Հայ-ադրբեջանական խաղաղության պայմանագիրը կստորագրվի Թուրքիայո՞ւմ. Թբիլիսիում եռակողմ հանդիպում է

Թուրքիայից հետո Վրաստանում են տարածաշրջանային համագործակցության եզրեր փնտրում Երևանը, Թբիլիսին և Բաքուն: Տեսակետներով են փոխանակվել Հայաստանի, Վրաստանի և Ադրբեջանի փոխարտգործնախարարները, ինչպես Անթալիայում պայմանավորվել էին նրանց ղեկավարները: Թբիլիսիում եռակողմ բանակցություններին զուգահեռ Բաքուն տևական դադարից հետո նորից վերհիշել է, այսպես կոչված, «Զանգեզուրի միջանցքը»: Այն բանից հետո, երբ Փաշինյանն ասաց, որ հանելու է Սահմանադրությունից հղումը Անկախության հռչակագրին և Մինսկի խումբը լուծարելու մասին դիմումը կստորագրի խաղաղության համաձայնագրի հետ միասին, Ադրբեջանի արտգործնախարարը խոսեց Երևանից Բաքվի նոր ակնկալիքի մասին՝ իրենք անարգել մուտք են ուզում Նախիջևան: