Փաշինյանը, կառավարության նիստում «աչքալուսանք» տվեց․ «Փաստ»

«Փաստ» օրաթերթը գրում է․ «Սյունիքի արևելյան՝ անմիջականորեն Արցախին հարող տարածքում թշնամական Ադրբեջանի զինուժի անարգել առաջխաղացումն ու դիրքավորումը, առավել ևս՝ դրա հետ կապված Նիկոլ Փաշինյանի ու նրա իշխանությունը ներկայացնող կառույցների հայտարարությունները բազմաթիվ հարցերի առիթ են տալիս: Ինքը՝ Փաշինյանը, կառավարության նիստում «աչքալուսանք» տվեց: Նրա գալարուն և բազմախուճուճ հայտարարությունից այդպես էլ անհայտ մնաց, թե այդ ո՞վ, ո՞ր երկրի ո՞ր կառավարությունը պիտի ժամանակին կառուցեր ու շահագործման հանձներ Հայաստանն Արցախին կապող, այսպես կոչված, «նոր ճանապարհը», ինչո՞ւ է այդ ճանապարհը այդպես էլ գրունտային մնացել, ասֆալտը փիարվելու միջոց դարձրած իշխանությունն ինչո՞ւ այսքան ժամանակում ունեցած բոլոր հնարավորությունները չի ուղղել այդ խնդիրը լուծելուն:

Բայց դրանք դեռ «տեխնիկական» հարցերն են: Ավելի էական հանգամանքներ կան: Մասնավորապես, Նիկոլ Փաշինյանը հայտարարեց, որ բանակային ստորաբաժանումները դուրս են գալու Ադրբեջանի հետ փաստացի «շփման գծի» մի նկատելի մասից և փոխարինվելու են ԱԱԾ սահմանապահ ուժերով: Ու Նիկոլ Փաշինյանը, որի կառավարման միայն այս վերջին երկուսուկես՝ «հետպատերազմական» տարիներին նույն թշնամական Ադրբեջանը Հայաստանի տարածքից տասնյակ քառակուսի կիլոմետրեր է զավթել, ահա այդ ամենը թույլ տված Նիկոլ Փաշինյանը, հայտարարելով զինվորականներին սահմանապահներով փոխարինելու մասին, հույս է հայտնում կամ խոսում է այն մասին, որ ադրբեջանական կողմը սադրանքների չի դիմի: Լավ, դա իրականությունը համարժեք ընկալող մարդու ասա՞ծ է:

Կամ հակառակը՝ որքան պիտի որևէ մեկը իրականության հետ կապը կորցրած լինի, որ լուրջ ընկալի իրեն ասվող նման բաները: Իսկ «ադրբեջանական կողմն» էլ, պարզվում է, հենց դրան էր սպասում և, խնդրեմ, անարգել, առանց մեկ կրակոցի անգամ, կարելի է ասել՝ ցուցադրաբար, զորքով, տեխնիկայով առաջ է շարժվում, այսպես ասենք՝ արխային դիրքավորվում է Հայաստանի Հանրապետության Սյունիքի մարզի Տեղ, Կոռնիձոր համայնքներին պատկանող արտերում: Բայց հարցը միայն այդ չէ (եթե միայն դա լիներ հարցը): Երևի Նիկոլ Փաշինյանի խճճված հայտարարությունները քիչ համարվեցին, ու ավելի ուշ որոշվեց, որ ԱԱԾ-ն էլ «շուրջպար» մտնի: Ավելի լավ է, դա չանեին:

Մարտի 30-ին, ժամը 19:30-ի սահմաններում, ինչպես կնշեին ոստիկանական օպերատիվ ամփոփաթերթիկներում, այսինքն, երբ համացանցում արդեն տարածվում էին ադրբեջանական զորքերի առաջխաղացման ու դիրքավորվելու կադրերն ու Սյունիքի մարզից տեղացիների ահազանգերը, ԱԱԾ-ն հաղորդագրություն տարածեց, որտեղ հաստատում էին իրենց իշխանության ղեկավարի ասածը, որ նախապես թշնամու հետ պայմանավորված են եղել: Ու չնայած դա ուշագրավ հաղորդագրություն է բոլոր առումներով, բայց առանձնահատուկ հետաքրքրական են 4-րդ, 5-րդ, 6-րդ կետերը: Հիացեք, թե ինչ է հայտարարում Նիկոլ Փաշինյանի ԱԱԾ-ն. «...4. Տեղակայման ընթացքում (սահմանապահների) ի հայտ են եկել քարտեզների տարընթերցումներ:

Որոշ տեղերում ադրբեջանական կողմը, չսպասելով նախապես պայմանավորված ճշգրտումներին, սկսել է դիրքավորվել և իրականացնել ինժեներական աշխատանքներ: 5. Հայկական կողմի հաշվարկներով, հինգ այդպիսի կետ կա, որտեղ ադրբեջանական կողմը սահմանից 100-ից 300 մետր ավելի առաջ է տեղակայվել: Այժմ պայմանավորվածություն է ձեռքբերվել, որ երկու կողմերի քարտեզագիրները ճշգրտեն իրավիճակը: 6. Հայկական կողմն իրավիճակին մոտենում է էսկալացիա թույլ չտալու տրամաբանությամբ»: Այսինքն, բացի այն, որ ադրբեջանական կողմի հետ բան են պայմանավորվել, ինչի մասին, պարզվում է, չեն բարեհաճել անգամ տեղի հայ բնակչությանը հայտնել, և մարդիկ գյուղերով անակնկալի են եկել, դեռ մի բան էլ, պարզվում է, ադրբեջանական կողմը չի սպասել ինչ-ինչ ճշգրտումներին, առաջ է եկել:

Ինչպիսի՜ անակնկալ, ախր ո՞վ կսպասեր, չէ՞, ադրբեջանական կողմից նման նամարդություն, ա՜յ-ա՜յ-ա՜յ: Լուսահոգի տատս նման դեպքերում կասեր՝ «պառվի ուլերի» ամբողջ ձյունը Նալբանդյան փողոցի ձեր շենքի գլխին տեղար: Լավ, բա էլ դուք ինչի՞ համար եք, եթե թշնամու հնարավոր առաջխաղացման ու «ճշգրտումներին չսպասելու» պահը բաց եք թողել (չնայած, չենք կարծում, թե նկատած ու վերև զեկուցած չլինեն): Թե՞ զեկուցել եք, ձեզ ասվել է՝ «հանգիստ նստեք տեղներդ»: Ու հիմա ո՞ւմ եք ուզում պարզերես անել՝ նման հակասական բաներ հաղորդագրելով: Ոչ պակաս վրդովեցուցիչ է ԱԱԾ տարածած հաղորդագրության փաշինյանական ոճն ու տոնայնությունը: Հատուկ նշում են, թե «ադրբեջանական կողմը» («կո՜ղմ...», հանկարծ չասեն՝ թշնամին) մի 5 տեղ է առաջ եկել, այն էլ՝ ընդամենը 100-300 մետր:

Ասել կուզի, ըստ ԱԱԾ-ի, ի՜նչ մի աղմուկ եք դրել, ոչ մի սարսափելի բան չկա, ինչ-որ մի 274 մետր են առաջ եկել, էլի՜... Այսինքն, կարող են այդպես 300-300 մետր առաջ գալ, ու դա անկարևոր բան է: Հա, ու «հայկական կողմը» ինչ անում կամ, ավելի ճիշտ, ինչ չի անում, չի անում «էսկալացիա թույլ չտալու տրամաբանությամբ»: Հասկանալի է, չէ՞: Սա թշնամուն ուղիղ հրավիրատոմս է, որ այդպես քայլելով կարող են Սյունիքն էլ վերցնել, տո Երևանն էլ, կարևորը, որ «էսկալացիա թույլ չտրվի»: Թշնամին մտել է անմիջականորեն ՀՀ տարածք ու դիրքավորվում, զենք ու տեխնիկա է կուտակում, որ էլի առաջ շարժվի, սրանք ասում են՝ «վայ, հանկարծ էսկալացիա-մեսկալացիա չլինի, վա՜յ...»:

Այնպես որ, Փաշինյանի խոստացած «ապագան» լոք-լոք առաջ է գալիս, և քանի որ միակ բանը, ինչին «հայկական կողմն», ըստ երևույթին, ունակ է, «էսկալացիա թույլ չտալն» է, ապա նիկոլականներին մնում է պատրաստվել «ապագայի» դիմավորմանը, իսկ ոչ նիկոլականներին՝ թողնել-հեռանալ, թերևս: Բայց այս ամենից ավելի վատ բան կա: Իսկ այդ ավելի վատ բանն այն է, որ այս ամեն ինչը տեղի է ունենում առանց որևէ ներքին ընդվզման, զրոյական դիմադրության պայմաններում: Այնպիսի տպավորություն է, որ երկրի ոչնչացումն այլևս ոչ մեկին չի հետաքրքրում: Երևի բոլորը որոշել են «թուլանալ ու հաճույք ստանալ»»:

Մանրամասները՝ «Փաստ» օրաթերթի այսօրվա համարում։