Լրահոս

Ապրիլի 1-ին, ժամը 23.00-ին, Երևանի Սեբաստիայի փողոցում «Պորշ» մակնիշի ավտոմեքենան բախվել է երկաթե սյանը: 39-ամյա վարորդ Գևորգ Սիմոնյանը հիվանդանոց տեղափոխվելու ճանապարհին մահացել է, իսկ երկու ուղևորները մարմնական վնասվածքներով տեղափոխվել են հիվանդանոց: Կատարվում է նախաքննություն։

ՀՀ ՊՆ նախկին փոխնախարար Արտակ Զաքարյանը գրում է․ «Լրանում է Արցախի տոտալ շրջափակման 113-րդ օրը: Թշնամին հյուսիս-արևելքից մինչև հարավ-արևելք մխրճվում է Հայաստանի սուվերեն տարածքներ և առաջ շարժվելով դիրքավորվում է: Զուգահեռաբար` տարածաշրջանում եփվում է նոր ռազմական էսկալացիա: Հայաստանի իշխանությունները պատրաստվում են դավադրության նոր ռեկորդ սահմանել և Արցախի ճակատագիրը վերջնականապես հանձնել Ադրբեջանին: Մենք կանգնած ենք նաև պետականության կորստի առջև: Մեր ժողովրդի զգալի հատվածը լավ չի գիտակցում իրավիճակի լրջությունը: Այս ամենից ուշադրությունը շեղելու համար ՔՊ դավադիր խմբակը իբրև թե իր նկատմամբ հորինովի սադրանքներ է փնտրում: Փաստացի` իրենց հերթական դավադրությունը ծածկող «վարագույրի» կտորներն են հավաքում»:

Ապրիլի 3-ին, ժամը 12:35-ին Արմավիրի մարզային ճգնաժամային կառավարման կենտրոն տեղեկություն է ստացվել, որ Նորապատ գյուղի մոտակայքում տեղի է ունեցել ՃՏՊ, կա արգելափակված քաղաքացի․ անհրաժեշտ է փրկարարների օգնությունը: Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։ Պարզվել է, որ Նորապատ-Արմավիր ավտոճանապարհի 1-ին կմ-ին բախվել են «Opel» (վարորդ՝ Ա․ Հ․) և «BMW» (վարորդ՝ Ա․ Ն․) մակնիշների ավտոմեքենաները: Մինչ փրկարարների կանչի վայր հասնելը՝ Ա․ Ն․-ն տեղի ուժերով դուրս է բերվել ավտոմեքենայից։ Տուժածը հոսպիտալացվել է Արմավիրի ԲԿ, որտեղ բժիշկները նրա առողջական վիճակը գնահատել են միջին ծանրության։ Փրկարարները հոսանքազրկել են ավտոմեքենաները և փակել գազի բալոնների փականները:

Իսրայելում ոստիկանությունը ջրցան մեքենաներ է կիրառել երկրի գլխավոր մայրուղին բացելու համար, որը փակել էին ցուցարարները: Բողոքի ակցիաների կազմակերպիչ Ջոշ Դրիլը, որը միջազգային «Անձրևանոցների շարժման» իսրայելական թևի ներկայացուցիչն է, Թվիթերում գրել է, որ 450 հազար մարդ է մասնակցել շաբաթ օրվա ցույցին, նրանցից 230 հազարը Թել Ավիվի փողոցներում էր: Ըստ ոստիկանության՝ 19 ցուցարար է ձերբակալվել:

Հայաստանի Հանրապետության գլխավոր դատախազ Աննա Վարդապետյանի՝ 2023 թվականի մարտի 31-ի հրամաններով՝ Դատախազությունում տեղի են ունեցել կադրային նշանակումներ և փոխատեղումներ: Մասնավորապես՝ ⦁ Գլխավոր դատախազության Հասարակական անվտանգության դեմ ուղղված հանցագործությունների գործերով վարչության ավագ դատախազ Էդուարդ Հովհաննիսյանը փոխադրվել է Կոտայքի մարզի դատախազի տեղակալի պաշտոնին: ⦁ Կոտայքի մարզի դատախազի տեղակալ Վիկտոր Գրիգորյանը փոխադրվել է Գլխավոր դատախազության հասարակական անվտանգության դեմ ուղղված հանցագործությունների գործերով վարչության ավագ դատախազի պաշտոնին: ⦁ Գլխավոր դատախազության մարդու դեմ ուղղված հանցագործությունների գործերով վարչության դատախազ Տաթևիկ Խաչատրյանը փոխադրվել և նշանակվել է Երևան քաղաքի Շենգավիթ վարչական շրջանի դատախազության ավագ դատախազի պաշտոնին: ⦁ Երևան քաղաքի դատախազության դատախազ Արմեն Սապոնջյանը նշանակվել է Երևան քաղաքի դատախազության ավագ դատախազի պաշտոնին: ⦁ Երևան քաղաքի Էրեբունի և Նուբարաշեն վարչական շրջանների դատախազության դատախազ Արամ Ներսիսյանը փոխադրվել է Երևան քաղաքի դատախազության դատախազի պաշտոնին: ⦁ Կոտայքի մարզի դատախազության դատախազ Մերի Ցականյանը փոխադրվել է Կոտայքի մարզի դատախազության ավագ դատախազի պաշտոնին: ⦁ Կոտայքի մարզի դատախազության դատախազ Մերինե Սահակյանը փոխադրվել է Երևան քաղաքի Էրեբունի և Նուբարաշեն վարչական շրջանների դատախազության դատախազի պաշտոնին: ⦁ Արմավիրի մարզի դատախազության դատախազ Ապրես Գրիգորյանը փոխադրվել է Կոտայքի մարզի դատախազության դատախազի պաշտոնին: ⦁ Արթուր Մուսոյանը նշանակվել է Արմավիրի մարզի դատախազության դատախազի պաշտոնին՝ 2023 թվականի ապրիլի 6-ից: ⦁ Միլենա Թաթոյանը նշանակվել է Արմավիրի մարզի դատախազության դատախազի պաշտոնին՝ 2023 թվականի ապրիլի 4-ից:

Ռուս բլոգերի սպանությունից ժամեր անց Ռուսաստանում լրտեսության կասկածանքով «Ուոլ Սթրիթ ջորնլ»-ի մոսկովյան բյուրոյի թղթակցի ձերբակալության մասին են հեռախոսով խոսել Ռուսաստանի արտգործնախարարն ու Միացյալ Նահանգների պետքարտուղարը: Կիրակի տեղի ունեցած հեռախոսազրույցի ժամանակ Սերգեյ Լավրովը Էնթոնի Բլինքենին Ռուսաստանի իշխանությունների որոշումները հարգելու անհրաժեշտության մասին է նշել, ընդգծել՝ անընդունելի է Վաշինգտոնի պաշտոնյաների և արևմտյան լրատվամիջոցների կողմից այդ գործին քաղաքական երանգ հաղորդելու մտադրությամբ աղմուկ բարձրացնելը։

Ապրիլի 2-ը նոր էր սկսվել, երբ ոստիկանության Գյումրի քաղաքի Կումայրիի բաժնում ստացվեց հաղորդում. որովայնի ծակած-կտրած թափանցող վերքով «Գյումրի» բժշկական կենտրոն էր դիմել 22-ամյա մի երիտասարդ: Մեկնած օպերատիվ խումբը պարզեց, որ Չերազի փողոցի բար-ռեստորանի մոտ տեղի ունեցած վիճաբանության ժամանակ անհայտ անձը դանակով հարվածներ էր հասցրել 22-ամյա երիտասարդին: Մինչ կպարզվեր այդ հանգամանքը, Շիրակի պարեկները Չերազի փողոցից Կումայրիի բաժին են տեղափոխել գյումրեցի 23-ամյա և 21-ամյա երկու երիտասարդի: 23-ամյա երիտասարդը դեմքի վնասվածքով էր. նա շտապօգնության մեքենայով տեղափոխվեց հիվանդանոց: Նրանք նույն վիճաբանության մասնակիցներ էին: Փաստի առթիվ Շիրակի մարզային քննչական վարչությունում նախաձեռնվեց քրեական վարույթ: Կումայրիի քրեական հետախույզների և Շիրակի պարեկների համատեղ ձեռնարկած միջոցառումների արդյունքում պարզվեց, որ բար-ռեստորանի մոտ տեղի ունեցած վիճաբանության ժամանակ դեմքի վնասվածքներ ստացած 23-ամյա երիտասարդն էր դանակի հինգ հարված հասցրել հիվանդանոց տեղափոխված երիտասարդին, իսկ նրան ձեռքերով և ոտքերով հարվածներ հասցրել ու մարմնական վնասվածքներ էին պատճառել 21 և 22 տարեկան վիճաբանողները: Հանցագործության գործիք դանակը հայտնաբերվել է: Նախաքննությամբ հանգամանքները պարզվում են:

Ադրբեջանցի ոստիկանները ռետինե փամփուշտներով կրակել են ցուցարարների վրա: Ակցիայի մասնակիցներից մեկը վիրավորվել է, նրան հիվանդանոց են տեղափոխել: «Մեզ հասանելիք ջուրը պաշտոնյաներին են տալիս» կոչերով՝ փողոց են դուրս եկել Սաաթլիի շրջանի բնակիչները: Նրանք ճանապարհ են փակել՝ Ալիևից պահանջելով լուծել ոռոգման և խմելու ջրի խնդիրը: Արցունքաբեր գազով են փորձել ցրել ակցիան իրավապահները: Ադրբեջանի ներքին գործերի նախարությունը հայտնում է, որ կրակել են քաղաքացիների վրա, քանի որ նրանք չեն կատարել իրավապահների օրինական պահանջը:

Հայաստանում Հարավային ռազմական օկրուգի (ՀՌՕ) ռազմակայանի օպերատիվ-մարտավարական և բանակային ավիացիայի անձնակազմերն ​​ուսումնամարտական թռիչքներ կիրականացնեն, որոնց ընթացքում մի շարք առաջադրանքներ կկատարեն ձմեռային ուսումնական շրջանի ստուգման շրջանակներում։ «Արմենպրես»-ի փոխանցմամբ՝ այս մասին հաղորդում է ՌԴ Պաշտպանության նախարարությունը: Ըստ հաղորդագրության՝ ՄիԳ-29 բազմաթիրախային կործանիչների օդաչուները կմշակեն օդային մարտերի մղումը, օդանավակայանի տարածքի պաշտպանությունը և օդային թիրախների որսը, բարձրլեռնային շրջաններում կկատարեն բարդ և բարձր պիլոտաժի տարրեր (մարտական ​​շրջադարձեր, հորիզոնական «տակառներ», վիրաժներ, թեքության մեծ անկյուններով պիկային վերընթացներ և այլն) տարբեր բարձրությունների վրա, այդ թվում՝ գերցածր: Միջոցառումների ընթացքում առանձնահատուկ ուշադրություն կդարձվի առաջադրանքների կատարման ընթացքում անձնակազմերի աշխատանքի ստուգմանը և համակարգմանը։ «Մի-8ՄՏՎ-5 և Կա-52 ուղղաթիռների անձնակազմերը կխոցեն ցամաքային թիրախներ, որոնք նմանակում են պայմանական թշնամու կենդանի ուժին ու տեխնիկային, կվերաբազավորվեն պահեստային օդանավակայանում, ինչպես նաև կմշակեն փոխգործակցությունը ՀՌՕ-ի ռազմաբազայի ստորաբաժանումների հետ «Ալագյազ» և «Կամխուդ» բարձրլեռնային զորավարժարաններում։ Բացի այդ, զինծառայողները կիրականացնեն պայմանականորեն վիրավորված զինծառայողների որոնողական աշխատանքներն ու տարհանումը, ինչպես նաև կկատարելագործեն իրենց հմտությունները որոնողափրկարարական աշխատանքներում», - նշված է ՌԴ ՊՆ-ի տարածած հաղորդագրությունում։ Գերատեսչությունը հավելել է, որ բանակի և օպերատիվ-մարտավարական ավիացիայի բոլոր ​​ուսումնամարտական թռիչքները կիրականացվեն ցերեկային և գիշերային ժամերին՝ զույգերով, փոքր խմբերով և էսկադրիլիաների կազմում։ Ստուգման շրջանակներում նաև կգնահատվի ինժեներատեխնիկական ստորաբաժանման աշխատանքը:

«Ականջներիդ օղ արեք՝ ձեր լկտիությունն անպատասխան չի մնալու, իշխանությանը վիրավորելուն լինելու է օրինական պատասխան»: Այսպես է Ազգային ժողովի նախագահ Ալեն Սիմոնյանն արձագանքել իր ու դաշնակցական Կարեն Մկրտչյանի միջև տեղի ունեցած միջադեպին: Սփյուռքահայ Կարենը պատմել էր, որ կիրակի Կասկադում հանդիպել է անվտանգության աշխատակիցներով շրջող Սիմոնյանին, նրան դավաճան անվանել, ինչից հետո Սիմոնյանը թիկնապահներին կարգադրել է բռնել քաղաքացու ձեռքերից ու թքել է Կարենի երեսին:

Ապրիլի 3-ին, ժամը 12:53-ին Ճգնաժամային կառավարման ազգային կենտրոն ահազանգ է ստացվել, որ Երևանի Նոր Նորքի 8-րդ զանգվածի թիվ 31 շենքի մոտակայքում գտնվող ավտոտնակի 2-րդ հարկում հրդեհ է բռնկվել։ Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից երկու մարտական հաշվարկ։ Հրդեհը մեկուսացվել է ժամը 13։28-ին, մարվել՝ 13։50-ին։

Ամերիկյան հետախուզական օդանավեր են հայտնվել Իրանի ջրային տարածքներում: Այս մասին հայտնում է իրանական «ՄԵՀՐ» գործակալությունը: Ամերիկյան Ի-ՓԻ-3-Ե ինքնաթիռը, ըստ լրատվամիջոցի, տեղեկություններ ու տվյալներ է հավաքագրել Իրանի երկնքում: Հաղորդվում է, որ Իրանի ռազմածովային ուժերը նախազգուշացում են արել ամերիկյան օդանավին՝ առանց թույլտվության երկրի օդային սահմանը հատելու համար, ինչից հետո օդանավը դուրս է եկել Իրանի տարածքից:

Երևանի «Բյուրեղ» բնակելի թաղամասում Հայաստանի պաշտպանության նախարար Սուրեն Պապիկյանի կողմից բնակարանի ձեռքբերման գործընթացի վերաբերյալ քրեական վարույթ չի նախաձեռնվել՝ հիմքերի բացակայության պատճառով։ «Արմենպրես»-ի հարցմանն ի պատասխան այս մասին հայտնել են ՀՀ գլխավոր դատախազությունից։ Փետրվարի 28-ին «Հետք»-ը հոդված էր հրապարակել՝ գրելով, որ պաշտպանության նախարար Սուրեն Պապիկյանը Երևանի «Բյուրեղ» բնակելի թաղամասում հիփոթեքային վարկով բնակարան է ձեռք բերել, որի համար վճարել է 168 հազար դոլար, սակայն բնակարանի իրական արժեքը 412 հազար դոլար է։ Դրան հաջորդել էր ՀՀ գլխավոր դատախազության հաղորդագրությունը, որ ուսումնասիրում են հրապարակումը։

Թեհրանը Բաքվին բողոքի նոտա է հղել՝ ադրբեջանական լրատվամիջոցների հրապարակումների պատճառով: Ըստ իրանական կողմի՝ Թեհրանի հասցեին վիրավորական բովանդակության հոդվածներ են հրապարակվում: Իրանն Ադրբեջանին զգուշացրել է անհարգալից գործողությունների վնասակար հետևանքների մասին։

Թբիլիսիում կանանց համերաշխության երթ է անցկացվել ընդդեմ անհավասարության, բռնության, ճնշումների և ահաբեկչության։ Համերաշխության երթը մեկնարկել է Աղմաշենեբելիի պողոտայից և ավարտվել «Մայրենի լեզվի» («Դեդաենիս պարկի») այգում, ահյտնում է Ալիք մեդիան: Կանանց համերաշխության երթի անդամները նշել են, որ պետությունը ստանձնել է տեղական և միջազգային պարտավորություններ՝ հասնելու գենդերային հավասարության, այդ թվում՝ եվրոպական ինտեգրման 12 կետից բաղկացած ծրագրի շրջանակներում, սակայն կանանց նկատմամբ դաժան և նվաստացուցիչ վերաբերմունքը չի նվազել։ Երթի մասնակիցները կոչ են արել քաղաքական գործիչներին հրապարակայնորեն զերծ մնալ կանանց նկատմամբ բռնությանը նպաստող հայտարարություններից։ Ի դեպ, մինչ երթի մեկնարկը ներկա է եղել նաև հանրային պաշտպան Լևան Իոսելիանին: Հանրային պաշտպանը նշել է՝ առաջնային է կանանց կարգավիճակը, իրավունքների պաշտպանությունը։ «Ես համերաշխություն եմ հայտնում այս ակցիային, անթույլատրելի է կանանց նկատմամբ բռնությունը։ Ես համերաշխ եմ բռնության ենթարկված բոլոր կանանց հետ։ Կանանց կարգավիճակը, իրավունքների պաշտպանությունը առաջնահերթություն է, դրա համար էլ այստեղ եմ», — նշել է Իոսելիանին:

«Հայաստանում ռազմաքաղաքական իրավիճակն այնպիսին է, որ տարածաշրջանային զարգացումների վրա կարող են ազդել նաև աշխարհաքաղաքական բոլոր իրադարձությունները»,- Եռաբլուրում հայտարարել է «Հայաստան» խմբակցության ղեկավար, պաշտպանության նախկին նախարար Սեյրան Օհանյանը: «Հայաստան» խմբակցությունը կիրակի Եռաբլուր է այցելել՝ Ապրիլյան քառօրյա պատերազմի 7-րդ տարելիցի օրը՝ հարգանքի տուրք մատուցելու զոհվածների հիշատակին:

Մարտի 31-ին, ժամը 20.30-ի սահմաններում, «Նիսան» մակնիշի մեքենան Սևան-Մարտունի-Գետափ ճանապարհի 36-րդ կմ-ին մերկասառույցի պատճառով դուրս էր եկել երթևեկելի գոտուց և հայտնվել դաշտում: 7-ամյա և 26-ամյա երկու ուղևորները մարմնական վնասվածքներով տեղափոխվել էին հիվանդանոց: Ապրիլի 1-ին հիվանդանոցից հաղորդում է ստացվել, որ 7-ամյա Մանե Սիմոնյանը մահացել է: Կատարվում է նախաքննություն: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Մահացել է լրագրող Սասուն Մամյանը; Այս մասին տեղեկանում ենք Դավիթ Մամյանի ֆեյսբուքյան էջից:

5-ից 10 մետր են իրարից հեռու հայ և ադրբեջանցի զինծառայողները Սյունիքի Տեղ գյուղում, այսօր «Հայլուր»-ին հայտնել է Տեղի ավագանու անդամ Մասիս Զեյալնյանը: Նրա խոսքով՝ թշնամին հաստատված կետերից մեկ քայլ էլ հետ չի գնացել: