Գերեվարված կամ անհետ կորած զինծառայողների վերաբերյալ տվյալների ցրվածություն կա, պետք է մեկ միասնական բազա ստեղծվի. Արա Զոհրաբյան

Հետպատերազմյան ժամանակահատվածում առնչվելով մեր հայրենակիցների խնդիրներին՝ հասկացանք, որ ռազմական գործողությունների հետևանքով տուժած անձանց որոշ խնդիրներ չեն լուծվում կամ լուծվում են դանդաղ, և նախաձեռնեցինք մեկ ուղեցույց՝ ռազմական գործողությունների հետևանքով տուժած անձանց հնարավոր խնդիրների և լուծման ուղիների վերաբերյալ: tert.am-ի փոխանցմամբ, այս մասին այսօր լրագրողների հետ հանդիպման ժամանակ նշեց Փաստաբանների պալատի նախագահ Արա Զոհրաբյանը:

Խոսելով խնդիրներին մասին՝ Զոհրաբյանը նշեց, որ այս ընթացում արձանագրել են անհայտ բացակայող ճանաչելու դատական գործընթացի բարդություններ: Նախկինում քաղաքացուն անհայտ բացակայող ճանաչելու համար օրենսդրորեն առնվազն մեկ տարի պետք է նրա գտնվելու վայրի մասին տեղեկություն չլիներ, սակայն հիմա Քաղաքացիական Օրենսգիրքը փոփոխության է ենթարկվել և սահմանվել է երեք ամիս.

«Հաշվի առնելով պատերազմի փաստը՝ եթե զինծառայողը մասնակցել է պատերազմական գործողությունների և չի վերադարձել, օրենսդրությունը թույլ է տալիս, որ ընտանիքի անդամը դիմի դատարան, և նա ճանաչվի անհայտ բացակայող, սակայն խնդիրը նրանում է, որ սահմանված չեն ժամկետներ, թե դատարանը ի՞նչ ժամկետներում պետք է վճիռ կայացնի, և հաշվի առնելով դատարանների ծանրաբեռնվածությունը` դա խնդիր է: Մենք առաջարկում ենք նաև որոշակի ժամկետներ սահմանել, պետական մարմնին թույլ տալու, որ դիմի դատարան, օրինակ՝ Պաշտպանության նախարարությունը դիմի դատարան և ասի, որ այս խումբ անձանց ճանաչել անհայտ բացակայող»:

Մյուս խնդիրը, ըստ նրա, անհետ բացակայող ճանաչելու նպատակով դիմումների համար սահմանված պետական տուրքի վճարն է, իրենց առաջարկությամբ, եթե անհայտ բացակայողը պատերազմի մասնակից է, ապա քաղաքացին պետք է պետտուրքի վճարումից ազատվի:

 «Մյուս խնդիրը զինծառայողների, գերեվարված կամ անհետ կորած զինծառայողների վերաբերյալ տվյալների ցրվածությունն է: Այս պահին կան մի քանի մարմիններ, որ զբաղվում են այդ հարցերով, օրինակ՝ ստեղծվել է հատուկ հանձնաժողով, որը գերեվարման կամ անհետ կորածների վերաբերյալ տեղեկություններ է հաղորդում, կա գերատեսչական հանձնաժողով, որը ստեղծվել է մինչ պատերազմը և կան քննչական մարմինները, բայց չկա միասնական մեկ բազա, որ այդ տեղեկությունները հավաքվեն և ուղղորդվեն: Մենք կարծում ենք, որ պետք է ստեղծվի մեկ պետական իրավասու մարմին, որին կտրվի լիազորություն այդ  ինֆորմացիաները հավաքելու, և իրավունք կունենա նախաքննական գաղտնիք պարունակող տեղեկությունից վերցնի և մեկ միասնական բազա ստեղծի»,- ընդգծեց նա:

Նախագծով առաջարկվում է նաև, որ այն զինծառայողը, որը հաշմանդամություն չի ստացել, սակայն պատերազմի պատճառով առողջական խնդիրներ ունի, նրանց ներառել որոշակի ծրագրերում: Աջակցություն տրամադրել նաև գերեվարված անձանց ընտանիքների: