Կործանողը չի կարող միաժամանակ փրկիչ լինել

«Հրապարակ»-ը գրել է․

Խորհրդարանական ընդդիմության՝ ԱԺ վերադարձը ոչ միանշանակ է ընկալվել ընդդիմադիր այլ շերտերի, այդ թվում՝ ընդդիմության ընդդիմադիրների կողմից։ Ոմանք քննադատում են նրանց, թե Նիկոլ Փաշինյանի դիրքերն են ամրացնում, ընդդիմությունն էլ ասում է՝ մեր օրակարգով ենք վերադարձել խորհրդարան։ Ոմանք էլ ասում են, որ վերադարձել են՝ այլ հնար չունենալով։ «Բացարձակ այլ հնար չունենալու մասին չի կարող խոսք լինել։ Ես Ձեզ առաջարկում եմ, իբրև պատասխան, մեջբերել ֆրակցիայի հանձնարարությամբ իմ հայտարարությունն ԱԺ նիստի սկզբում… Էնտեղ բոլոր հիմնավորումները կան, ամեն ինչ ասված է»,- մեզ հետ զրույցում ասաց «Հայաստան» խմբակցության անդամ Աղվան Վարդանյանը։

- ՔՊ-ականները հեգնում են, որ բացակայությունների պատճառով դուք մանդատից զրկվելու շեմին էիք հայտնվել, եղանակային պայմաններն են վատացել, դրա համար վերադարձաք։

- ՔՊ-ականներին մեկնաբանելու, նրանց հայտնած կարծիքը գնահատելու ցանկություն բացարձակ չունեմ։ Մանդատն իրենց է պետք, և այդ մանդատի հետևանքները մենք տեսնում ենք։

- Իսկ իրենց հետ աշխատելու ցանկություն ունե՞ք։

- Նորից եմ կրկնում՝ մեջբերեք «Հայաստան» խմբակցության հայտարարությունը, էնտեղ բոլոր հարցերի պատասխանը կգտնեք։

- Դուք այդ հայտարարության մեջ ասում էիք, որ սա բոլորիս խորհրդարանն է, միայն ՔՊ-ինը չէ։

- Որևէ սխալ բա՞ն եմ ասում։ Սա Հայաստանի Հանրապետության Ազգային ժողովն է՝ իրենց սեփականությունը չէ։

- Այդ դեպքում հարց է առաջանում՝ մինչև հիմա ինչո՞ւ չէիք գալիս խորհրդարան։

- Այդ մասին տասնյակ անգամներ բացատրել ենք։ Մենք օգտագործում էինք պատգամավորների համար այլ գործիքակազմ, այս գործիքակազմը թողել էինք, որովհետև փողոցում էինք պայքարում։ Հիմա այս գործիքակազմը լիարժեք օգտագործելու ենք։

- Փողոցի գործիքակազմը սպառե՞ց իրեն, որ որոշեցիք վերադառնալ։

- Ոչ, այս պահին ժամանակավոր դադար է, այնպես որ՝ որևէ բան բացառված չէ առաջիկայում։

- Նույնիսկ ընդդիմադիր գործիչներն են ասում, որ իշխանությունը յուրացրել է ընդդիմության բառապաշարը, հռետորաբանությունը։ Ավելի հայրենասիրական ծիրում է հայտնվել Փաշինյանը։

- Հիմա տեսեք՝ նույն բանը Դուք կարող եք անել Փաշինյանի պարագայում։ Վերջին իր հարցազրույցում և դրանից առաջ, կառավարության նիստում իր զգույշ, մեղմ հակադարձումներն Ադրբեջանի հռետորաբանությանը եզակի դեպք է, չէ՞, վերջին 2 տարվա ընթացքում։ Նա առաջին անգամ հակադարձում է, կոշտ չի հակադարձում, բայց հակադարձում է։ Բայց մենք 2 տարի շարունակ դա էինք ասում, չէ՞։ Ինքը նոր եկել է, փորձում է ինչ-որ արտահայտություններ անել Ալիևի դեմ։ Բայց եթե խելք ունենար, կհասկանար, որ Ալիևի վարքագիծը չի փոխվելու, Ալիևի հետ խաղաղության օրակարգը չի աշխատելու, և երբ արդեն շատ նեղն է վիճակը, երբ արդեն Ալիևը նորից անցել է ամենալկտի հարձակումներին, պահանջներին, նոր փորձում է ինչ-որ բաներ անել։ Եվ նույնը վերաբերում է Թուրքիային։ Նա Թուրքիայի հասցեին ինչ ասես՝ ասել է պատերազմի օրերին, այսօր փորձում է դրական ինչ-որ խաղի մեջ մտնել Թուրքիայի հետ, դրական գնահատել Էրդողանի հետ իր հանդիպումը և այլն։ Ես հայտարարել եմ, որ էս խաղն էլ չի անցնի, էստեղ էլ իրենք սխալվում են՝ Թուրքիայի քաղաքականությունը չի փոխվել։

- Հնարավո՞ր է, համարենք՝ անսալով ընդդիմության քննադատություններին, վերջում պարզվի, որ դարձել է մի հայրենասեր և ազգասեր ղեկավար։

- Եթե ինքն այդքան հասկանում է, այդքան խելք ունի, եթե գալու է լրիվ․․․ «հայրենասիրական» բառը չօգտագործենք, այլ այն, ինչ խոսում են երկու դաշինքները, այն գնահատականները, որ տալիս էին իր գործունեությանը, եթե ինքը հասկանում է, որ սխալ ընթացքի մեջ է եղել դեռ այն ժամանակ, մի ելք ունի՝ հեռանալ։

- Այսինքն՝ բոլոր դեպքերում, միևնույն է, պետք է հեռանա՞, նույնիսկ եթե ամբողջությամբ տեղավորվի ձեր պատկերացումներում։

- Անշուշտ, պիտի հեռանա, ինքը չի կարող իր այս վիճակով բանակցել, Հայաստանի ու Արցախի համար որևէ դրական լուծում ստանալ։ Ինքը մնում է, որ ի՞նչ անի, բացի իշխանությունը պահելուց, այն էլ՝ գիտեք, թե ինչ մեթոդներով է պահում։

- Ասում է՝ մնում է, որ փրկի Հայաստանը, որ խաղաղություն բերի մեր երկրին։

- Կործանողը չի կարող միաժամանակ փրկիչ լինել։

- Հիմա դուք խորհրդարանում եք, եթե իշխանությունը բերի այնպիսի մի արձանագրություն, որոշում, միջազգային պայմանագիր, որը Հայաստանի շահերից ակնհայտորեն չի բխի, ո՞րն է լինելու ընդդիմության գործիքը՝ բացի դեմ քվեարկելուց։

- Օրը կգա, բարին՝ հետը։ Վստահ եղեք, որ այն, ինչ արել է ընդդիմությունը մինչև հիմա, առնվազն գոնե կանխարգելել է այդ տեսակ հակահայաստանյան, հակաարցախյան փաստաթղթի ստորագրումը։ Նման տպավորություն ունեմ նաև իրենից, իր վերջին շրջանի խոսույթներից, որ մոտ չէ այդ ժամանակը։ Բայց եթե կլինի նման փաստաթուղթ, որ իսկապես ամբողջովին կհակասի երկու պետականությունների և հայության շահերին, ես կարծում եմ՝ մեթոդներ կլինեն կանխարգելելու։

- Տպավորություն է, որ թե՛ իշխանությունը, թե՛ ընդդիմությունը մի տեսակ «խելոքացել» են, ավելի կառուցողական ու հանդարտ միջավայր է ձևավորվել խորհրդարանում, կոշտ ձևակերպումներ չկան, փոխադարձ ագրեսիան շատ սուր արտահայտված չէ։

- Ես չգիտեմ՝ Դուք կոշտ դիրքորոշում ինչը նկատի ունեք, որովհետև այն, ինչ ես հայտարարեցի ֆրակցիայի անունից, և այն հայտարարությունները, որ արել եմ նիստերի ժամանակ, հակադիր տեսակետներ են, և հակադրվել՝ չի նշանակում անպայման անձնական վիրավորանքներ հասցնել, հայհոյել և այլն։ Նայած՝ մարդու խելքը, մարդու փորձառությունն ինչպիսին է, շատ ավելի մեծ հակադրություն կարող է առաջանալ կիրթ, գրագետ ելույթներով, տեքստերով։

- Իսկ այդ գնահատականներում շարունակելո՞ւ են տեղ գտնել «դավաճան», «հող հանձնող», «կապիտուլյանտ» ձևակերպումները, որոնցից ՔՊ-ականները, այսպես ասած, «խրտնում են»։ Եվ դրանք վիրավորակա՞ն են, ըստ Ձեզ։

- Չէ, դրանք վիրավորական չեն, կարծում եմ, դրանք գնահատական են։ Մեր խմբակցությունում պատգամավորներն ազատ են իրենց անձնական տեսակետներն արտահայտելիս։ Մեկը կարող է այդպես ասել, մյուսը կարող է այդպես չասել, բայց շատ ավելի խիստ լինել իր գնահատականներում։