Արմեն Հարությունյանը մեղադրանքը չի ընդունում, Մովսես Հակոբյանն էլ չի հարցաքննվել. Ինչ պարտականություններ չեն կատարվել. 168.am

Մոտ մեկ շաբաթ առաջ տեղեկություն ստացվեց, որ Դատախազությունը Զինված ուժերի գլխավոր շտաբի նախկին պետ Մովսես Հակոբյանի և ՀՀ զինված ուժերի հրթիռային զորքերի և հրետանու նախկին պետ-վարչության պետ, գեներալ-մայոր Արմեն Հարությունյանի դեմ հայցադիմում է ներկայացրել դատարան և պահանջում է հօգուտ Հայաստանի Հանրապետության բռնագանձել 4 մլրդ 370 մլն 985.000 դրամ։

Մարտի 28-ին 168.am-ը գրավոր հարցում էր ուղարկել ՀՀ գլխավոր դատախազություն՝ հետևյալ հարցադրմամբ՝

– 2025 թվականի մարտի 14-ին ՀՀ զինվորական կենտրոնական դատախազության կողմից հայցադիմում է ներկայացվել ՀՀ հակակոռուպցիոն դատարան՝ ընդդեմ Մովսես Հրանտի Հակոբյանի և Արմեն Սամսոնի Հարությունյանի՝ համապարտությամբ՝ որպես ոչ օրինաչափ վարքագծի արդյունքում պետությանը պատճառված վնասի հատուցում, հօգուտ Հայաստանի Հանրապետության 4 մլրդ 370 մլն 985 հազար դրամ բռնագանձելու մասին:

Կխնդրենք մանրամասնել՝ ինչ գործի շրջանակում է, ի՞նչ է ենթադրում՝ ոչ օրինաչափ վարքագիծը, արդյո՞ք այն ՌԴ-ի հետ զենք-զինամթերքի հետ կապված պայմանագրային հարաբերությունների հետ առնչություն ունի, և կոնկրետ ի՞նչ զինամթերքի մասին է խոսքը:

Մեր հարցադրմանն ի պատասխան՝ ապրիլի 1-ին իր պատասխան գրության մեջ Դատախազությունը հայտնել է.

«Ի պատասխան 2025 թվականի մարտի 28-ի հարցման՝ հայտնում ենք, որ 2025 թվականի հունվարի 24-ին, հսկող դատախազի կողմից որոշում է կայացվել ՀՀ պաշտպանության նախարարի տեղակալ-նյութականատեխնիկական ապահովման դեպարտամենտի պետի պաշտոնը զբաղեցրած Մովսես Հրանտի Հակոբյանի նկատմամբ 2003 թվականի ապրիլի 18-ին ընդունված ՀՀ քրեական օրենսգրքի 315-րդ հոդվածի 2-րդ մասով (համապատասխանում է գործող ՀՀ քրեական օրենսգրքի 446-րդ հոդվածի 2-րդ մասի 2-րդ կետին) նախատեսված առերևույթ հանցանքի կատարման համար հանրային քրեական հետապնդում հարուցելու մասին:

Մ․Հակոբյանի նկատմամբ որպես համակցված խափանման միջոց է կիրառվել՝ բացակայելու արգելք և գրավ՝ 10․000․000 ՀՀ դրամի չափով:

2025 թվականի հունվարի 24-ին հսկող դատախազի կողմից որոշում է կայացվել Արմեն Սամսոնի Հարությունյանի նկատմամբ 2003 թվականի ապրիլի 18-ին ընդունված ՀՀ քրեական օրենսգրքի 376-րդ հոդվածի 2-րդ մասով (համապատասխանում է գործող ՀՀ քրեական օրենսգրքի 550-րդ հոդվածի 2-րդ մասի 2-րդ կետին) քրեական հետապնդում հարուցելու մասին: 24․01․2025 թվականին Արմեն Հարությունյանին մեղադրանք է ներկայացվել, և որպես խափանման միջոց է կիրառվել՝ բացակայելու արգելք:

2025թ. մարտի 27-ին թիվ 58219221 քրեական վարույթի նյութերը մեղադրական եզրակացությամբ ուղարկվել է ՀՀ Երևան քաղաքի առաջին ատյանի ընդհանուր իրավասության դատարան»:

Ըստ մեղադրական եզրակացության՝ Մովսես Հակոբյանին մեղադրանք է առաջադրվել այն բանի համար, որ նա, 2015-2016թթ. զբաղեցնելով ՀՀ պաշտպանության նախարարի տեղակալ-նյութականատեխնիկական ապահովման դեպարտամենտի պետի պաշտոնը, հանդիսանալով պաշտոնատար անձ, ծառայության նկատմամբ անփույթ վերաբերմունքի հետևանքով ոչ պատշաճ է կատարել իր պարտականությունները, որն անզգուշությամբ առաջացրել է ծանր հետևանք՝ առանձնապես խոշոր չափերի գույքային վնաս:

Իսկ գեներալ Արմեն Հարությունյանի նկատմամբ մեղադրանք է առաջադրվել այն բանի համար, որ նա 2017թ. մայիսից զբաղեցնելով ՀՀ զինված ուժերի հրթիռային զորքերի և հրետանու պետ-վարչության պետի պաշտոնը, հանդիսանալով պետ և պաշտոնատար անձ, խախտելով «Հայաստանի Հանրապետության զինված ուժերի ներքին ծառայության կանոնագիրքը հաստատելու մասին» ՀՀ օրենքի պահանջները, իր ծառայողական պարտականությունների կատարման նկատմամբ անբարեխիղճ և անփույթ վերաբերմունքի հետևանքով դրանք ոչ պատշաճ է կատարել, որն անզգուշությամբ առաջացրել է ծանր հետևանքներ:

Նշենք, որ Մովսես Հակոբյանը Հայաստանի Հանրապետության պաշտպանության նախարարի տեղակալ-պաշտպանության նախարարության նյութատեխնիկական ապահովման դեպատամենտի պետ էր նշանակվել 2016թ. մայիսի 20-ին, ազատվել՝ 2016 թվականի հոկտեմբերի 3-ին և նշանակվել ՀՀ ԶՈՒ ԳՇ պետ:

Այսինքն, գեներալ-գնդապետը ՀՀ պաշտպանության նախարարի տեղակալ-պաշտպանության նախարարության նյութատեխնիկական ապահովման դեպատամենտի պետի պաշտոնում մի քանի ամիս է մնացել:

Հավելենք, որ նշված պաշտոնը Մովսես Հակոբյանից առաջ երկար տարիներ զբաղեցրել էր Ալիկ Միրզաբեկյանը և ազատվել 2016 թվականի ապրիլի 26-ին՝ Ապրիլյան պատերազմից հետո և գուցե դրա համատեքստում:

Իսկ 2024 թվականին Դատախազությունը հայտնել էր, որ Միրզաբեկյանն ապօրինի ծագում ունեցող գույքի բռնագանձման գործառույթի շրջանակում, 2024 թվականի սեպտեմբերի 9-ին կնքել է հաշտության համաձայնություն, որով ՀՀ պաշտպանության նախկին փոխնախարար Ալիկ Միրզաբեկյանը և նրան փոխկապակցված անձինք պարտավորվել են հօգուտ Հայաստանի Հանրապետության փոխանցել 200 մլն ՀՀ դրամ (շուրջ 500 հազար ԱՄՆ դոլար):

Նշենք, որ ՊՆ նյութատեխնիկական դեպարտամենտի խնդիրներն են եղել՝

– զինված ուժերը ժամանակակից սպառազինությամբ ու ռազմական տեխնիկայով ապահովելը,

– սպառազինության և ռազմական տեխնիկայի պլանային վերականգնողական աշխատանքների կազմակերպումը և այլն:

Այսինքն, դեպարտամենտի գործառույթը օրենքով և այլ իրավական ակտերով սահմանված կարգով զինված ուժերի համար սպառազինության ու ռազմական տեխնիկայի, պարենային, իրային և այլ ունեցվածքի, ինչպես նաև նյութական պաշարների գնումների կազմակերպումը, ռազմական տեխնիկայի, սպառազինության և այլ նյութական միջոցների կուտակ­ման կազմակերպումն ու և ապահովումն է եղել:

Ինչ վերաբերում է գեներալ Արմեն Հարությունյանին, ապա նա Հայաստանի Հանրապետության զինված ուժերի հրթիռային զորքերի և հրետանու պետ-վարչության պետի պաշտոնից ազատվել էր 2022 թվականի փետրվարի 24-ին:

Նա անցնում էր «հրանոթի արկերի» գործով, և դեռ 2023 թվականին 168.am-ը գրել էր, որ հրանոթի արկերի գործով անցնող ՀՀ զինված ուժերի հրթիռային զորքերի և հրետանու նախկին պետ-վարչության պետ, գեներալ-մայոր Արմեն Հարությունյանի և զենքի մատակարար Դավիթ Գալստյանի նկատմամբ քրեական հետապնդումը դադարեցվել է՝ արարքը չկատարելու հիմքով:

168.am-ը փորձեց ՀՀ ԶՈՒ ԳՇ նախկին պետ Մովսես Հակոբյանից պարզել՝ ծառայության նկատմամբ ի՞նչ անփույթ վերաբերմունքի մասին է խոսքը, ի՞նչ գույքային վնասի, որն, ըստ Դատախազության, առանձնապես խոշոր չափերի է, հատկապես, երբ գործն արդեն ուղարկվել է դատարան:

«Քրեական գործ կա հարուցված, այլ բանից ես տեղյակ չեմ: Ինձ չեն հարցաքննել, չեն կանչել դատախազություն»,- մեզ հետ զրույցում նշեց նա:

Իսկ գեներալ Հարությունյանի փաստաբան Հակոբ Ենոքյանն էլ ասաց, որ իր պաշտպանյալը մեղադրանքը չի ընդունում:

168.am-ի տեղեկություններով, առաջադրված մեղադրանքը վերաբերում է ինչ-ինչ զինատեսակների սպասարկմանը, եղել են խնդիրներ, որոնց կարգավորումը երաշխիքային սպասարկումից դուրս է մնացել: