«Երկրպագում եմ Փաշինյանին եւ փաշինյանականներին». Վեդիի բնակիչ Սուսաննան պատմում է, թե ոնց է առաջարկել Գարիկ Սարգսյանին իրեն «օգտագործել»՝ չի օգտվել

«Ես Վեդիի ամենահամարձակ մարդն եմ, որ ոչ մեկից չի վախենում… Այդքան պայքարեցինք ինչի՞ համար, որ էլի նախկիններն իրենց գործն  անե՞ն: 30 տարի կերան, թալանեցին:

Վրես սարքել են, խմելու ջուրը 200 դրամ է իմ ծախսը, բռնել են 38 հազար նստացրել են ինձ վրա: Նույնը լույսն է անում, նույնը ջուրն է անում: Ես քաշքշոցների մեջ եմ: Իրենք գիտեն, որ ես սերժական չեմ ու չեմ էլ լինի, հասկացա՞ք»,- այսպես «Aravot.am»-ի հետ զրույցում Վեդիի բնակիչ Սուսաննա Եղյանը հավատացնում էր, որ նախկին իշխանություններն իր ջրի, լույսի վարձը ավելի են գրում հաշվին, որովհետև «սերժական չի»: 

Երբ լրագրողը հիշեցրել է՝ հիմա Սերժ Սարգսյանը իշխանության չի երկրում, իշխանությունները փոխվել են՝ նա պատասխանել է. 

«Սերժ Սարգսյանը տակից իրա խաղերը տալիս է, ես գերազանց գիտեմ»: 

Նրա խոսքով, իր ջրի ցուցմունքը ոչ թե անձամբ Սերժ Սարգսյանն է փոխում, այլ՝ «հին գելերն են հլը գործում».

«30 տարի երկիրն էլ թալանեցին, բանակն էլ, ժողովրդին էլ, կրթոլորտն էլ հիմքից քանդեցին ու մեր տարածքի բնակչության վրա էլ տեղ-տեղ ճնշումներ են բանեցնում»:

Սուսաննա Եղյանը ՔՊ մոլի աջակիցներից է ու Վեդիի ՏԻՄ ընտրություններին էլ սատարում էր Գարիկ Սարգսյանին: Թե ինչու, որ արժանիքների համար, այսպես բացատրել է. 

«Մարդուն կատարյալ կարելի է համարել, եթե նա ազնիվ է, իսկ ես Նիկոլ Փաշինյանին մանկուց եմ ճանաչում: Այն ժամանակ նայում էի իրեն, ափսոսում էի, որովհետև ես իմ վրա կրել եմ այդ դաժանությունները: 

Նայում էի, ասում էի՝ ես հլը մեծ եմ, ինքը ջահել է, էդ երեխին КГБ-ի պադվալներում քացիներով ծեծել են: Ես ծանոթներ ունեի վերին ատյաններից, որոնք ուրախացած պատմում էին, թե ինչ տանջանքներ են տվել էդ մարդուն: 

Իսկ ես միշտ սրտով ցավացել եմ ու մտածել եմ, որ գլուխը կուտեն, քի՞չ մարդու գլուխ կերան: Այս երկրում խելացի, ազնիվ մարդը ապրել չի կարողացել: Ես ինքս պայքարել եմ է՛լ ֆեյսբուքով, է՛լ որտեղ առիթ է եղել, բոլոր տեղերում: Իմ նպատակն է, որ իմ տանջված ժողովուրդը մարդավայել, արժանավայել ապրի: Հրաշքով որ հեղափոխությունը հաղթանակեց, իմ համար սենսացիա էր, ես ուղղակի զարմացա: 

Ես իմ ուղուց չեմ շեղվում, մեռնելուց էլ այս ձևով կմեռնեմ: Ես թոշակով, նպաստովս ապրում եմ և գոհ եմ իմ կառավարությունից: Ես գիտեմ, որ մեր պետությունը առաջնայինը պետք է ծախսեր կատարի բանակի վրա, որը 30 տարի թալանվել է: 

Երկրպագում եմ Փաշինյանին և փաշինյանականներին, Սուրեն Պապիկյանին, Արտյոմ Թումանյանին և մեր այն քաջազուն տղաները, որ արտասահմանի իրենց խաղաղ կյանքը, բիզնեսը թողեցին, ուղիղ կրակի բերան գնացին»: