ: Քաղաքացիները իրենց ուժերով, վերամբարձ կռունկի միջոցով դուրս են բերել ջրանցքից տրակտորը, ապա փրկարարները այնտեղից դուրս են բերել երիտասարդ տղայի դին: Մահացածը Սուրենավան գյուղի բնակիչ, 28-ամյա Գագիկ Անդրեասյանն էր:

«Ժողովուրդ» թերթը գրում է. «Փետրվարի 21-ից հետո, երբ Ռուսաստանի Դաշնության նախագահ Վլադիմիր Պուտինը հայտարարեց Լուգանսկի ու Դոնեցկի անկախությունը ճանաչելու մասին, եվրոպական երկրներն իրար հետևից հայտարարություններ են անում ու հայտնում Ռուսաստանի Դաշնության հանդեպ սանկցիաների մասին: Իրավիճակը հատկապես սրվեց փետրվարի 24-ի առավոտյան, երբ Վլադիմիր Պուտինն արդեն բացահայտ հայտարարեց հատուկ ռազմական գործողություններ սկսելու մասին: Այսինքն՝ միջազգային հանրությունը ՌԴ-ին ճանաչեց ագրեսոր և հայտարարում է կապերը խզելու մասին, այնինչ 44-օրյա պատերազմի ընթացքում Հայաստանը նման աջակցություն չստացավ, և Ադրբեջանի հանդեպ նման լուրջ սանկցիաներ այդպես էլ չկիրառվեցին: Այսպիսով, ի՞նչ իրավիճակ ունենք: Միացյալ նահանգները, Մեծ Բրիտանիան և Եվրամիության երկրները հայտարարել են, որ պատժամիջոցները առնչվում են ռուսաստանյան ընկերություններին, ֆինանսական կազմակերպություններին ու ֆիզիկական անձանց: Երեկ ևս ՌԴ հանդեպ պատժամիջոցների մասին նոր հայտարարություն եղավ: Ըստ այդմ, Եվրամիությունը պատժամիջոցների նոր փաթեթ է սահմանել, սակայն 44-օրյա պատերազմի ժամանակ նույն միջազգային հանրությունը չէր շտապում այդպես արագ պատժամիջոցներ կիրառել կամ ագրեսոր համարել Ադրբեջանին: Այդ շրջանում միջազգային հանրության կողմից ավելի շատ երկու կողմերին զսպող հայտարարություններ էին արվում, Ադրբեջանի կամ Թուրքիայի հանդեպ շատ քիչ կառույցներ կամ երկրներ պատժամիջոցներ կիրառեցին: Օրինակ՝ Նիդեռլանդների խորհրդարանը 2020 թվականի նոյեմբերին հայտարարեց, թե մի շարք առաջարկություններ է ընդունել Ադրբեջանի նախագահ Իլհամ Ալիևի և Ադրբեջանի առաջին փոխնախագահի՝ Մեհրիբան Ալիևայի դեմ պատժամիջոցներ կիրառելու վերաբերյալ, ինչպես նաև հայտարարել է Թուրքիային զենք վաճառելու մորատորիումի մասին: ԱՄՆ Ներկայացուցիչների պալատի 50 անդամներ պահանջում են Գլոբալ Մագնիտսկու պատժամիջոցներ սահմանել Ադրբեջանի նկատմամբ»։

Ուկրաինայի Ազգային բանկը Ռուսաստանի ռազմական օպերացիայի մեկնարկի հետ կապված երկրի վարկային կազմակերպություններին արգելել է արտարժութային ցանկացած գործարք կատարել ռուսական եւ բելառուսական ռուբլով։ Այս մասին ասվում է Ուկրաինայի ազգային բանկի կայքում։ Ուկրաինական բանկերը նաեւ չեն կարողանա արտարժույթով գործարքներ կատարել, որոնց մասնակիցը գտնվում է Ռուսաստանում եւ Բելառուսում գտնվող ֆիզիկական կամ իրավաբանական անձ է:

Փլուզվել է Տետերիվի կամուրջը։ Այս մասին հայտնում է Ուկրաինայի Զինված ուժերի գլխավոր շտաբը։

«Հրապարակ» թերթը գրում է. «Չնայած որոշում է կայացվել, որ Սյունիքի մարզպետն ու տեղակալները պետք է հեռանան, անցած շաբաթ էլ մարզի ՔՊ-ի միջոցով մարզպետ Մելիքսեթ Պողոսյանին փոխանցել են, որ պետք է հեռանա, սակայն նա որոշել է մինչև վերջին շունչը պայքարել և դիմում գրելու փոխարեն իրեն գցել է գյուղեգյուղ։ Փոխմարզպետ Կարո Ավանեսյանի հետ այցելում է սահմանային համայնքներ, մարզպետարանը հաղորդագրություններ է տարածում, թե մարզում յուրաքանչյուր խնդիր՝ Մեղրիից մինչև Գորայք, մարզպետի ուշադրության կենտրոնում է, տեսանյութեր են հրապարակում, թե ինչպես են բնակիչները շփվում նրա հետ։ Մարզպետն ուզում է իշխանություններին ստիպել, որ հրաժարվեն իրեն ազատելու մտքից, քանզի մարզում ինքն ընդունելի պաշտոնյա է։ ՔՊ-ում ասում են՝ զուր ջանքեր են»։