Լրահոս

Լրագրող Թիլ Բրուքները ծավալուն հետաքննական հոդված է գրել, թե ինչպես է Ադրբեջանն իր հսկայական նավթադոլարները տալիս քաղաքական գործիչներին, գործարարներին և համալսարաններին: Նույնիսկ հայտնի անհատներն ու հաստատություններն են իրենց վաճառում, երբ հսկայական գումարներ են թափվում նրանց վրա։ Բրուքների՝ «Կոռուպստան Ադրբեջան. ինչպես դառնալ թաքուն լոբբիստ ադրբեջանական ոճով» վերնագրով հոդվածը տեղադրվել է «Կազմակերպված հանցավորության և կոռուպցիայի լուսաբանման նախագծի (OCCRP)» կայքում։ Հոդվածում ասվում է. «Բրենդա Շեյֆերի՝ գիտնականի և էներգետիկ քաղաքականության հաճախ հիշատակվող փորձագետի վերելքը ցույց է տալիս, թե որքան խոցելի է ամերիկյան արտաքին քաղաքական կառույցը օտարերկրյա գործակալների կողմից շահարկումների նկատմամբ: Օտար վարչակարգի և բացահայտ ու գաղտնի լոբբիստների բազմազան ցանցի աջակցությամբ՝ նա նավթային փողերն օգտագործել է իր գիտական ​​համբավը բարձրացնելու համար, այնուհետև իր հերթին այդ հեղինակությունը օգտագործել առաջ մղելու Ադրբեջանի օրակարգը՝ Կոնգրեսի վկայությունների, թերթերի տասնյակ հոդվածների և լրատվամիջոցներում ելույթների, անհամար վերլուծական/ուղեղային միջոցառումների և նույնիսկ գիտական հրապարակումների միջոցով։ Ու դեռ շարունակում է դա անել»: 2001 թվականին Ներկայացուցիչների պալատի արտաքին հարաբերությունների հանձնաժողովին վկայություն տալիս՝ Շեյֆերը ներկայացվել է որպես «Կասպյան ուսումնասիրությունների ծրագրի տնօրեն և գիտության ու միջազգային հարաբերությունների Բելֆորթի [Բելֆեր] կենտրոնի Միջազգային անվտանգության ծրագրի ասպիրանտ Հարվարդի Քենեդու անվան կառավարման դպրոցում» Իր ելույթում Շեյֆերը Կոնգրեսին խնդրել է չեղյալ համարել Ազատության աջակցության ակտի 907-րդ բաժինը, որն արգելում է ամերիկյան ուղղակի օգնությունն Ադրբեջանի կառավարությանը: Կոնգրեսի անդամները չգիտեին, որ «Կասպյան ուսումնասիրությունների ծրագիրը, որը նա ղեկավարում էր Հարվարդում, ստեղծվել է 1999 թվականին Ադրբեջանի Առևտրի պալատի և նավթագազային ընկերությունների համախմբման՝ Exxon-ի, Mobil-ի և Chevron-ի կողմից, 1 միլիոն դոլար դրամաշնորհով, որոնք բոլորն էլ առևտրային շահեր ունեին տարածաշրջանում։ Առևտրի պալատը ադրբեջանամետ ազդեցության խումբ է, որի տնօրենների խորհրդի կազմում ընդգրկված են SOCAR-ի փոխնախագահը, ադրբեջանական պետական ​​էներգետիկ ընկերությունը, ինչպես նաև BP-ի և Chevron-ի առաջատար լոբբիստները»: 1999-ին պալատը մամուլի հաղորդագրություն է տարածել՝ նշելով, որ Կասպյան ուսումնասիրությունների ծրագրի նպատակն է «օգնել ձևավորել իրազեկ քաղաքականություն» Ադրբեջանի վերաբերյալ։ Քենեդու կառավարման դպրոցն իր մամուլի հաղորդագրության մեջ հայտարարել է, որ Հարվարդի Բելֆերի գիտության և միջազգային հարաբերությունների կենտրոնի տնօրեն Գրեհեմ Թ. Ալիսոնը և նախագահ Իլհամ Ալիևը, որն այն ժամանակ Ադրբեջանի SOCAR նավթային ընկերության առաջին փոխնախագահն էր, ելույթ կունենան դրա անդրանիկ համաժողովում։ 2000 թվականին, այն ժամանակ նախագահ Հեյդար Ալիևը մասնակցել է Ադրբեջանի Առևտրի պալատի միջոցառմանը` ասելով հյուրերին. «Ողջունում եմ նոր ամբիոնի բացումը Հարվարդի համալսարանում, որը վերաբերում է Ադրբեջանին և Կասպյան տարածաշրջանին: Շնորհակալ եմ ամերիկա-ադրբեջանական Առևտրի պալատի կողմից ցուցաբերվող օգնության համար»։ Պաշտպանության նախարարի նախկին օգնական և Հարվարդի Քենեդու դպրոցի դեկան Էլիսոնը հեռացվել էր պալատի հոգաբարձուների խորհրդի կազմից այն բանից հետո, երբ OCCRP-ն մատնանշել էր նրա անունը: OCCRP-ն բազմիցս խնդրել է պալատից նրա ֆինանսական հաշվետվությունների պատճենները, սակայն պալատը դրանք չի տրամադրել, ինչն անօրինական է: Պալատը նշել է այնպիսի նշանավոր դեմքերի, ինչպիսիք են «Հենրի Քիսինջերը, Զբիգնև Բժեզինսկին, Ջեյմս Ա. Բեյքեր III-ը, Բրենտ Սքոուկրոֆթը և Ջոն Սունունուն» որպես իր «Խորհրդականների պատվավոր խորհրդի» անդամներ։ Շեյֆերը «ղեկավարել է Կասպյան ուսումնասիրությունների ծրագիրը մինչև 2005 թվականը: Իր պաշտոնավարման ընթացքում նա գրել է 14 կարծիքի հոդվածներ ԱՄՆ-ի և Իսրայելի առաջատար թերթերի համար, ներառյալ International Herald Tribune-ը և Jerusalem Post-ը՝ շատ հոդվածներոմ կոչ անելով ամերիկյան քաղաքականություն մշակողներին ավելի մեծ ուշադրություն դարձնել տարածաշրջանին: Դրանցից մեկում հորդորել է ԱՄՆ-ին դադարեցնել վիճելի Լեռնային Ղարաբաղի ֆինանսավորումը»։ 2006 թվականի մայիսին լրագրող և լոբբիստական հարցերով փորձագետ Քեն Սիլվերսթինը Harper’s Magazine-ում գրել է «Վարձու ակադեմիկոսներ» վերնագրով մի հոդված՝ մեղադրելով հայտնի ակադեմիկոսներին «[Կասպյան] տարածաշրջանի ղեկավարների անունից մտային լարախաղացության հանար»։ Նա առանձնահատուկ կոշտ քննադատության է ենթարկել Շեյֆերին։ Սիլվերսթինը մեղադրել է Հարվարդի Կասպյան ուսումնասիրությունների ծրագրին «մտավորական ամբողջականության» բացակայության մեջ՝ ընդգծելով դրա կապը Ադրբեջանի Առևտրի պալատի հետ և մասնավորապես նշել է «2001 թվականին Շեյֆերի խնդրանքը Կոնգրեսին՝ չեղարկել Ադրբեջանի դեմ պատժամիջոցները»։ Սիլվերսթինն իր հոդվածում նախազգուշացրել է. «Զգուշացե՛ք կասպյան դիտորդներ. հաջորդ անգամ, երբ կտեսնեք կամ կլսեք «անկախ» ամերիկացի փորձագետի խոսքն այն մասին, թե ինչպես են տարածաշրջանի ղեկավարները համարձակ բարեփոխումներ իրականացնում, ստուգեք այդ փորձագետի վկայագրերը, որպեսզի տեսնեք, թե արդյոք նա իրականում անկախ է»։ Բրուքները գրել է՝ հաջորդ ամիս ««International Herald Tribune»-ը հրապարակեց Շեյֆերի երրորդ հոդվածը, որը վերաբերում էր Իրանի էթնիկ ադրբեջանցիներին և այլ փոքրամասնությունների»: Այդ ժամանակից ի վեր Սիլվերսթինը նրան անվանեց «վարձու ակադեմիկոս, որի պաշտոնը սնվել է ադրբեջանական լոբբիստական ​​կազմակերպությունների և արևմտյան նավթային ընկերությունների կողմից, որոնք ներդրումներ են կատարել Ադրբեջանում»: Բրուքները բողոքել է New York Times-ի, Washington Post-ի, Reuters-ի, Bloomberg-ի, Foreign Affairs Journal-ի և Wall Street Journal-ի խմբագիրներին՝ Շեյֆերի հոդվածները հրապարակելու համար՝ առանց բացահայտելու նրա կապերը Ադրբեջանի հետ: Շեյֆերը նաև հաճախ մասնակցել է վերլուծական կենտրոնների խմբային քննարկումներին: 2013 թ. Ադրբեջանի նախագահական կեղծ ընտրություններից երկու օր անց Շեյֆերը ելույթ ունեցավ Կարնեգի հիմնադրամում` գովաբանելով ճնշող երկրի «աշխույժ մամուլը», նրա բուռն քաղաքական բանավեճերը և նրա «իրատես» ընտրողներին… 2014 թվականի դեկտեմբերին Շեյֆերը հայտնվեց հեռուստաէկրաններին Fox Business-ի և Al Jazeera America-ի միջոցով և տպագիր մեկնաբանություն տվեց էներգետիկ խնդիրների մասին Jerusalem Post-ի, London Times-ի, The Australian-ի, NPR-ի և Foreign Policy ամսագրի միջոցով: (Ընդամենը մի քանի շաբաթ առաջ Foreign Policy ամսագիրը հրապարակել էր մեկ այլ հեղինակի հոդվածը Ադրբեջանի լոբբիստական ​​ջանքերի վերաբերյալ, որտեղ նշվում էր Շեյֆերի կապը SOCAR-ի հետ»), գրել է Բրուքները։ Ամոթալի է, որ վերլուծական կենտրոնները, համալսարաններն ու քաղաքական գործիչները պատրաստակամորեն ընդունում են Ադրբեջանի առաջարկած գումարները, դրանով իսկ խրախուսելով ճնշող վարչակարգին շարունակել մեծ գումարներ տալ՝ քողարկելու մարդու իրավունքների խախտումները։

ՀԱՊԿ-ում ըմբռնումով են մոտենում Հայաստանում ստեղծված իրավիճակին, որը թույլ չի տալիս անցկացնել ՀԱՊԿ-ի խաղաղապահ ուժերի զորավարժությունները: «Արմենպրես»-ի փոխանցմամբ՝ այս մասին հաղորդել է ՀԱՊԿ քարտուղարությունը՝ մեկնաբանելով ՀՀ վարչապետ Նիկոլ Փաշինյանի այն հայտարարությունը, որ Երևանը ստեղծված իրավիճակում նպատակահարմար չի գտնում ՀԱՊԿ զորավարժություններ անցկացնել Հայաստանի Հանրապետության տարածքում առնվազն այս տարի: Մեկնաբանության մեջ նշվում է, որ նախատեսված էր Հայաստանի Հանրապետության տարածքում անցկացնել «Անխախտելի եղբայրություն-2023» զորավարժությունը ՀԱՊԿ խաղաղապահ ուժերի հետ՝ համաձայն Պաշտպանության նախարարների խորհրդի և Անվտանգության խորհուրդների քարտուղարների հանձնաժողովի կողմից հաստատված պլանի: «Այս տարի հայկական հողի վրա այս զորավարժությունների անցկացման անհրաժեշտությունն ավելի վաղ հաստատվել էր նաև Երևանում։ Ներկայում ՀԱՊԿ քարտուղարությունը Կազմակերպության կողմից սահմանված կարգով հայկական կողմից ծանուցումներ չի ստացել այդ զորավարժությունների չեղարկման մասին», - նշվում է հաղորդագրությունում։ «Մենք ըմբռնումով ենք վերաբերվում Հայաստանի Հանրապետությունում տիրող իրավիճակին, որը չի կարող թույլ տալ այս տարի լիարժեք իրականացնել նախատեսվող ՀԱՊԿ զորավարժությունները», - հավելել է ՀԱՊԿ քարտուղարությունը։ Ըստ հաղորդագրության՝ ՀԱՊԿ քարտուղարությունը և Միացյալ շտաբը գործադրում են բոլոր ջանքերը, որպեսզի կազմակերպության կանոնադրական մարմինների կողմից հաստատված Զորքերի (Հավաքական ուժերի) մարտական ​​պատրաստության պլաններն ամբողջությամբ իրականացվեն՝ նրանց պատրաստության բարձրացման համար՝ ի շահ ՀԱՊԿ անդամ երկրների անվտանգության ապահովման։

Մոսկվայի Բորիս Պաստեռնակի փողոցում բռնկված հրդեհի պատճառով այրվել են դիզելային վառելիքով կոնտեյներ, 6 ավտոմեքենա, հայտնում է Ռուսաստանի արտակարգ իրավիճակների նախարարությունը: Ըստ գերատեսչության՝ հրդեհն արդեն ամբողջությամբ մեկուսացվել է, բայց կրակը հասցրել է մոխրացնել 150-200 քառակուսի մետր տարածք:

2021 թվականի սեպտեմբերի 13-ին ադրբեջանական ագրեսիայի հետևանքով զոհված հայ զինծառայողներից երեքի մարմինների գտնվելու վայրը հայտնի չէ. ադրբեջանական կողմից հետ բանակցություններ են տարվում նրանց մարմինները գտնելու և դուրս բերելու ուղղությամբ: Ինչպես տեղեկացնում է «Արմենպրես»-ը, լրագրողների հետ զրույցում այս մասին ասաց ՀՀ պաշտպանության փոխնախարար Արման Սարգսյանը։ «Հստակ վայրը պարզելու և նրանց մարմինները դուրս բերելու ուղղությամբ իրականացվում են աշխատանքներ։ Հնարավոր ամեն ինչ արվում է, ընդհուպ մինչև ադրբեջանական կողմի հետ բանակցությունների միջոցով զոհված զինծառայողների դիերը դուրս բերելու համար»,- ասաց Սարգսյանը:

Հունվարի 11-ին՝ ժամը 12:57-ին, Արագածոտնի մարզային ճգնաժամային կառավարման կենտրոն ահազանգ է ստացվել, որ Աշտարակ-Ագարակ ավտոճանապարհին այրվում է ավտոմեքենա։ Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ: Պարզվել է, որ Աշտարակ-Ագարակ ավտոճանապարհի 7-րդ կմ-ին այրվում է «Opel Omega» մակնիշի ավտոմեքենա (վարորդ՝ Ս․ Ս․): Հրդեհը մեկուսացվել է ժամը 13։13-ին, մարվել՝ 13։24-ին։ Այրվել է ավտոմեքենան՝ մասամբ։

2022թ. դեկտեմբերին 2021թ. դեկտեմբերի համեմատ հանրապետությունում արձանագրվել է սննդամթերքի և ոչ ալկոհոլային խմիչքի 10.0%, իսկ 2022թ. նոյեմբերի համեմատ՝ 2.4% գնաճ, հայտնում են ՀՀ վիճակագրական կոմիտեից։ Հանրապետության դիտարկվող բոլոր քաղաքներում 2022թ. դեկտեմբերին նոյեմբերի համեմատ սննդամթերքի և ոչ ալկոհոլային խմիչքի գներն աճել են 2.3-3.0%-ով, այդ թվում, գնաճի ամենաբարձր ցուցանիշն արձանագրվել է ք. Արտաշատում: Մայրաքաղաքում սննդամթերքի և ոչ ալկոհոլային խմիչքի գների մակարդակն աճել է 2.3%-ով: 2022թ. դեկտեմբերին 2021թ. դեկտեմբերի համեմատ մրգի ապրանքախմբում գրանցվել է 10.9%, իսկ 2022թ. նոյեմբերի համեմատ՝ 4.7% գնաճ:

Միգրացիոն ճգնաժամը խնդիր է և՛ ԱՄՆ-ի, և՛ Մեքսիկայի համար, երկրները փորձում են այն լուծել համատեղ ջանքերով, հայտարարել է ԱՄՆ նախագահ Ջո Բայդենը Մեքսիկայի մայրաքաղաքում Հյուսիսային Ամերիկայի ղեկավարների գագաթնաժողովի ավարտին: Գագաթնաժողովին մասնակցել են նաև Ջո Բայդենի մեքսիկացի գործընկեր Անդրես Մանուել Լոպես Օբրադորը և Կանադայի վարչապետ Ջասթին Թրյուդոն։ Այս մասին «Արմենպրես»-ը տեղեկանում Է ТАСС գործակալությունից: Միացյալ Նահանգների ղեկավարը հիշեցրել է, որ Մեխիկո ժամանելուց առաջ կանգ է առել Էլ Պասոյում (Տեխասի նահանգ)՝ իր աչքերով տեսնելու սահմանին տիրող իրավիճակը: «Այս (միգրացիոն ճգնաժամն) իրական ծանրաբեռնվածություն Է ստեղծում ինչպես Մեքսիկայի, այնպես էլ Միացյալ Նահանգների համար: Մենք միասին աշխատում ենք լուծել այս խնդիրն այնպես, որպեսզի կիրառենք մեր երկրների օրենքները և պաշտպանենք ներգաղթյալների իրավունքները, որոնք հայտնվել են հուսահատ վիճակում», - հայտարարել է Բայդենը: «Մեր ամբողջ կիսագունդը բախվել է աննախադեպ մակարդակի միգրացիայի, որը պատմության մեջ ամենաբարձրն է: Հյուսիսային Ամերիկայի երկրների գագաթնաժողովում, որը տեղի Է ունեցել 2021 թվականին Վաշինգտոնում, մենք առաջ քաշեցինք ընդհանուր տարածաշրջանային խնդրին ընդհանուր տարածաշրջանային մոտեցման գաղափարը: Այս գաղափարը վերաճեց Լոս Անջելեսի Միգրացիայի և պաշտպանության հռչակագրի, որը կես տարի առաջ Ամերիկաների գագաթնաժողովում ընդունվեց 21 երկրների կողմից: Եվ մենք աշխատում ենք միասին, հատկապես Հյուսիսային Ամերիկայի մեր գործընկերների հետ, որպեսզի կատարենք այս հռչակագրի շրջանակներում մեր ստանձնած պարտավորությունները: Դա ներառում է Նիկարագուայից, Հայիթիից և Կուբայից ներգաղթյալների համար օրինական ուղիների ընդլայնման միջոցներ, որոնց մասին ես հայտարարեցի անցյալ շաբաթ», - նշել է ԱՄՆ նախագահը: «Մենք փորձում ենք դյուրացնել մարդկանց ճանապարհն այստեղ, ստեղծում ենք հնարավորություններ, որպեսզի նրանք կարողանան հասնել այստեղ», - հայտարարել է Բայդենը: ԱՄՆ նախագահը միևնույն ժամանակ ընդգծել է, որ հարկավոր է, որ ներգաղթյալները մնան իրենց երկրներում: «Մենք կշարունակենք միգրացիայի հիմնական պատճառների վերացմանն ուղղված մեր ջանքերը, որպեսզի օգնենք մարդկանց մնալ իրենց երկրներում: Այդ նպատակով ես Կոնգրեսից խնդրել եմ 4 միլիարդ դոլար», - հավելել է ԱՄՆ-ի ղեկավարը՝ հանրապետականներին կոչ անելով աջակցել իր առաջարկած միգրացիոն բարեփոխմանը: Բայդենը նշել է մաքսային ծառայությունների տեխնոլոգիական ներուժի ընդլայնման կարևորությունը թմրամիջոցների ապօրինի շրջանառության, մաքսանենգության և անօրինական միգրացիայի դեմ պայքարի արդյունավետության բարձրացման համար։ Ինչպես նշված է Մեխիկոյում կայացած հյուսիսամերիկյան գագաթնաժողովից հետո տարածված համատեղ հայտարարության մեջ, Կանադայի, Մեքսիկայի և Միացյալ Նահանգների ղեկավարները պարտավորվել են օգնել Արևմտյան կիսագնդի երկրներին՝ բարելավել կենսամակարդակը` դրանով իսկ նպաստելով միգրացիոն հոսքերի կրճատմանը: «Ներկայում մենք… պետք է բացահայտենք այն պատճառները, որոնք առաջացնում են անօրինական միգրացիա և հարկադիր տեղահանում և զբաղվենք դրանցով: Մեքսիկան, Կանադան և ԱՄՆ-ը պատավորություն են ստանձում՝ օգնելու Արևմտյան կիսագնդի երկրներին ստեղծել պայմաններ, որպեսզի բարելավվի կյանքի որակը, հատկապես միգրացիոն խմբերում, որոնք առավել խոցելի են այնպիսի երևույթների հանդեպ, ինչպիսք են տեղահանումը, հարկադիր ներքին և արտաքին միգրացիան», - ասված Է փաստաթղթում:

Հունվարի 10-ին, ժամը 23:39-ին Սյունիքի մարզային ճգնաժամային կառավարման կենտրոն տեղեկություն է ստացվել, որ Վերին Խոտանան գյուղի եկեղեցու մոտակայքում բեռնատար ավտոմեքենան բեռնվածության պատճառով չի կարողանում շարունակել ընթացքը և խոչընդոտում է երթևեկությունը. անհրաժեշտ է փրկարարների օգնությունը: Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատի Աղվանի հենակետից մեկ մարտական հաշվարկ: Փրկարարները քարշակման միջոցով դուրս են բերել «Volvo» մակնիշի բեռնատար ավտոմեքենան։ *** Հունվարի 10-ին, ժամը 10:20-ին Սյունիքի մարզային ճգնաժամային կառավարման կենտրոն ահազանգ է ստացվել, որ Վերին Խոտանան գյուղի եկեղեցու մոտակայքում բեռնատար ավտոմեքենան բեռնվածության պատճառով չի կարողանում շարունակել ընթացքը և խոչընդոտում է երթևեկությունը. անհրաժեշտ է փրկարարների օգնությունը: Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատի Աղվանի հենակետից մեկ մարտական հաշվարկ: Փրկարարները քարշակման միջոցով դուրս են բերել «Scania» մակնիշի բեռնատար ավտոմեքենան։

2020 թվականի դեկտեմբերի 28-ին պատգամավորներ Ա.Ք.-ի և Ս.Գ.-ի նկատմամբ խուլիգանական գործողություն կատարած Ա.Ս.-ի և Գ.Բ.-ի վերաբերյալ մեղադրական եզրակացությունը և քրեական վարույթի նյութերը 2022 թվականի դեկտեմբերի 19-ին հանձնվել են Երևան քաղաքի առաջին ատյանի ընդհանուր իրավասության դատարան: Գլխավոր դատախազությունը տեղեկացրել էր, որ Գ.Բ.-ն, 2020 թվականի դեկտեմբերի 28-ին` ժամը 09:00-ից մինչև 11:30-ն ընկած ժամանակահատվածում, մասնակցելով Ազգային ժողովի բնականոն աշխատանքի խոչընդոտման նպատակով անցկացվող հավաքին, մի խումբ անձանց հետ, դիտավորությամբ, կոպիտ կերպով խախտել է հասարակական կարգը, որը զուգորդվել է բռնության գործադրմամբ: Մասնավորապես, Գ.Բ.-ն հավկիթներով և ձնագնդիկներով, հարվածներ է հասցրել Ազգային ժողովի շենքին մոտեցող պատգամավոր Ա.Ք.-ին սպասարկող ծառայողական ավտոմեքենային, որի մեջ գտնվել է պատգամավորը: Դրանից անմիջապես հետո Գ.Բ.-ն բերման է ենթարկվել ոստիկանության Արաբկիրի բաժին: Այնուհետև, հավաքի մի խումբ մասնակիցներ, շարունակելով խուլիգանական գործողությունները, ժամը 11:00-ի սահմաններում փակել են Դեմիրճյան փողոցի երթևեկելի հատվածը: Վերջիններիս միացած Ա.Ս.-ն և գործով չպարզված անձինք խոչընդոտել են աշխատանքի վայր ժամանող Ազգային ժողովի պատգամավոր Ս.Գ.-ի երթևեկը, հնչեցրել անպարկեշտ արտահայտություններ: Պատգամավորը փորձել է խուսափել կոնֆլիկտից և առաջարկել բացել ճանապարհը, սակայն հավաքի մասնակիցներից չպարզված անձը Ս.Գ.-ին վիճաբանության մեջ ներքաշելու նպատակով հարվածել է նրա ավտոմեքենային: Վիճաբանություն է սկսվել պատգամավորի ու հավաքի մասնակիցների միջև, որի ընթացքում Ա.Ս.-ն և ինքնությունները չպարզված մասնակիցները, հնչեցրել են սեռական բնույթի հայհոյանքներ, հավկիթներով հարվածել Ս.Գ.-ին, քաշքշել և ձեռքերով ու ոտքերով հարվածներ հասցրել նրա մարմնի տարբեր մասերին: Ա.Ս.-ն և չպարզված անձինք, հրմշտելով և ճեղքելով խուլիգանական գործողությունները խափանող ոստիկանների կենդանի պատը՝ հետապնդել են Ս.Գ.-ին՝ շարունակելով կոպիտ կերպով խախտել հասարակական կարգը, տևական ժամանակ սեռական բնույթի հայհոյանքներ հնչեցրել, հավկիթներով հարվածել՝ պատճառելով թեթև վնասի հատկանիշներ չպարունակող վնասվածքներ՝ ձախ բազկի ստորին երրորդականի դրսային մակերեսի, աջ արմնկային շրջանի արյունազեղումներ, ձախ այտային շրջանի փափուկ հյուսվածքների սալջարդ: Ա.Ս.-ի և վարույթով դեռևս չպարզված անձանց խուլիգանական գործողությունները դադարել են՝ դեպքի վայրում գտնվող ոստիկանության մեծաքանակ ուժերի միջամտության արդյունքում՝ ժամը 11:20-ին՝ Ա.Ս.-ին ոստիկանության Արաբկիրի բաժին բերման ենթարկելուց հետո: Հսկող դատախազի որոշմամբ 2022 թվականի դեկտեմբերի 12-ին Գ.Բ.-ի և Ա.Ս.-ի նկատմամբ հարուցվել էր հանրային քրեական հետապնդում (համապատասխանաբար՝ Քրեական օրենսգրքի 297-րդ հոդվածի 2-րդ մասի 1-ին կետով՝ խուլիգանություն՝ մի խումբ անձանց կողմից և Քրեական օրենսգրքի 195-րդ հոդվածի 1-ին մասով և 297-րդ հոդվածի 2-րդ մասի 1-ին կետով՝ խուլիգանություն՝ մի խումբ անձանց կողմից՝ հարվածներ հասցնելով կամ բռնի այլ գործողություններ կատարելով): Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

«Հայաստանի էլեկտրական ցանցեր» փակ բաժնետիրական ընկերությունը տեղեկացնում է, որ հունվարի 11-ին պլանային նորոգման աշխատանքներ իրականացնելու նպատակով ժամանակավորապես կդադարեցվի հետևյալ հասցեների էլեկտրամատակարարումը` Երևան քաղաք՝ 10:00-16:00 Պուշկինի փ. 58-72 շենքեր, Սարյան փ. 7-17 շենքերի բնակիչ-բաժանորդներ և հարակից ոչ բնակիչ-բաժանորդներ, Ֆանարջյան փ. 1-91/3 առանձնատներ, Արարատի մարզի՝ 10:00-14:00 Վեդի քաղաք` Արարատյան փողոց մասնակի, Արարատ քաղաք` Աբովյան և Գրիբոյեդովի փողոցներ մասնակի, 11:00-16:00 Ոստան գյուղ մասնակի, Վայոց Ձորի մարզի՝ 11:00-15:00 Եղեգնաձոր քաղաք՝ Նորավան թաղամաս մասնակի, Համբարձումյան և Պռոշյան փողոցներ մասնակի, Գեղարքունիքի մարզի՝ 11։00–14:00 Մարտունի համայնք մասնակի և հարակից ոչ բնակիչ-բաժանորդներ, 11:30-13:30 Լուսակունք, Խաչաղբյուր, Գեղաքար, Տորֆավան,Վանեվան գյուղեր և հարակից ոչ բնակիչ-բաժանորդներ, «Անուշ Քնար», «Կապավոր», «Գոգա և Սեդա Հարությունյաններ», «ՀԱԳԱ» ՍՊԸ-ներ, Զին մասը, «Վիվա-ՄՏՍ», «Յուքոմ» ընկերությունների բջջային կայաններ, Գանձակ և Ծաղկաշեն գյուղեր, Հացառատ գյուղի Սարուխանից սնվող հատված, «Վիվա-ՄՏՍ», «Յուքոմ», «Տելեկոմ Արմենիա» ընկերությունների բջջային կայաններ և հարակից ոչ բնակիչ-բաժանորդներ, Լոռու մարզի՝ 10:00-13:00 Սպիտակ քաղաք՝ Մյասնիկյան, Թորոսյան, Շիրակի, Ս.Ավետիսյան փողոցներ, Այգեստան 1-ին նրբանցք և թիվ 1 դպրոց, 12։00-17:00 Կաթնառատ գյուղ, Կաթնաղբյուր, Ուրասար և Արմանիս գյուղեր, Տավուշի մարզի՝ 11:00-13:00 Գոշ և Ներքին Գոշ գյուղեր, Սյունիքի մարզի՝ 10:30-11:00 Վերինշեն գյուղ: Սպառած էլեկտրաէներգիայի, անջատումների, Ձեր իրավունքներին կամ պարտականություններին վերաբերող, ինչպես նաև այլ հարցերի առնչությամբ կարող եք զանգահարել 1-80 և 0 8000 0 180 շուրջօրյա գործող հեռախոսահամարներով: «Հայաստանի էլեկտրական ցանցեր» ընկերությունը հորդորում է հետևել էլեկտրաանվտանգության կանոններին:

ՄԱԿ-ի Անվտանգության խորհրդի խաղաղապահների առաքելության տեղակայումը Ղարաբաղում հնարավոր է միայն հակամարտության երկու կողմերի համաձայնությամբ։ Այս մասին լրագրողներին ասել է ՌԴ նախագահի մամուլի խոսնակ Դմիտրի Պեսկովը՝ մեկնաբանելով Հայաստանի վարչապետ Նիկոլ Փաշինյանի հայտարարությունները՝ ԼՂ-ում միջազգային խաղաղապահ զորակազմ տեղակայելու հնարավորության մասին։ «Տարբեր մակարդակներում անընդհատ շփումներ են ընթանում։ Անշուշտ, այս թեման բազմիցս եղել է օրակարգում։ Սակայն հասկանալի է, որ ցանկացած առաքելություն կարող է ուղարկվել (Լեռնային Ղարաբաղ – խմբ․ )միայն հակամարտության երկու կողմերի համաձայնությամբ», - ասել Է Պեսկովը։ Փաշինյանը հունվարի 10-ին կայացած մամուլի ասուլիսում հայտարարել է, որ Լեռնային Ղարաբաղում ռուս խաղաղապահների մանդատի ժամկետի լրանալուն կարող է հաջորդել ՄԱԿ-ի Անվտանգության խորհրդին ուղղված՝ միջազգային խաղաղապահ զորակազմ ուղարկելու մասին հարցումը:

Ստամբուլի «Ակոս» հայկական թերթի հիմնադիր-խմբագրապետ Հրանտ Դինքի սպանության 16-րդ տարելիցի (հունվարի 19) կապակցությամբ հիշատակի միջոցառումներ կկազմակերպվեն: Այս մասին հայտնում է «Ակոս»-ը, փոխանցում է Էրմենիհաբերը: Այդ միջոցառումների շրջանակներում հունվարի 11-ին Ստամբուլի Քադըքյոյ շրջանում կցուցադրվի գրող և ռեժիսոր Ումիթ Քըվանչի «Հիշողությունը քիչ է. ֆիլմ Հրանտ Դինքի համար» կինոֆիլմը: Ցուցադրումից նախատեսված է, որ տեղի կունենա քննարկում ռեժիսորի մասնակցությամբ։ Հիշեցնենք, որ Հրանտ Դինքը սպանվել է 2007թ. հունվարի 19-ին Ստամբուլում՝ «Ակօս» թերթի խմբագրատան դիմաց: Թուրքիայում նա մշտապես բացահայտ խոսել է 1915-ի հայոց ցեղասպանության մասին։ Մշտապես հանդես է եկել հայ և թուրք ժողովուրդների երկխոսության կոչերով՝ նշելով, որ դա կհանգեցնի երկու երկրների միջև հարաբերությունների կարգավորմանը: Սպանությունից առաջ Հրանտ Դինքը դատապարտվել էր Թուրքիայի ՔՕ 301 հոդվածով, որը պատիժ է սահմանում «թուրք ազգին վիրավորելու համար»: Նրա սպանությունից հետո Թուրքիայի ողջ տարածքում տեղի են ունեցել բազմահազարանոց ցույցեր: Սպանությունը դատապարտել էին նաև օտարերկրյա պետությունների ղեկավարները և միջազգային հանրությունը։

«Ժողովուրդ» օրաթերթը գրում է. Վարչապետ Նիկոլ Փաշինյանը վերջերս՝ 2022-ի տարեմուտին ու 2023-ը մեկնարկելուն պես տարբեր նախարարություններ է այցելում, ինչի ժամանակ ոլորտի պատասխանատուներն ամփոփում են կատարած աշխատանքը: «Ժողովուրդ» օրաթերթը տեղեկացավ, որ, Փաշինյանի այցին ընդառաջ, նախարարություններում անգամ օդն է կանգ առնում: Բանն այն է, որ Նիկոլ Փաշինյանի անվտանգությունն ապահովելու համար պատկան մարմիները նախարարություններում ստուգումների համալիր գորոծողություններ են իրականացնում: Ամեն ինչ մանրակրկտորեն է իրականացվում, կառավարական շենքեր անգամ վարժեցված շներ են տանում՝ պայթուցիկ նյութեր որոնելու համար: Շներով, սակայն, չեն բավարարվում, ու գործի են դնում նաեւ մետաղաորսիչ հատուկ սարքեր: «Ժողովուրդ» օաթերթին հայտնի դարձավ նաեւ, որ Փաշինյանի՝ նախարարություններ այցերի օրերին կառավարական շենքերի հարակից շենք-շինությունների տանիքներին դիպուկահարներ էլ են նկատել: Փաստորեն, Փաշինյանի՝ «իքս» նախարարություն այցը ոչ միայն տվյալ նախարարության, այլ այդ շենքում տեղակայված մի քանի նախարարությունների աշխատանքն է կաթվածահար անում, քանի որ ուժային կառույցները մի ամբողջ օրը լարված մթոնոլորտ են ստեղծում, ինչ-որ բաներ սկսում փնտրել, որսալ, խոչընդոտում գերատեսչությունների բնականոն աշխատանքը: Կառավարության թիվ մեկ շենքից, ենթադրենք, կառավարության երրորդ մասնաշենք հասնելու համար, որոնց հեռավորությունն ընդամենը մի քանի մետր է, Փաշինյանն ուժայիններին ոտքի է հանում, նախարարության աշխատակիցների համար լարվածության մթնոլորտ ստեղծում, ինչ է թե ցույց տա, որ ինքն անարգել ուր ասես, կարող է գնալ: Անգամ շատ աշխատակիցների սենյակներում անծանոթ ուժայիններ են գնում, նստում, մինչեւ վարչապետի կարճատեւ հանդիպումն ավարտվի: Հ.Գ. Երեկ զգուշավոր իրավիճակ էր տիրում նաեւ Նիկոլ Փաշինյանի ասուլիսի ժամանակ: Որոշում էր կայացվել լրագրողներին մեկ տեղում հավաքել եւ բոլորին միանգամից ուղեկցել ասուլիսի վայր, մինչ այդ էլ կառավարության անցակետում բոլոր լրագրողներից վերցրել էին անձը հաստատող փաստաթղթերը, որոնք վերադարձվեցին միայն ասուլիսի ավարտից եւ շենքից դուրս գալուց հետո: Սա արարք է, որն արգելված է «ՀՀ քաղաքացու անձնագրի մասին» օրենքի 8-րդ հոդվածի 5-րդ կետով. «Արգելվում է անձնագիրը վերցնելը»:

Պաշտպանության հանձնաժողովում ընդդիմադիրների ու ՔՊ-ականների լեզվակռիվը շարունակվել է: Պատգամավոր Աննա Գրիգորյանի ելույթը փորձել է ընդհատել Անդրանիկ Քոչարյանը և կոշտ նկատողություն արել, ինչին պատասխանել է պատգամավորը:

Դերասանուհի Մարջան Ավետիսյանը մեղադրում է իր փաստաբան Մասիս Մելքոնյանին, որ վերջինս յուրացրել է իրեն պատկանող գումարները և հրաժարվում է վերադարձնել։ Tert.am-ի հետ զրույցում դերասանուհու փաստաբան Մարինա Պողոսյանը մանրամասներ է ներկայացրել տեղի ունեցածից։ «Դեռևս 2021թ-ին, երբ Մարջան Ավետիսյանը գտնվում էր Հայաստանում, հաղորդում էր ներկայացրել հանցագործության մասին, որ ոմն Արմեն Գևորգյան խարդախությամբ տիրացել էր իր գումարներին։ Այն ժամանակ, երբ Մարջան Ավետիսյանը պետք է գնար Հայաստանից, այդ տղան կապի է դուրս եկել նրա հետ և ասել, որ ցանկանում է գումարը մաս-մաս վերադարձնել և Մարջանը որոշում է դիմել որևէ իրավաբանի իր շահերը այդ հարցում պաշտպանելու համար։ Մարջանի մտերիմնեից մեկը նրան ծանոթացնում է փաստաբան Մասիս Մելքոնյանի հետ»,- ասաց Մարինա Պողոսյանը՝ ընդգծելով, որ Մարջան Ավետիսյանի և Մասիս Մելքոնյանի միջև որևէ փաստաթուղթ չի ստորագրվել։ Ըստ Պողոսյանի՝ Մարջան Ավետիսյանն ընդամենը մի թղթի վրա դիմում է գրել առ այն, որ ցանիանում է, որպեսզի Մասիս Մելքոնյանը ներկայացնի իր շահերը, դա ոչ լիազորագիր է եղել, ոչ պայմանագիր։ «Սովորաբար, ըստ կարգի, եթե տուժողը ցանկանում է, որ քրեական գործի շրջանակներում որևէ մեկը լինի իր ներկայացուցիչը , գնում է քննչական բաժին և քննիչի մոտ համապատասխան գրություն է թողնում։ Այդ դիմումից հետո Մասիս Մելքոնյանը Արմեն Գևորգյանից ստացել է մեղադրյալի՝ Մարջան Ավետիսյանի գումարի մի մասը, պահել իրեն և առ այսօր չի վերադարձրել։ Երբ Մարջան Ավետիսյանը վերադարձել է Հայաստան, մոտ երկու ամիս շարունակ փորձել է կապի դուրս գալ Մասիս Մելքոնյանի հետ, նրանից խնդրել է մեղադրյալ Արմեն Գևորգյանի կոնտակտները, որպեսզի հասկանա՝ ինչքան գումար է տվել, ինչքանն է պարտք մնացել և խնդրել է նաև այն գումարը, որը մեղադրյալը փոխանցել է փաստաբանին։ Սակայն, Մասիս Մելքոնյանը շատ կոպիտ պատասխան է տվել և ասել, որ չի պատրասվում այդ գումարը վերադարձնել Մարջան Ավետիսյանին։ Եթե Մասիս Մելքոնյանը որոշել է, որ դա իր ծառայությունների գումարն է, ապա ծառայութունների գումարի փոխանցման համար մարդիկ պայմանագիր են կնքում, դա նաև որոշակի հարկային պարտավորություն է ենթադրում։ Հիմա ինչո՞վ է Մասիս Մելքոնյանը տարբերվում մեղադրյալ Արմեն Գևորգյանից»,- ասաց Մարինա Պողոսյանը։ Վերջինս հավելեց, որ որ Մարջան Ավետիսյանը պատրաստվում է առաջիկայում հրապարակայնորեն խոսել սրա մասին և մանրամասներ հայտնել։ Tert.am-ը փորձեց մեկնաբանություն ստանալ նաև Մասիս Մելքոնյանից, սակայն վերջինս հրաժարվեց։

Հանդիպում է կայացել Ռուսաստանում և Ուկրաինայում մարդու իրավունքների հարցերով հանձնակատարներ Տատյանա Մոսկալկովան և Դմիտրի Լուբինեցի միջև։ «Արմենպրես»-ի փոխանցմամբ՝ այս մասին Մոսկալկովան հայտնել է իր Telegram-ալիքում։ «Այսօր տեղի է ունեցել նախապես ծրագրված հանդիպում Ուկրաինայի օմբուդսմեն Դ. Լուբինեցի հետ։ Քննարկել ենք երկու երկրների քաղաքացիներին մարդասիրական օգնություն տրամադրելու հարցեր», - գրել է նա։ ТАСС գործակալությունը նշում է, որ Մոսկալկովայի և Լուբինեցի հանդիպումը պետք է տեղի ունենար Անկարայում, որտեղ Մոսկալկովան պետք է մասնակցեր «Մարդու իրավունքների ապագան 21-րդ դարում» ֆորումին։ Թե որտեղ է անցկացվել այս հանդիպում՝ տեղեկություն չի փոխանցվում: Հունվարի սկզբին Լուբինեցը հայտնել էր, որ մտադիր է Մոսկալկովայի հետ քննարկել այն քաղաքացիական անձանց փոխանակման հարցը, որոնց նկատմամբ քրեական հետապնդում է իրականացվել։ Մոսկալկովան իր հերթին անցյալ տարվա դեկտեմբերին հայտնել էր, որ Ռուսաստանի Դաշնությունն ու Ուկրաինան բանակցում են քրեական գործով անցնող քաղաքացիական անձանց փոխանակման հնարավորության շուրջ։

ԵԱՀԿ գործող նախագահ, Հյուսիսային Մակեդոնիայի արտգործնախարար Բույար Օսմանին նախատեսում է այցելել Երևան և Բաքու: Եվրապաշտոնյան հեռախոսով զրուցել է Հայաստանի ու Ադրբեջանի արտգործնախարարների հետ։ Հյուսիսային Մակեդոնիայի արտաքին քաղաքական գերատեսչությունը թվիթերում գրել է, որ պաշտոնյան մտահոգություն է հայտնել Լաչինի միջանցքում ստեղծված իրավիճակի վերաբերյալ։

Շվեյցարիայի Համադաշնության Դաշնային ժողովի Կանտոնների խորհրդի (Վերին պալատ, Սենատ) Արտաքին հարաբերությունների հանձնաժողովը, մտահոգված լինելով հումանիտար իրավիճակով և միջազգային իրավունքի խախտումներով, որոշել է նամակ հղել Դաշնային խորհրդին (Շվեյցարիայի կառավարությանը)՝ տեղեկացնելով, որ դատապարտում է միջազգային իրավունքի խախտումները, որոնց հանգեցրել է 2022 թվականի դեկտեմբերի 12-ից ի վեր Լաչինի միջանցքի շրջափակումը։ «Արմենպրես»-ի փոխանցմամբ՝ հանձնաժողովը խնդրում է Կառավարությանը Միավորված ազգերի կազմակերպության Անվտանգության խորհրդում գործողություններ ձեռնարկել՝ մի կողմից հասնելու համար շրջափակման վերացմանն ու ռազմական գործողությունների դադարեցմանը, իսկ մյուս կողմից՝ Երևանի և Ստեփանակերտի միջև օդային մարդասիրական կամուրջի կազմակերպմանը:

ՀՀ նախկին վարչապետ Վազգեն Մանուկյանն իր ֆեյսբուքյան էջում գրել է. «Անկախ-ի խնդրանքով մեկնաբանելով Նիկոլ Փաշինյանի երեկվա մամուլի ասուլիսը՝ Վազգեն Մանուկյանն արձագանքել է. «Խղճուկ մարդ, ո՛չ գիտելիքներ, ո՛չ տրամաբանություն, ո՛չ խիղճ: Խեղճ պետություն, խեղճ ժողովուրդ․․․»։

ՀՀ արտաքին գործերի նախկին նախարար Զոհրաբ Մնացականյանը անդրադարձել է արդեն 30 օր Լաչինի միջանցքի շրջափակմանը: «Ադրբեջանի կառավարության վստահված անձինք, որոնք Ադրբեջանի նախագահի անունից շուրջ մեկ ամիս պաշարել են Արցախն ու սրել հումանիտար ճգնաժամը, արթնացնում են հիշողություններ, օրինակ, թե ինչպես էին Ջանջավիդների ցեղերը դաժանորեն գործում Դարֆուրում ալ-Բաշիրի անունից: ՄԱԿ-ի համար սա պետք է ձախողված պաշտպանության մասին հիշողություններ արթնացնի», - «Թվիթեր»-ում գրել է Մնացականյանը։