Լրահոս

Ամենքիս հոգիներն այս օրերին անհանգիստ են Լաչինի միջանցքի արգելափակման պատճառով Արցախում ստեղծված հումանիտար ճգնաժամով։ Թող Ամենակալի օգնականությամբ մեր տարածաշրջանը վերագտնի իր խաղաղությունը, վերականգնվի Հայաստանի տարածքային ամբողջականությունը և միջազգային հանրության կողմից ճանաչվի Արցախի մեր ժողովրդի՝ հայրենի հողում ապահով, ազատ ու անկախ ապրելու իրավունքը։ Ինչպես տեղեկանում է Մայր Աթոռի տարածած հաղորդագրությունից, ՌԴ պատվո շքանշանի հանձնման արարողության ժամանակ ունեցած իր ելույթում ասել է Ն․Ս․Օ․Տ․Տ․ Գարեգին Բ Ամենայն Հայոց կաթողիկոսը:

ՀՀ ՔԿ Արարատի մարզային քննչական վարչության Մասիսի քննչական բաժնում քննվող քրեական վարույթի շրջանակներում պարզվում են ՀՀ-ում գործող կուսակցություններից մեկի հավաքին մասնակցելու նպատակով անձանց առերևույթ նյութապես շահագրգռելու դեպքի հանգամանքները:

Ադրբեջանի նախագահ Իլհամ Ալիևը շարունակում է միջազգային հանրության առջև ստել Լաչինի միջանցքի՝ արդեն մեկ ամիս շարունակվող արգելափակման վերաբերյալ։ Այս մասին «Թվիթեր»-ի իր էջում գրել է ԱՄՆ կոնգրեսական Ֆրենկ Փալոնը՝ անդրադառնալով Ադրբեջանի ղեկավարի՝ օրերս լրատվամիջոցներին տված հարցազրույցում արած հայտարարություններին։

Ազատ ընտրությո՞ւն, թե՞ նոր ընտրակեղծարարություն: Թերևս այդպիսի հարց է առաջանում, երբ ծանոթանում ես Ազգային ժողովի «Քաղաքացիական պայմանագիր» խմբակցության պատգամավորներ Հովիկ Աղազարյանի և Հակոբ Ասլանյանի ներկայացրած օրենքի նախագծին: Մասնավորապես, նրանք առաջարկում են փոփոխություն կատարել Ընտրական օրենսգրքում և ամրագրել, որ քվեախցիկը պետք է տեղադրվի այնպես, որ ընտրողը քվեարկության պահին լինի թիկունքով դեպի հանձնաժողովը:

«Ժողովուրդ» օրաթերթի տեղեկությունների համաձայն՝ Հակակոռուպցիոն կոմիտեի նախագահ Սասուն Խաչատրյանն առաջիկայում կազմակերպելու է Բարձրագույն դատական խորհրդի նախկին նախագահներ Ռուբեն Վարդազարյանի և Գագիկ Ջհանգիրյանի առերեսումը Հակակոռուպցիոն կոմիտեում:

Հանրապետության տարածքում hունվարի 12-ին Լոռիի, Տավուշի, Սյունիքի և Արցախի առանձին հատվածներում սպասվում է թույլ ձյուն։ Հանրապետության մյուս շրջաններում հունվարի 12-ին, 13-16-ը ողջ հանրապետությունում սպասվում է առանց տեղումների եղանակ: Քամին՝ հյուսիսարևելյան` 2-5 մ/վ: Օդի ջերմաստիճանը հունվարի 14-16-ի ցերեկային ժամերին աստիճանաբար կբարձրանա 8-10 աստիճանով, Արարատյան դաշտում և նրա նախալեռնային շրջաննեում՝ 2-4 աստիճանով:

«Բարսելոնայի» գլխավոր մարզիչ Չավին մեկնաբանել է Կրիշտիանու Ռոնալդուի՝ «Ալ-Նասր» տեղափոխությունը։ «Կրիշտիանու Ռոնալդուն խաղալու է Սաուդյան Արաբիայի առաջնությունո՞ւմ։ Նա պայմանագիր է կնքել Սաուդյան Արաբիայի լավագույն ակումբներից մեկի հետ, բայց դա մարտահրավեր է։ Ես խաղացել եմ նրանց թիմերից մի քանիսի դեմ, երբ մարզում էի «Ալ-Սադդը»։ Սաուդյան Արաբիայի առաջնությունը շատ մրցունակ է, բայց Կրիշտիանու Ռոնալդուն մրցունակ խաղացող է։ Վստահ եմ, որ նա լավ հանդես կգա այս թիմում»,- Չավիի խոսքերն է փոխանցում Marca-ն։

ԱՀ ՆԳՆ արտակարգ իրավիճակների պետական ծառայությունը տեղեկացնում է, որ Արցախի Հանրապետության տարածքում կան դժվարանցանելի ճանապարհներ։

«Ճանապարհային դեպարտամենտ» հիմնադրամը տեղեկացնում է, որ հունվարի 12-ին՝ ժամը 09։00-ի դրությամբ, Նաիրիի, Աշտարակի, Ապարանի, Արագածի, Սպիտակի, Վանաձորի, Ստեփանավանի, Տաշիրի, Իջևանի, Նոյեմբերյանի, Հրազդանի, Թալինի, Անիի և Արթիկի տարածաշրջաններում ձյուն է տեղում։

Գորիսում արցախցիները «սառը» վերաբերմունք են ցույց տվել ՔՊ-ական պատգամավորներին. հանդիպումը հարթ չի անցել:

ԱՄՆ-ում Կալիֆորնիայի 108-ամյա բնակչուհին հերթական տարեդարձն է նշել և բացահայտել իր երկարակեցության պատճառները։ Այս մասին հայտնում է The San Diego Union-Tribune-ը։ Ջիննի Բերգմանը ծնվել է Նյու Ջերսիում 1914 թվականի դեկտեմբերի 30-ին և աշխատել է հոր դիզայներական ստուդիայում, մինչև իր ամուսնությունը՝ 1930-ականների կեսերին: Հետո նա ամուսնացել է Թոմ անունով ավիակոնստրուկտորի հետ, և զույգը սկսել է հաճախակի տեղից տեղ տեղափոխվել։ Մասնավորապես, երեք երեխա ունեցող զույգը Ավստրալիայում ապրել է ընդհանուր առմամբ 14 տարի։ Այժմ կինն ապրում է Սան Դիեգոյի տարեցների պանսիոնատներից մեկում։ Ծնունդը շնորհավորելու էին գնացել հարազատներն ու ընկերները։ Երկար կյանքի բանալին Բերգմանը անվանել է ճիշտ մտավոր վերաբերմունքը և անցյալի վրա չանդրադառնալու կարողությունը: «Երկարակեցության գաղտնիքը ամեն օր վայելելն է և ապագայում ինչ-որ բանի սպասելը: Եվ այնուամենայնիվ, դուք միշտ պետք է լինեք երիտասարդ, հետաքրքիր մարդկանց մեջ»,- ասել է 108-ամյա կինը։

«Հայաստանի էլեկտրական ցանցեր» փակ բաժնետիրական ընկերությունը տեղեկացնում է, որ հունվարի 12-ին պլանային նորոգման աշխատանքներ իրականացնելու նպատակով ժամանակավորապես կդադարեցվի հետևյալ հասցեների էլեկտրամատակարարումը` Երևան քաղաք՝ 10:00-16:00 Մաշտոցի պող. 48 շենք, Մոսկովյան փ. 8 շենքի բնակիչ-բաժանորդներ և հարակից ոչ բնակիչ-բաժանորդներ, Սարկավագի փ. 106/1, 106/2, 151/2, 171 շենքեր, Սարկավագի 6-րդ նրբ. 1-21 առանձնատներ, Թբիլիսյան խճ․ 33, 33/2, 35/1, 35/2, 35/20, 37 շենքեր, 11:00-14:00 Վարդաշեն 1փ. 2-50; 2փ. 1-22 սեփական տներ, Վարդաշեն 5փ. նրբ. 1-37 սեփական տներ, 11:00-17:00 Նոր Նորք 7-րդ զանգ.՝ Ավետիսյան փ. 8, 13, 28, 29, 30 շենքեր, թիվ 21 մսուր-մանկապարտեզ և հարակից ոչ բնակիչ-բաժանորդներ, Արարատի մարզի՝ 10:30-13:30 Ոսկետափ, Փոքր Վեդի, Տափերական, Արալեզ և Նոր Կյանք գյուղեր, Այգավան գյուղ մասնակի, 11:00-15:00 Մրգավետ գյուղ մասնակի, 11:00-16:00 Բերդիկ գյուղ մասնակի, Վայոց Ձորի մարզի՝ 11:00-15:00 Եղեգնաձոր քաղաք՝ Միկոյան և Սևակի փողոցներ մասնակի, Կոտայքի մարզի՝ 11։00-16։00 Հրազդան քաղաք՝ Միկրո թաղամաս 1-50 շենքեր և հարակից ոչ բնակիչ-բաժանորդներ, 13:00-14:00 Բալահովիտ գյուղ մասնակի:

2022 թ.-ին Իսրայել այցելած զբոսաշրջիկների ամենամեծ հոսքը եղել է Միացյալ Նահանգներից, Ֆրանսիայից, Մեծ Բրիտանիայից, Ռուսաստանից և Գերմանիայից: Այդ մասին «Արմենպրես»-ը տեղեկանում Է «Интерфакс» գործակալությունից: «2022 թ. ամբողջ աշխարհից Իսրայել է այցելել 2,67 միլիոն զբոսաշրջիկ, ինչը 41 %-ով պակաս Է 2019 թ.-ի ռեկորդային ցուցանիշից, սակայն վկայում է զբոսաշրջային հոսքի վերականգնման բարձր տեմպերի մասին», - հաղորդել Է երկրի զբոսաշրջության նախարարության մամուլի ծառայությունը։ Ամենաշատ զբոսաշրջիկները ժամանել են ԱՄՆ-ից՝ 793,7 հազար, ինչը 16 %-ով պակաս Է 2019 թ.-ի համեմատությամբ։ Երկրորդ տեղում Ֆրանսիան է, որտեղից ժամանել է 231,5 հազար զբոսաշրջիկ, ինչը մեկ երրորդով պակաս է 2019 թ. ցուցանիշի համեմատությամբ: Երրորդ դիրքն զբաղեցրել է Մեծ Բրիտանիան (174,6 հազար զբոսաշրջիկ. տարբերությունը կազմել Է 23%)։ Չորրորդ հորիզոնականում Ռուսաստանն Է, որտեղից ժամանել է 160 հազար զբոսաշրջիկ։ Սա 52%-ով պակաս Է ռեկորդային 2019 թ.-ի ցուցանիշից: Հինգերորդ տեղն զբաղեցրել է Գերմանիան (141 հազար զբոսաշրջիկ): «2022 թ.-ը եղել է վերականգնման տարի համավարակով պայմանավորված ճգնաժամից հետո: Միտումը դրական է, և 2019 թ.-ի զբոսաշրջության ռեկորդը գերազանցելն իրատեսական նպատակ է: Մեր խնդիրն Է փորձել նվազեցնել խոչընդոտները և ավելի արագ գործարկել ենթակառուցվածքների զարգացմանն ուղղված նախագծերը՝ Իսրայելի զբոսաշրջության ողջ ներուժն օգտագործելու համար», - Իսրայելի զբոսաշրջության նախարար Խայիմ Կացի խոսքը մեջբերում Է գերատեսչության մամուլի ծառայությունը։ 2019 թ.-ին Իսրայել է այցելել 4,55 միլիոն օտարերկրյա զբոսաշրջիկ, այդ թվում՝ գրեթե 320 հազար ռուսաստանցի։ Այդ ժամանակ Ռուսաստանը զբոսաշրջային հոսքի ծավալով երրորդ տեղն էր զբաղեցրել՝ ԱՄՆ-ից և Ֆրանսիայից հետո։

Թուրքիայի նախագահ Ռեջեփ Թայիփ Էրդողանը հայտարարել է, որ Անկարան աջակցում է վիրավորների համար մարդասիրական միջանցքի բացմանը Ուկրաինայում տիրող իրավիճակի հետ կապված, և պատրաստ է հոգալ նրանց բուժումը։ «Արմենպրես»-ի հաղորդմամբ այս մասին հայտնում է «ՌԻԱ Նովոստի»-ն: «Մենք վիրավորներին բերել ենք Սիրիայից, Ադրբեջանից և Լիբիայից, բուժել նրանց մեր հիվանդանոցներում և նորից հետ ուղարկել: Դա մեր մարդասիրական պարտքն է, մենք կշարունակենք աշխատել այս ուղղությամբ»,- ասել է Էրդողանը՝ ելույթ ունենալով Անկարայում մարդու իրավունքների միջազգային համաժողովի մասնակիցների առջև։ Ավելի վաղ Թուրքիայի օմբուդսմեն Շերեֆ Մալքոչը հայտարարել էր, որ Թուրքիան հույս ունի Ռուսաստանի Դաշնության և Ուկրաինայի միջև հումանիտար միջանցք կբացվի՝ Անկարայի միջնորդությամբ՝ օգնելու համար երեխաներին, կանանց և ուկրաինական ճգնաժամից տուժածներին:

Ռուսական որոշ աղբյուրներ հայտնում են, թե մի քանի շաբաթ տևած մարտերից հետո Բախմուտի շրջանի Սոլեդար քաղաքն անցել է ռուսական կողմին: Դաշնության նախագահի խոսնակը, սակայն, հորդորել է չշտապել, սպասել պաշտոնական տեղեկության: Ոչ պաշտոնական է նաև ամերիկյան տեղեկությունը, թե Կիևին կասետային զինամթերք են մատակարարում Թուրքիան և Պակիստանը: Հնարավո՞ր է սա վերածվի համաշխարհային պատերազմի:

Շատ կանայք դադարեցնում են կրծքով կերակրումը ֆիզիոլոգիական պատճառներով, ոմանք տեղեկատվության պակասի, իսկ ոմանք էլ պարզաբանում չստացած միֆերի: Այն, որ առաջին երեք օրվա ընթացքում կրծքագեղձում կարող է կաթ չլինել, նորմ է։ Երեխայի կուշտ լինելուն կարելի է հետևել միզապարկի և աղիքների դատարկման քանակով։ Նորածինը պետք է օրական այնքան անգամ դատարկի միզապարկը, ինչքան օրական է՝ առաջին օրը 1 անգամ, երկրորդ օրը 2 անգամ և այլն։ Կյանքի առաջին օրերին երեխաները շատ սննդի կարիք չունեն, քանի որ նրանց փոքր ստամոքսը հեշտությամբ է լցվում։ Խորհուրդ չի տրվում առաջին 4-6 շաբաթվա ընթացքում արհեստական ​​սնուցում ավելացնել։ Բայց եթե ծնողները որոշեն լրացնել երեխային, ապա պետք է պահպանել բժշկի կողմից առաջարկված սննդի քանակությունը։ Փոքր ստամոքսի և արագ նյութափոխանակության պատճառով երեխաները շատ հաճախ են ուտում կյանքի առաջին օրերին: Նրանց համար նորմալ է օրական 7-16 անգամ կրծքով կերակրումը։ Շատ կանայք անհանգստանում են, որ իրենց կաթը բավարար չէ: Իրականում, դա հազվադեպ է տեղի ունենում: Կանանց մեծամասնությունը կրծքի կաթ է արտադրում երեխայի կարիքից մեկ երրորդով ավելի: Հաղորդակցման բոլոր միջոցներից երեխաները գիտեն միայն լաց լինելը: Այսպիսով, նրանք հայտնում են, որ տաք են, սառը, վախեցած, թաց, ուզում են խմել, ուտել, քնել կամ պարզապես լինել մայրիկի մոտ: Եթե ​​երեխան հաճախ է լացում, դա չի նշանակում, որ նա միշտ ուզում է ուտել։ Կանանց մեծամասնությունը չի կարողանում տարբերել քաղցած երեխայի լացը մնացածից, այստեղից էլ բարձր անհանգստությունն ու կաթի պակասի մասին կեղծ եզրակացությունները։ Ցանկացած լացի համար խորհուրդ չի տրվում կուրծք առաջարկել։ Երբ երեխան ուզում է ուտել, նա գլուխը շարժում է կողքից այն կողմ՝ փնտրելով կուրծքը և ձգելով շուրթերը։ Մնացած դեպքերում արժե երեխային վերցնել ձեր գրկում, ստուգել՝ արդյոք երեխան չոր է, տաք է, ցավո՞ւմ է նրա ստամոքսը, բավարարված են արդյոք այլ կարիքներ։ Կյանքի առաջին երկու-չորս շաբաթվա ընթացքում խորհուրդ չի տրվում օգտագործել շիշ և ծծակ, քանի որ այն կարող է խանգարել կրծքով կերակրմանը: Ավելի լավ է երեխային առաջարկել կուրծքը, այնպես որ նա կխթանի կաթի արտադրությունը: Երբ երեխան սկսել է ավելի շատ քաշ ունենալ, քան ծնվելիս, և սովորել է խմել կրծքից ստացված ամբողջ կաթը, կարելի է նրան ծծակ առաջարկել: Ուսումնասիրությունները ցույց են տվել, որ դա չի հանգեցնում արհեստական ​​կամ խառը կերակրման անցման: Իսկ եթե քնած ժամանակ օգտագործում եք ծծակ, դա նվազեցնում է մանկական հանկարծակի մահվան համախտանիշի վտանգը։ Կրծքով կերակրող մոր սնունդը պետք է բազմազան լինի. խորհուրդ է տրվում սահմանափակել միայն ալկոհոլը և կոֆեինը։ Կրծքով կերակրող կանանց խորհուրդ է տրվել խուսափել կաթնամթերքից, ընդ որում երեխաների 14%-ի մոտ կասկածվում է կովի կաթի նկատմամբ ալերգիա: Ծնողները հաճախ ալերգիան շփոթում են միլիայի հետ: Միլիան սպիտակավուն ցան է ճակատին, քթին և այտերին։ Դրանք տարածվում են յուրաքանչյուր երկրորդ նորածնի մոտ։ Միլիան ինքնուրույն անհետանում է 3-4 շաբաթվա ընթացքում և բուժում չի պահանջում: Սթրեսի դեպքում կաթը կարող է անհետանալ ադրենալինի արտազատման պատճառով։ Այն ճնշում է օքսիտոցինի և պրոլակտինի արտադրությունը, որոնք պատասխանատու են լակտացիայի համար: Սուր սթրեսից հետո լակտացիան արագ վերականգնվում է։ Այսպիսով, մասնագետները խորհուրդ են տալիս պարբերաբար կշռել երեխային՝ հասկանալու համար նրա աճի աստիճանական ընթացքը և խուսափել հավատալ վերոնշյալ միֆերին։

Հունվարի 11-ին՝ ժամը 18։38-ին, Ճգնաժամային կառավարման ազգային կենտրոն ահազանգ է ստացվել, որ Երևան-Աբովյան ավտոճանապարհին տեղի է ունեցել ՃՏՊ։ Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը: Պարզվել է, որ բախվել են «Renault Logan», «Toyota Camry» և «Porsche» մակնիշների ավտոմեքենաները․ «Renault Logan» մակնիշի ավտոմեքենան շրջվել է։ Մինչ փրկարարների կանչի վայր հասնելը՝ «Renault Logan» մակնիշի ավտոմեքենայի ուղևորներից մեկը ավտոմեքենայից դուրս է բերվել տեղի ուժերով, իսկ մյուս ուղևորը՝ փրկարարների օգնությամբ․ վերջիններս հոսպիտալացվել են «Միքայելյան վիրաբուժության ինստիտուտ»։ Փրկարարները հոսանքազրկել են «Toyota Camry» մակնիշի ավտոմեքենան և ուղղել «Renault Logan» մակնիշի ավտոմեքենան։

Արարատ-Արմենիան նորեկ ունի ՖՈՒՏԲՈԼ, Հայաստան, Բարձրագույն խումբ11.01.23 / 21:27 «Արարատ-Արմենիա» ակումբին է միացել 24-ամյա նիգերիացի հարձակվող Թաոֆիք Ջիբրիլը: Այս մասին տեղեկացնում է երևանյան ակումբի մամուլի ծառայությունը։ Նշվում է, որ նիգերիացի ֆուտբոլիստն իր կարիերայի մեկնարկում հանդես է եկել պորտուգալական «Վիլա Ռեալ», «Պորտիմոնենշե 23», «Վալադարեշ Գայա» ակումբներում, ինչից հետո տեղափոխվել է սլովակական «Ժիլինա»։ 1,5 տարի «Ժիլինայում» անցկացնելուց հետո ֆուտբոլիստը անցած փետրվարին վարձավճարով` մինչ մրցաշրջանի ավարտը տեղափոխվեց «Զլատե Մորավցե»: Սլովակիայի Ֆորտունա լիգայում Ջիբրիլն ընդհանուր առմամբ մասնակցել է 55 հանդիպման ու դարձել 7 գոլի հեղինակ։

Ռուսաստանի Դաշնության մարդու իրավունքների հանձնակատար Տատյանա Մոսկալկովան Անկարայում կրկին կհանդիպի Ուկրաինայի օմբուդսմեն Դմիտրի Լուբինեցի հետ։ «Արմենպրես»-ի հաղորդմամբ այս մասին «ՌԻԱ Նովոստի»-ին հայտնել է Տատյանա Մոսկալկովան: «Այո, մենք դեռևս ունենք մի շարք հարցեր, որոնք պահանջում են քննարկում և հստակեցում կոնկրետ դեպքերի և ցուցակների վերաբերյալ», - ասել է Մոսկալկովան՝ պատասխանելով այն հարցին, թե արդյոք դեռևս նախատեսված է հանդիպում Լյուբինեցի հետ Անկարայում: Բացի այդ, ըստ ՌԴ օմբուդսմենի, դեռևս հնարավոր է հանդիպում՝ Թուրքիայի օմբուդսմենի հետ փոխգործակցության աշխատանքների հետ կապված ։ «Դրանք կրթության և միգրացիայի խնդիրներն են»,- հավելել է Մոսկալկովան։

ՀՀ ԿԳՄՍ նախարարության աջակցությամբ և «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտի նախաձեռնությամբ 2022 թվականի ավարտին հրատարակվել է Ներսես Շնորհալու «Մատենագիրք Հայոց» ԻԲ հատորը: Ինչպես «Արմենպրես»-ին հայտնում են ԿԳՄՍ նախարարությունից, հրատարակությունը նվիրված է միջնադարի մեծ մտածող, բանաստեղծ, աստվածաբան ու շարականագիր Ներսես Շնորհալու մահվան 850-րդ տարելիցին: Հատորն ընդգրկում է Շնորհալու արձակ գործերը՝ թղթերը, սուրբգրային մեկնությունները, ինչպես նաև նրա խմբագրած թարգմանությունները՝ ամբողջացնելով մատենագրի թողած ողջ գրավոր ժառանգությունը: Այս հատորի նպատակը Ներսես Շնորհալու դարավոր ժառանգության ամբողջացումն ու հանրայնացումն է: Ներսես Շնորհալու մահվան 850-րդ տարելիցն ընդգրկվել է նաև ՅՈՒՆԵՍԿՕ-ի «Հռչակավոր մարդկանց և կարևոր իրադարձությունների 2022-2023 թվականների օրացույցում»: