Անոմալ շոգ՝ Ֆրանսիայում. բուժաշխատողներն ահազանգում են մահացության հնարավոր աճի մասին

Ֆրանսիացի բուժաշխատողները լուրջ մտավախություն են հայտնում երկարատև անոմալ շոգի ֆոնին մահացության հնարավոր աճի վերաբերյալ։ Այս մասին հայտնել է Ֆրանսիայի հիվանդանոցների ֆեդերացիայի (FHF) գլխավոր պատվիրակ Զեյնաբ Ռիեն։

«Մենք մտավախություն ունենք, որ հաշվի առնելով շոգի տևողությունը և պայմանները տներում ու հաստատություններում, մարդկանց առողջական վիճակը զգալիորեն կվատթարանա, - ասել է նա France Inter ռադիոկայանի եթերում։ - Մենք իսկապես վախենում ենք, որ, ամենայն հավանականությամբ, կբախվենք ավելցուկային մահացության»։ Ռիեն հավելել է, որ մարդիկ ավելի հաճախ են շտապօգնություն կանչում։

Ֆրանսիայում անոմալ շոգ է դիտվում հունիսի 17-ից։ Այդ կապակցությամբ դադարեցվել է շուրջ 10 հազար ուսումնական հաստատությունների աշխատանքը կամ փոխվել է դրանց ժամանակացույցը, սահմանափակվել է երկաթուղային տրանսպորտի երթևեկությունը։ Անոմալ շոգի պատճառով առնվազն հինգ մարդ է մահացել, ևս առնվազն 42 մարդ խեղդվել է ջրամբարներում, ինչը նույնպես կապում են շոգ եղանակի հետևանքների հետ։

Le Parisien թերթը՝ հղում անելով Ջերմաստիճանի չափումների ազգային գործակալության տվյալներին, հայտնել է, որ հունիսի 24-ը Ֆրանսիայում օդերևութաբանական դիտարկումների պատմության մեջ ամենաշոգ օրն է դարձել։ Այդ օրը հանրապետության ողջ տարածքում միջին ջերմաստիճանը կազմել է 30 աստիճան։ Météo-France ազգային օդերևութաբանական ծառայության տվյալներով՝ ավելի քան 50 դեպարտամենտներում գրանցվել է 40 աստիճանի ցուցանիշ։