Իտալիան առաջարկում է Ֆինլանդիայի նախագահի թեկնածությունը՝ որպես ռուս-ուկրաինական բանակցություններում ԵՄ ներկայացուցիչ

Իտալիայի վարչապետ Ջորջիա Մելոնին մտադիր է Եվրամիության և «Յոթնյակի» (G7) առաջիկա գագաթնաժողովներում բարձրացնել ռուս-ուկրաինական կարգավորման շուրջ հնարավոր բանակցություններում միասնական եվրոպական ներկայացուցիչ ունենալու հարցը։ Ինչպես գրում է Corriere della Sera թերթը, Հռոմը որպես թեկնածու կարող է առաջարկել Ֆինլանդիայի նախագահ Ալեքսանդր Ստուբին։

Թերթը նշում է, որ Մելոնին չի թաքցնում իր դժգոհությունը Ուկրաինայի հարցով եվրոպական միջնորդի ընտրության ձգձգումների վերաբերյալ, և դա մասամբ ուղղված է Ֆրանսիայի նախագահ Էմանյուել Մակրոնի դեմ. իտալացի վարչապետին դուր չի գալիս առանձին մայրաքաղաքների, այդ թվում՝ Փարիզի «առաջատար դեր խաղալու ձգտումը»։ Բացի այդ, նա կարծում է, որ Եվրոպային խաղաղ գործընթացում չպետք է ներկայացնի խոշոր երկրներից մեկը, քանի որ դա կարող է առաջացնել այլ երկրների անհարկի մրցակցություն և «խանդ», ինչը չի նպաստում եվրոպական միասնությանը։ Ըստ թերթի՝ Մելոնին նաև կարծում է, որ Եվրոպան ներկայացնող երկիրը պետք է լինի բավականաչափ հեղինակավոր, նրա ղեկավարը պետք է լավ տեղեկացված լինի, ինչպես նաև ներկայացնի ԵՄ-ին չանդամակցող այնպիսի երկրներ, ինչպիսիք են Մեծ Բրիտանիան և Նորվեգիան, որոնք ակտիվորեն աջակցում են Կիևին։ Այս տեսանկյունից ֆինն նախագահը համարվում է հարմար թեկնածու, որն ի թիվս այլնի՝ լավ հարաբերություններ ունի ԱՄՆ նախագահ Դոնալդ Թրամփի հետ։

Ինչպես գրում է Corriere della Sera-ն, թեկնածուների թվում դիտարկվում է նաև Եվրոպական խորհրդի նախագահ, պորտուգալացի Անտոնիու Կոշտան։

Ավելի վաղ Իտալիայի վարչապետ Ջորջիա Մելոնին, ելույթ ունենալով խորհրդարանում, ընդգծել էր ռուս-ուկրաինական կարգավորման բանակցություններում Եվրոպայից միասնական ներկայացուցիչ նշանակելու անհրաժեշտությունը, սակայն անուններ չէր նշել։ Միաժամանակ նա քննադատաբար էր արտահայտվել «առանձին ձևաչափերի» մասին, որոնք բավարար չափով ներկայացուցչական չեն՝ ակնարկելով Լոնդոնում Մակրոնի, Մեծ Բրիտանիայի վարչապետ Քիր Սթարմերի և ԳԴՀ կանցլեր Ֆրիդրիխ Մերցի վերջին հանդիպումը։

ՌԴ նախագահ Վլադիմիր Պուտինն ավելի վաղ հայտարարել էր, որ ԵՄ-ի և Ռուսաստանի միջև հնարավոր բանակցությունների համար նախընտրելի է ԳԴՀ նախկին կանցլեր Գերհարդ Շրյոդերի թեկնածությունը։ Դրա դեմ հանդես են եկել ինչպես Բրյուսելը, այնպես էլ Բեռլինը։