ԳՇ հայտարարությունը ահազանգ էր այն մասին, որ գործող վարչապետն այս ծանր իրադրության պայմաններում ի վիճակի չեն գնալու անհրաժեշտ փոփոխությունների. Տ. Աբրահամյան

Հայաստանի Զինված ուժերի գլխավոր շտաբի մտահոգություններին և պահանջներին արձագանքել են մեծ թվով գործող և պահեստազորում գտնվող զինվորականներ, գեներալներ։ Սա առաջին հերթին խոսում է իրադրության ծայրահեղ ծանր վիճակի մասին։ Այս մասին ֆեյսբուքյան իր էջում գրել է «Հենակետ» վերլուծական կենտրոնի ղեկավար Տիգրան Աբրահամյանը:

«Որոշակի առանձնահատկություններով պայմանավորված` այս պահին նպատակահարմար չեմ համարում, որպեսզի Արցախի Պաշտպանության բանակի հրամանատարությունը ևս իր դիրքորոշումը հանրայնացնի։ Նման պահանջ դնելը, շեշտում եմ՝ այս պահին, ճիշտ չեմ համարում։ Չնայած ամեն ինչ պարզից էլ պարզ է։

Այս պահին ևս երկու զինվորական կա, ում դիրքորոշումը կարևոր եմ համարում՝ ԶՈՒ ԳՇ նախկին պետ Արտակ Դավթյանի և ՊԲ նախկին հրամանատար Ջալալ Հարությունյանի։

Ոչ թե նրա համար, որ դա կարող է կտրուկ իրավիճակ փոխել, այլ որ նրանց կարծիքի արտահայտում կամ չարտահայտումը (շրջանցումը), կարող է նոր հարցադրումներ առաջ բերել։

Ջալալ Հարությունյանի դեպքում՝ պատերազմական գործողությունների համատեքստում, իսկ Արտակ Դավթյանի՝ 2018-2020 թվականների ընթացքում, բանակի ներսում տեղի ունեցած գործընթացների։

Գլխավոր շտաբի հայտարարությունը զուտ անձի կամ անձանց դեմ ուղղված վերաբերմունք չէ, համակրանքի հարց չէ․ խորքային առումով այն առաջին հերթին ընդգծում է պետական կառավարման համակարգի, պետական ինստիտուտների քայքայված լինելը, զինված ուժերը փլուզման տանելու փորձերը և անվտանգության համակարգում առկա տագնապային սպառնալիքները։

Եվ վերջապես, ԳՇ հայտարարությունը ահազանգ էր այն մասին, որ գործող վարչապետն ու իր կառավարությունն այս ծանր իրադրության պայմաններում ի վիճակի չեն գնալու անհրաժեշտ փոփոխությունների, վերափոխումների, լուծումների, իսկ դա պարզ ասած հղի է պետականության ամբողջական տապալմամբ»,- գրել է նա։

Հիշեցնենք, որ ԶՈՒ ԳՇ ղեկավարությունը հայտարարություն է տարածել, որում նշվում էր, որ ՀՀ վարչապետը և կառավարությունն այլևս ի վիճակի չեն ընդունելու ադեկվատ որոշումներ։ Հայտարարությունում նաև նշվում էր, որ բանակը պահանջում է Նիկոլ Փաշինյանի հրաժարականը։

Նիկոլ Փաշինյանը ԳՇ հայտարարությունից հետո հանդես եկավ ուղիղ եթերով, որի ժամանակ ասաց, որ ստորագրել է Օնիկ Գասպարյանին ԳՇ պետի պաշտոնից ազատելու մասին հրամանագիրը, ՀՀ նախագահի աշխատակազմից էլ հաստատեցին, որ նախագահը ստացել է առաջարկությունը, սակայն դեռ չի ստորագրել:

Կարդացեք նաև