Լրահոս

Այսօր՝ փետրվարի 10-ին, ողբերգական դեպք է տեղի ունեցել Կոտայքի մարզում։ Ժամը 18։35-ի սահմաններում ՀՀ Ներքին գործերի նախարարության ոստիկանության Նաիրիի բաժին Նոր Հաճնի շտապօգնության կայանից ահազանգ է ստացվել, որ բժիշկների հերթապահ խումբը կանչով մեկնել է Գետամեջ գյուղի տներից մեկը, որտեղ հայտնաբերել է երիտասարդ տղայի կախված դի։ Ոստիկաններն ու քննիչները նշված գյուղի տներից մեկի պատշգամբի տակ գտնվող նկուղային հարկի տակ հայտնաբերել են Արմավիրի մարզի բնակիչ՝ 17-ամյա Ս. Վ-ի դին՝ առաստաղից գոտու միջոցով կախված վիճակում։ Ս. Վ-ն այցելել էր իր տատի և պապի տուն, ու նրա դին հայտնաբերել է քեռին։

Թուրքիայում մահացածներին հողին հանձնելու համար հարազատները ձեռքով են գերեզման փորում: 19 հազարի է մոտենում զոհերի թիվը: Թուրքիայում հրատարակվող «Ակոս» պարբերականի խմբագիր Բագրատ Էստուկյանը «Հայլուր»-ին ասել է՝ թուրքական իշխանությունը պատրաստ չէր նման ավերածությունները վերացնելուն, զինվորականներն են միացել փրկարարներին: Երկրաշարժից 4 օր անց էլ փլատակներից լսվում են մարդկանց ճիչեր:

Ղազախստանի սեյսմոլոգիական կայանների ցանցը Ռուսաստանի հետ սահմանին 4,4 մագնիտուդով երկրաշարժ է գրանցել։ Այս մասին հայտնում է Ղազախստանի արտակարգ իրավիճակների նախարարության սեյսմոլոգիական փորձարարական և մեթոդական գործակալությունը։ Երկրաշարժը գրանցվել է Աստանայի ժամանակով 18:35-ին։ Երկրաշարժի էպիկենտրոնը գտնվել է Ալմաթիից 928 կմ հյուսիս-արևելք՝ Ղազախստանի և Ռուսաստանի սահմանին։ Օջախը գտնվել է 10 կմ խորության վրա։ Զոհերի և ավերածությունների մասին տեղեկություններ չկան։

Աղետի գոտի դարձած Թուրքիայում ու Սիրիայում երկրաշարժերի զոհերի թիվը մոտենում է 22 հազարի: 3 հազարն անցնում է զոհերի թիվը Սիրիայում, որտեղ կարելի է արդեն օգնություն ուղարկել՝ առանց վախենալու ամերիկյան պատժամիջոցներից: Միացյալ Նահանգները կես տարով չեղարկել է Սիրիայի դեմ պատժամիջոցները: Երկրաշարժից 10 ժամ անց փլատակներում հայտնաբերված նորածնի վիճակը լավ է: Աղջնակին գտել էին մոր պորտալարից կպած: Ծննդաբերությունից հետո մայրը մահացել է:

Արցախում շինարարական աշխատանքները 95 տոկոսով դադարեցվել են: Բնակելի տների շինարարությունը կանգնել է շինանյութի պակասի, գազի ու հոսանքի անընդհատ անջատումների պատճառով: Թերի ջեռուցվող հիվանդանոցներում ծայրահեղ ծանր հիվանդներ կան: 8 երեխա մանկական հիվանդանոցի վերակենդանացման բաժանմունքում է:

Գլխի մաշկի բարձր զգայունությունը բավականին տարածված երևույթ է։ Շատերը ցավ են նկատում լոգանքից, սանրելուց, հարդարելուց կամ նույնիսկ թեթև հպման պահին։ Նման ցավերի պատճառները շատերի համար մնում են առեղծված, չէ՞ որ արտաքուստ խնդիրը ոչ մի կերպ չի արտահայտվում։ Մազերի և գլխի արմատների ցավը հաճախ արդյունք է այն սխալների շղթայի, որոնք մենք թույլ ենք տալիս մազերի խնամքի մեջ: Սխալ ընտրված լվացող միջոցները կարող է լուրջ խնդիրներ առաջացնել։ Նույնիսկ լավ շամպունը, որը կատարյալ է ձեր ընտանիքի և ընկերների համար, կարող է ձեզ համար վտանգավոր լինել: Ախտանիշները, ինչպիսիք են քորը, շերտավորումը, գլխի չորությունը և այլն, որոնք ի հայտ են գալիս դեղամիջոցի օգտագործումից հետո, ազդանշան են տալիս, որ պետք է հրաժարվել այդ միջոցից: Մեծ նշանակություն ունի նաև հարմար և ճիշտ սանր ընտրելը։ Մասնագետները խորհուրդ են տալիս նախապատվությունը տալ փայտե սանրերին։ Դրանք զգալիորեն նվազեցնում են գլխամաշկի տարբեր հիվանդությունների առաջացման վտանգը՝ կանխելով մազերի էլեկտրականացումը։ Նորաձև սանրվածքները ևս կարող են բացասաբար ազդել մազերի և գլխի վիճակի վրա։ Մազերը, որոնք չափազանց սեղմված են, գլխի ցավի ևս մեկ հնարավոր պատճառ են հանդիսանում: Դրանք կարող են հանգեցնել միկրոճաքերի և միկրոպատռվածքների՝ երբեմն շատ ցավոտ: Այդ իսկ պատճառով ցանկալի է օգտագործել միայն փափուկ ռետինե ժապավեններ։ մասնագետները խորհուրդ են տալիս գիշերը մազերը բաց թողնել, որպեսզի գլխամաշկը հանգստանա։ Ի դեպ, եթե երկար ժամանակ կրել եք նույն սանրվածքը, իսկ հետո հանկարծ կտրուկ փոխել ձեր կերպարը, ապա այս դեպքում նույնպես հավանական է ցավ, քանի որ մազերը և մազերի ֆոլիկուլները սովոր են որոշակի դիրքում լինել։ Ինչպես ցույց է տալիս պրակտիկան, հաստ և երկար, և հետևաբար ծանր մազեր ունեցողները հաճախ տառապում են մազերի ֆոլիկուլների ցավից: Պատշաճ խնամքը և ճիշտ ընտրված սանրվածքները կօգնեն նվազեցնել անհարմարությունը և նույնիսկ ամբողջությամբ ազատվել ցավից: Հաճախակի գունաբացումները, գույնի հետ փորձարկումները ևս վնասակար են մազերի և գլխի համար։ Մասնագետները զգուշացնում են, որ քիմիական ներկերի հաճախակի օգտագործումը կարող է մաշկային ցավ առաջացնել։ Սա հատկապես ճիշտ է մազերի գույնի արմատական ​​փոփոխության դեպքում, օրինակ, երբ բնական պիգմենտը փոխվում է՝ թխահերից շիկահեր դառնալու համար՝ ստեղծելով բազմագույն երանգ: Մեր մաշկը հակված է մեծ թվով մաշկաբանական հիվանդությունների։ Դրանցից ամենատարածվածը սեբորեան է: Բարեբախտաբար, այս բոլոր հիվանդությունները լիովին բուժելի են՝ մասնագետին ժամանակին դիմելու պարագայում։ Որոշ մարդկանց մաշկը շատ զգայուն է: Այս հատկանիշը կարող է փոխանցվել գենետիկորեն: Այս դեպքում գլխամաշկը ցավով է արձագանքում արտաքին և ներքին պայմանների տարբեր փոփոխություններին, տարբեր գրգռիչների ազդեցությանը։ Նման իրավիճակներում միակ հնարավոր փրկությունը մազերի և գլխամաշկի հատուկ, ավելի մանրակրկիտ խնամքն է։ Ինչ էլ որ լինի գլխի ցավի պատճառը, ամենաարդյունավետ և արագ միջոցը թեթև մերսումն է։ Այն արդյունավետորեն վերականգնում է արյան շրջանառությունը, և երբեմն դա բավական է, որպեսզի խնդիրը նահանջի: Որոշ դեպքերում մասնագետին դիմելը անհրաժեշտություն կլինի, քանի որ գլխամաշկի հաճախակի ցավերը կարող են ազդարարել որևէ հիվանդության առկայության մասին։

Եվրախորհրդարանի արտաքին հարաբերությունների հանձնաժողովը Ադրբեջանին դատապարտող զեկույց է ընդունել, պահանջել, որ Բաքուն հանի զորքը Հայաստանի տարածքից: Նոր զեկույցում նշված է նաև, որ անցած տարի սեպտեմբերին Ադրբեջանի հարձակումը Հայաստանի վրա խափանել է խաղաղության հասնելու փորձերը: Հայաստանի խորհրդարանական ընդդիմությունը կարևորում է եվրոպական նոր զեկույցը: «Հայաստան» խմբակցության պատգամավոր Քրիստինե Վարդանյանը համոզմունք է հայտնել, որ այսպիսի փաստաթուղթ ՔՊ-ականները չէին ընդունի:

Համեմունքները յուրաքանչյուր խոհանոցի հիմնական բաղադրիչն են: Հաճախ ընտրությունը կանգ է առնում հենց կծու համեմունքների վրա, ինչն էլ կարող է ունենալ և՛ դրական, և՛ բացասական հետևանքներ։ Խոտաբույսերով և համեմունքներով հարուստ ամենօրյա սննդակարգը պարունակում է հակաօքսիդանտներ, հանքանյութեր և մուլտիվիտամիններ: Դրանք բարելավում են նյութափոխանակությունը, ստեղծում են հագեցվածության զգացում և երկարացնում երիտասարդությունը։ Ճիշտ չափաբաժիններով բուսական կծու մթերքը համեղ է և անվտանգ: Ճիշտ է նաև այն վարկածը, որ կծու սնունդը սպանում է սննդի հետ եկող և օրգանիզմին խանգարող բակտերիաներն ու վիրուսները։ Օրինակ՝ կապսաիցինը տարբեր մրգերի և համեմունքների բաղադրամաս է, որը դրանք դարձնում է թանձրալի: Այն ունի հակասեպտիկ հատկություն, որն օգնում է խուսափել աղեստամոքսային տրակտի հիվանդություններից։ Չիլին, չամանը, սխտորը, կոճապղպեղը և այլ տաք համեմունքներ ոչնչացնում են ստամոքս-աղիքային վարակների, E. coli-ի և այլ բակտերիաների մեծ մասը: Կապսաիցինը, որն առատորեն առկա է չիլի պղպեղի մեջ, սպանում է հելիկոբակտերիաները և համարվում է այս բակտերիաների առաջացրած խոցերի և գաստրիտների բուժման լավագույն բնական միջոցներից մեկը: Քուրքումին հիմնական նյութը, որը կազմում է քրքումի արմատի բաղադրության մասը, ունի հակաբորբոքային, հակաուռուցքային, հակաբակտերիալ, հակաօքսիդանտ հատկություններ: Միևնույն ժամանակ, պղպեղի տարբեր տեսակներ պարունակում են նյութեր, որոնք ուժեղացնում են քուրքումինի ազդեցությունը։ Գիտնականները ցույց են տվել, որ կապսաիցինը կարող է նվազեցնել քաղցը և մեծացնել էներգիայի ծախսերը: Այնուամենայնիվ, այն արագացնում է սրտի աշխատանքը և բարձրացնում ջերմաստիճանը: Սա իր հերթին խթանում է նյութափոխանակությունը։ Նույնիսկ մեծ ցանկության դեպքում դժվար կլինի հաճախակի շատ կծու սնունդ ուտել։ Շատերն օրինակ այս մեթոդին են դիմում քաշի կորստի համար։ Սակայն պետք է հիշել, որ կարելի է նիհարել միայն կալորիականության դեֆիցիտի և ֆիզիկական ակտիվության հետ համատեղ: Կծու համեմունքներում պարունակվող նյութերը նվազեցնում են արյան մեջ տրիգլիցերիդների մակարդակը, ավելացնում են լյարդում ճարպային նյութափոխանակության մեջ ներգրավված ֆերմենտների քանակը, արագացնում են նյութափոխանակությունը, ակտիվացնում են ճարպերի օքսիդացման գործընթացը: Կապսաիցինը չեզոքացնում է ճարպային բջիջների կողմից առաջացած քրոնիկական բորբոքումները և նվազեցնում է գրելինի հորմոնի արտադրությունը, որը պատասխանատու է սովի զգացման համար։ Կծու սնունդը լավացնում է մարսողությունը, սակայն սա ևս միանշանակ չէ, քանի որ ստամոքս-աղիքային հիվանդությունների առկայության դեպքում, կծու սնունդը կարող է բորբոքային պրոցեսներ հրահրել։ Կծու համեմունքները խթանում են ստամոքսահյութի արտազատումը, ինչը բարելավում է արյան հոսքը դեպի ստամոքսի պատեր և օգնում վերականգնել նրա լորձաթաղանթը։ Դրական ազդեցության հետ մեկտեղ, այն կարող է առաջացնել նաև այրոցի զգացում՝ կախված գրգռիչի ազդեցությունից։ Կծու սնունդը չի հրահրում գաստրիտ, այլ ցավ է պատճառում առկա խնդիրներ ունեցող մարդկանց։ Կծուն մեծացնում է ստամոքսում թթվի արտազատումը, իսկ գաստրիտով մարդու ստամոքսի լորձաթաղանթն արդեն թույլ է և անպաշտպան։ Քիմքի բշտիկները ազդանշան են ուղարկում ուղեղին՝ բերանում այրոցի զգացողության մասին, և այն սկսում է էնդորֆին արտադրել՝ արգելափակելու տհաճ զարգացումը, որից էլ առաջանում է բերանի և լեզվի թմրություն։ Հիվանդություններ, որոնց դեպքում կան կծու համեմունքների օգտագործման սահմանափակումներ և հակացուցումներ՝ ստամոքսի և 12 տասներկումատնյա աղիքի խոց, խոցային կոլիտ սուր փուլում, հեպատիտ, խոլեցիստիտ, պանկրեատիտ, խոլելիտիաս։

Ռուսաստանի խաղաղապահ զորախումբը շարունակում է Լեռնային Ղարաբաղում իր առջև դրված խնդիրների կատարումը: Ինչպես տեղեկացնում է «Արմենպրես»-ը, այս մասին հաղորդագրություն է տարածել ՌԴ պաշտպանության նախարարությունը: Նշվում է, որ ՌԴ խաղաղապահների կողմից 30 դիտակետերում իրադրության շուրջօրյա մոնիթորինգ և կրակի դադարեցման ռեժիմի պահպանման վերահսկողություն է իրականացվում: «Զորախմբի հրամանատարությունը շարունակում է բանակցությունները հայկական և ադրբեջանական կողմերի հետ՝ Ստեփանակերտ-Գորիս ճանապարհով (Լաչինի միջանցք – խմբ.) տրանսպորտային միջոցների երթևեկությունը վերականգնելու հարցով»,-ասվում է հաղորդագրությունում: Ըսստ հաղորդագրության՝ ընդհանուր առմամբ, 2020 թվականի նոյեմբերի 23-ից ՌԴ խաղաղապահ զորախմբի ինժեներասակրավորական խմբերը ականներից և արկերից մաքրել են 2508,3 հա տարածք, 689,5 կմ ճանապարհ,1940 շենք, հայտնաբերվել և վնասազերծվել է 26762 պայթյունավտանգ առարկա: Նշվում է, որ ՌԴ խաղաղապահների անվտանգության ապահովման և հնարավոր միջադեպերի կանխարգելման նպատակով պահպանվում է շարունակական փոխգործակցություն Հայաստանի և Ադրբեջանի զինված ուժերի գլխավոր շտաբների հետ:

Ռուսաստանը տեղյակ չէ, որ Ադրբեջանը բողոքել է Բաքվի դեմ հայ-ռուսական կոալիցիայից: Ռուսաստանի արտգործնախարարության պաշտոնական ներկայացուցիչ Մարիա Զախարովան այսօր անդրադարձել է Փաշինյանի՝ խորհրդարանում արած հայտարարությանը: Փաշինյանն ասել էր՝ Բաքուն բողոքել է, թե հայ-ռուսական հարձակում է ծրագրվում Ադրբեջանի դեմ ու դրա համար է ինքը եվրոպացի դիտորդներին հրավիրել Հայաստան, որ անձամբ տեսնեն՝ ինչ է կատարվում հայ-ադրբեջանական սահմանին: Զախարովան վստահ է՝ նման հայտարարություններով փորձ է արվում արդարացնել եվրոպացիների մուտքը տարածաշրջան:

