Հենց զգացի՝ անդորր է քաղաքական առումով, որոշեցի բիզնեսով զբաղվեմ․ Նաիրի Սարգսյան

Այս տարվա հունվարի 26-ին Նիկոլ Փաշինյանի հրամանով պաշտոնից ազատվեց վարչապետի օգնական Նաիրի Սարգսյանը։ Հեղափոխությունից հետո Սարգսյանների ընտանիքը Նիկոլ Փաշինյանի գլխավոր հենարաններից էր՝ երկվորյակ եղբայրներից մեկը վարչապետին էր ուղեկցում ամենուր՝ օգնականի կարգավիճակում, մյուս եղբայրն ԱԺ պատգամավոր էր և նախընտրական փուլերում էր մեծ ծառայություններ մատուցում՝ կոորդինացնելով ձայներ բերելու գործընթացը, իսկ հայրը՝ Զարեհ Սարգսյանը, ստվերային աջակիցներից էր և կառավարման գործընթացներում լուրջ դերակատարում ուներ այս տարիներին, գրում է «Hraparak.am»-ը։

Օգնական Նաիրի Սարգսյանի անակնկալ ազատումը որևէ կերպ չբացատրվեց, թեև մամուլում տեղեկություններ շրջանառվեցին, որ նա շուտով Կանադայում դեսպան է նշանակվելու, հետո գրվեց, թե նրա ազատումն առնչվում է դեռ 2021 թվականի նոյեմբերից ԱԱԾ-ում քննվող «զրահաբաճկոնների» քրեական գործին։

«Մեզ ևս նման տեղեկություններ են հասել, ուստի կապվեցինք Նաիրի Սարգսյանի հետ՝ լսելու նրա մեկնաբանությունը, թե ինչու է ազատվել պաշտոնից, ինչով է զբաղվում հիմա։  Նաիրի Սարգսյանն ասաց, որ  գտնվում է Դուբայում, ավելի ուշ Տիկ-տոկում տեսանյութ տեղադրեց, թե ինչպես է ծովում լողում, հանգստանում։ Մեզ հետ զրույցում ասաց, որ մտադիր է բիզնեսով զբաղվել ու Դուբայ հենց այդ գործերով է մեկնել։ 

«Իմ ազատման պատճառների վերաբերյալ ինչ գրվել է մամուլում, բոլորը սուտ է, տարբեր հորինված բաներ են, մարդկանց երևակայության արդյունք է։ Ես ո՛չ դեսպան եմ ուզում գնալ, ո՛չ էլ որևէ այլ պաշտոնի։ Առհասարակ, պետական պաշտոն չեմ ուզում ստանձնել։ Նախորդ չորս տարիներին, որ աշխատել եմ, բավականին ծանր է եղել։ Արդեն վաղուց որոշում ունեի, որ մասնավոր ոլորտում բիզնեսով զբաղվեմ։ 

Խառը ժամանակ, բարդ շրջանում, երբ պատերազմ էր, քովիդ և այլն, ճիշտ չէր լինի իմ դուրս գալը աշխատանքից։ Դրա համար հենց զգացի՝ ամեն ինչ նորմալ է, անդորր է՝ քաղաքական առումով, ընտրություններն անցել են, որոշեցի, որ պետք է բիզնեսով զբաղվեմ։ Հիմա նաև նմանատիպ հանդիպումների համար եմ եկել էստեղ»։

-Բայց տեղեկություններ կան, թե Նիկոլ Փաշինյանին տեղեկացրել են, որ Դուք և Ձեր եղբայրը՝ Հայկ Սարգսյանը, ինչ-որ ֆինանսական չարաշահումներ եք թույլ տվել, դուք վստահեցրել եք Փաշինյանին, որ նման բան չկա, հետո նրան փաստեր են ներկայացրել, որից հետո տհաճ խոսակցություն եք ունեցել, նա զայրացել է և Ձեզ ազատել աշխատանքից։

-Ես որևէ չարաշահման հետ, բնականաբար, կապ չունեմ, նմանատիպ հոդված է եղել ինտերնետում, որ իբր զրահաբաճկոնների հայտնի թեմայում ես մասնակցություն ունեմ, ինչ-որ քրեական գործեր կան և այլն։

Հավաստիացնում եմ, որ ես բացարձակապես որևէ կապ չունեմ որևէ բրոնեժիլետի հետ, առաջին անգամ ես դրա մասին իմացել եմ էդ հոդվածից ու, բնականաբար, որևէ չարաշահման հետ ես կապ չունեմ։ Իսկ եթե տեսականորեն նայենք, որ դա իրականություն է, ինձ ոչ թե վարչապետը կազատեր օգնականի պաշտոնից, այլ ուղղակի ինձ կդատեին, ինչպես, օրինակ, վարչապետի բարեկամներից մեկին դատեցին, ով որ ինչ-որ օրենքի խախտում էր թույլ տվել։ Ավելի շուտ՝ ոչ թե դատեցին, այլ քրեական գործ հարուցվեց, չգիտեմ՝ դատվե՞ց էդ մարդը, թե՞ չէ։

-Իսկ Նիկոլ Փաշինյանի հետ այդ թեմայով խոսակցություն եղե՞լ է, քանզի Դուք հիմա որքան էլ ասեք՝ հոգնել էիք, դրա համար ազատվեցիք, դա արժանահավատ չի թվում։ Ենթադրաբար, ինչ-որ խնդիր եղել է, և որ ասում եք՝ Ձեզ կդատեին, եթե նման բան լիներ, ապա հնարավոր է Նիկոլ Փաշինյանը բավարարվել է պաշտոնից ազատելով՝ Ձեր նախկին մտերմությունը հաշվի առնելով։

-Ասեմ, որ վարչապետի հետ չի եղել խոսակցություն իմ՝ ենթադրյալ չարաշահումների վերաբերյալ, որովհետև տենց բան ուղղակի չի կարա լինի։ Ինձ բոլոր ճանաչող մարդիկ էդ թեման ուղղակի չեն էլ քննարկում, որովհետև դա ուղղակի աբսուրդ ա։ Առհասարակ, չարաշահումները կամ կոռուպցիոն ցանկացած մեխանիզմ, որը պետական բյուջեին կամ երկրի շահերին դեմ ա, ես դա համարում եմ դավաճանություն։ Իսկ պատերազմի օրերին եթե տենց բան լինի, դա կրկնակի դավաճանություն ա։ Էնպես որ, չի քննարկվում էդ հարցը»։