Ինչպես է բնությունը բուժում մարդու մարմինն ու հոգին, լավացնում նրա կյանքի որակը

Գիտական հետազոտությունների համաձայն՝ մարդուն շրջապատող միջավայրը կարող է ուժեղացնել կամ նվազեցնել սթրեսը , ինչպես նաև դրա բացասական ազդեցությունը մարդու օրգանիզմի վրա։ Այն, ինչ տեսնում, լսում կամ զգում է մարդը, փոխում է ոչ միայն նրա տրամադրությունը, այլև նյարդային, էնդոկրին և իմունային համակարգերի աշխատանքն ու ռիթմը։ Տհաճ միջավայրից առաջացած սթրեսը անհանգստության, տխրության, անօգնականության զգացումներ է արթնացնում, ինչն էլ իր հերթին հանգեցնում է արյան բարձր ճնշման, սրտի աշխատանքի խախտումների, մկանների լարվածության առաջացման, դա էլ բացասաբար է անդրադառնում իմունային համակարգի վրա։ Մարդուն հաճելի միջավայրում այս ամենը տեղ չունի։ Այդ պատճառով էլ, անկախ տարիքից, սեռից, ազգային պատկանելությունից, բոլոր մարդիկ բնության գրկում իրենց լավ են զգում և հաճույք են ստանում բնությունից, գրել է Aysor.am-ը։

Գիտական հետազոտություններից մեկի համաձայն, մարդկանց երկու երրորդը սթրեսից ձերբազատվելու համար առանձնանում է բնության գրկում։ Լռությունն ու անդորրը, բնության գեղեցիկ տեսարանները հանգստացնում են մարդու նյարդերը, կենսական էներգիայով են վերալիցքավորում նրան։

Գիտականորեն ապացուցված է, որ ոչ միայն բնության գրկում գտնվելը, այլև բնության տեսարանները վիրտուալ եղանակով դիտելը նվազեցնում է զայրույթը, վախի, տագնապի զգացողությունը, սթրեսը։ Իսկ բնության գրկում անցկացրած ժամանակը բարելավում է մարդու հուզական վիճակը, բարենպաստ է անդրադառնում նաև ֆիզիկական առողջության վրա՝ նվազեցնելով սթրեսի հորմոնների արտադրությունը։

Հիվանդանոցներում, հիմնարկներում ու դպրոցներում արված հետազոտությունները ցույց են տվել, որ սենյակում դրված ամենապարզ բույսն անգամ բարենպաստ ազդեցություն է թողնում մարդու նյարդային համակարգի վրա։

Բացի այդ, բնությունն օգնում է ավելի հեշտ հաղթահարել ցավի զգացողությունը։ Մարդը, կլանվելով բնության գեղեցիկ տեսարաններով, շեղվում է ցավից և դիսկոմֆորտի զգացողությունից։ Լեղապարկի վիրահատության ենթարկված մի խումբ հիվանդների շրջանում բժիշկները գիտափորձ են անցկացրել․ նրանց մի մասին տեղափոխել են հիվանդասենյակներ, որոնց պատուհաններից երևացել են ծառեր, իսկ մյուս մասի հիվանդասենյակների պատուհաններից միայն հարևան շենքի պատն է երևացել։ Ծառերի տեսարանով հիվանդասենյակներում գտնվող պացիենտներն ավելի հեշտ են հաղթահարել ցավը, հիվանդության հետևանքներն ավելի քիչ են եղել, նրանք ավելի արագ են ապաքինվել ու ավելի շուտ են դուրս գրվել հիվանդանոցից։ Նմանատիպ մեկ այլ հետազոտություն է անցկացվել՝ հիվանդների սենյակների պատերին բնության պատկերներ փակցնելու միջոցով։ Արդյունքները համանման են եղել։

Ժամանակակից գիտնականները, ուսումնասիրելով բնության ազդեցությունը մարդու ինքնազգացողության վրա, մի հետազոտության շրջանակում հարցում են անցկացրել, որին մասնակցած անձանց 95 տոկոսը հաստատել է, որ անկումային տրամադրությունից ձերբազատվել է՝ դրսում, թարմ օդին գտնվելու շնորհիվ։ Բնության գրկում ժամանակ անցկացրածները նշել են, որ իրենց հաջողվել է վերականգնել հանգստությունը, հավասարակշռվածությունը։ Բնությունն օգնել է նաև ոգեշնչվել․ շատերը փաստել են, որ իրենց մտքում նոր գաղափարներ են ծագել, իրեք նոր էներգիայով ու եռանդով են լցվել։

Հետազոտություններից մեկի ժամանակ էլ հատուկ սարքավորման միջոցով չափել են մարդու ուղեղի ակտիվությունը։ Երբ գիտափորձի մասնակիցներին ցուցադրել են բնության տեսարաններով պատկերներ, ակտիվացել են նրանց գլխուղեղի այն հատվածները, որոնք պատասխանատու են կարեկցանքի, սիրո համար։ Երբ նրանց ցուցադրել են տեսարաններ քաղաքային կյանքից, ակտիվացել են գլխուղեղի այն հատվածները, որոնք պատասխանատու են վախի, տագնապի առաջացման համար։

Ժամանակակից մարդն այսօր ավելի ու ավելի քիչ ժամանակ է ունենում՝ բնության գրկում լինելու համար։ Մարդու կենսագործունեությունն ավելի ու ավելի շատ է կախման մեջ ընկնում ժամանակակից նորագույն տեխնոլոգիաներից, մարդու և բնության միջև կապը խզվում է, ինչն իր բացասական ազդեցությունն է թողնում մեր ֆիզիկական ու հոգեկան առողջության վրա։ Ինչպես բժիշկները, այնպես էլ հոգեբանները, խորհուրդ են տալիս մի փոքր ավելի շատ մտորել այս խնդրի շուրջ և գիտակցել դրա լրջությունը։ Այդ դեպքում նույնիսկ հոգսաշատ առօրյայում յուրաքանչյուրը հնարավորություն կգտնի հանգստի մի քանի ժամը կամ օրը անպայման բնության գրկում անցկացնելու համար։