Ոստիկանության բաժնում փաստաբաններին ու անչափահասներին ոստիկանների կողմից ծեծի ենթարկելու դեպքը խիստ մտահոգիչ է, դրան պետք է հաջորդի քննություն` մեղավորների պատիժով, հայտարարել է Իրավունքի և արդարության կենտրոն «Թաթոյան» հիմնադրամը «Այսօր ՀՀ փաստաբանների պալատը հայտարարություն է տարածել այն մասին, որ 2023 թվականի փետրվարի 9-ին ՀՀ ոստիկանության Երևան քաղաքի վարչության Էրեբունու բաժնում ոստիկանության մի խումբ ծառայողներ շարունակական բռնություն են գործադրել իրենց մասնագիտական գործունեությունն իրականացնող փաստաբաններ Մարզպետ Ավագյանի և Էմանուել Անանյանի նկատմամբ: Ըստ հայտարարության՝ ոստիկանության ծառայողները տևական ժամանակ ոտքերով և ձեռքերով հարվածել են փաստաբաններին: Ոստիկանության կողմից բռնությունն առհասարակ քրեորեն պատժելի արարք է: Մասնագիտական գործունեություն իրականացնող փաստաբանի նկատմամբ բռնությունն այն էլ ոստիկանության բաժնում բացարձակ անընդունելի է ոչ միայն այն պատճառով, որ քրեորեն պատժելի արարք է, այլ նաև վնաս է հասցնում փաստաբանության հեղինակությանը, մարդու իրավունքների պաշտպանության համակարգին և ի վերջո երկրի հեղինակությանը: Փաստաբանի մասնագիտական աշխատանքն ունի իրավապաշտպան նշանակություն: Փաստաբանի երաշխավորված մասնագիտական աշխատանքը սկզբունքային կարևորություն ունի մարդու ու նրա իրավունքների, երկրում իրավունքի գերակայության ամրապնդման համար։ Միանում ենք այսօրվա ասուլիսում Փաստաբանների պալատի ղեկավարության պահանջին առ այն, որ դեպքը պետք է լինի քրեական հետապնդման մարմինների հատուկ ուշադրության ներքո: Պետք է հատուկ ուշադրության ներքո պահել նաև անչափահասներին ոստիկանների կողմից բռնության ենթարկելու դեպքը: Սա բացարձակ անթույլատրելի երևույթ է։ Փաստաբանների պալատի ղեկավարության այսօրվա ասուլիսում հնչեցին նաև պնդումներ օրենքով արգելված այնպիսի երևույթի մասին, որ ոստիկանության աշխատակիցները փաստաբանների նկատմամբ հնչեցրել են սպառնալիքներ, եթե նրանք բարձրաձայնեն բռնության դեպքի մասին։ Իրավունքի և արդարության կենտրոն «Թաթոյան» հիմնադրամը հատուկ ընդգծում է, որ պարտադիր է ոստիկանության բաժնում բռնության այդ դեպքի կապակցությամբ արագ և օբյեկտիվ քննություն իրականացնելը։ Պետք է պարզվեն դեպքի բոլոր հանգամանքները և իրավական պատասխանատվության միջոցներ կիրառվեն մեղավոր անձանց նկատմամբ»,- նշված է հայտարարությունում:

Լուսնի ազդեցությունը մարդու ֆիզիկական և հոգեկան վիճակի վրա երկար ժամանակ քննարկվել է, և բավականին հաճախ կարելի է գտնել էզոթերիկ տեքստեր և չհաստատված եզրահանգումներ, սակայն փաստ է, որ լուսնային ռիթմերը, որոնք ակտիվորեն ուսումնասիրված են, ազդում են մարդու կենսապայմանների վրա: Մարդկանց վերաբերող հետաքրքիր ուսումնասիրություններից է լուսնի տարբեր փուլերում տարբեր տեսակի հարվածների առաջացման հաճախականությունը: Հետազոտությունների արդյունքում պարզվել է, որ հեմոռագիկ ինսուլտներն ավելի հաճախ են տեղի ունենում լուսնային ցիկլի առաջին քառորդում, քան նորալուսնի ժամանակ։ Անցումային իշեմիկ նոպաները նույնպես ավելի հաճախ են տեղի ունեցել առաջին քառորդի և լիալուսնի ընթացքում: Բայց լուսնային փուլերը չեն ազդել իշեմիկ ինսուլտի դեպքերի վրա։ Ի դեպ, ինսուլտները, ընդհանուր առմամբ, ավելի քիչ են լինում կեսգիշերից մինչև առավոտյան ժամը 6-ը, քան օրվա մյուս ժամերին։ Մեկ այլ կարևոր հարց՝ ինչպես է փոխվում մարդու քնի որակը՝ կախված լուսնի փուլից։ Գիտնականները դա գնահատել են էլեկտրաէնցեֆալոգրաֆիայի միջոցով և կատարել լրացուցիչ թեստեր՝ համեմատելու մելատոնինի և կորտիզոլի մակարդակները: Պարզվել է, որ լիալուսնի ժամանակ խորը քնի փուլը կրճատվում է 30%-ով, քնելու ժամանակը երկարացվում է 5 րոպեով, իսկ քնի ընդհանուր ժամանակը կրճատվում է 20 րոպեով։ Մարդու մարմնում տեղի ունեցող գործընթացների, մտավոր ասպեկտների և լուսնի փուլերի վիճակագրորեն հաստատված փոխհարաբերություններից մեկը երկբևեռ խանգարման և դեպրեսիվ փուլերի ու լուսնային ռիթմերի միջև հնարավոր կապն է: Ակնհայտ է, որ կան ֆիզիոլոգիական պրոցեսների և լուսնային ռիթմերի միջև կապի առկայության նախադրյալներ, սակայն մարդկանց մասնակցությամբ իրավասու փորձի բարդությունը և լրացուցիչ ազդեցության գործոնների առկայությունը դժվարացնում են միանշանակ եզրակացություններ անելը և վիճակագրական հավաստի տվյալների վրա հիմնված առաջարկներ ձևակերպելը: . Վերջերս գիտնականների շրջանում աճում է այն կարծիքը, որ լուսնային ռիթմերի ազդեցության աստիճանը տարբեր մարդկանց մոտ կարող է տարբեր լինել: Թերևս, կան որոշակի գենետիկական նախադրյալներ՝ այս ազդեցությունների նկատմամբ ավելի կամ պակաս հակվածության մասին:

Փաստաբան Րաֆֆի Ասլանյանը գրում է․ «Տղե՜րք, ձեզ բազմիցս՝ պատեհ ու անպատեհ առիթներով ասել և ասում եմ. կարդացե՜ք, կարդացե՜ք ձեր գործունեության ոլորտը կարգավորող օրենսդրությունը, նախադեպային իրավունքը, տեսաբանների կարծիքն արտահայտող գրականությունը, ուղեցույցները, թե չէ պրովոկացիայով, արդեն նույնիսկ փաստաբան ծեծելով կամ դրան նպաստելով՝ ձեր տկար ուղեղները չեն կազդուրվելու, միևնույն է՝ ձեզ միայն կարդալը կփրկի, թեկուզ 10 տոկոսն ընկալելու դեպքում։ Կամ, 2023 թվականի հուլիսի 1-ից ուժի մեջ է մտնելու բոլոր քննչական գործողությունները տեսաձայնագրելու պարտադիր օրենսդրական պահանջը, այդ դեպքում ի՞նչ եք անելու, ո՞վ է ձեզ օգնության գալու փաստաբանի հետ իրավական մրցակցության «նեղ» պահին»։

Առողջապահության համաշխարհային կազմակերպությունը խորհուրդ է տալիս երկու հղիությունների միջև ամենաքիչը երկու տարվա միջակայք պահել, քանի որ հաճախ երկրորդ հղիությունը կարող է որոշակի ռիսկեր պարունակել: Ուսումնասիրությունները ցույց են տվել, որ 18 ամսից շուտ երկրորդ անգամ հղիանալը մեծ թվով ռիսկեր է պարունակում ապագա երեխայի համար՝ վաղաժամ ծննդաբերություն, ցածր քաշ, կարճ հասակ և այլն: Այսպիսով, եթե կինը ֆիզիկապես և էմոցիոնալ առումով առողջ է, ապա երկրորդ հղիությունը խորհուրդ է տրվում պլանավորել առաջին երեխայի ծնվելուց 18 ամիս անց: Հաճախ առաջին երեխան ունենալուց հետո, ծնողներին կարող է թվալ, թե երկրորդ հղիությունն էլ նույնքան հեշտ կստացվի: Սակայն լինում են պատճառներ, որոնք կարող են խոչընդոտել երկրորդ հղիությունը: Դրանցից են՝ Տարիք՝ 35-ից բարձր. Գաղտնիք չէ, որ կնոջ՝ հղիանալու հավանականությունը մեծապես կախված է նրա տարիքից և 30-ն անց կանայք ավելի շատ են հակված երկրորդ անգամ հղիանալու հետ կապված դժվարություններ ունենալուն: Պոլիկիստոզային ձվարանների համախտանիշ. Պոլիկիստոզային ձվարանների համախտանիշը հորմոնալ դիսբալանս է, որը կարող է խաթարել կնոջ օվուլյացիան: Ավելորդ քաշ. Թե՛ կանանց, թե՛ տղամարդկանց դեպքում ավելորդ քաշը կարող է բեղմնավորման հետ կապված խնդիրներ առաջացնել: Կանանց մոտ ավելորդ քաշը կարող է առաջացնել ինսուլինի անբավարարություն, ինչպես նաեւ՝ տեստոստերոնի քանակի ավելացում, որը նույնպես խանգարում է օվուլյացիային: Տղամարդկանց դեպքում ավելորդ քաշը կարող է ավելացնել էստրոգենի քանակն օրգանիզմում, ինչն, իր հերթին, կնվազեցնի սպերմատոզոիդների քանակը: Ծխախոտի և ոգելից խմիչք եք չարաշահում. Մեծ քանակությամբ խմիչքը կանանց դեպքում երկարաձգում է բեղմնավորման գործընթացը և նվազեցնում առողջ երեխա ծննդաբերելու շանսերը: Պետք է հիշել, որ երկրորդ հղիության պլանավորումը կարող է մի փոքր ավելի երկար տևել, քան առաջինը: Գինեկոլոգները կանանց խորհուրդ են տալիս միանգամից չանհանգստանալ, այլ մի փոքր սպասել: Իսկ ջանքերի մեկ տարուց ավել ապարդյուն անցնելու դեպքում, այցելել մասնագետի:

Yerevan.Today-ի գլխավոր խմբագիր Սևակ Հակոբյանը ֆեյսբուքյան իր էջում գրում է․ 1․ Հայաստանի նախագահ Վահագն Խաչատուրյանը շնորհակալություն է հայտնում Հայաստանի վարչապետ Նիկոլ Փաշինյանին Թուրքիայի ժողովրդին ցավակցելու և օգնելու համար։ 2․ Երկրորդ հայկական պետություն Արցախը արդեն 62 օր է` կտրված է Հայաստանից և աշխարհից և գտնվում է հումանիտար աղետի մեջ։ 3․ Արցախը Հայաստանից շրջափակման մեջ է պահում Ադրբեջանը, որին պատերազմի և շրջափակման հարցում անվերապահորեն աջակցում է Թուրքիան։ 4․ Հայաստանի իշխանությունը հրաժարվում է որևէ միջոց ձեռնարկել Արցախում հումանիտար աղետը վերացնելու համար։ Ուզում եմ գտնել, թե ինչ փաստարկներ կարող են մոգոնել նիկոլականները՝ համոզելու համար, թե վարչապետը բացառապես հայկական շահն ա առաջ տանում։ Շատ բարդ ա, մի էլ խրվեք։

Ներքին գործերի նախարարությունը չի շտապում մեկնաբանել ոստիկանության Էրեբունու բաժնում փաստաբանների ու ոստիկանների միջև տեղի ունեցած ծեծկռտուքը: Տուժած փաստաբանները «Հայլուր»-ի թղթակցին պատմել են, որ դեպքը տեղի է ունեցել այն բանից հետո, երբ իրենք անչափահասներին բերման ենթարկելու հանգամանքները պարզելու համար մերկացնող հարցեր են ուղղել ոստիկաններին: 2 փաստաբանի ու նրանց անչափահաս պաշտպանյալներին ծեծի ենթարկելու փաստը դատապարտել է Մարդու իրավունքների պաշտպանի գրասենյակը:

Իրավապաշտպան, հասարակական գործիչ Ավետիք Իշխանյանը գրում է․ «Անկախ Հայաստանի ողջ պատմության ընթացքում, դեռևս չի եղել որևէ դեպք, որ ոստիկանները բացահայտ հայհոյեն և բռնություն կիրառեն իրենց մասնագիտական գործն անող փաստաբանների նկատմամբ, այն էլ հենց ոստիկանական բաժանմունքում։ Փաստաբանի նկատմամբ բռնության մեկ դեպք եմ հիշում, երբ 90-ականներին «անհայտ անձանց» կողմից բռնության ենթարկվեց Ռուբեն Սահակյանը, ով հայտնի էր որպես քաղաքական հետապնդվող գործիչների փաստաբան։ Իհարկե, հանցագործները չհայտնաբերվեցին։ Իսկ այսօր ոստիկանների ցինիզմը չափ ու սահման չունի, քանի որ դավաճան իշխանության միակ «պահապան հրեշտակները» նրանք են։ Եվ ի՞նչ եք կարծում , բռնություն գործադրած ոստիկանները կպատժվե՞ն։ Վստահաբար եմ ասում՝ ոչ։ ՆԳ կոչվող նախարարությունը կհայտարարի ծառայողական քննության մասին, կանցնի որոշ ժամանակ և ամեն ինչ կմոռացվի, ինչպես բազմաթիվ այլ դեպքեր։ Հ․Գ․ Առաջարկում եմ ԵՄ-ին, ոչ թե դիտորդներ տեղակայել հայ-ադրբեջանական սահմանին, այլ որպես ժողովրդավարության նվիրյալ կառույց, Հայաստանի ոստիկանական բաժանմունքների մոտ»։

NEWS.am-ը գրում է․ Գեղարքունիքի մարզի Ազատ գյուղում տեղակայված N զորամասի ինժեներասակրավորային վաշտի կացարանում բռնկված հրդեհի հետեւանքով զոհված շարքային զինծառայող Հայկ Կիրակոսյանի հայրը՝ Գաբրիել Կիրակոսյանը չի հավատում պաշտոնական վարկածին, ըստ որի՝ հրդեհն անփութության հետեւանք է եղել։ Զոհված զինծառայողի հայրը NEWS.am-ի հետ զրույցում անդրադառնալով զինծառայողների՝ ննջասենյակի տարբեր հատվածներում հայտնաբերելու մասին Դատախազության հայտարարությանը, ասաց. «Ինձ համար իրենց խոսքն արժեք չունի: Ես մի քիչ հավատում եմ տեղերում պառկած լինելուն, որովհետեւ եթե իրենք ոտքի վրա լինեին կգտնեին ելք կացարանից դուրս գալու համար»: Գաբրիել Կիրակոսյանը շեշտեց, որ հավատում է միայն փաստերին. «Եթե երեխաներին իրենք այդտեղից հանում էին, ո՞վ է այդ հրամանը տվել երեխաներին հանելու, թող հանելուց առաջ երեխաներին տեսանկարահանեին, որպեսզի այս հակասական հայտարարությունները չլիներ, հասկանայինք՝ երեխաներն ինչ դիրքում են եղել»: Ավելի վաղ NEWS.am-ը հայտնել էր, որ հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետեւանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երեւան՝ Այրվածքաբանության ազգային կենտրոն: Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը եւ եւս 7 բարձրաստիճան զինվորականներ։ Նշենք, որ հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու եւ ավելի անձի մահ)։ Այս գործով մեղադրյալի կարգավիճակում են 4 զինվորական, որոնցից երկուսը կալանքի տակ են, մեկը՝ դեպքից տուժել է եւ բուժումը ստանում է հիվանդանոցում, մյուսի նկատմամբ որպես խափանման միջոց ՝ ընտրվել ստորագրությունը չհեռանալու մասին: Նշենք, որ 19-ամյա Հայկը Արմավիրի մարզի Մեծամոր քաղաքից էր։ Նա ընտանիքի ավագ զավակն էր, քույր ու եղբայր ունի։ Հունվարի 24–ին կլրանար նրա ծառայության մեկ տարին։

Իշխանությունը, կարծես թե, արտերկրից եկամուտ ստացողներին վերահսկելու մի նոր ձև է գտել: ՔՊ-ականներն առաջարկում են փոփոխություն կատարել «Արժութային կարգավորման և արժութային վերահսկողության մասին» օրենքում ու արտարժույթային եկամուտներ չունեցող քաղաքացիներին տրամադրվող հիպոթեքային վարկերը տրամադրել բացառապես դրամով: Բայց այս փոփոխությունը կարող է հիփոթեքային վարկերի տոկոսագումարների բարձրացման պատճառ դառնալ: ՔՊ-ականների օրինագծին դեմ են ուրիշ ՔՊ-ականներ: