Լրահոս

Շիրակի մարզում ընթանում են ճանապարհների մաքրման աշխատանքները։ Սպասարկող ընկերությունները շարունակում են արտակարգ ռեժիմով աշխատանքը, մարզում դեռ կան փակ ու դժվարանցանելի ճանապարհներ, որոշ հատվածներում ձյան բարձրությունը հասնում է 3-5, անգամ 6 մետրի։ Դեռևս փակ են Ցողամարգ-Աշոցք, Ամասիա-Շաղիկ և Արթիկի (Մեծ Մանթաշ և Գեղանիստ) տարածաշրջանների ավտոմոբիլային ճանապարհները (միջպետական, հանրապետական և մարզային)։ Մարզի Անիի, Ախուրյանի և Արթիկի տարածաշրջանների մյուս ճանապարհահատվածները բաց և բավարար երթևեկելի են։ Գյումրի-Երևան, Գյումրի-Արմավիր և Գյումրի-Վանաձոր ճանապարհները բաց են։ Վարորդներին հորդորում ենք երթևեկել միայն խիստ անհրաժեշտության դեպքում։

Լոռու մարզում, մարտի 20-ին, կրակոցներ են հնչել: ժամը 23։15-ի սահմաններում «Վանաձոր» բժշկական կենտրոնից ոստիկանության Վանաձոր քաղաքի Տարոնի բաժին ահազանգ է ստացվել, որ հրազենային վնասվածքով իրենց մոտ է տեղափոխվել մի քաղաքացի։ «Shamshyan.com»-ը գրում է՝ պարզվել է, որ նա Լոռու մարզի Լորուտ գյուղի բնակիչ, 25-ամյա Էդգար Մելիքսեթյանն է։ Ոստիկաները, ձեռնարկելով անհրաժեշտ օպերատիվ-հետախուզական և քննչական միջոցառումներ, պարզել են, որ նույն օրը, ժամը 19։30-ի սահմաններում գյուղում համագյուղացու տանը վիճաբանություն է տեղի ունեցել Է. Մելիքսեթյանի և ևս 1 անձի միջև։ Կայքի տեղեկություններով՝ այդ անձը 19-ամյա Նաիրի Մաթևոսյանն է։ Վերջինս վիճաբանության մասին հայտնել է իր հորը՝ 43-ամյա Վիգեն Մաթևոսյանին, որը գյուղում հայտնի է «Պոշոլանց Վիգեն» մականվամբ, ինչից հետո վերջինս էլ, ըստ նախնական տեղեկությունների, վրեժխնդիր լինելու նպատակով գյուղամիջում դեռևս չպարզված հրազենից կրակել է Է. Մելիքսեթյանի վրա։ Կայքի տեղեկություններով՝ վիրավոր Է. Մելիքսեթյանը Լոռու մարզի Թումանյան խոշորացված համայնքի ավագանու անդամ է։

Ուկրաինայում հատուկ գործողության ժամանակ 15 հայ է զոհվել: Նրանցից հինգը զինծառայող են, 10-ը՝ քաղաքացիական անձ: Այս մասին SputnikArmenia-ին ասել է Ուկրաինայի հայ համայնքի փոխնախագահ Դավիթ Մկրտչյանը։ Նա նաև նշել է, որ մինչ օրս համայնքը տեղեկություն չունի, թե քանի հայ է հեռացել Ուկրաինայից։ Կառույցը հարցում է ուղարկել տեղական սահմանապահ գերատեսչություններին` խնդրելով տեղեկացնել, թե «-յան»-ով վերջացող ազգանունով քանի հոգի է հատել սահմանը։ Սակայն մեկնողների չափազանց մեծ հոսքի պատճառով համայնքը չի կարողացել նման տեղեկատվություն տրամադրել։ Մկրտչյանի խոսքով՝ Հայաստանի քաղաքացիները հանգիստ լքում են Ուկրաինան՝ անցնելով ԵՄ գոտի՝ այնտեղից Հայաստան վերադառնալու նպատակով։ Միաժամանակ նա նշել է, որ դրանք հայ կանայք են, ծերերն ու ուկրաինական քաղաքացիություն ունեցող երեխաներն ազատորեն տեղաշարժվում են նաև ԵՄ գոտի, իսկ տղամարդիկ հիմնականում գտնվում են Արևմտյան Ուկրաինայում։

ՀՀ արտաքին գործերի նախարար Արարատ Միրզոյանը ԱԺ արտաքին հարաբերությունների մշտական հանձնաժողովի նիստում հայտնել է, որ Ադրբեջանը որպես գերի պահում է 38 անձի, որոնցից 3-ը քաղաքացիական անձինք են: «Ադրբեջանում դեռևս ապօրինաբար պահվում են հայ ռազմագերիներ և քաղաքացիական անձինք: Եվ Հայաստանը շարունակում է միջազգային տարբեր ձևաչափերով բարձրաձայնել Ադրբեջանում պահվող հայ ռազմագերիների, պատանդների և այլ պահվող անձանց անհապաղ վերադարձի հարցը: Ադրբեջանը դեռևս պահում է 38 անձի՝ ռազմագերի, պատանդ և այլ կարգավիճակով պահվող անձինք: 38-ից 3-ը քաղաքացիական անձինք են: Ուշագրավ է, որ 38-ից 2-ը գերեվարվել են նախքան նոյեմբերի 16-ը տեղի ունեցած էսկալացիան»,- ասել է Միրզոյանը:

Հայաստանի Հանրապետության Ազգային ժողովի նախագահ Ալեն Սիմոնյանը մարտի 21-ին ելույթ է ունեցել Միջխորհրդարանական միության 144-րդ վեհաժողովում: Վեհաժողովի օրակարգի հիմնական ուղղվածությունը կլիմայական փոփոխությունների դեմ համախմբված պայքարն է, ինչը նաեւ տարբեր երկրների խորհրդարանների համակարգված աշխատանք է պահանջում: Ելույթում ԱԺ նախագահն անդրադարձել է միջազգային գործընթացներում կլիմայի փոփոխության կողմնակի ազդեցությանը: Նա գործընկերներին տեղեկացրել է, որ Հայաստանն ակտիվ միջոցներ է ձեռնարկում կլիմայափոխության եւ մարդածին աղետների դեմ ուղղված միջազգային հանրության ջանքերին նպաստելու ուղղությամբ: ՀՀ խորհրդարանի ղեկավարը նշել է, որ Հայաստանն ընդունել է Կլիմայափոխության գործողությունների ազգային հարմարվողականության ծրագիր, ինչը խորացնում է համագործակցությունը ոլորտային նախաձեռնությունների միջեւ: Ներկայացնելով կլիմայական խնդիրների հայաստանյան առանձնահատկությունները՝ Ալեն Սիմոնյանն ընդգծել է, որ միջազգային մի շարք համաձայնագրերի շրջանակներում ՀՀ կառավարությունը հաստատել է 2021-2030թթ. համար նախատեսված ներդրումների ծրագիրը, ինչը նպաստելու է արտանետումների մակարդակի նվազեցմանը եւ կանաչ գոտիների աճին: Ալեն Սիմոնյանը նշել է, որ Հայաստանը խթանում է էլեկտրաէներգիայի արտադրության ոլորտում վերականգնվող էներգիայի ավելացման քաղաքականությունը՝ հավելելով, որ իրականացվում են համապատասխան օրենսդրական բարեփոխումներ: Հաշվի առնելով համաշխարհային բնապահպանական մարտահրավերները եւ դրանց անշրջելի ազդեցությունը կլիմայի վրա՝ ՀՀ ԱԺ նախագահը վերահաստատել է տվյալ հարցում մեր պետության համագործակցային պատրաստակամությունն անդամ բոլոր պետությունների խորհրդարանների, միջազգային կազմակերպությունների հետ: Եզրափակելով ելույթը՝ ՀՀ ԱԺ նախագահը շեշտել է, որ խորհրդարանները պատասխանատու են կոնվենցիաների եւ համաձայնագրերի, ինչպես նաեւ ազգային օրենսդրության բարեփոխումների հարցերում, եւ ՀՀ Ազգային ժողովը պատշաճ վերահսկում է այս գործընթացները:

2020-ին Ադրբեջանի սանձազերծած ագրեսիայից հետո այդ երկիրը նոր պահանջներ է առաջ քաշում խաղաղության համար, այսպես կոչված հինգ սկզբունքներ ներկայացնում։ Իմ համոզմամբ, դրանք Արցախից հրաժարվելու, Արցախի հարցը վերջնական փակելու մասին են»,- այս մասին խորհրդարանական լսումների ժամանակ ասաց «Պատիվ ունեմ» խմբակցության ղեկավար Արթուր Վանեցյանը։

Առատ ձյան տեղումների պատճառով՝ հանրապետության տարածքում կան փակ և դժվարանցանելի ճանապարհներ, հայտնում է Արցախի ՆԳ նախարարությունը։ Փակ են Ասկերանի շրջանի Շոշ, Մխիթարաշեն, Խաչմաչ, Սզնեք, Կարմիր գյուղ, Ռև, Փառուխ, Սարուշեն և Հարավ համայնքների ճանապարհները: Միջշրջանային մյուս ճանապարհները դժվարանցանելի է: Կատարվում են ձնամաքրման աշխատանքներ: Շրջանում ձյան շերտի բարձրությունը 1 մ-ից հասնում է 1,20սմ-ի: Մարտակերտի շրջանում միջհամայնքային ճանապարհները հիմնականում բաց են, բարձր լեռնային գոտիներում՝ հորիզոնական տեսանելիությունը թույլ է: Դժարանցանելի է Կոճողոտ համայնքի ճանապարհը: Ձյան շերտի բարձրությունը հասնում է 60-70սմ-ի: «Զառին բաղ» կոչվող տեղանքից դեպի Կարմիր շուկա տանող միջշրջանային ճանապարհը և Հաղորտի, Կոլխոզաշեն, Կավահան, Աշան, Նորշեն, Մուշկապատ, Մյուրիշեն, Սոս, Քարահունջ, Հերհեր, Ծովատեղ, Կաղարծի, Պառավաթումբ, Մսմնա միջհամայնքային ճանապարհները փակ են: Մարտունի քաղաքը և շրջանի մյուս համայնքների ճանապարհները դժվարանցանելի են: Ձյան շերտի բարձրությունը շրջանում կազմում է 80-100 սմ: Շրջանում թեթև ձյուն է տեղում: Ստեփանակերտը շրջաններին կապող միջշրջանային ճանապարհները տեղ-տեղ անանցանելի են, առկա է նաև մերկասառույց և ցածր հորիզոնական տեսանելիություն: Փակ է ՀՀ հետ կապող միջպետական մայրուղու Լիսագոր-Գորիս-Սիսիան-«Զանգեր»-Սարավան հատվածը: Ներքին գործերի նախարարությունը կոչ է անում հնարավորինս սահմանափակել երթևեկությունը, բացառել դժբախտ ելքով դեպքերն ու պատահարները:

Իշխանությունները շարունակում են պարտությունների և կապիտուլյացիայի շղթան։ Հայաստանի կապիտուլյացիան սկսվել է 2018թ.՝ Նիկոլ Փաշինյանի և նրա թիմի՝ իշխանության գալու պահից։ 2020թ․ նոյեմբերի 9-ին այն ամրապնդվեց, իսկ 2021թ․ հունվարի 11-ին ստացավ շարունակություն։ Եվ դա շարունակվում է մինչ օրս, մամուլի ասուլիսի ժամանակ ասել է ՀՀԿ ներկայացուցիչ Էդուարդ Շարմազանովը «Կապիտուլյանտների ռեժիմը իրականանցում է երկու ազգակործան ծրագիրը՝ «հարաբերությունների կարգավորում Թուրքիայի հետ, Ադրբեջանի հետ խաղաղության դարաշրջանի բացում։ Մենք խաղաղության դեմ չենք, ոչ էլ առանց նապապամայնների հարաբերություներին, բայց արդյոք այսօր գոյություն ունեն առանց նախապայմանների հարաբերություններ և արդյոք ՀՀ-ն գնում է դեպի խաղաղության»,- ասել է Շարմազանովը։

Վերաքննիչ քրեական դատարանում՝ դատավոր Մխիթար Պապոյանի նախագահությամբ, ընթանում է Նիկոլ Փաշինյանի օգնական Աննա Վարդապետյանի կողմից ՀՖՖ նախկին նախագահ Ռուբիկ Հայրապետյանի և վերջինիս որդու՝ Ռաֆիկ Հայրապետյանի գործով առերևույթ ապօրինի միջամտություն կատարելու, ինչպես նաև՝ բանկային գաղտնիք պարունակող տեղեկություններ հրապարակելու դեպքի առթիվ քրեական գործ հարուցելու պահանջով բողոքի քննությունը։ Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, մերժել էր դատախազության կողմից քրեական գործի հարուցումը մերժելու մասին ԱԱԾ քննիչի որոշման դեմ բողոքը, ինչն էլ այժմ վիճարկվում է Վերաքննիչ դատարանում։ Փաստաբան Ամրամ Մակինյանը վերաքննիչ բողոքով պահանջում է բեկանել առաջին ատյանի դատարանի դատական ակտը՝ կայացնելով նոր դատական ակտ կամ գործն ուղարկել առաջին ատյանի դատարան՝ նոր քննության, գրում է «Փաստինֆո»-ն։ Ներկայացնելով բողոքը՝ փաստաբանն արձանագրեց, որ խախտվել են Ռուբիկ և Ռաֆիկ Հայրապետյանների իրավունքները, չեն պահպանվել Քրեական դատավարության օրենսգրքի սկզբունքները։ Ակնհայտ ապօրինի որոշումը, ըստ նրա, խաթարել է արդարադատության բուն էությունը, մինչդատական վարույթ իրականացնող մարմինների հեղինակությունը, ինչն առաջացրել է ծանր հետևանքներ, մինչդեռ, դատարանն իր ոչ իրավաչափ որոշմամբ աչք է փակել այս ամենի վրա և հաստատել վարույթն իրականացնող մարմնի, դատախազության ոչ իրավաչափ գործողությունները։ Մակինյանն ընդգծեց, որ ԱԱԾ-ում նախապատրաստված նյութերով հիմնավորվել էր, որ վարչապետի օգնականը, ի պաշտոնե չունենալով քննիչի գործողություններին միջամտելու որևէ լիազորություն, պաշտոնեական լիազորությունների անցմամբ, ապօրինի միջամտել է քննիչի գործողություններին՝ փաստական առումով խմբագրելով և քննիչին վերադարձնելով Ռաֆիկ Հայրապետյանին որպես մեղադրյալ ներգրավելու որոշումը։ «Մինչդեռ, ԱԱԾ քննիչն, ունենալով վարչապետի օգնականի և ՀԿԳ քննիչի լիազորությունների անցման և քննիչի լիազորություններին միջամտելու ինքնախոստովանական բացատրությունները, մեր գնահատմամբ առերևույթ հանցավոր խմբի գործողություններն ամեն կերպ կոծկելու համար արժանահավատ է համարել վարչապետի օգնականի և քննիչի բերած այն պատճառաբանությունները, որ իբրև վարչապետի օգնականը խնդրահարույց գործերով իրավական օգնություն է ցուցաբերել քննիչին և որևէ եղանակով չի միջամտել նրա գործողություններին, իբրև՝ վարչապետի օգնականի խմբագրած՝ որպես մեղադրյալ ներգրավելու մասին որոշումը հիմք չի հանդիսացել Ռաֆիկ Հայրապետյանի գործողություններին գնահատական տալու համար, այն քննիչի համար պարտադիր չի եղել»,-նշեց Մակինյանը՝ հավելելով, որ, եթե իրոք քննիչն ու առաջին ատյանի դատարանը հավատում են իրենց որոշմանը, ապա սա իրավական զավեշտ և ծաղր է՝ ՀՀ-ի և ԱԱԾ-ի նկատմամբ։ Մակինյանն ընդգծեց, որ վարչապետի օգնական Աննա Վարդապետյանը, իր հայեցողությամբ, քննիչի որոշման մեջ «փաստեր է» լրացրել կամ կրճատել,ինչը չի բխում նրա պաշտոնեական պարտականություններից։ Դատախազը չառարկեց, որ նման գործառույթ վարչապետը օգնականը չունի, սակայն պնդեց, թե Փաշինյանի օգնական Աննա Վարդապետյանը քրեական գործով ներգրավված է եղել որպես փորձագետ։ Դրանով հանդերձ, չկարողացավ նաեւ հիշատակել քրեական դատավարության օրենսգրքի որեւէ հոդված, որը թույլ է տալիս գործադիր մարմնի ղեկավարի օգնականին ներգրավել որպես փորձագետ ու անձին որպես մեղադրյալ ներգրավելու որոշման մշակումը քննիչի փոխարեն վերապահել նրան, բայց ինչպես դատախազը, այնպես էլ քննիչը խնդրեցին մերժել բողոքը։ Դատական նիստը հետաձգվեց՝ մինչև մարտի 29-ը, ժամը՝ 16.00-ն։ Հիշեցնենք, որ դրան նախորդել էր Աննա Վարդապետյանի կողմից ՀՖՖ նախկին նախագահ Ռուբեն Հայրապետյանի և որդու՝ Ռաֆիկ Հայրապետյանի գործով առերևույթ ապօրինի միջամտություն կատարելու վերաբերյալ տեսագրություն էր տարածվել, համաձայն որի՝ գործը քննող քննիչը դատավարական որոշումների նախնական տարբերակներն ուղարկել է Աննա Վարդապետյանին, որը խմբագրել է դրանք և կրկին ուղարկել քննիչներին։ Տարածվող տեսագրության առթիվ ԱԱԾ-ում նյութեր են նախապատրաստել, որոնց հիման վրա ԱԱԾ-ն մերժել էր քրեական գործ հարուցել՝ պատճառաբանելով, թե Փաշինյանի օգնականը որպես փորձագետ է ծանոթացել քննիչի որոշումների հետ եւ խմբագրել դրանք։ Դրան հաջորդել է թելեգրամյան ալիքներով տարածված մեկ այլ ձայնագրություն, համաձայն որի՝ Երևան քաղաքի քննչական վարչության ծանր հանցագործությունների բաժնի պետ Արմեն Մարգարյանի տեղակալ Արման Աբրահամյանը ձայնային հաղորդագրություն է ուղարկել նախկին պաշտոնյաների վերաբերյալ քրեական գործերը քննող քննիչներին՝ տեղեկացնելով, որ Նիկոլ Փաշինյանի խորհրդական Աննա Վարդապետյանը կրկին գնալու է քննչական մարմին։ ԱԱԾ-ն մերժել էր նաև այս դրվագով քրեական գործի հարուցումը։ Հայրապետյանների փաստաբան Ամրամ Մակինյանը նախ՝ դատախազություն էր բողոք ներկայացրել՝ պահանջելով վերացնել որոշումները, իսկ բողոքի մերժումից հետո դիմել դատարան։

Իշխանությունները Հայաստանն ուզում են դարձնել թուրքական ոտնաման սրբելու տեղ. Արեգնազ Մանուկյան։ Մեր սիրտն Արցախի հետ է, Հայաստանն առանց Արցախ և Արցախն առանց Հայաստան անպաշտպան են ու որբացած, հետևաբար մեր միասնությունը կասկածի տակ դնողներին պետք է նետել քաղաքական աղբանոց, և մեր երկիրը մաքրել ներսից քայքայող միջատներից: Ազգային ժողովում լսումների ժամանակ ասաց «Հայաստան» խմբակցության պատգամավոր Արեգնազ Մանուկյան: «Մենք ծանր ժամանակներ ենք ապրում, աշխարհն իրար է խառնվել, մեր թշնամիները սպասում են ուկրաինական ճգնաժամի հանգուցալուծման՝ ի վնաս Ռուսաստանի, որպեսզի հարձակվեն մեզ վրա: Հայաստանի թավշյա իշխանությունները բերեցին պատերազմ ու պարտություն, հիմա էլ բերում են նոր խայտառակություն իրենց թուրքական վեկտորն առաջ մղելով և Ռուսաստանի դեմ խաղեր տալով»:

Առողջապահության ոլորտի վատ աշխատանքի ու անգործության մասին երբ բարձրաձայնում ես, պատասխանատուները սկսում են սլաքներն ուղղել դեպի բժիշկը։ Այս մասին ֆեյսբուքի իր էջում գրել է ԱԺ նախկին պատգամավոր Կարեն Ավագյանը։ «Բժշկի համար ստեղծելով լուրջ կազմակերապական խոչընդոտներ, ոչ պատշաճ գործունեության պայմաններ, անբավարար հանգիստ։ Գիտակցելով նաև բժշկի դիմող քաղաքացու հոգեվիճակը պատկան մարմինները ցանկացած բողոք, խնդիր անուղղակի կերպով, երբեմն նաև ուղղակի մեղավորությունը բարդում են բժշկի վրա։ Այսօր առողջապահական ոլորտի պատասխանատուները զբաղվում են բացառապես այն թեմաներով, որոնք իրենց հետ բերելու են տեսանելի, իսկ իրականում թվացյալ մտահոգության ցուցադրում մարդկանց առողջության նկատմամբ։ Աղի չարաշահումն իհարկե վնաս է, բայց այն սեղանից հավաքելն ուղղակի ծաղր: Միջազգային փորձում կա հիմնավորված միջոցառումների ցանկ, որը իրապես բացառում է աղի վնասակար հետևանքների նվազեցումը, այլ ոչ թե առողջապահական գերատեսչությունը դարձնում ծաղրուծանակի առարկա»,-գրել է նա։

Ազգային ժողովում լսումների ժամանակ «Հայաստան» խմբակցության պատգամավոր Արամ Վարդևանյանը ասել է, որ սուտը քրեականացնելու վերաբերյալ նախագիծ են դրել շրջանառության մեջ։ «Քանի որ հնչեց մտահոգություն, որ բարձրաստիճան պաշտոնյաները կարող են գալ և օրինակ՝ այս նախգծի ընդունման և դրա իրացման դեպքում սուտ տեղեկություն հայտնել, ուզում եմ տեղեկացնել, որ գործընկերներիս հետ մասին մենք նախագիծ էինք դրել շրջանառության մեջ՝ սուտը քրեականացնելու վերաբերյալ»։ Պատգամավորը հավելել է, որ նախագիծը ԱԺ-ում դեռ չի քննարկվել, բայց կառավարութունից ստացել են խոստունալից դիրքորոշում։ «Կառավարությունն ասել է, որ դեմ է այդ նախագծին, քանի որ դա կսահմանափակի խոսքի ազատությունը,- ասել է պատգամավորը և ի պատասխան ներկաների զարմացած արձագանքին, թե ինչ անհիմն դիրքորոշում է, ավելացրել է,- ամենայն լրջությամբ եմ հայտնում, զուտ ուզեցի տեղեկացնեմ»:

Ձյունառատ մարտը դեռ հյուսիս-արևմուտքից եկող ցիկլոնի ազդեցության տակ է: Առանձին շրջաններում տեղումներ են լինելու մինչև մարտի 25-ը: Լեռնային հատվածներում բուք է սպասվում: Այսօր ու վաղը կցրտի 2-ից 4 աստիճան:

Նախկին պատգամավոր Նաիրա Զոհրաբյանը Ազգային ժողովում իր ելույթի ժամանակ հայտարարել է, որ թե՛ Հայաստանի իշխանությունը, թե՛ միջազգային հանրությունը թքած ունեն Արցախում հումանիտար ճգնաժամի վրա։ Նա մեջբերել է Ադրբեջանի ԱԳՆ մամուլի խոսնակի այն հայտարարությունը, թե Հայաստանը, ոնց որ, հետևություններ չի անում 44-օրյա պատերազմից։ «Խոսվում է խաղաղության պայմանագրի մասին, հիմա հարց՝ ի՞նչ խաղաղության պայմանագրի մասին կարող է խոսք լինել, փորձում են շրջանառության մեջ դնել ամենավտանգավոր թեզը՝ այս կամ այն կարգավճակով Արցախը Ադրբեջանի կազմում։ Ինչ-որ «դիջեյներ», ինչ-որ թրքահպատակներ փորձում են տարատեսակ լղոզված ձևակերումներով ասել՝«դե, պիտի քննարկվի, պիտի նայենք»։ Արցախը Ադրբեջանի կազմում նշանակելու է ցեղասպանություն, նշանակելու է Արցախի ցեղասպանություն»,- հայտարարել է ԱԺ նախկին պատգամավորը։ Նա եզրափակեց իր ելույթը՝ ըդգծելով, որ Արցախը վերջնականապես կորցնելու հետհաշվարկը սկսված է։ «Մենք հապաղելու ժամանակ չունենք, կոնկրետ քայլեր են պետք»։

Այսօր ԱԺ-ում խորհրդարանական լսումների ժամանակ ելույթ է ունեցել նաև ՀՀ նախկին վարչապետ Հրանտ Բագրատյանը։ Նա նշել է, որ Ադրբեջանի իշխանությունները Հայաստանի իշխանությունների հետ թև-թևի տված ոչնչացնում են Արցախի անկախության ճանաչման բոլոր հիմքերը։ «Արցախի ղեկավարության հետ հանդիպումից հետո ստացանք այն տպավորությունը, որ ոչինչ չի արվում Արցախի անկախության ճանաչման հարցում, նույնիսկ Մինսկի խմբի համանախագահների շրջանում։ Այս մասին Ադրբեջանի իշխանությունները Հայաստանի իշխանությունների հետ թև-թևի տված ոչնչացնում են Արցախի անկախության ճանաչման բոլոր հիմքերը։ Արցախի ղեկավարության հետ հանդիպումից հետո ստացանք այն տպավորությունը, որ ոչինչ չի արվում Արցախի անկախության ճանաչման հարցում, նույնիսկ Մինսկի խմբի համանախագահների շրջանում»։ Բագրատյանը նաև նշել է, որ պետք չէ իլյուզիաներ ունենալ, այս անգամ գազամուղն են պայթեցնում, հաջորդ անգամ կկտրեն կապը Արցախի հետ և դրանով ամեն ինչ կվերջանա, մի քանի ժամ ժամանակ կտան և ժողովրդին կասեն՝ դե դուրս եկեք, և մենք էլ դուրս ենք գալու, առանց կասկածի։ «Խաղաղության մասին հայտարարություններից հետո Ադրբեջանը ավելացրել է բյուջեն պաշտպանության ոլորտում, իսկ Հայաստանը՝ կրճատել։ Ինձ իշխանությունից ասում են՝ իշմար եմ տալիս Ադրբեջանին, ինչ է, իրենք չեն կարողանո՞ւմ բացել, կարդալ՝ ՀՀ բյուջեն որքան է։ Ուկրաինայի հետ կապված իրադարձություններից հետո իրենք նայում են, երբ հարձակվեն ՀՀ-ի վրա, ուրիշ թեմա չկա։ Ադրբեջանը ավելացրել է բյուջեն և գնել այնպիսի զենքեր, որոնք մեզ հասանելի չեն, մենք չենք կարող խփել դրանց, նորագույն բայրաքթարները բարձանում են մինչև 13 կմ։ Հազար անգամ ասել ենք՝ հերիք է խրամատները ստից փորեք, կառուցեք կապսուլներ, որին ոչ մի բայրաքթար չի խփում, այդպիսի մի հնարավորություն կար Մարտունիում և այնտեղ ոչ մի թիզ հող չենք հանձել, 3-4 մլն-ի պատմություն է։ Ամբիոնների հայտարարում են, թե այսինչ զինատեսակներից ունենք, բայց մի հատ չեն ցուցադրում։ Փորձը ցույց է տալիս, որ թուրքը չի սիրում ցեխի մեջ թաղվել կռվելուց, օրերը կտաքանան և վտանգը շատ մեծ է, որ ապրիլ-մայիսին ՀՀ-ի վրա կլինի հարձակում»։ Նախկին վարչապետն ասել է, որ խաղաղության մասին հայտարարություններից հետո Ադրբեջանը ավելացրել է բյուջեն պաշտպանության ոլորտում, իսկ Հայաստանը՝ կրճատել։ «Ինձ իշխանությունից ասում են՝ իշմար եմ տալիս Ադրբեջանին, ինչ է, իրենք չեն կարողանո՞ւմ բացել, կարդալ՝ ՀՀ բյուջեն որքան է։ Ուկրաինայի հետ կապված իրադարձություններից հետո իրենք նայում են, երբ հարձակվեն ՀՀ-ի վրա, ուրիշ թեմա չկա։ Ադրբեջանը ավելացրել է բյուջեն և գնել այնպիսի զենքեր, որոնք մեզ հասանելի չեն, մենք չենք կարող խփել դրանց, նորագույն բայրաքթարները բարձանում են մինչև 13 կմ։ Հազար անգամ ասել ենք՝ հերիք է խրամատները ստից փորեք, կառուցեք կապսուլներ, որին ոչ մի բայրաքթար չի խփում, այդպիսի մի հնարավորություն կար Մարտունիում և այնտեղ ոչ մի թիզ հող չենք հանձել, 3-4 մլն-ի պատմություն է։ Ամբիոնների հայտարարում են, թե այսինչ զինատեսակներից ունենք, բայց մի հատ չեն ցուցադրում։ Փորձը ցույց է տալիս, որ թուրքը չի սիրում ցեխի մեջ թաղվել կռվելուց, օրերը կտաքանան և վտանգը շատ մեծ է, որ ապրիլ-մայիսին ՀՀ-ի վրա կլինի հարձակում»։

ՀՀԿ փոխնախագահ Արմեն Աշոտյանը ֆեյսբուքյան էջում գրառումներից մեկն է վերահրապարակել և կից գրառում է արել․ «Այս գրառման համար այսօր հրավիրվել էի Էրեբունու ոստիկանության բաժին՝ «վիրավորանքի» տխրահռչակ հոդվածով։ Եվրոմիության դեսպանին հանկարծ չասեք, կարող է հանկարծ զարթնի ու մատ թափ տա Նիկոլի վրա»:

Արցախի Հանրապետության կրթության գիտության, մշակույթի և սպորտի նախարարությունը տեղեկացնում է, որ եղանակային աննախադեպ պայմաններից ելնելով՝ նախադպրոցական, հանրակրթական, նախնական (արհեստագործական) և միջին մասնագիտական ուսումնական հաստատություններում ուսումնական գործընթացը կասեցվում է մինչև մարտի 23-ը ներառյալ։ Հանրակրթական, նախնական (արհեստագործական) և միջին մասնագիտական ուսումնական հաստատություններում 5-օրյա աշխատանքային շաբաթվա դեպքում պարապմունքները լրացվելու են հաջորդող շաբաթ օրերին, 6-օրյա աշխատանքային շաբաթվա դեպքում դասաժամերը բաշխվելու են հաջորդող մեկ ամսվա ժամաքանակների վրա։