Լրահոս

ՀՀ հակակոռուպցիոն կոմիտեում իրականացված քրեական վարույթով հիմնավորվել է, որ Ռ. Ս.-ն, զբաղեցնելով Գեղարքունիքի մարզի ընդհանուր իրավասության առաջին ատյանի դատարանի դատավորի օգնականի պաշտոնը, խարդախությամբ պաշտոնեական դիրքն օգտագործելով դատապարտյալից գումար է հափշտակել: Մասնավորապես` պարզվել է, որ Ռ. Ս.-ն ծանոթություն է հաստատել Դիլիջան քաղաքի բնակիչ Ս. Հ.-ի հետ, որը Գեղարքունիքի մարզի ընդհանուր իրավասության առաջին ատյանի դատարանի` 2016 թվականի հուլիսի 8-ի դատավճռով մեղավոր է ճանաչվել ՀՀ քրեական օրենսգրքի 242-րդ հոդվածի 2-րդ մասով նախատեսված արարք կատարելու մեջ և դատապարտվել ազատազրկման: Դրանից հետո` 2017 թվականի հունիսի 21-ին, դատապարտյալի պաշտպանը դիմում է մուտքագրել Գեղարքունիքի մարզի ընդհանուր իրավասության դատարան` Ս. Հ.-ի նկատմամբ նշանակված ազատազրկման ձևով պատժատեսակը հանրային աշխատանքներով փոխարինելու վերաբերյալ: Դատավորի օգնական Ռ. Ս.-ն, տեղեկացված լինելով վերը նշված դիմումի մասին և նպատակ ունենալով դատապարտյալից խարդախությամբ գումար հափշտակել, Ս. Հ.-ին հայտնել է, որ որպես պատժատեսակ նշանակված ազատազրկումը հանրային աշխատանքներով փոխարինելու համար անհրաժեշտ է 300.000 ՀՀ դրամի պետական վճարում կատարել, մինչդեռ օրենքով որևէ նման վճարում սահմանված չի եղել: Արդյունքում` Ռ. Ս.-ն Վանաձոր քաղաքում հանդիպել է դատապարտյալ Ս. Հ.-ի հետ և նրանից ստացել 300.000 ՀՀ դրամ գումարը: Քննության առնելով Ս. Հ.-ի պաշտպանի դիմումը` Գեղարքունիքի մարզի ընդհանուր իրավասության առաջին ատյանի դատարանը որոշում է կայացրել հիշյալ դիմումն ըստ ընդդատության ուղարկելու վերաբերյալ, որից հետո դատապարտյալ Ս. Հ.-ի պահանջով Ռ. Ս.-ն հիշյալ գումարը վերադարձրել է նրան: Ռ. Ս.-ին մեղադրանք է ներկայացվել ՀՀ նախկին քրեական օրենսգրքի 178-րդ հոդվածի 2-րդ մասի 1.1 կետով նախատեսված հանցավոր արարքի կատարման համար: Նախաքննությունն ավարտվել է: Քրեական վարույթի նյութերը մեղադրական եզրակացությամբ հանձնվել են հսկողություն իրականացնող դատախազին` այն հաստատելու և դատարան ուղարկելու միջնորդությամբ: Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Ռուսաստանը և Ուկրաինան գերիներ են փոխանակել՝ 35-ը 35-ի դիմաց: Ռուսաստանի պաշտպանության նախարարության հաղորդմամբ՝ ուրբաթ երեկոյան են ռուս գերիները հայրենիք վերադարձել: Ավելի վաղ, Դաշնության պաշտպանական գերատեսչությունը հայտնել էր, որ ուկրաինացի զինվորականները միտումնավոր սպանել են 10 ռուս ռազմագերիների։

Հայկական բեռնափոխադրման ճգնաժամը դեռ չի հանգուցալուծվել Վրաստանում: Հայաստանի էկոնոմիկայի նախարարությունը «Սպուտնիկ Արմենիային» վստահեցրել է, թե քայլեր են ձեռնարկվում իրավիճակի կարգավորման ուղղությամբ։ Նախարարությունը հաստատում է, որ վրացական կողմում հայկական պետհամարանիշով 1600 մեքենա կա: Ըստ նախարարության՝ խնդիրը ծագել է Ղրիմի կամրջի պայթյունից հետո, երբ ռուսական կողմը անվտանգությունից ելնելով խստացրել է վերահսկողությունը բոլոր բեռնատարների նկատմամբ:

Հայաստանի տնտեսական ակտիվության ցուցանիշը 2022 թվականի հունվար-հոկտեմբերին 14.5 տոկոսով ավելացել է նախորդ տարվա նույն ժամանակահատվածի նկատմամբ: «Արմենպրես»-ի հաղորդմամբ՝ այս մասին փաստում են ՀՀ վիճակագրական կոմիտեի հրապարակած տվյալները: Արդյունաբերական արտադրանքի ծավալը այս տարվա հունվար-հոկտեմբերին նախորդ տարվա հունվար-հոկտեմբերի համեմատ ավելացել է 9.9 տոկոսով: Շինարարության ծավալը այս տարի 10 ամսում նախորդ տարվա նույն ժամանակի համեմատ ավելացել է 14.4 տոկոսով Առևտրի շրջանառությունում հունվար-հոկտեմբերին 2021-ի նույն ժամանակահատվածի նկատմամբ ավելացումը կազմել է 15.5 տոկոս: 2022 թվականի հունվար-հոկտեմբերին մատուցված ծառայությունների ծավալը նախորդ տարվա նույն ժամանակահատվածի նկատմամբ ավելացել է 27.9 տոկոսով: Իսկ այս տարվա 10 ամիսների ընթացքում սպառողական գների ինդեքսը 2021-ի նույն ժամանակահատվածի համեմատ աճել է 8.7 տոկոսով: Արդյունաբերական արտադրանքի գների ինդեքսը հունվար-հոկտեմբերին 2021-ի հունվար-հոկտեմբերի համեմատ աճել է 3.4 տոկոսով: Իսկ էլեկտրաէներգիայի արտադրության ծավալը հունվար-հոկտեմբերին նախորդ տարվա նույն ժամանակի համեմատ ավելացել է 16.8 տոկոսով: Արտաքին առևտրաշրջանառության ծավալներում այս տարվա հունվար-հոկտեմբերին նախորդ տարվա նույն ժամանակի համեմատ արձանագրվել է 66.4 տոկոս աճ, ընդ որում արտահանումն աճել է 71.2 տոկոսով, իսկ ներմուծումը՝ 63.5 տոկոսով: Դրամի փոխարժեքը ԱՄՆ դոլարի նկատմամբ հունվար-հոկտեմբեր ամիսներին կազմել է 443.81 դրամ:

Կրեմլը հայտարարել է, որ Ռուսաստանը պատրաստ է և կշարունակի գործադրել բոլոր ջանքերը՝ իր հարթակում հայ-ադրբեջանական հակամարտությունը լուծելու համար, փոխանցում է interfax.ru-ն: Լրագրողների այն հարցին, թե Ռուսաստանը պատրա՞ստ է տրամադրել իր հարթակը՝ հաշվի առնելով այն հանգամանքը, որ Ֆրանսիայի նախագահ Էմանուել Մակրոնի հնարավոր ներկայության պատճառով Ադրբեջանի նախագահ Իլհամ Ալիևը հրաժարվել է Հայաստանի վարչապետ Նիկոլ Փաշինյանի հետ բրյուսելյան հանդիպումից, ՌԴ նախագահի մամուլի քարտուղար Դմիտրի Պեսկովը պատասխանել է.«Ռուսաստանը ոչ միայն պատրաստ է, այլև մշտապես արձանագրում է իր աշխատանքի շարունակության մասին՝ աջակցելու երկու պետություններին իրավիճակի կարգավորման և խաղաղության համաձայնագրի ստորագրման հարցում»։ Ի պարզաբանում հարցին, թե արդյոք մոտ ապագայում նախատեսվո՞ւմ է նման հանդիպում ռուսական հարթակում, Կրեմլի խոսնակն ասել է. «Կարճաժամկետ հեռանկարում՝ ոչ»։

Հայաստանի արտաքին գործերի նախարարությունն արձագանքել է Ադրբեջանի նախագահ Իլհամ Ալիևի հայտարարությանը, թե դեկտեմբերի 7-ին Բրյուսելում Հայաստանի վարչապետ Նիկոլ Փաշինյանի հետ նախատեսված հանդիպումը չի կայանա, քանի որ հայկական կողմը հանդիպմանը համաձայն է պայմանով, որ դրան մասնակցի նաև Ֆրանսիայի նախագահը: Ադրբեջանի նախագահի հայտարարության, ինչպես նաև խաղաղության պայմանագրի վերաբերյալ հայկական կողմի՝ Ադրբեջանին ներկայացված առաջարկների մասին «Արմենպրես»-ի հարցերին է պատասխանել ՀՀ ԱԳՆ մամուլի քարտուղար Վահան Հունանյանը. Հարց. Ադրբեջանի նախագահ Իլհամ Ալիևը հայտարարել է, որ Բրյուսելում դեկտեմբերի 7-ին նախատեսվող հանդիպումը տեղի չի ունենա ձևաչափի վերաբերյալ հայկական կողմի դիրքորոշման պատճառով: Ինչպե՞ս կմեկնաբանեք դա: Պատասխան. Ցանկանում ենք հիշեցնել, որ նախորդ հանդիպումը Պրահայում, որտեղ հենց ձեռք է բերվել հանդիպումները շարունակելու պայմանավորվածություն, տեղի է ունեցել քառակողմ ձևաչափում, և տրամաբանական է, որ հանդիպման ձևաչափը և մասնակիցների կազմը պիտի նույնը լինի: Ադրբեջանական կողմի բոլոր հայտարարությունները, թե հայկական կողմը փորձում է խաթարել հանդիպման անցկացումը և խաղաղության գործընթացն իրականության հետ որևէ աղերս չունեն։ Հայաստանի Հանրապետությունը պատրաստ է դեկտեմբերի 7-ի հանդիպմանը՝ Պրահայում ձեռք բերված պայմանավորվածության և ձևաչափի համաձայն։ Հարց. Վաշինգտոնում նոյեմբերի 7-ին անցկացված հանդիպման ընթացքում Հայաստանը Ադրբեջանին էր փոխանցել խաղաղության պայմանագրի վերաբերյալ հայկական առաջարկները: Արդյոք որևէ զարգացում կա՞ այս առումով: Պատասխան. Այս պահի դրությամբ խաղաղության պայմանագրի մեր առաջարկներին Ադրբեջանը չի պատասխանել։

Ռուսական Կրիմսկում տեղի ունեցած ողբերգության փաստով քրեական գործ է հարուցվել: Քաղաքի «Սլավյանսկի» առևտրի կենտրոնի մոտ ցերեկը մի տղամարդ հրացանից կրակել էր իր երկու ծանոթների ուղղությամբ, սպանել նրանց: Սպանել էր նաև պատահական մի անցորդի, որի ինքնությունը դեռ պարզված չէ, և վիրավորել 61-ամյա մի քաղաքացու, որին տեղափոխել էին հիվանդանոց: Երեքին սպանելուց և մեկին վիրավորելուց հետո հրաձիգը ինքնասպան էր եղել, հայտնել էր Ռուսաստանի ներքին գործերի նախարարությունը:

Ամերիկացի ռեփ երաժիշտ Քանյե Ուեսթը հայտնել է, որ ԱՄՆ նախկին նախագահ Դոնալդ Թրամփը բղավել է իր վրա Ֆլորիդայի Մար-ա-Լագո կալվածքում տեղի ունեցած հանդիպման ժամանակ, հաղորդում է «Արմենպրես»-ը: 45-ամյա երաժիշտը, ով անցյալ շաբաթ հայտարարեց 2024 թ.-ի ԱՄՆ նախագահական ընտրություններում առաջադրվելու իր մտադրության մասին, նշել է, որ ԱՄՆ նախկին նախագահին հատկապես բարկացրել է այն, որ ինքը Թրամփին խնդրել է լինել իր փոխնախագահը: Քանյե Ուեսթն իր և Թրամփի հանդիպման մասին պատմող տեսանյութը տեղադրել է Twitter-ի իր էջում, որն օրերս էր վերականգնվել արգելափակումից հետո: Հիշեցնենք՝ նախագահական ընտրություններում առաջադրվելու մտադրության մասին անցյալ շաբաթ հայտնել էր նաև Դոնալդ Թրամփը:

Երեկ՝ նոյեմբերի 24-ին, ավտովթար է տեղի ունեցել Արարատի մարզում։ Ժամը 17։00-ի սահմաններում Մասիս գյուղի Արտաշատյան խճուղում բախվել են Արարատի մարզի բնակիչ 28-ամյա Արշակ Հ․-ի վարած Volkswagen Jetta մակնիշի և Երևանի բնակիչ 56-ամյա Կարեն Ա․-ի վարած Hyundai Elantra մակնիշի ավտոմեքենաները; © shamshyan.com https://shamshyan.com/hy/article/2022/11/25/1227326/

Ադրբեջանի նախագահ Իլհամ Ալիևը կարծում է, որ Հայաստանն «ի վիճակի չէ արգելափակել Զանգեզուրի միջանցքը»։ «Զանգեզուրի միջանցքը քննարկել ենք ռուս պաշտոնյաների հետ իմ վերջին զրույցի ժամանակ։ Ես չեմ կարծում, որ Հայաստանն ի վիճակի է արգելափակել այդ միջանցքը», - այսօր ասել է Ալիևը։ Նրա խոսքով, Իրանը նույնպես չի խանգարի Զանգեզուրի միջանցքի գործարկմանը։ «Ինչ վերաբերում է Իրանին, ապա կարծում եմ, որ նա նույնպես դա չի անի՝ հաշվի առնելով իր հետաքրքրությունը տարածաշրջանային հաղորդակցության նախագծերի նկատմամբ, որովհետև այդ նախագծերն ուղղված չեն որևէ մեկի դեմ, այլ, ընդհակառակը, միայն ի շահ՝ բոլոր շահագրգիռ կողմերի», - նշեց նա։

Մենք խաղաղություն ենք ուզում, ուզում ենք, որ նրանք հասկանան, որ իրենք ընդհանուր ոչինչ չունեն Ղարաբաղի հայերի հետ, հայտարարել է Ադրբեջանի նախագահ Իլհամ Ալիևը։ «Մենք ուզում ենք Զանգեզուրի միջանցքը և մենք ձգտում ենք սահմանների սահմանազատման՝ հիմնվելով պատմական քարտեզների վրա, ոչ թե այն քարտեզների վրա, որոնք փորձում են ներկայացնել։ Մենք տարածքներ չենք ուզում, պատերազմ չենք ուզում, եթե ուզենայինք, կանեինք», - հավելել է Ադրբեջանի նախագահը։

Չինաստանում երկու օր շարունակ COVID-19-ի ռեկորդային դեպքեր են գրանցվում ԵՐԵՎԱՆ, 25 ՆՈՅԵՄԲԵՐԻ, ԱՐՄԵՆՊՐԵՍ: Չինացի բժիշկները վերջին 24 ժամում հայտնաբերել են կորոնավիրուսով վարակման 32 943 նոր դեպք՝ նախորդ օրվա համեմատությամբ 4 տոկոսով ավելի: ՉԺՀ-ի Հիգիենայի և առողջապահության հարցերով պետական հանձնաժողովի՝ նոյեմբերի 25-ին հրապարակված տվյալների համաձայն՝ դա նոր հակառեկորդ Է համավարակն սկսվելուց ի վեր: Այս մասին «Արմենպրես»-ը տեղեկանում է ՏԱՍՍ գործակալությունից: Ըստ գերատեսչության ներկայացրած տվյալների՝ վարկաման նոր դեպքերի 90,5 տոկոսն անախտանիշ Է, 29 840 անախտանիշ հիվանդներից 186-ը ՉԺՀ Է ժամանել արտասահմանից, մնացածները վարակվել են երկրում: Վերջին մեկ օրում հայտնաբերված հիվանդներից 3 103-ի մոտ հիվանդությունն ընթանում է ախտանիշներով: Նրանցից 62-ը Չինաստան Է ժամանել արտասահմանից: Երկրում երկրորդ օրը շարունակ ավելանում Է վարակման նոր դեպքերի թիվը: Նախկինում Չինաստանում կորոնավիրուսով ախտահարվածների թվի առավելագույն աճ Էր արձանագրվել ապրիլի 14-ին՝ 29 411 դեպք: Ինչպես ավելի վաղ հայտնել էր «Արմենպրես»-ը, նոյեմբերի 24-ին Չինաստանում կորոնավիրուս էր հաստատվել ավելի քան 31 հազար մարդու մոտ: Դրանով պայմանավորված՝ երկրի իշխանությունները շարունակում են խստացնել հիվանդության դեմ պայքարի միջոցները: Չինաստանը COVID-19-ի նկատմամբ ,զրոյական հանդուրժողականությանե քաղաքականություն է վարում:

Նոյեմբերի 25-ի երեկոյան ժամերին, 26-ին, 27-ին՝ մինչև կեսօր, շրջանների զգալի մասում սպասվում են տեղումներ: «Արմենպրես»-ի փոխանցմամբ՝ այս մասին հայտնում են Շրջակա միջավայրի նախարարության Հիդրոօդերևութաբանության և մոնիթորինգի կենտրոնից, նշելով, որ լեռնային շրջաններում տեղումները լինելու են թաց ձյան տեսքով: Առանձին շրջաններում սպասվում է նաև մառախուղ: Օդի ջերմաստիճանը նոյեմբերի 26-ի ցերեկը կնվազի 5-7 աստիճանով:

Ֆուտբոլի աշխարհի 22-րդ առաջնությունում մեկնարկում են խմբային փուլի երկրորդ տուրի հանդիպումները: «Արմենպրես»-ի հաղորդմամբ` մրցումային հերթական օրը կկայանա 4 հանդիպում: Երևանի ժամանակով 14:00-ին կկայանա B խմբի Ուելս-Իրան հանդիպումը, այնուհետ` 17:00-ին կմեկնարկի A խմբի Կատար-Սենեգալ հանդիպումը: 20:00-ին միմյանց դեմ կմրցեն A խմբում ընդգրկված Նիդերլանդները և Էկվադորը: 23:00-ին էլ կկայանա Անգլիա-ԱՄՆ խաղը: A խմբի առաջատարները Էկվադորն ու Նիդերլանդներն են, որոնք ունեն 3-ական միավոր: Կատարը և Սենեգալը դեռևս միավոր չունեն: B խմբում առաջին տեղում Անգլիայի ընտրանին է (3 միավոր): 1-ական միավոր ունեն ԱՄՆ-ն և Ուելսը, Իրանը միավոր չի վաստակել:

Երևանի քաղաքապետարանից տեղեկացնում են, որ մայրաքաղաքի ամանորյա տոնական ձևավորման աշխատանքներով պայմանավորված՝ նոյեմբերի 26-ին, ժամը 09:00-ից մինչև նոյեմբերի 27-ի 22:00-ն փակ կլինի Բաղրամյան պողոտան Կասյան փողոցին կապող ուղեանցը:

Անկարայի Ենիմահալլե թաղամասում 15 հարկանի շենք է այրվում: Ինչպես հաղորդում է cnnturk-ը՝ հրդեհը բռնկվել է շենքի տանիքում: Ըստ նախնական տեղեկությունների՝ հրդեհը սկսվել է էլեկտրական վահանակից, 3 բնակիչ ծխահարվել է: Շենքի բնակիչների խոսքերով՝ դեպքի վայր եկած հրշեջները հրդեհաշիջման աշխատանքներ են իրականացնում, բայց կրակը մարել դեռ չի հաջողվում:

Արցախի Հանրապետության ոստիկանությունը հաղորդում է, որ սահմանային խախտումներ են եղել Մարտունու և Մարտակերտի շրջաններում։ «Նոյեմբերի 25-ին՝ ժամը 11:55-ին, Մարտունու շրջանի Կարմիր շուկա համայնքի բնակիչ Ս. Գրգորյանը ոստիկանության շրջանային բաժնի նույն համայնքի բաժանմունք է դիմել այն մասին, որ նույն օրը՝ ժամը 11:30-ի սահմաններում, Թաղավարդ գյուղի վարչական տարածքի «Ծմակեն տակ» կոչվող տեղամասում «Բելառուս» տրակտորով գյուղատնտեսական աշխատանքներ կատարելիս հակառակորդը հրաձգային զինատեսակներից անկանոն կրակոցներ է արձակել, ինչի հետևանքով դադարեցվել են գյուղատնտեսական աշխատանքները: Առավոտյան հրադադարի պահմանման ռեժիմի խախտում է արձանագրվել նաև Մարտակերտի շրջանի Ճանկաթաղ համայնքի ուղղությամբ: Ադրբեջանական բանակի ստորաբաժանումները թիրախավորել են խաղաղ բնակչության ուղղությամբ՝ խոչընդոտել իրականացվող գյուղատնտեսական աշխատանքները: Ոստիկանության շրջանային բաժինները փաստերը հավաքագրել ու տրամադրել են ռուսական խաղաղապահ զորակազմին», - նշվում է հաղորդագրությունում։

Եվրախորհրդարանի որոշումը ռուսական անձնագրերը չճանաչելու վերաբերյալ, որոնք տրվել են Ռուսաստանի նոր տարածաշրջաններում, ինչպես նաև Ղրիմում և Աբխազիայի ու Հարավային Օսիայի տարածքներում, լիովին հակասում են միջազգային իրավունքի հիմնարար սկզբունքներին, Սուխումում լրագրողներին հայտարարել Է Աբխազիայի արտաքին գործերի նախարար Ինալ Արձինբան: Այդ մասին «Արմենպրես»-ը տեղեկանում Է «Ինտերֆաքս» գործակալությունից: Միևնույն ժամանակ նա նշել Է, որ այդ որոշումը «չի ազդում անկախ ինքնիշխան աբխազական պետության ամրապնդման ուղեգծի վրա»: Նրա խոսքով՝ պաշտոնական Սուխումը «եվրոպական կառույցների հետ երկխոսության ընթացքում կձգտի հասնել նախևառաջ Աբխազիայի Հանրապետության քաղաքացու ազգային անձնագրի ճանաչման»: Ավելի վաղ Աբխազիայի ԱԳՆ-ն այդ առիթով իր հայտարարության մեջ Եվրոպական միությանը մեղադրել Էր «Աբխազիայի միջազգային մեկուսացման ուղղությամբ Վրաստանի հակամարդասիրական քաղաքականությանը» մասնակցելու մեջ: «Ընդունված սահմանափակումները Մարդու իրավունքների համընդհանուր հռչակագրի, Քաղաքացիական և քաղաքական իրավունքների մասին միջազգային դաշնագրի և Մարդու իրավունքների եվրոպական կոնվենցիայի կոպիտ խախտում են: Եվրախորհրդարանի որոշումը խոչընդոտում Է Աբխազիայի Հանրապետության քաղաքացիների կողմից ազատ տեղաշարժման անքակտելի իրավունքի իրագործումը», - ընդգծել են Աբխազիայի ԱԳՆ-ում:

Արցախում ռուս խաղաղապահների հրամանատարությունը հաստատել է Մարտակերտի շրջանի Մաղավուզ գյուղում ադրբեջանական կողմից հրադադարի ռեժիմի խախտումը: Միջադեպի պատճառով զոհեր ու վիրավորներ չկան։ Ռուսաստանի ռազմական գերատեսչությունն այլ մանրամասներ չի հայտնում: Պաշտոնական հաղորդագրությունից պարզ չէ նաև, թե որ օրն է Բաքուն խախտել հրադադարի ռեժիմը։

ՀՅԴ Բյուրոյի ներկայացուցիչ Հակոբ Տեր-Խաչատուրյանն Արցախի Հանրապետություն երկօրյա աշխատանքային այցի շրջանակներում հանդիպումներ է ունեցել ՀՅԴ Արցախի ԿԿ-ի, ԱՀ նախագահ Արայիկ Հարությունյանի, ԱՀ Անվտանգության խորհրդի քարտուղար Վիտալի Բալասանյանի, Արցախի պետնախարար Ռուբեն Վարդանյանի հետ։ Քննարկումների առանցքը եւ շեշտադրումն է եղել ՀՅԴ համահայկական կառույցի ողջ ներուժի ներդրումն ի սպաս Արցախի։ Արտաքին ճակատի ուղղությամբ տարվող աշխատանքներում ՀՅԴ Բյուրոյի ներկայացուցիչը ընդգծել է Արցախի ինքնորոշման իրավունքի շեշտադրումը։ Տեր-Խաչատուրյանը հստակ նշել է՝ Հ․Յ․ Դաշնակցության նպատակն է՝ գործադրել ամեն ինչ, մոռացության չմատնելու Արցախի հարցը եւ վերականգնելու ԵԱՀԿ Մինսկի խմբի համանախագահների ձեւաչափը: Իսկ ՀՀ-ի հետ որեւէ համաձայնություն կնքման պարագայում, անհրաժեշտ է Արցախի կարգավիճակը միջազգային օրակարգում պահելու խնդրի շեշտադրումը: Ացախի հարցը մնում է այժմեական է եւ լուծման կարոտ։ Պետք է բացառել ուժի կիրառումը եւ վերակենդանացնել բոլոր այն ձեւաչափերը, որոնք կնպաստեն հարցի լուծմանը։ Հստակ է նաեւ ներքին ճակատում ՀՅԴ դիրքորոշումը։ Արցախի շահերի պաշտպանության համար պետք է լինի համահայկական համախմբվածություն։ Արցախի ժողովուրդը հոկտեմբերի 30-ի հանրահավաքով արտահայտել է իր կամքը, սակայն իշխանություններն էլ պետք է պնդեն, որ ամեն գնով բացառելու են Արցախի՝ Ադրբեջանի կազմում հայտնվելը եւ աշխատելու են վերականգնել ներազգային միասնությունը։ ՀՅԴ Բյուրոյի ներկայացուցիչը ողջունել է Ռուբեն Վարդանյանի պետնախարարի՝ պաշտոնում նշանակվելը եւ հույս ունել, որ նոր մոտեցումներով եւ ուժերի համախմբմամբ կարելի կլինի լծվել նաեւ ներքին ճակատի խնդիրները լուծելուն։ Տեր-Խաչատուրյանը նշել է, որ ոչ միայն ՀՅԴ Արցախի կենտրոնական կոմիտեությունն է իր աշխույժ մասնակցությունը բերում Արցախի քաղաքական կյանքին: ՀՅԴ աշխարհասփյուռ շրջանները որդեգրել են գյուղական համայնքների եւ գյուղատնտեսության զարգացման, ինչպես նաեւ ազատամարտիկների ընտանիքների օժանդակության մի շարք ծրագրեր: ՀՕՄ-ի միջոցով ՀՅԴ մեծ ընտանիքն իր օժանդակությունն է ցուցաբերել տեղահանված ընտանիքներին, հաստատվել է «Արեւային Արցախ» ծրագիրը, որի շնորհիվ ՀՕՄ-ի միոցներով արեւային ջրատաքացուցիչներ է տեղադրվում գյուղական համայնքներում: ՀՕՄ-ը շարունակում է իր մանկապարտեզների ցանցի հովանավորությունը: Արցախում այժմ գործում են նաեւ ՀՄԸՄ-ի սկաուտական կառույց եւ Համազգային Մշակութային Միության գրասենյակ: Արցախի Հանրապետության ներկայացուցիչները բարձր են գնահատել ՀՅԴ Արցախի ու համահայկական կառույցի դերն ու ներդրումը: