Բողոքի ինքնաբուխ ալիքը տարածվել է հանրապետությունով մեկ

Նիկոլ Փաշինյանի հրաժարականի պահանջով այսօր ամբողջ հանրապետությունով մեկ անհնազանդության ինքնաբուխ խաղաղ ակցիաներ են տեղի ունեցել: Ժամը 12:00-ից սկսած մարդիկ փակել էին Երևանի տարբեր փողոցներ, դադարեցվել էր մետրոպոլիտենի աշխատանքը:

Քաղաքացիների մի խումբ էլ «Նիկոլ, հողատու», «Նիկոլ, դավաճան» կոչերով ԱԱԾ շենքի մոտից հասել են դատախազության շենքի մոտ:

«Մենք այցելեցինք ԱԱԾ շենքի կենտրոնական մուտքի մոտ և խնդրեցինք, որ նրանք իրենց վերադասին՝ մարդուն, ով կարծում է երկրի վարչապետն է և շարունակում է նստել այդ աթոռին, փոխանցեն մեր միջոցներով գնված օծանելիքն ու ժամացույցը, որ նա վերցնի ու հեռանա, թողնի, որ այս երկիրն ու այս ժողովուրդն ի վերջո ուշքի գա և կարողանա փորձել հաղթահարել այն խայտառակ վիճակը»,- պարզաբանեց քաղաքական գործիչ Արման Սաղաթելյանը:

Հիշեցնենք, որ կապիտուլիացիան ստորագրմանը հաջորդած բողոքի ակցիաներից հետո, նիկոլ Փաշինյանը հայտարարել էր, որ գողացել են իր ժամացույցն ու օծանելիքիքը:

 «Կարծում եմ կհիշեք՝ խայտառակ կապիտուլյացիոն փաստաթուղթը ստորագրելուց հետո լայվ մտած անձը, որը շարունակում է կարծել, թե ինքը երկրի վարչապետ է, փոխանակ խոսեր այդ ողբերգության մասին, փորձեր բացատրել մարդկանց՝ ինչ է տեղի ունեցել, ինչ է նրանց սպասում, խոսեր հազարավոր զոհերի, անհետ կորածների, գերիների, տասնյակ հազարավոր մարդկանց մասին, որոնք մնացել են անհայրենիք և անօթևան, այդ մարդը եթերում խոսում էր իրենից հափշտակված ժամացույցի և օծանելիքի մասին և գործը հանձնվեց ԱԱԾ վարույթին: Այսօրվա մեր ակցիան այդ նպատակն ունի՝ տալ այդ մարդուն իր դարդը, որովհետև սա է այդ մարդու արժեհամակարգի սահմանագիծը, ու ասել՝ ժամ առաջ հեռանա իր պաշտոնից, որ մնացած բոլորը կարողանան ինչ-որ բան անել»,- ընդգծեց նա:

Լուսանկարը` fotolur.am-ի