Լրահոս

Շիրակի մարզի ծննդօգնություն իրականացնող բուժհաստատություններում 2022 թվականի հունիսի 13-19-ը ծնվել է 56 երեխա, 25-ը տղա է, 31-ը՝ աղջիկ։ Նրանցից 1-ը զույգ է։ Այս մասին հայտնում են Շիրակի մարզպետարանից:

Հունիսի 16-20-ը ԱԻՆ ՓԾ Ճգնաժամային կառավարման ազգային կենտրոնում 5 ահազանգ է ստացվել հանրապետության տարբեր խոտածածկ տարածքներում բռնկված մոտ 200 քմ և ավելի տարածք ընդգրկող հրդեհների վերաբերյալ, մասնավորապես՝ Կոտայքի մարզի Աբովյան քաղաքում՝ 2000 քմ, Եղվարդ քաղաքում՝ 2200 քմ, Վայոց ձորի մարզի Վայք քաղաքում՝ 3 հա։ Հրշեջ-փրկարարները մարել են վերոնշյալ տարածքներում բռնկված հրդեհները՝ ընդհանուր մոտ 3.4 հա։

Երեկ՝ հունիսի 19-ին, խոշոր ավտովթար է տեղի ունեցել Արագածոտնի մարզում։ Ժամը 23։00-ի սահմաններում Երևան-Գյումրի ավտոճանապարհի 82 կմ հատվածում բախվել են Գյումրի քաղաքի բնակիչներ՝ 39-ամյա Հայկ Գրիգորյանի վարած BMW մակնիշի և 41-ամյա Սողոմոն Ղազարյանի վարած Opel Zafira մակնիշի ավտոմեքենաները; © shamshyan.com https://shamshyan.com/hy/article/2022/06/20/1216070/

ՀՀ քննչական կոմիտեի Արագածոտնի մարզային քննչական վարչությունում ՀՀ քրեական օրենսգրքի 104-րդ հոդվածի 2-րդ մասի 6-րդ կետով և 235-րդ հոդվածի 1-ին մասով հարուցված քրեական գործի շրջանակներում իրականացված քննչական և դատավարական այլ մեծածավալ գործողությունների արդյունքում պարզվել են Ապարան քաղաքում երկու անձի սպանության դեպքի մի շարք հանգամանքներ, այդ թվում՝ դրդապատճառը: Քննությամբ ձեռք բերված փաստական տվյալների համաձայն՝ 2022թ. հունիսի 18-ին՝ ժամը 22:30-ի սահմաններում, Երևան քաղաքի 32–ամյա բնակիչը եղբոր հետ Ապարան քաղաքում ավտոմեքենան վարելու ընթացքում ձայնային ազդանշան է տվել «Ինֆինիտի» մակնիշի ավտոմեքենային, շրջանցել և կանգնեցրել այն, այնուհետև մոտեցել են վարորդին և մեքենան վարելու հարցի շուրջ զրուցել նրա հետ, ինչին միջամտել են Ապարան քաղաքի մի խումբ բնակիչներ: Խոսակցությունը վերածվել է վիճաբանության, որը շարունակվել է Ապարան քաղաքի սկզբնամասում: Նշված խոսակցությունը շարունակելու նպատակով հաջորդ օրը՝ հունիսի 19-ին, 32-ամյա տղամարդը, նրա եղբայրը մի քանի անձանց հետ գնացել են Ապարան քաղաքում գտնվող գազալցակայանի տարածք, հանդիպել են նախորդ օրը իրենց խոսակցությանը միջամտած անձանցից մեկին և ծեծի ենթարկել վերջինիս: Նույն հարցի շուրջ խոսակցությունը ժամը 19:30-ի սահմաններում շարունակվել է Նիգավան գյուղի աղբանոցին հարակից տարածքում, որի ընթացքում 32-ամյա տղամարդն իր մոտ գտնվող հրացանից կրակոցներ է արձակել իրենց հետ վիճաբանող անձանց ուղղությամբ: Արդյունքում, հրազենային վնասվածքներով Ապարանի բժշկական կենտրոն տեղափոխված երկու անձ՝ Ապարան քաղաքի 27-ամյա բնակիչներ, հիվանդանոցում մահացել են, իսկ 5 անձ տեղափոխվել են բժշկական կենտրոններ: 32-ամյա տղամարդը ձերբակալվել է: Նախաքննությունը շարունակվում է, ձեռնարկվում են անհրաժեշտ միջոցառումներ՝ դեպքի բոլոր մասնակիցներին հայտնաբերելու և հանգամանքները պարզելու ուղղությամբ:

Հունիսի 17-20-ը ԱԻՆ ՓԾ ճգնաժամային կառավարման ազգային կենտրոնում ստացվել է 5 ահազանգ՝ հանրապետության տարբեր տարածքներում գտնվող շենք-շինություններում (տուն, վագոն-տնակ, անասնագոմ և այլն) և տրանսպորտային միջոցներում բռնկված հրդեհների վերաբերյալ: Մասնավորապես՝ Երևանում և Լոռու մարզի Վանաձոր, Շիրակի մարզի Գյումրի, Կոտայքի մարզի Աբովյան քաղաքներում: Դեպքի վայր ժամանած հրշեջ-փրկարարները մարել են վերոնշյալ տարածքներում (ընդհանուր՝ 11 քմ) և տրանսպորտային միջոցներում բռնկված հրդեհները:

Հունիսի 20-ին, ժամը 09։46-ին Արմավիրի մարզային ճգնաժամային կառավարման կենտրոն ահազանգ է ստացվել, որ Արմավիր քաղաքի Չարենցի փողոցում այրվում է տան տանիք: Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։ Հրդեհը մեկուսացվել է ժամը 10:15-ին։

Այսօր՝ ժամը 09։54-ին, Ճգնաժամային կառավարման ազգային կենտրոն ահազանգ է ստացվել, որ Երևան-Աշտարակ ավտոճանապարհին՝ Վահագնի թաղամասի մոտակայքում, հայտնաբերվել է զինամթերք։ Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ, քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի ինժեներասակրավորական և Ճգնաժամային կառավարման ազգային կենտրոնի օպերատիվ խմբերը:

Երեկ երեկոյան Ապարանի Նիգավան համայնքում արյունալի միջադեպի հետևանքով վիրավորներից ևս մեկը մահացել է։ Yerevan.Today-ի տեղեկություններով, մահացածը Ապարանի քաղաքապետ Կարեն Եղիազարյանի քրոջ որդին է։ Քաղաքապետարանից մեզ հետ զրույցում հաստատեցին տեղեկությունը՝ մանրամասնելով, որ 28-ամյա Տիգրանը ամուսնացած չէր, աշխատում էր Գնթունիքում, որը պատկանում է Ապարանի համայանքապետի ընտանիքին։ Նշենք նաև, որ վիրավորներից մեկի վիճակը բժիշկները գնահատում են ծայրահեղ ծանր։ Ավելի վաղ հայտնել էինք, որ կրակոցներ և սպանություն է տեղի ունեցել Արագածոտնի մարզում․ Հունիսի 19-ին, ժամը 20:30-ի սահմաններում, «Ապարան» բժշկական կենտրոնից ոստիկանության Ապարանի բաժին ահազանգ է ստացվել, որ տարբեր աստիճանի մարմնական վնասվածքներով, այդ թվում՝ հրազենային, իրենց մոտ են տեղափոխվել 7 քաղաքացի։ Ըստ մամուլի հրապարակումների, կրակողները ՔՊ-ականների հարազատներն են։ Politik.am-ի տեղեկություններով՝ ՔՊ-ականների հարազատները կրակել են երիտասարդների վրա, քանի որ նրանք հայհոյել են Նիկոլ Փաշինյանին։ Ըստ աղբյուրի՝ ՔՊ պատգամավոր Մաթևոս Ասատրյանի հարազատները և ՔՊ Արագածոտնի փոխմարզպետ Էդգար Փարվանյանի հորեղբոր որդին վիճաբանել են ապարանցի մի խումբ երիտասարդների հետ, ինչի հետևանքով վերոնշյալ մարդիկ կալաշնիկովով կրակել են երիտասարդների վրա։

Yerevan.Today-ի գլխավոր խմբագիր Սևակ Հակոբյանը ֆեյսբուքյան իր էջում գրում է․ Երկրորդ դեպքն է արդեն, որ Նիկոլ Փաշինյան անվան հետ են ուղիղ կապվում սպանություններ։ Սոնա Մնացականյանի սպանությունը հիշում ենք բոլորս, ընդամենը վերջերս էր։ Նրան վթարի ենթարկեց Նիկոլ Փաշինյանի շարասյունը, թողեց մահանա ու անտարբեր անցավ կողքով։ Օրը ցերեկով էր, մարդկանց աչքի առաջ էր, տեսանյութեր կան։ Էդ ժամանակ ի՞նչ եղավ․ ՔՊ-ն և շրջանակները անմիջապես սկսեցին արդարացնելը՝ «դե հո վարչապետը չի քշել», «աղջիկը հետ-հետ է քայլել» և այլն, փորձում էին մաքրել Նիկոլի անունը։ Նույնը հիմա է, տեղեկությունը մի քանի տեղից նույնն էր՝ Նիկոլին հայհոյելու համար մարդ են սպանել․․․ ու ՔՊ-ականները, ափալ-թափալ անցան էլի նրա անունը մաքրելուն․ դեռ սպանությունը չբացահայտած, դեռ չհարցաքննած՝ ոստիկանությունը գիշերվա կեսին հաղորդագրություն է տարածում՝, թե քաղաքական ենթատեքստ չունի, որսորդական հրացանով մի հատ կրակոց է։ Բայց նույն տեքստում ասում է, թե 6 վիրավոր կա հիվանդանոցներում, մանրամասները ճշտում են։ Այսինքն՝ ամենից կարևոր մանրամասնությունը՝ Նիկոլին հայհոյելու համար է, թե ոչ՝ ճշտել եք, դրանով անմիջապես հաղորդագրությունը տալիս եք, դե մնացածը հետո, ընթացքում կճշտե՞ք։ Իսկ իրականում այն, ինչը երեկ տարածեց ոստիկանությունը, արդեն տարածում էին ՔՊ-ական շրջանակները, այ լրիվ նույն կերպ։ Էս մարդու անվան հետ կապված երկրորդ աղմկահարույց դեպքն է, և իշխանական կուսակցությունը, իրավապահ համակարգը ընկած առաջին հերթին դրա անունն են փորձում մաքրել։ Հիշու՞մ եք, Սոնա Մնացականյանին ավտոյի տակ ճզմել-սպանելուց հետո շատերն ասում էին՝ հաստատ Փաշինյանն է միջից հրահանգել, թե՝ քշե՛ք, քշե՛ք, չկանգնե՛ք։ Որովհետև, ինչու՞ պիտի գոնե մեկը չկանգներ՝ 7-8 մեքենաներից, գոնե մեկը, չֆայմեր՝ կանգնել։ Ուրեմն, տեղում մի շատ զորավոր հրահանգ է եղել, որին բոլորն են ենթարկվել։ Սոնայի ժամանակ էլ ասում էին մի քաղաքականացրեք, չնայած որ վարչապետի շարասյունից մեքենա էր խփել-սպանել։ Չէին քաղաքականացնում ոչ ոք, չէր ասում միտումնավոր է, ասում էին ինչի՞ չեք կանգնել օգնեք, կարող է փրկվեր։ Իրենց ասածը մեկն էր՝ վարչապետը և ոչ մի մեքենայի ղեկին չի եղել։ Էդքան բան։ Նայելով այն ժամանակվա, ու այս դեպքով արդարացումներին, ոստիկանության ափալ-թափալ հաղորդագրությանը, նույն բանն եմ մտածում․ իսկ գուցե նույն մարդը, հիմա էլ ասել է՝ ով ինձ կհայհոյի, գյուլեք թող գնա՞։ Կարող եմ, չէ՞, մտածել։ Բա էլ ինչի՞ են առաջին իսկ ժամերին ընկած մաքրում քաղաքական ենթատեքստը, իր անվան հետ կապված լինելը։ Եթե ՔՊ պատգամավորներ, այլ կուսակիցներ, իշխանական կողմից այլ գրառումներ անողներ, ու գումարած այդ բոլորին՝ ոստիկանությունը, ասում են նույնը, ուրեմն ինչոր մեկը, որը կարող է այդ բոլորին ասել ինչ անել, նրանք էլ անմիջապես՝ կնոպկայով միանան, ուրեմն ինչոր այլ կերպ է իր դերակատարումը այդ ամենում՝ իր հրամանով չեն կանգնել, իր հրամանով են կրակել, ու այն ժամանակ էլ ու հիմա էլ մի հարց են լուծում՝ մաքրում են իր անունը։ Ուրիշ ոչինչ։

Հունիսի 19-ին արտակարգ դեպք է տեղի ունեցել Երևանում։ Ժամը 02։50-ի սահմաններում 31-ամյա Գարիկ Սահակյանն իր վարած Opel Zafira մակնիշի ավտոմեքենայով Բաշինջաղյան փողոցում դուրս է եկել հանդիպակաց երթևեկելի գոտի և բախվել 25-ամյա Ալբերտ Ամուլիկյանի վարած Hyundai մակնիշի ավտոմեքենային, այնուհետև մասամբ հայտնվել գաջի շինանյութի խանութ-սրահի տարածքում՝ վերջիններիս պատճառելով  նյութական վնաս։   Ինչպես հայտնում է «Shamshyan.com-ը», տուժածներ չկան։   Վարորդը ենթարկվել է սթափության փորձաքննության. Opel-ի վարորդը եղել է խմածության ամենաբարձր աստիճանում։ 

Վարչապետ Նիկոլ Փաշինյանը որոշումներ է ստորագրել բարձր տեխնոլոգիական արդյունաբերության նախարարի տեղակալներ նշանակելու մասին։ «Ղեկավարվելով «Հանրային ծառայության մասին» օրենքի 9-րդ հոդվածի 1-ին մասով՝ Գևորգ Մանթաշյանին 2022 թվականի հունիսի 20-ից նշանակել բարձր տեխնոլոգիական արդյունաբերության նախարարի առաջին տեղակալ»։ «Ղեկավարվելով «Հանրային ծառայության մասին» օրենքի 9-րդ հոդվածի 1-ին մասով՝ Ավետ Պողոսյանին 2022 թվականի հունիսի 20-ից նշանակել բարձր տեխնոլոգիական արդյունաբերության նախարարի տեղակալ», - նշված է որոշումներում։

Մեր զինծառայողների կյանքը սահմանին պաշտպանելուն զուգահեռ պետք է պաշտպանենք նաև երկրի ներսում։ Երբ այս խնդիրները լուծենք նոր միայն կարող ենք մտածել սահմանների պաշտպանության և անվտանգային սպառնալիքների հաղթահարման մասին։ Ներքին ու արտաքին թուրքը խիստ մրցակցության մեջ են, թե ով ավելի շատ սպառնալիք կստեղծի Հայաստանի ու Արցախի համար։

Հունիսի 19-ին, ժամը 22։54-ին Ճգնաժամային կառավարման ազգային կենտրոն ահազանգ է ստացվել, որ քաղաքացին փորձում է ինքնասպանություն գործել՝ նետվելով Երևանի Դավթաշենի կամրջից․ անհրաժեշտ է փրկարարների օգնությունը։ Այս մասին հայտնում են ՀՀ ԱԻՆ-ից: Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և Հոգեբանական աջակցության բաժնի հերթապահ հոգեբանը: Հոգեբանական աջակցության բաժնի հերթապահ հոգեբանը Ա. Խ.-ին (ծնված 1995 թ․) ցուցաբերել է հոգեբանական աջակցություն. վերջինս տեղափոխվել է ոստիկանության Մաշտոցի բաժին։

Հայ-ադրբեջանական սահմանին տեղի ունեցած միջադեպից հետո Ադրբեջանի պետական մարմինները եւ ԶԼՄ-ները տարածեցին տեղեկություն տարբեր միջադեպերի մասին, իբր որոնց հետեւանքով զոհվել եւ վիրավորվել են ադրբեջանցի մի քանի զինվորներ։ Ադրբեջանը հերթական անգամ, հին ավանդույթի համաձայն, թաքցնում է մարտական կորուստները եւ դրանք ներկայացնում որպես դժբախտ դեպքեր։ Հունիսի 19-ի տեղեկատվության համաձայն՝ Քյուրդամիրի կենտրոնական շրջանային հիվանդանոցում ադրբեջանցի երկու զինծառայող՝ մայոր Յուսիֆ Մահիր օղլի Մամեդլին (ծնվ. 1988թ.) եւ Ֆարիդ Սամիր օղլի Նասիբովը (ծնվ. 1999թ.) զոհվել են վթարի հետեւանքով։ Տեղեկացվել է, որ Հաթեմ Հայդեմիրովիչ Բայդաշովը (ծնվ. 1994թ.) ծայրահեղ վիճակում է։ Ծառայողական պարտականությունները կատարելիս զոհվել է Ադրբեջանի ԶՈւ ազգային անվտանգության ծառայության կապիտան Յոլչուզադե Նիզամի Վահիդ օղլուն։ Զինծառայողներին մարտական դիրք տեղափոխող մեքենան ընկել է ձորը։ ANAMA ականազերծման գործակալության աշխատակից Ալի Շուքուրովը (ծնվ. 1992թ.) պայթել է ականի վրա Ջեբրայիլի շրջանում։ Շուքուրովը պայթյունի հետեւանքով բազմաթիվ վիրավորումներ էր ստացել։

Քննչական ծիծաղելի աճպարարությունը. Կարդում եմ ՊՊԾ պետ Սարգիս Հովհաննիսյանի և MediaHub.am-ի լրագրողի և օպերատորի միջև Բաղրամյան-Պռոշյան խաչմերուկում կատարված դեպքով քրեական գործի հարուցումը մերժելու մասին քննիչը որոշումը և շատ տարօրինակ հանգամանքներ բացահայտում: Այս մասին Տելեգրամի իր ալիքում գրել է «Հայրենիք» կուսակցության քաղխորհրդի անդամ Արսեն Բաբայանը: Նա նաեւ նշել է. «Պարզվում է, որ ՊՊԾ բոլոր այն ծառայողները, որոնք եղել են դեպքի ականատեսներ, իրենց բացատրություններում հստակ նշել են, որ կատարվել է լրագրողի մասնագիտական օրինական գործունեությանը խոչընդոտելու հանցագործություն: Առանց որևէ բացառության բոլոր ՊՊԾ ծառայողներն իրենց բացատրություններում պնդում են, որ կոնկրետ ծառայակիցը փակել է տեսախցիկի օբյեկտիվը, որպեսզի հնարավոր չլինի նկարահանել և լուսաբանել իրադարձությունը (ՊՊԾ պետի գործունեությունը): Բացի դրանից նրանք պնդում են, որ փորձել են հեռացնել լրագրողին դեպքի վայրից, սակայն լրագրողը և օպերատորն այդպես էլ չեն հեռացել: Կարդում ես ու մտածում, թե լավ, բա էլ ի՞նչ պետք է տեղի ունենա, որ արարքը դառնա լրագրողի մասնագիտական օրինական գործունեության խոչընդոտում: Այս ամենից հետո քննիչը եզրահանգել է, թե հանցագործություն տեղի չի ունեցել: Շուտով բողոքը պատրաստ կլինի և կտեսնենք, թե դատախազությունում մնացե՞լ է արդյոք մասնագիտական արժանապատվությունը: Քննիչի որոշումը բացահայտ ծաղրանք է քրեական իրավունքի նկատմամբ»։

Ինչպես արդեն տեղեկացրել էինք, հունիսի 19-ին կրակոցներ են հնչել Արագածոտնի մարզի Ապարան քաղաքի սկզբանամասում։ Մենք տեղեկացրել էինք, որ նախ վիճաբանություն է տեղի ունեցել ՔՊ պատգամավոր Մաթևոս Ասատրյանի հարազատների և ՔՊ Արագածոտնի փոխմարզպետ Էդգար Փարվանյանի հորեղբոր որդիների միջև, որի ընթացքում էլ հնչել են կրակոցներ։ Նախնական տեղեկությունների համաձայն կա երկու զոհ և հինգ վիրավոր։ Շրջանառվող վարկածն այն է, որ երիտասարդները հայհոյել են Նիկոլ Փաշինյանին, ինչից հետո տեղի է ունեցել միջադեպը: Ստորև ներկայացնում ենք տեսանյութ, թե ինչ էր ասում Նիկոլ Փաշինյանը 2018 թվականին: «Ես ուզում եմ ասեմ, որ թույլ չեմ տալու, որ մեր սիրո և համերաշխության հեղափոխությունից հետո կանգնի և ասի ես զենքով հարցեր կլուծեմ, զենքով այլևս հարցեր չեն լուծվելու»,-ասաց նա:

Պաշտպանության նախարարության պաշտոնական կայքում մինչև հիմա նախորդ գիշերը սահմանին տեղի ունեցած միջադեպի մասին որևէ տեղեկություն չկա։ Սա այն դեպքում, որ ՊՆ-ից լրատվամիջոցներից մեկի հետ զրույցում միջադեպը կարճ հաստատել էին, սակայն փոխանցել էին, որ մանրամասներ կհաղորդեն ավելի ուշ։ Դեպքի մանրամասների հետ կապված մի ամբողջ օր տարատեսակ լուրեր են շրջանառվում, իսկ թե ինչով են զբաղված ՊՆ-ի կուսակցական ֆունկցիոներները կարելի է միայն ենթադրել։ Դե իսկ իրավապահ համակարգը զբաղված է ընդդիմախոսների զուգարան գնալը օպերատիվ հետևելով, իշխանական մամուլին տարբեր թեմաներով օպերատիվ կադրեր տրամադրելով, իշխանական քարոզչամեքենան սպասարկելով, մի խոսքով վերածվել է քպ շարքային ստորաբաժանման։ Դե սրանց համար ի՞նչ սահման, ի՞նչ զինծառայող, ի՞նչ պաշտպանություն, ի՞նչ հայրենիք։ Կարևորը իրենց կիրակին հաճելի անցնի, փորները կուշտ լինի, փողն էլ գրպաններում անպակաս։

Հիշեցնեմ բազմիցս հնչեցված պարզ ճշմարտությունը. կապիտուլյանտն ու իր խմբավորումը Հայաստանում դե ֆակտո իշխանություն պահել կարող են բացառապես բռնապետությամբ ու օրստօրե այդ բռնապետության շղթաները ավելի են զգացվելու հասարակության բոլոր շերտերի համար։ Կրկնում եմ՝ բոլոր։ Արագածոտնում վերջին հանցագործության դեպքը ևս մեկ վկայությունն է վերևում ասվածի։ Մենք սահուն մտնում ենք արյունոտ բռնապետության վերջին փուլ, որի առաջին զոհը շաբաթներ առաջ վրաերթի ենթարկված հղի աղջիկն էր, հաջորդ զոհերը ապօրինի ձերբակալված քաղաքական բանտարկյալները, այսօր՝ ընդդիմադիր հայացքներ ունեցող երիտասարդները։ Սա #հակաՀայաստան'ն է, որին իրենց լռությամբ օժանդակում են իրենց բարի գործերով զբաղեցնող կարծիքի առաջնորդները՝ ժպիտը դեմքին, քաղաքականության հանդեպ ցուցադրական քամհարանքով և կործանվող հայրենիքի կենացը մտքում շարադրելով։ հ.գ. Իսկ առավոտյան թշնամու կրակից զոհված Հրաչ Փիլիպոսյանի մասին ՀՀ դե ֆակտո պաշտպանության նախարարությունը դեռ ոչ մի տվյալ չի հայտնել...

Երբ իրական արտաքին թշնամուն թողած թշնամիներին երկրի ներսում ես փնտրում, արդյունքը կոնֆլիկտն է, կրակոցները, մահերը, բայց ոչ թե իրական թշնամուն, այլ քո պետության քո հետ անհամաձայն քաղաքացիների: Փողոցային թափթփուկներին ու ոչնչություններին բերել դարձրել են պատգամավոր ու մարզպետ, ձեռքները զենք են տվել ու ասել են ով մեզ բան կասի, տվեք սպանեք: Սա է իրականությունը, սա է մեր ձախողումների ու պարտությունների պատճառը, սա է մեր ողբերգությունը . . .

Հայաստանում շարունակվում է կորոնավիրուսի դեմ պատվաստումային գործընթացը։ Հունիսի 12-ի դրությամբ Հայաստանում Covid-19-ի դեմ պատվաստվել է 2 միլիոն 210 հազար 776 քաղաքացի։ Առաջին դեղաչափով պատվաստվել է 1 միլիոն 137 հազար 428 քաղաքացի, երկրորդով՝ 1 միլիոն 11 հազար 387 քաղաքացի։ Երրորդ՝ բուստեր դեղաչափով պատվաստվել է 57 հազար 520 քաղաքացի։