«Եթե լուծում չտրվի, ձվի արկղերով փողոցները կփակենք». ինչ է կատարվում ձվի շուկայում

Այս օրերին որոշ սուպերմարկետներում հավի ձվի գինը տատանվում է 40-ից մինչև 80 դրամ։ Փոքր և միջին արտադրողներն ահազանգում են` ձվի շուկայում կրկին դեմպինգ է, և եթե պետական մարմինները քայլեր չձեռնարկեն, տասնյակ ընկերություններ են փակվելու։ 

«Արամուս» թռչնաֆաբրիկայի տնօրեն Հրայր Ասլանյանը «Սպուտնիկ Արմենիա»-ի հետ զրույցում նշում է, որ ձվի ինքնարժեքն այսօր 55 դրամ է, բայց մի շարք սուպերմարկետներում 27 դրամով է արդեն իսկ վաճառվում։ 

«Պարզ է չէ՞, որ չի կարող որևէ մեկին ձեռնտու լինել ինքնարժեքից ցածր գնով ձու վաճառել։ Առավել ևս, որ կերի արժեքը համաշխարհային շուկայում, Ռուսաստանում բարձրացել է։ Հարցն այն է, որ մի խաղացող է մտել շուկա, որն առաքման ցանց էլ չունի և ուզում է 27 դրամով ձու վաճառել, փոքր ու միջիններին շուկայից դուրս թողնել»,- ասել է Ասլանյանը։ 

Նրա խոսքով` սա նաև երկրի անվտանգության հարցն է, քանի որ մեկ խաղացողը չի կարող ապահովել բնակչության կարիքները. ձուն հանդիսանում է երրորդ մարտավարական ապրանքը` հացից ու կարտոֆիլից հետո։

Եթե մեկ խաղացող լինի շուկայում, կարող է և՛ բարձրացնել, և՛ իջեցնել ապրանքի գինը։  Ասլանյանն ասում է նաև, որ բացի սրանից մեծ ընկերությունների պահեստներում միլիոնավոր ձվերի կուտակումներ կան։ Հայաստանում ձվի օրական պահանջարկը 2800-3000 արկղ է` 1 մլն 100 հատ ձու, սակայն այսօր օրական 2 միլիոնից ավելի ձու է արտադրվում։ Ընկերության տնօրենը նշում է` ձուն 21 օր հետո արդեն օրգանիզմին վնաս է, իսկ շուկայում հայտնվում է ձու, որը մեկ ամիս առաջ է մակնշված։ 

«Հորդորում ենք մրցակցության պաշտպանության հանձնաժողովին, որ քայլեր ձեռնարկեն, հակառակ դեպքում տասնյակ ձեռնարկություններ կփակվեն, 1000-ից ավելի մարդ գործազուրկ կմնա ու երկիրը կլքի։ Ամեն օրը փոքր և միջի ընկերությունների համար վիճակագրական է` ամեն օր նրանք մեկ արտադրողի են կորցնում»,- ասում է Ասլանյանը։ 

Նա հավելեց, որ փոքր և միջին ձեռնարկություններով քննարկել են հարցը։ Դրանից հետո դիմել են մրցակցության պաշտպանության հանձնաժողով, վարչապետի աշխատակազմ, բայց մինչ օրս որևէ պատասխան չկա։ Ասլանյանն ասում է, որ եթե խնդրին լուծում չտան, ծայրահեղ քայլերի կդիմեմ` պատրաստ են ձվի արկղերով գնալ ու Բաղրամյան պողոտան, օդանավակայան տանող ճանապարհը փակել։ 
Ձեռնարկատերը նշում է` պետք է գնային քաղաքականություն լինի, ներքին սանդղակ սահմանվի, որ դրանից ցածր գնով չվաճառեն ձուն։ Ասլանյանն իր խոսքն ամփոփում է` հավելելով, թե վերջերս պարզաբանումներ էին հնչել, թե որոշ ընկերություններ ձվի գինն իջեցրել են, որ թոշակառուներն էլ կարողանան այն գնել, սակայն մարդ միայն ձվով չի ապրում` ՀՀ-ում ամեն ինչն է թանկացել։ 

Մրցակցության հանձնաժողովից լրատվականին հայտնեցին` հարցի առնչությամբ հանձնաժողովին գրավոր դիմել է «Աշտարակ ձու» ընկերությունը, թեժ գծով՝ Հրայր Ասլանյանը: 
«Այս պահին կարող ենք ասել, որ եթե խնդիրը հանձնաժողովի տիրույթում լինի, հանձնաժողովը հայտարարությամբ հանդես կգա»,-հայտնեցին մրցակցության հանձնաժողովից։  

«Աշտարակ ձու», «Արաքս» և «Արզնի» թռչնաֆաբրիկաներին մրցակցության հանձնաժողովը 2021 թվականի մարտին ձվի գնի չհիմնավորված բարձրացման համար տուգանել էր: «Աշտարակ ձու» ընկերությունը վարչական դատարանում վիճարկել էր հանձնաժողովի սահմանած ավելի քան 15 միլիոն դրամ տուգանքը: Վարչական դատարանը մերժել էր ընկերության հայցը։