Երեխեքին վերցրեցինք, հազիվ դուրս եկանք. Մեծամորում հրդեհվել է գերությունից վերադարձածի վարձակալած բնակարանը

«News.am»-ը գրում է.

«Այսօր առավոտյան հրդեհ է բռնկվել գերությունից վերադարձած Խաչիկ Գրիգորյանի վարձակալած բնակարանում: Խաչիկի կինը` Իրինան ասում է.

«Առավոտ ժամը 7-ն էր, ամուսինս շատ բարձր ձայնով  գոռաց` Իռա, հելի, երեխեքին հավաքի, ձեզ գցեք դուրս, ասում եմ` ինչ է եղել` պատասխանում է, որ տունը կպել է: Հետո երեխեքին վերցրեցինք, հազիվ դուրս եկանք, ամբողջ տունը համարյա վառվեց, կրակը տարածվել էր, գույք տեխնիկա, մեր շորերը, ամբողջովին վառվել է, հյուրասենյակում նորածին  երեխայիս շորերն են միայն մնացել»,- պատմել է կինը:

Իրինան 3 մանկահասակ երեխաների հետ այժմ քրոջ բնակարանում է գտնվում, չգիտի` ուր են գնալու հետագայում:

«Փոքրս 30 օրական է դեռ, քրոջս տանն ենք, իրենք էլ վարձով են, չենք կարող երկար մնալ, չգիտեմ` ինչ ենք անելու, մի բան գիտեմ, որ փողոցում ենք մնացել: Լավ է, գոնե երեխաներիս հետ ամեն ինչ նորմալ է, միայն տղաս է սթրես տարել, անընդհատ ասում է` տունը կրակի մեջ էր, վառվում էր»,- ասել է նա:

Կնոջ խոսքով` հրդեհը բռնկվել է պատշգամբից, սակայն ամենայն հավանականությամբ հին  էլեկտրական լարերի պատճառով է եղել, կարճ միացումից ամենայն հավանականությամբ»: