Արցախում ողբերգական վթարից մահացած չորս կանանցից 2-ը քույրեր էին. նոր մանրամասներ

Ստեփանակերտ-Ասկերան ավտոճանապարհին այսօր՝ օգոստոսի 12-ին, տեղի ուենցած ողբերգական վթարի հետևանքով մահացած 4 կանանցից 2-ը հարազատ քույրեր էին: Այս մասին «News.am»-ի հետ զրույցում ասաց Ասկերանի շրջանի Այգեստան գյուղի բնակիչներից մեկը, որի համագյուղացին են մահացած կանայք: Բնակչի խոսքով՝ ողբերգական դեպքը տեղի է ունեցել աշխատանքի գնալու ժամանակ: 

«Քույրերը Հադրութից էին տեղահանվել և երկու տարի է՝ Այգեստանում էին ապրում։ Վարորդի վիճակը ծանր է, նա մահացած կանանցից  մեկի որդին է»,- ասաց նա:

Ավելի վաղ հայտնել էինք, որ օգոստոսի 12-ին առավոտյան ժամը 08:45-ի սահմաններում Մելիքավան փողոցի 19/1 տան դիմացի խաչմերուկում իրար են բախվել  ՌԴ խաղաղապահ զորախմբի վարորդ Ի.Յ.-ի (ծնված 1992թ.) վարած «HAVAL H9» և Ասկերանի շրջանի Սարուշեն համայնքի բնակիչ Է.Գ.-ի (ծնված 1996թ.) վարած «ՎԱԶ- 2107»  մակնիշի ավտոմեքենաները։

Վթարի հետևանքով «ՎԱԶ- 2107»-ի վարորդը  կոտրվածքներով և աջ թոքի ստորին բլթի սալջարդ ախտորոշմամբ տեղափոխվել է «Հանրապետական բժշկական կենտրոն»։

Վերջինիս ուղևորները՝ Հ. Գ.-ն (ծնված 1971թ., Ասկերանի շրջան գ. Սարուշեն), Ն.Դ.-ն (ծնված 1970թ., Ասկերանի շրջան  գ. Այգեստան), Լ. Մ-ն (ծնված 1972թ., Ասկերանի շրջան գ. Այգեստան) և Ս. Ս.-ն (ծնված 1966թ., Ասկերանի շրջան  գ. Այգեստան) տեղում մահացել են: