Լրահոս

Արտակարգ իրավիճակների նախարարությունը տեղեկացնում է, որ ՀՀ տարածքում կան փակ ավտոճանապարհներ։ Փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները: Սյունիքի մարզի Գորիս, Սիսիան, Քաջարան, Գեղարքունիքի մարզի Ճամբարակ, Մարտունի, Տավուշի մարզի Դիլիջան քաղաքներում, Դիլիջանի ոլորաններում և Արագածոտնի մարզի Ծաղկահովիտի տարածաշրջանում տեղում է ձյուն։ Վարդենյաց լեռնանցքում, Սարավան-«Զանգեր» հատվածում, Տավուշի մարզի Դիլիջանի ոլորաններում, Նոյեմբերյան քաղաքում, Սյունիքի մարզի բարձրադիր գոտիներում և Գորիս քաղաքում մառախուղ է։ Լարսի մասին Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։

Ադրբեջանցիներն Արցախը Հայաստանին կապող ճանապարհը փակել են՝ որպես հիմք ներկայացնելով Արցախում ընդերքի շահագործման հետ կապված հնարածին խնդիրները։ Այս մասին գրել է «Պատիվ ունեմ» խմբակցության քարտուղար Տիգրան Աբրահամյանը։ «Պատահական չէ, որ օրեր առաջ, ադրբեջանական քարոզչական ալիքներում հանքի բեռնատարների լուսանկարներ հայտնվեցին, որոնցում նաև նշվում էր, որ հայերն ապօրինի շահագործում են հանքերը։ Ի դեպ, Ադրբեջանը նաև կեղծ տեղեկություններ էր շրջանառում իրանական դիվերսիոն խմբերի Արցախում գտնվելու վերաբերյալ։ Ինչևէ, Ադրբեջանն օգտագործում է հայաստանյան իշխանությունների հնչեցրած հայտարարությունները, որոնք կասկածի տակ են դնում Արցախի ինքնորոշման իրավունքը և այն դիտարկում Ադրբեջանի տարածքային ամբողջականության շրջանակներում։ Մյուս կողմից՝ նոյեմբերի 9-ի եռակողմ հայտարարության պայմաններում, Ադրբեջանը փորձում է միջանցքի նկատմամբ հսկողության հիմքեր գտնել, որպեսզի ռուսական կողմի հետ շփումներում ցույց տա, թե ստիպված է գնում նման քայլի։ Իրականում Հայաստանն Արցախին կապող միջանցքը փակելու որևէ հիմք Ադրբեջանը չունի, դա լավագույնս գիտակցում են նաև Մոսկվայում։ Դե Հայաստանի իշխանությունների հանգամանքը անիմաստ է քննարկել, նրանք թեմայի հետ կապված անտարբեր են և այն համարում են բացառապես ռուսների խնդիրը։

«Հրապարակ» թերթը գրում է. «Վայոց Ձորի մարզպետ Արարատ Գրիգորյանն իր գերակտիվությամբ կարող է մրցել, թերեւս, միայն Երեւանի փոխքաղաքապետ Տիգրան Ավինյանի հետ։ Նա էլ է Ավինյանի նման սիրում գնալ միջոցառումների ու հաղորդագրություններ տարածել, որոնց հետ ոչ միայն ինքը, այլ նաեւ Վայոց Ձորի մարզը կապ չունի, բայց դրանք հենց մարզպետարանի պաշտոնական էջով են տարածվում։ Դեկտեմբերի 1-ին տեղի ունեցավ օլիմպիական խաղերի եռակի չեմպիոն, լեգենդար մարզիկ Ալբերտ Ազարյանի կիսանդրու բացման արարողությունը։ Կիսանդրին կանգնեցվել է Գագիկ Ծառուկյանի կողմից՝ նրա ֆինանսներով ու նախաձեռնությամբ։ Արարատ Գրիգորյանը եկել, մասնակցել է բացման արարողությանը, դեռ մի բան էլ մարզպետարանի էջում այդ մասին հաղորդագրություն ու լուսանկարներ տարածել՝ այն դեպքում, երբ ադրբեջանցիները մինչ այժմ իր մարզի տարածքում են, իսկ սեպտեմբերի 13-14-ին էլ ռմբակոծում էին Ջերմուկ քաղաքը։ Արարատ Գրիգորյանի մասնակցությունն ու դրա մասին հաղորդագրությունը գուցե արդարացված լինեին, եթե Ալբերտ Ազարյանը Վայոց Ձորի հետ որեւէ կապ ունենար․ Ազարյանը ծնվել է 1929 թվականին՝ Ղարաքիլիսայում (Վանաձորում), եւ ոչ մի կապ չունի Վայոց Ձորի հետ»:

Ճանապարհը բացելու նպատակով ադրբեջանական կողմի հետ Արցախում տեղակայված ռուսական խաղաղապահ զորակազմի պատասխանատուները շարունակում են ակտիվ բանակցություններ վարել: Այս մասին հայտնում է Արցախի Տեղեկտվական շտաբը: «Ավելի քան երկու ժամ է շարունակում է փակ մնալ Արցախ-Հայաստան միակ մայրուղին: Ինչպես ավելի վաղ տեղեկացրել էինք, Շուշիի հատվածում քաղաքացիական հագուստներով մի խումբ ադրբեջանցիներ բնապահպանական կեղծ պատճառաբանությամբ փակել են մայրուղին: Ճանապարհը բացելու նպատակով ադրբեջանական կողմի հետ Արցախում տեղակայված ռուսական խաղաղապահ զորակազմի պատասխանատուները շարունակում են ակտիվ բանակցություններ վարել: Խնդրի հնարավորինս արագ կարգավորման ուղղությամբ Արցախի լիազոր պետական մարմինները օպերատիվ կապի մեջ են խաղաղապահ զորակազմի հրամանատարության հետ: Իրավիճակի փոփոխության դեպքում հանրությանը պատշաճ կտեղեկացվի»,- նշված է հայտարարության մեջ:

«Հայլուրը» ստացել է Պաշտպանության նախարարություն ուղարկված գրավոր հարցման պատասխանը՝ որքա՞ն աշխատավարձ են ստանում դիրքապահները և արդյոք ճի՞շտ են այն պնդումները, թե նրանց աշխատավարձերը կրճատվել են: Պաշտպանության նախարարության պատասխանն անորոշ է, գերատեսչությունը հայտնում է, որ զինծառայողների աշխատավարձերը վերջին 4 տարիներին միայն բարձրացել են: Բայց «Խաչակիրներ» կազմակերպությունը շարունակում է ահազանգել՝ իրենց դիրքապահների աշխատավարձերը կրճատվել են գրեթե 50 տոկոսով:

Թուրքական լրատվամիջոցները պաշտոնական Դամասկոսին են մեղադրում Անկարայի հետ բանակցություններ սկսելու գործընթացը ձգձգելու համար: Պաշտոնական Մոսկվան է ուզում միջնորդ դառնալ մեղմացնելու թուրք-սիրիական ավելի քան 1 տասնամյակ ձգվող թշնամանքը: Կրեմլից հայտնել են, որ փորձում են կազմակերպել կողմերի հանդիպումը, բայց հստակ պայմանավորվածություն դեռ չկա:

«Մինչև հաջորդ տարվա գարուն պետք է սպասել, դրանից հետո պարզ կլինի, թե երբ հրադարար կհաստատվի ուկրաինական ճակատում»: Այս մասին հայտարարել է Թուրքիայի արտգործնախարարը: «Մենք պետք է համոզենք մեր եվրոպացի որոշ գործընկերներին, որ նորից նստեն բանակցությունների սեղանի շուրջ»,- ասել է Մևլութ Չավուշօղլուն: Նրա խոսքով՝ Ուկրաինան որոշ առաջընթաց ունի ռազմաճակատում, բայց ռուսական զինուժն էլ թիրախավորում է կենսական նշանակություն ունեցող օբյեկտները:

Ադրբեջանը, Ստեփանակերտ-Գորիս մայրուղին փակելով, փորձում է առաջ տանել իր հայատյաց քաղաքականությունը, կաթվածահար անել Արցախը, ինչը հարված է նաև ռուս խաղաղապահ առաքելությանը: «Արմենպրես»-ի հետ զրույցում նման համոզմունք հայտնեց Արցախի Հանրապետության արտաքին գործերի նախարարի պաշտոնակատար Դավիթ Բաբյանը՝ անդրադառնալով ադրբեջանական հերթական սադրանքին: Նա նկատեց, որ ադրբեջանցիների նմանատիպ սադրանքներից զարմանալ պետք չէ: «Նրանցից ամեն ինչ սպասելի է: Փորձում են ահաբեկել, փորձում են համառորեն առաջ տանել իրենց հայատյաց քաղաքականությունը, կաթվածահար անել Արցախը, խախտում են միջազգային նորմերը, սա հարված է ռուս խաղաղապահ առաքելությանը, հարված է ամեն ինչին»,-շեշտեց արտգործնախարարը: Նրա խոսքով՝ այս ամենից միջազգային հանրությունը շատ հստակ հետևություններ պետք է անի: «Միջազգային հանրությունը պետք է ճնշի Ադրբեջանին, այլ տարբերակ չկա: Դատապարտելն անպայման պետք է, բայց քայլեր պետք է ձեռնարկեն, միայն խոսքերով սահմանափակվելը ճիշտ չէ»,-ասաց Բաբայանը՝ հավելելով, որ հիմա իսկապես դրա ժամանակը չէ: Բաբայանը վստահեցրեց, որ Արցախը կանգուն է: Իրավիճակը կարգավորելու ուղղությամբ արվում են բոլոր քայլերը: Ռուս խաղաղապահները տեղյակ են միջադեպի մասին, բոլոր քայլերը ձեռնարկվում են, որ վերականգնվի կապը:

Ակնհայտ է, որ քիչ առաջ Արցախում Գորիս-Ստեփանակերտ ճանապարհի Շուշի-Քարին տակ հատվածն Ադրբեջանի մի խումբ քաղաքացիների կողմից փակելն ադրբեջանական իշխանությունների կազմակերպածն է` ինչ ձևական պատճառ էլ բերեն, ֆեյսբուքյան իր էջում գրել է Մարդու իրավունքների նախկին պաշտպան Արման Թաթոյանը։ «Ադրբեջանը վերջին օրերին քաղաքականություն էր տանում, որով հիմքեր էին ստեղծում նման հանցավոր արարքների համար: Սա ուղղված է խաղաղ բնակչության ահաբեկմանը, մեկուսացմանը, որն ադրբեջանական իշխանությունների իրական դեմքն է, նրանց իրական մտադրությունները», - գրել է Թաթոյանը։

Ադրբեջանի կողմից Ստեփանակերտ-Գորիս մայրուղու փակումը լրջագույն կերպով ոտնահարում է միջազգային մարդասիրական իրավունքները և նպատակ ունեն հումանիտար աղետ ստեղծել Արցախում։ Այս մասին հաղորդագրություն է տարածել Արցախի առողջապահության նախարարությունը: «Ստեղծված իրավիճակում անհնարին է դարձել բժշկական պարագաների և դեղամիջոցների տեղափոխումը Արցախ: Ավելին, այս պարագայում լուրջ խնդիր է դարձել առողջական ծանր խնդիրներ ունեցող հիվանդների Արցախից ՀՀ տեղափոխումը: Կոչ ենք անում միջազգային հանրությանը, մարդասիրական բոլոր կազմակերպությունների­ն անհապաղ կերպով պատշաճ քայլեր ձեռնարկել ստեղծված վիճակը կարգավորելու և վերահաս հումանիտար աղետը կանխելու համար»։

«Քիչ առաջ Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել են Ստեփանակերտ-Գորիս մայրուղին»,- այսօր կեսօրին հայտնել է Արցախի տեղեկատվական շտաբը: Ըստ հաղորդագրության՝ միջադեպի մասին «պատշաճ տեղեկացվել է» ռուսական խաղաղապահ զորակազմի հրամանատարությունը, ձեռնարկում են բոլոր հնարավոր միջոցները իրավիճակի կարգավորելու համար: «Ակնհայտ է, որ Ադրբեջանն այս քայլով դիմում է սադրանքի Հայաստանի և Արցախի միջև ցամաքային կապի ընդհատման և խաղաղ բնակչությանը հոգեբանական ահաբեկչության ենթարկելու համար»,- նշված է Արցախի տեղեկատվական շտաբի տեքստում: Արցախի պետնախարարի խորհրդական Արտակ Բեգլարյանը տելեգրամյան իր ալիքում գրել է․ «Ակնհայտ է, որ պատրվակը հեռու է, դրա տակ փորձ է արվում խզել Արցախի և Հայաստանի եզակի կապը։ Այդ կապը, եռակողմ պայմանավորվածությունների համաձայն, ապահովում է ռուսական խաղաղապահ զորախումբը։ Այսպիսով, Ադրբեջանի գործողություններն ուղղված են ուղղակիորեն Արցախի 120 հազար բնակչության և խաղաղապահների դեմ։ Հուսով եմ, որ ավտոսերվիսը շուտով կվերականգնվի»։ «Արցախ բժշկական պարագաների և դեղամիջոցների տեղափոխումը անհնարին է դարձել»,- հայտնել է Արցախի առողջապահության նախարարությունը: Ըստ պաշտոնական հաղորդագրության՝ լուրջ խնդիր է դարձել առողջական ծանր խնդիրներ ունեցող հիվանդների Արցախից ՀՀ տեղափոխումը: Արցախի առողջապահության նախարարությունը կոչ է արել միջազգային հանրությանը, մարդասիրական բոլոր կազմակերպություններին՝ «անհապաղ կերպով պատշաճ քայլեր ձեռնարկել ստեղծված վիճակը կարգավորելու և վերահաս հումանիտար աղետը կանխելու համար»։

Հայաստան տանող միակ ճանապարհին Ադրբեջանը նպատակ ունի հասնել հումանիտար աղետի և էթնիկ զտումների Լեռնային Ղարաբաղում։ Այս մասին Թվիթերում գրառում է արել Արցախի պետնախարարի խորհրդական Արտակ Բեգլարյանը։

Ֆուտբոլի աշխարհի առաջնության 1/8 եզրափակիչ փուլի առաջին խաղերը կկայանան դեկտեմբերի 3-ին: «Արմենպրես»-ի փոխանցմամբ՝ դեկտեմբերի 3-ին կկայանա երկու հանդիպում: Երևանի ժամանակով ժամը 19:00-ին կմեկնարկի Նիդերլանդներ-ԱՄՆ խաղը: Հանդիպումը կանցկացվի «Խալիֆա» միջազգային մարզադաշտում: Երևանի ժամանակով ժամը 23:00-ին միմյանց դեմ կմրցեն Արգենտինայի և Ավստրալիայի հավաքականները: Այս հանդիպումն էլ կանցկացվի «Ահմեդ բին Ալի» մարզադաշտում: Նիդերլանդներ-ԱՄՆ և Արգենտինա-Ավստրալիա դիմակայությունների հաղթողները ¼ եզրափակիչում կմրցեն միմյանց դեմ:

Իրանի Բանդար Խամիր նավահանգստային քաղաքում դեկտեմբերի 3-ին թեթև երկրաշարժ է տեղի ունեցել: «Արմենպրես»-ի փոխանցմամբ՝ այս մասին հայտնում է IRNA-ն: 4 բալ ուժգնությամբ երկրաշարժը սկսվել է տեղական ժամանակով 00:20-ին: Այն զգացվել է նավահանգստային քաղաքի որոշ հատվածներում: Թեհրանի համալսարանի երկրաֆիզիկայի ինստիտուտը ստորգետնյա ցնցումների խորությունը գնահատել է 10 կմ (6.2 մղոն) և հայտնել, որ էպիկենտրոնը գտնվել է Բանդար Խամիրից 25 կմ հեռավորության վրա: Երկրաշարժի հետևանքով տուժածների մասին առայժմ ոչինչ չի հաղորդվում։

Օրերս ոստիկանության Եղեգնաձորի բաժնի ծառայողները բացահայտել են ապօրինի թմրաշրջանառության 3 դեպք: Մասնավորապես, նոյեմբերի 12-ին անչափահասների գործերով ծառայողները տեղեկություն են ստացել, որ Եղեգնաձոր քաղաքի Խնձորի այգի թաղամասի 27-ամյա մի բնակիչ իր «Մերսեդես» մակնիշի մեքենայում պահում է թմրամիջոց: Նույն օրը նա իր թաղամասում հայտնաբերվեց, ձերբակալվեց ու տեղափոխվեց բաժին, իսկ նրա մեքենան՝ բաժնի պահպանվող հատուկ տարածք: Ավտոմեքենայի պահոցում կար մարիխուանայի նմանվող զանգվածով փաթեթ, որն, ըստ ձերբակալվածի, ձեռք էր բերել տելեգրամի միջոցով: Ապօրինի թմրաշրջանառության հերթական դեպքը բացահայտվեց նոյեմբերի 17-ին՝ ոստիկանության Եղեգնաձորի բաժնի պարեկապահակային ծառայության դասակի կողմից: Նրանք Արենի բնակավայրում ձերբակալեցին ու բաժին տեղափոխեցին Արմավիրի մարզի Տանձուտ գյուղի 35 և 37-ամյա երկու բնակչի: Վերջինիս վարած «Զիլ» բեռնատարի սրահում մարիխուանայի նմանվող զանգվածով փաթեթ և նույն զանգվածով լցված ծխախոտի այրված գլանակ կար: Երրորդ բացահայտումն արձանագրվեց նոյեմբերի 20-ին: Եղեգնաձորի բաժնի քրեական հետախուզության ծառայողները Արենի բնակավայրում ձերբակալել և բաժին են տեղափոխել մայրաքաղաքի Շերամի փողոցի 35-ամյա մի բնակչի: Վերջինիս վարած «Ֆորդում» ևս մարիխուանայի նմանվող զանգված կար՝ պոլիէթիլենային փաթեթով: Հանգամանքները պարզվում են: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Իսպանիայի Կոնգրեսի պատգամավոր Ջոն Ինյարիտուն այցելել է Գեղարքունիքի մարզի Սոթ բնակավայր, և տեսաուղերձով ցույց տալով Ադրբեջանի սեպտեմբերին կատարած վայրագությունների հետևանքները, կոչով դիմել միջազգային հանրությանը՝ ստիպել Ադրբեջանին հարգել խաղաղության օրակարգը, հեռանալ Հայաստանի այն տարածքներից, որոնք օկուպացրել է: «Արմենպրես»-ի փոխանցմամբ՝ Ինյարիտուն տեսաուղերձը հրապարակել է «Թվիթեր»-ի իր էջում: «Մենք գտնվում ենք Հայաստանում, Սոթքում: Այս ամբողջ տարածքը ռմբակոծվել է Ադրբեջանի կողմից սեպտեմբերին՝ հանգեցնելով քաղաքացիական զոհերի և հարյուրավոր տների ավերման։ Մենք խնդրում ենք միջազգային հանրությանը գործել և ստիպել Ադրբեջանին հարգել խաղաղության օրակարգը, միջազգային մարդասիրական իրավունքը և հեռանալ հայկական հողից»,-շեշտել է իսպանացի պատգամավորը:

Արտակարգ իրավիճակների նախարարությունը տեղեկացնում է, որ ՀՀ տարածքում կան փակ ավտոճանապարհներ։ Փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները: Սյունիքի մարզի Գորիս, Սիսիան, Քաջարան, Գեղարքունիքի մարզի Ճամբարակ, Տավուշի մարզի Դիլիջան քաղաքներում, Դիլիջանի ոլորաններում և Արագածոտնի մարզի Ծաղկահովիտի տարածաշրջանում տեղում է ձյուն։ Վարդենյաց լեռնանցքում, Սարավան-«Զանգեր» հատվածում, Տավուշի մարզի Դիլիջանի ոլորաններում, Նոյեմբերյան քաղաքում, Սյունիքի մարզի բարձրադիր գոտիներում և Գորիս քաղաքում մառախուղ է։ Լարսի մասին Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։

ՀՀ նախագահ Վահագն Խաչատուրյանի դեկտեմբերի 2-ի հրամանագրերով Հակակոռուպցիոն, Սյունիքի եւ Գեղարքունիքի առաջին ատյանի դատարաններում 3 նոր դատավորներ են նշանակվել: Խաչիկ Ղազարյանը նշանակվել է հակակոռուպցիոն դատարանի կոռուպցիոն հանցագործությունների վերաբերյալ վարույթներով մասնագիտացմամբ դատավոր: Գեղարքունիքի մարզի առաջին ատյանի ընդհանուր իրավասության դատարանի դատավոր Սերոբ Մանուկյանը նշանակվել է Գեղարքունիքի մարզի առաջին ատյանի ընդհանուր իրավասության դատարանի նախագահ՝ երեք տարի ժամկետով: Արմավիրի մարզի առաջին ատյանի ընդհանուր իրավասության դատարանի դատավոր Վահե Ջիվանյանը նշանակվել է Սյունիքի մարզի առաջին ատյանի ընդհանուր իրավասության դատարանի դատավոր:

Օրերս ոստիկանության Վաղարշապատի բաժնում հաղորդում ստացվեց, որ Արմավիրի մարզի Ոսկեհատ գյուղում գողություն է կատարվել: «Էջմիածին» ջրօգտագործողների ընկերությանը պատկանող տրանսֆորմատորից մեկի յուղն էին գողացել: Բաժնի քրեական հետախույզները մի քանի օր տևած միջոցառումների արդյունքում պարզեցին, որ գողությունը կատարել են չորս հոգով։ Բոլորն էլ Էջմիածին քաղաքի բնակիչներ էին: Նոյեմբերի 29-ին նրանք հայտնաբերվեցին ու ձերբակալվեցին, ապա ներկայացվեցին Վաղարշապատի քննչական բաժին, որտեղ տվեցին խոստովանական ցուցմունք: Պարզվեց, որ բացի վերոնշյալ դեպքից նրանք խմբով տասնյակից ավելի գողություններ էին արել Արմավիրի մարզի այլ բնակավայրերում ևս՝ Արտիմետում, Առատաշենում, Ակնալիճում, Եղեգնուտում և այլուր: Գողացել էին նույն ընկերությանը պատկանող տրանսֆորմատորների յուղեր, մալուխներ, շարժիչներ և ջրամատակարարման համար կարևոր նշանակության այլ դետալներ: Դեպքերի հանգամանքները նախաքննությամբ պարզվում են: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Ադրբեջանը դիմում է սադրանքի՝ Հայաստանի և Արցախի միջև ցամաքային կապի ընդհատման և խաղաղ բնակչությանը հոգեբանական ահաբեկչության ենթարկելու համար, ֆեյսբուքյան էջում գրել է պատգամավոր Թագուհի Թովմասյանը՝ անդրադառնալով այսօրվա միջադեպին։ «Քիչ առաջ Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել են Ստեփանակերտ-Գորիս մայրուղին: Ակնհայտ է, որ Ադրբեջանն այս քայլով դիմում է սադրանքի Հայաստանի և Արցախի միջև ցամաքային կապի ընդհատման և խաղաղ բնակչությանը հոգեբանական ահաբեկչության ենթարկելու համար: Միջադեպի վերաբերյալ պատշաճ տեղեկացված է Արցախում տեղակայված ռուսական խաղաղապահ զորակազմի հրամանատարությունը: Արցախի լիազոր պետական մարմինները ձեռնարկում են բոլոր հնարավոր միջոցները իրավիճակի կարգավորման ուղղությամբ», - գրել է նա: