Բրոնխոէկտազ․ շարունակական հազը կարող է բացասաբար անդրադառնալ նաև սրտի աշխատանքի վրա

Բրոնխոէկտազը թոքերի օդատար ուղիների ախտահարմամբ ընթացքող հիվանդություն է, որը պատճառում է այդ ուղեիների կայուն լայնացում։

Բրոնխոէկտազի վաղ ախտորոշումը և բուժումը կարևոր են, որպեսզի կանխարգելվի թոքերի հետագա ախտահարումը, գրել է Aysor.am-ը։

Բրոնխոէկտազը սովորաբար առաջանում է թոքերի երկար ընթացքով վարակային բորբոքումից։ Թոքերի օդատար ուղիների ախտահարումն ուղեկցվում է դրանց պաշտպանական գործառույթների, օրինակ՝ լորձի մաքրման թուլացմամբ կամ վերացմամբ: Լորձն արտադրվում է օդատար ուղիների կողմից և օգնում է փոշու և այլ փոքր մասնիկների՝ շնչուղիներով հեռացմանը։

Օդատար ուղիներում կուտակվող լորձը կարող է վարակվել, որն առաջացնում է այդ ուղիների լորձաթաղանթի բորբոքային այտուց, բրոնխների խցանում և թոքային վարակների կրկնություն։ Ախտահարված բրոնխները լայնանում են և ի վիճակի չեն լինում ամբողջությամբ դուրս բերել լուսանցքում կուտակված արտազատուկը

Բրոնխոէկտազի հանգեցնող թոքային վարակների օրինակներից են՝

ցիստիկ ֆիբրոզը,

սուր թոքաբորբը,

տուբերկուլոզը,

սնկային վարակները։

Բրոնխոէկտազի այլ, ավելի հազվադեպ հանդիպող պատճառներից են՝

աուտոիմուն հիվանդությունները,

ալերգիկ բորխոթոքային ասպերգիլոզը,

բնածին խանգարումները։

Երբեմն բրոնխոէկտազի հստակ պատճառ գտնելը խիստ դժվարանում է կամ դառնում է անհնար։

Ամենահաճախ հանդիպող ախտանիշը մշտական հազն է, որն ուղեկցվում է խորխով։ Բրոնխոէկտազի դեպքում խորխն առատ է և ունի կանաչավուն կամ դեղնավուն գունավորում։

Այլ ախտանիշներից են՝

սինուսիտը,

ընդհանուր թուլություն և հոգնածության զգացումը,

օդի պակասի զգացումը, հևոցը կամ խզզոցները,

կրծքավանդակի շրջանի ցավերը կամ լարվածության զգացումը,

արյունային հազը։

Բրոնխոէկտազի կամ հարակից վիճակների ախտորոշման համար նշանակվող հետազոտություններից են՝

արյան հետազոտություններ՝ ուղղված վարակների կամ գանգատների այլ հավանական պատճառների հայտնաբերմանը,

շնչառական թեստեր, որոնց նպատակը թոքերի գործունեության գնահատումն է։

Բրոնխոէկտազի բուժումը կարող է ներառել վարակի դեմ պայքարը, ախտանիշների մեղմացումը և թոքերի հետագա ախտահարման կանխարգելումը։

Հաճախ նշանակվող դեղամջոցներն են՝

հակաբիոտիկներ՝ վարակը բուժելու համար,

բրոխները լայնացնող դեղեր, որոնք հեշտացնում են շնչառությունը,

ինհալացվող կորտիկոստերոիդներ, որոնք մեղմացնում են բրոնխների բորբոքումն ու այտուցը,

խորխալուծ դեղեր, որոնք ջրիկացնում են խորխը և հեշտացնում հազով հեռացումը։

Բժիշկը կարող է նշանակել նաև որոշ միջոցներ, որոնք կարող են մաքրել ձեր թոքերի օդատար ուղիները լորձի կամ խորխի ավելցուկներից։ Այլ միջոցներից են շնչառական և հազի վարժությունները, այնպիսի դիրքի ընտրությունը, որի դեպքում խորխն ավելի հեշտությամբ է հեռացվում։

Եթե ծխող եք, ապա փորձեք ձերբազատվել ծխախոտից։

Շատ կարևոր է բուժումը սկսել հնարավորինս շուտ, քանի դեռ հիվանդությունը չի ծանրացել և չի ներառել այլ օրգան-համակարգեր, օրինակ՝ սիրտը։ Դիմել բժշկի, եթե ունեք երկար ժամանակ շարունակվող հազ՝ անկախ խորխարտադրությունից։