Ասթման չունի սահմաններ. այն կարող է հանդիպել ցանկացած տարիքի, սեռի և սոցիալական կարգավիճակ ունեցող անձի մոտ

Մեր երկրում ևս հազարավոր մարդիկ ապրում են ասթմայով, նրանցից շատերը՝ երեխաներ։ Բրոնխիալ ասթման կարելի է վերահսկել։

Ի՞նչ է ասթման

Շնչուղիների քրոնիկական բորբոքային հիվանդություն է, որն առաջացնում է պարբերաբար կրկնվող՝

շնչահեղձություն,

կրծքավանդակում սեղմոցի զգացում,

խզզոցներ,

հազ, հատկապես` գիշերը կամ վաղ առավոտյան։

Ասթմայի հիմնական հրահրող գործոններն են՝

ալերգենները (տան փոշի, բորբոսասնկեր և այլ),

վիրուսային շնչառական վարակները,

ծխախոտի ծուխը, ներառյալ` պասիվ ծխի ազդեցությունը,

օդի աղտոտվածությունը և արդյունաբերական գոլորշիները,

սառը կամ չոր օդը,

ֆիզիկական ակտիվությունը (մասնավորապես` ցուրտ պայմաններում),

սթրեսը կամ ուժեղ էմոցիաները,

որոշ դեղեր:

Ասթմայի բուժման բացակայության դեպքում կարող են առաջանալ մի շարք բարդություններ՝

հաճախակի սրացումներ՝ շտապ բուժօգնության կամ հոսպիտալացման անհրաժեշտություն,

քնի խանգարում և հոգնածություն,

բուժման երկարատև բացակայության դեպքում՝ շնչուղիների անշրջելի փոփոխություններ,

ծայրահեղ դեպքերում՝ կյանքին վտանգ սպառնացող ասթմատիկ վիճակ:

Ինչպե՞ս վերահսկել ասթման

Բազմաթիվ մարդիկ կարողանում են ապրել ակտիվ և լիարժեք կյանքով, երբ`

տեղեկացված են հիվանդության մասին,

բժշկի օգնությամբ ստեղծել են ասթմայի կառավարման անհատական պլան,

դեղորայքն օգտագործում են կանոնավոր, նույնիսկ, եթե չկան ակնհայտ ախտանշաններ,

վարում են առողջ կենսակերպ` չեն ծխում, զբաղվում են չափավոր ֆիզիկական ակտիվությամբ, վերահսկում են ալերգիաները:

Արմինե Հակոբյան
Ալերգոլոգիայի գծով ԱՆ խորհրդատու