Լիբանանի վարչապետը «Հեզբոլլահ»-ին կոչ է արել համագործակցել իշխանությունների հետ

Լիբանանի վարչապետ Նավաֆ Սալամը շիական «Հեզբոլլահ» կազմակերպությանը կոչ է արել համագործակցել իշխանությունների հետ՝ երկիրը փրկելու և հարավային շրջաններից իսրայելական զորքերի դուրսբերմանը հասնելու նպատակով։

««Հեզբոլլահ»-ը պետք է աջակցի խաղաղ բանակցություններին, որոնք մենք վարում ենք [Իսրայելի հետ] Վաշինգտոնում, և Լիբանանի շահերը դնի առաջին տեղում՝ Իրանի շահերից վեր», - ընդգծել է քաղաքական գործիչը, որի հայտարարությունը մեջբերում է կառավարության մամուլի ծառայությունը։

Ինչպես նշել է Սալամը, ինքը միայն կողջունի, եթե ԱՄՆ-ի և Իրանի միջև, որը հովանավորում է «Հեզբոլլահ»-ին, պայմանավորվածություն ձեռք բերվի Լիբանանի հարավում ռազմական գործողությունները դադարեցնելու վերաբերյալ։ Սակայն, նրա խոսքով, Լիբանանի անունից բանակցություններ վարելու լիազորություն ունի միայն հանրապետության կառավարությունը։

«Ինչ վերաբերում է «Հեզբոլլահ»-ին, ապա այն պետք է հրաժարվի զենքից և դառնա սովորական քաղաքական կուսակցություն,- հայտարարել է վարչապետը։- Մենք նրանից ոչինչ ավելին չենք պահանջում, քան իշխանությունների ընդունած որոշմանը հետևելը»։

Մարտի 2-ին Լիբանանի կառավարությունը երկրի ողջ տարածքում արգելք է սահմանել «Հեզբոլլահ»-ի զինված գործունեության վրա։ Հանրապետության վարչապետը շիական կազմակերպությունից պահանջել է զենքը հանձնել լիբանանյան բանակին և սահմանափակվել քաղաքական ոլորտում իր գործունեությամբ՝ սահմանադրական նորմերի շրջանակներում։ Իշխանությունները նման քայլի են դիմել «Հեզբոլլահ»-ի գրոհայինների կողմից Իսրայելի հյուսիսային շրջանների հրետակոծությունից հետո, ինչը ռազմական էսկալացիայի պատճառ էր դարձել։