Արմեն Սարգսյանի երկքաղաքացիության փաստը թաքցնելու վերաբերյալ քրգործ հարուցելու որոշումը եւ գործի նյութերը ՀՔԾ-ում են

Հանրապետության նախագահ Արմեն Սարգսյանի երկքաղաքացիության փաստը թաքցնելու բողոքի հիման վրա քրեական գործ հարուցելու մասին Դատախազության որոշումը եւ քրեական գործի նյութերը Հատուկ քննչական ծառայությունը ստացել է։ Այս մասին NEWS.am-ի հարցմանն ի պատասխան հայտնեցին Հատուկ քննչական ծառայության մամուլի բաժնից։

Հիշեցնենք, որ 53 փաստաբան հանցագործության մասին հաղորդում էին ներկայացրել ՀՀ գլխավոր դատախազին՝ կապված նախագահ Արմեն Սարգսյանի երկքաղաքացիության փաստը թաքցնելու հետ:

Ըստ հաղորդման՝ Արմեն Սարգսյանը 2003-2012թթ. առնվազն 10 տարվա Միացյալ Թագավորության քաղաքացիություն է ունեցել եւ ՀՀ նախագահ է ընտրվել 02.03.2018թ. այն դեպքում, երբ չի բավարարել վերջին վեց տարում միայն ՀՀ քաղաքացի հանդիսանալու պահանջը: Արմեն Սարգսյանը կարող էր ՀՀ նախագահ ընտրվել միայն, եթե նրա ՄԹ քաղաքացիությունը դադարեցված լիներ մինչեւ 01.03.2012 թվականը (01.03.2018 — 6 տարի):

Նախագահի աշխատակազմի ղեկավարը նախագահի քաղաքացիության մասով հղում է կատարել ՀՀ օրենսդրությամբ նախատեսված տեղեկանքին, որը ՀՀ նախագահի ընտրության գործընթացում ներկայացվել է ՀՀ ԱԺ:

ՀՀ նախագահի ընտրության համար Ա. Սարգսյանին վեց տարում միայն Հայաստանի Հանրապետության քաղաքացի հանդիսանալու մասին տեղեկանքը տրվել է հիմք ընդունելով ՀՀ ոստիկանության անձնագրային եւ վիզաների վարչության բնակչության պետական ռեգիստրում առկա տեղեկատվությունը եւ Արմեն Սարգսյանի կողմից իր դիմումում նշված՝ այլ պետության քաղաքացի չհանդիսանալու վերաբերյալ հայտարարությունը: Այս կապակցությամբ հարկ է նշել նաեւ, որ որեւէ իրավական ակտով սահմանված չէ միայն Հայաստանի Հանրապետության քաղաքացի հանդիսանալը ստուգելու այլ կարգավորումներ:

Դատախազությունը հաղորդումն ուղարկել էր Հատուկ քննչական ծառայություն, սակայն ՀՔԾ-ն մերժել էր քրեական գործի հարուցումը։

Նշենք, որ ՀՀ գլխավոր դատախազությունը բողոքի հիման վրա վերացրել է ՀՔԾ որոշումը եւ հարուցել է քրեական գործ ՀՀ ՔՕ 325 հոդվածի 1-ին մասի (փաստաթղթեր կեղծելը, իրացնելը կամ օգտագործելը) հատկանիշներով: